Mbu te̱, o be̱n lokoli na lokoli la soa la mińangadu. Soa la mińangadu lō̱ lo titi bonde̱ne̱, nde ke̱ lope̱pe̱ lo mawana mbeu a ńolo inde̱ne̱, take na kwedi. Ponda iwo̱, nik’e mawana bewungusu ba ngo̱ bena be mawane̱ dibumbe dinde̱ne̱, na kwed’a bato jita. Mo̱ Bibe̱l e bīse̱ di soa la muńangadu e?

O mun mulopo m’ekwali

•  Mo̱ Bibe̱l e bīse̱ soa la mińangadu e?

•  Mo̱ soa la mińangadu di me̱ne̱no̱ we̱nge̱ di malonde̱ bedinge̱ ba Bibe̱l e?

•  Nje mambo mena Bibe̱l e bīse̱no̱ jombwea soa la mińangadu ma mapulano̱ kwala ońol’asu e?

•  Mo̱nge̱le̱ ma si te̱nge̱n jombwea bedinge̱ ba Bibe̱l na soa la mińangadu

 Yesu a kwaledi soa la mińangadu o edinge̱ ewo̱ e maso̱be̱ o Bibe̱l. Je ná di langa nje a kwaledino̱ jombwea nika o yin kalat’a Bibe̱l ilalo i mabupe̱:

 “Ebanja tumba di me̱nde̱ te̱me̱ te̱nge̱ne̱ tumba, janea pe̱ te̱nge̱ne̱ janea, njai ninde̱ne̱ na soa la mińangadu ba me̱nde̱ be wuma na wuma.”—Mateo 24:7.

 “Ebanja tumba di me̱nde̱ te̱me̱ te̱nge̱ne̱ tumba, janea pe̱ te̱nge̱ne̱ janea, soa la mińangadu di me̱nde̱ be̱ wuma na wuma, njai ninde̱ne̱ e me̱nde̱ be̱.”—Marko 13:8.

 “Soa la mińangadu dinde̱ne̱ di me̱nde̱ be̱, njai na diboa la bobe pe̱ wuma na wuma.”—Lukas 21:11.

 Yesu a bīse̱ so̱ ná soa la mińangadu di me̱nde̱ be̱ o “wuma na wuma” ponda mambo mape̱pe̱ ka bila, njai na maboa pe̱ ma me̱nde̱no̱ be̱. Ma mambo me̱se̱ ma malee̱ nde ná je nde o ponda ni belabe̱ ná “su la wase,” to̱ “mińa misukan.” (Mateo 24:3; 2 Timoteo 3:1) Bupisane̱ muso̱ngi me o Bibe̱l, “mińa misukan” mi botedi nde o 1914, mi si bedi pe̱ to̱ bo̱.

 E. Eding’a Yesu, mwemba na nje a kwalino̱ jombwea soa la mińangadu, be mulatako na nje e mabolane̱ we̱nge̱. Botea 1914, di máje̱ne̱ lambo ka 1950 la soa la mińangadu dinde̱ne̱, di bo pe̱ buka lodun la bato loba. a Jombweye byembilan bō̱ ba nin pond’asu.

 2004—Munja ma India. Soa la mińangadu la magnitude 9.1 di wan ewungus’a ngo̱ yena e ńamse̱ lambo ka dom la bekombo na betanu, nde e bwa pe̱ lambo ka 225 000 la bato.

 2008—Kina. Soa la mińangadu la magnitude 7.9 di bumbise̱ mindi misadi na minde̱ne̱, e me̱ne̱ne̱ pe̱ ná di bo lambo ka 90 000 la bato, di sengise̱ pe̱ 375 000 la bato bape̱pe̱, na ńamse̱ pe̱ milongi ma lodun la bato.

 2010—Haiti. Soa la mińangadu la magnitude 7.0 mwemba na jita la soa la mińangadu disadi dipe̱pe̱ di bo buka 300 000 la bato, di ńamse̱ pe̱ milongi ma lodun la bato.

 2011—Yapan. Soa la mińangadu la magnitude 9.0 na ewungus’a ngo̱ nik’e wanno̱, di bo lambo ka 18 500 la bato, nik’e bola pe̱ ná bebwea ba lokoli la bato basumwe̱ o mundi mabu. Epolo ba tano̱ ba bele̱ ná Fukushima, yena e ta nde epolo ba tano̱ ba kombe̱ ko̱s’a mabumbe inde̱ne̱, e ńam, na nika e wana dibumbe dinde̱ne̱. Dom la mbu ombusa nika, lambo ka 40 000 la bato ba si wusa te̱ nde timba o milongi mabu mena mi ta be̱be̱ na y’epol’a ko̱s’a mabumbe yena e ńam, ońola ngiń’a miso̱nji ma bobe yi ko̱s’a mabumbe i camane̱no̱ o ngo̱.

 Bedinge̱ ba Bibe̱l jombwea soa la mińangadu be malee̱ biso̱ nje e male̱ tombe̱ son a ponda. Yesu mo̱ ná: “Bińo̱ pe̱ le̱n te̱ ná man ma nibolane̱, bia ná janea la Loba je be̱be̱.”—Lukas 21:31.

 Bibe̱l e mateleye̱ ná Janea la Loba le nde janea la mbale̱ le o mo̱ń lena di be̱n Yesu Kristo ka Kiṅe̱. Jombwea di Janea nde Yesu a kwalane̱no̱ bokwedi bao ná ba kane̱.—Mateo 6:10.

 Ponda Janea la Loba di me̱nde̱no̱ janea wase ńe̱se̱, Loba a me̱nde̱ bola ná mbeu a ńolo ka soa la mińangadu i si takise̱ pe̱ bato. (Yesaya 32:18) A me̱nde̱ pe̱ bo̱lise̱ sese ye̱se̱ soa la mińangadu di sengise̱no̱ bato, e be̱ o eyobo to̱ o mo̱nge̱le̱. (Yesaya 65:17; Bebīsedi 21:3, 4) Ná o bate jokwa mambo mape̱pe̱, langa mulopo m’ekwali “Que fera le royaume de Dieu ?”