To̱ná Yehova a si tano̱ a mábola mbenda to̱ po̱ te̱nge̱ne̱ jowe̱ la losango, Yakob a ta a bia ná a mapula ná bowe̱ nde mo̱me̱ne̱ mō̱ buka te̱. (Bbu 20:3-5) Ońola nika, ponda Yehova a kwalane̱no̱ mo̱ ná a timbe o Bete̱l, Yakob a kwalane̱ be̱se̱ bena ba ta na mo̱ ná ba sumwe njimbidi ba tano̱ balea. Na Yakob a no̱ngo̱ yi njimbidi name̱ne̱ pe̱ na bebasi bena ba tano̱ ba bo̱to̱ yen ebe ka njum. (Bbot 35:1-4) Ye̱ke̱i te̱ Yehova a bwane̱ beboledi ba Yakob muńe̱nge̱.

We̱nge̱, ne̱ni jeno̱ ná jowe̱ Yehova mo̱me̱ne̱ mō̱ e? Lambo laboso le nde ná di sambe nje ye̱se̱ ye mulatako na jowe̱ la losango to̱ ndimsi. Nika e mabaise̱ pe̱ ná di pimbe nje ye̱se̱ e be̱n mulatako na midī ma bobe, na ná jombweye pe̱ longe̱le̱ lasu la ńolo ná pe̱ńe̱pe̱ńe̱. K’eyembilan, baise̱ wame̱ne̱ ná: ‘Mo̱ na malonge̱le̱ ńolo na kalati to̱ sinima yena i be̱n to̱ i malee̱ bawedi ba mabuse̱ o ńo̱ maya ma baweńa, bawedi ba matimbe̱ o longe̱, to̱ bato ba be̱n ngińa ni buki ńa mot’a benama e? Mbad’am ńa longe̱le̱ ńolo po̱ e malee̱ ngaṅ, malou to̱ beboma ka mambo ma titi bobe e? Jangame̱n panda etum na nje ye̱se̱ Yehova a singe̱no̱.​—Mye 97:10.

OMBWA SINIMA “EKA DIABOLO,” DENGE̱ O MALABE̱ MIN MYUEDI:

• Njika mitakisan mokwe̱ Bibe̱l mō̱ nu belabe̱ ná Palesa a kusino̱ e?

• Ońola nje yeno̱ dibie̱ ná di wase jongwane̱ la batudu yete̱na biso̱ to moto nupe̱pe̱ a be̱n mitakisan na midī ma bobe e?

• Di mapula te̱ ná Yehova a tate biso̱, njika mambo jangame̱nno̱ jese̱le̱ e?

• Njika bedomsedi be bam Palesa a no̱ngino̱ e?

• O njika mbadi iwo̱ jeno̱ ná di samba ngiń’a midī ma bobe owe̱ni di majano̱ e?