Botea mun mbu, di me̱nde̱ be̱ne̱ ponda jita o boṅsane̱ ońola Jo̱nge̱le̱ la kwed’a Kristo. Jo̱nge̱le̱ la kwed’a Yesu di kwedi te̱ oteten a woki, ndongame̱n a Longe̱ la kriste̱n n’ebola dikalo e si me̱nde̱ be̱. Di kwedi pe̱ te̱ su la woki, dikalo la ntelele na jokwa la Njongo a Betatedi ba si me̱nde̱ be̱. Mo̱ o me̱nde̱ bolane̱ ni ponda ni batabe̱le̱ wa o mbad’a bwam e? Ka o ebwea mbu yaboso, m’boṅsan mwangame̱n po̱ngo̱be̱ ońola bo buńa ba tobotobo. (Lk 22:7-13; km 3/15 1) Nde biso̱ be̱se̱ jangame̱n boṅsane̱ milema masu. Ne̱ni jeno̱ ná di bola nika e?

• Dutea ońola nje yeno̱ mweńa ná wukeye o Jo̱nge̱le̱ la kwed’a Yesu.​—1Ko 11:23-26

• Kane̱, nde o duteye pe̱ ońola mulatako mo̱ngo̱ na Yehova.​—1Ko 11:27-29; 2Ko 13:5

• Langa, o duteye pe̱ kalati i se̱medi o Bibe̱l i makwaleye̱ ońola janda la Jo̱nge̱le̱ la kwed’a Yesu.​—Yoh 3:16; 15:13

Bate̱ dikalo bō̱ ba malanga, ba dutea pe̱ jombwea bolanga ba Bibe̱l ońola Jo̱nge̱le̱ la kwed’a Yesu bwe o Jombweye Betiledi buńa te̱. Bape̱pe̱ ba malanga bepasi ba Bibe̱l be maso̱be̱ o edinge̱le̱ ye o wan. Bape̱pe̱ pe̱ ba mombwea pe̱te̱ mokwa ma Njongo a Betatedi ma makwaleye̱ ońola Jo̱nge̱le̱ la kwed’a Yesu na ndolo ńena Yehova na Yesu ba lee̱le̱no̱ biso̱. E be̱ to̱ njika mbadi o me̱nde̱no̱ po̱so̱, nik’e bole ná o bate sisea Yehova na Mun’ao be̱be̱.