Dipita—Mo̱ le mweńa na mbale̱ e?

DANIEL a ta nde a be̱ne̱ dom la mbu buka te̱, nde ye mbu mō̱ a tano̱ anane̱ kanse̱r. Mado̱kita na bandolo bao ba ta ba mábo̱lo̱ne̱ dipita. Nde Daniel mo̱ a ta te̱ nde a be̱ne̱ dipita. A ta a dube̱ ná a koki te̱, a me̱nde̱ timba mot’a muwaso, na mo̱ ongwane̱ o so̱ bwanga ba kanse̱r. Daniel a ta enge̱le̱ na muńe̱nge̱ mwe̱se̱ pe̱pe̱le̱ la do̱kita diwo̱ lena di maboleye̱ nde tobotobo pat’a kanse̱r a be̱nno̱. Nde bo buńa do̱kita di si po̱i pe̱, ońolana buńa bo ta bobe. Na mulema ma Daniel mu ńo̱sea. Ka nged’ao ńaboso, a bo̱bi. Ombusa mińa to̱ mininga, na mo̱ a wo̱.

Myango ma Daniel mi langwabe̱ nde na do̱kita diwo̱ lena loko mweńa ma dipita ońola muboedi. Yen ebe wa pe̱ o másenga i ńai a myango. K’eyembilan, mudun a moto mō̱ ńe be̱be̱ na kwedi, a be̱n mambo mō̱ eno̱ jenge̱le̱ etum a ponda, ka pe̱pe̱le̱ moto mō̱ a to̱ndino̱, to̱ bolise̱ la ngando po̱. Di lambo eno̱ jenge̱le̱ di tombi te̱, a si minda pe̱ longe̱. Nje ye ná yongwane̱ moto ńe o bete̱medi ka ben e? Mo̱ dipita le ná di bola moto ngińa ka nje te̱ bō̱ ba mo̱nge̱le̱no̱ e?

Muwaso ma jita la mado̱kita mu lee̱ ná yen ebe dipita na je̱ne̱ la mambo o mbad’a bwam ba be̱n ngińa ninde̱ne̱ omo̱ń a longe̱ la moto na ja lao la bwam. Nde bamuwaso be̱se̱ ba si mo̱nge̱le̱ nika. Bō̱ ba makwala ná di jo̱nge̱le̱ di si te̱nge̱n. Ba mo̱nge̱le̱ ná moto a maboa te̱, ke̱ ye̱ke̱i te̱ lambo nde le njo̱m.

Seto̱ we̱nge̱ nde bato ba botedino̱ dinga penda ońola mweńa ma dipita. Ye we̱nge̱ lokoli la mbu ba baise̱no̱ Aristotle, ńadibie̱ mō̱ ńa Grikia ná a tele̱ye̱ nje ye dipita. Mo̱ ná: “Dipita le nde ka moto ńe o ndo̱ti nde ke̱ e epe̱ńe̱.” Benjamin Franklin, mot’a politik mō̱ ńa Amerika pe̱ a kwali ná: “Nu ńe longe̱ ońola dipita, a me̱nde̱ wo̱ na njai.”

Dipita le so̱ nde nje e? Mo̱ le nde tet’a jo̱nge̱le̱, to̱ ndo̱ti ni mabole̱ moto lo̱ko̱mea buka te̱ e? Nga njo̱m i bam ye o je̱ne̱ ná dipita di titi ndo̱ti, nde le nde lambo lena di mapule̱ biso̱ ná di be̱ne̱ ja la bwam na bonam, lambo lena le mbaki na di mawaneye̱ biso̱ tombwane̱ e?