Kana di si mandise̱no̱ kalat’asu i se̱medi o Bibe̱l, bato bō̱ ba mo̱nge̱le̱ ná be wonja o songwa mo̱ na we̱le̱ mo̱ o milomba mipe̱pe̱ to̱ o milongwa ma bekwali o inte̱rne̱t mipe̱pe̱. Nde, bola la nika le nde te̱nge̱ne̱ la Mambenda ońola Bolane̱ * la mulomba masu, nika e máwana pe̱ mitakisan jita. Ka nje te̱ e kwalabe̱no̱ na bwē o ma Mambenda, to̱ moto a si be̱n bwam o “we̱le̱ ebol’a wedi, kalati, eyemban a bebokedi, musiki, maduta, sinima, to̱ betiledi ba mun mulomba o inte̱rne̱t (to̱ njika mulomba, mulomba ma jabane̱ mambo, mulomba ma jabane̱ sinima, to̱ milongwa ma bekwali o inte̱rne̱t).” Ońola nje nin mbenda ńangame̱nno̱ be̱ e?

Nje ye̱se̱ ye o milomba masu e be̱ne̱be̱. Bato ba to̱bi dube̱ la mbale̱ na bane̱ bate̱nge̱ne̱ biso̱ ba makeka o bolane̱ kalat’asu o milomba mabu ná ba lo̱nde Mboṅ a Yehova na bato bape̱pe̱. Mi milomba mi be̱n mambo ma lulabe̱ na m’boṅsan o we̱le̱ penda o milema ma balangedi. (Mye 26:4; Min 22:5) Bape̱pe̱ ba bolane̱ betiledi na mambo ma kalat’asu to̱so̱ eyemban a jw.org ońola mibia ma ńunga ma nje ye̱se̱ ba mandise̱no̱, name̱ne̱ pe̱ na o telefon, tafe̱l na bene̱ belongisan ba yi ńai. Tata la wonj’a mutiledi na mubusisedi, name̱ne̱ pe̱ n’eyemban a bebokedi, di mabola biso̱ wonj’a go̱bina o jeka ni mbad’a bolane̱ ńa bobe. (Min 27:12) Nde jese̱le̱ te̱ na m’boṅsan bato bape̱pe̱, to̱ mo̱me̱ne̱ bonasango asu, ná ba we̱le̱ mambo ma milomba masu o milomba mipe̱pe̱, to̱ bolane̱ eyemban a bebokedi ya jw.org ońola ńunga, bekaisedi be si me̱nde̱ sue̱le̱ miwe̱n masu o te̱nge̱ne̱ basingedi na miyo ma ńunga.

 Songwa la kalat’asu o milomba mipe̱pe̱ mi titi jw.org le ná di wana mbeu a ńolo. “Mūt’a jemea na jangwa” buka te̱ nde Yehova a bake̱no̱ m’bē̱ ma bola da la mudī. (Mat 24:45) Nu “mūtu” a mabolane̱ nde buka te̱ milomba mao membabe̱ na go̱bina, me pe̱ nde​—www.dan124.com, tv.dan124.com, na wol.dan124.com o busise̱ da la mudī. Di be̱n pe̱ nde apps yembabe̱ na go̱bina ilalo buka te̱ ońola belongisan ba dia, telefon na tafe̱l​—JW Language^®, JW Library^®, na JW Library Bwambo ba mbuke^®. Je ná di lakisane̱ ben belongisan ná be si be̱n mibia ma ńunga, be si kwesabe̱ pe̱ to̱ mbindo na was’a Satan. Da la mudī di nitombea te̱ o ngea ipe̱pe̱, mbaki to̱ po̱ e titi ná di si wengisabe̱, to̱ kwesabe̱ mbindo.​—Mye 18:27; 19:9

O sumo te̱ nika, we̱le̱ la kalat’asu o milomba mipe̱pe̱ mi mabole̱ bato wonja o bola mo̱nge̱le̱ mabu, di mabola bato̱bi dube̱ la mbale̱ na bamisan epolo o kwala to̱ nje te̱nge̱ne̱ bebokedi ba Yehova, ná bato ba si lakisane̱ mo̱. Bonasango bō̱ ba lo̱ndo̱be̱ o so̱lo̱ o musunga ma madoi o inte̱rne̱t, na nika e bata londe̱ dina la Yehova mbindo. Ońola nika, m’boko ma jakwalisane̱ o inte̱rne̱t mu titi epolo e te̱nge̱n o ‘jome̱le̱ bate̱nge̱ne̱ Yehova na yō̱.’ (2 Tim 2:23-25; 1 Tim 6:3-5) E so̱be̱ pe̱ nin we̱nge̱ ná milongwa ma bekwali o inte̱rne̱t na milomba mō̱ mi longabe̱ o dina la bebokedi, la Dibe̱le̱ di Madie̱le̱, na o dina la belongi bao. Nde, elong’a Dibe̱le̱ di Madie̱le̱ to̱ ewo̱ e si be̱n mulomba ma mo̱me̱ne̱, e titi pe̱ to̱ o milongwa ma bekwali o inte̱rne̱t.

Loma la bato o mulomba ma jw.org di mongwane̱ o lańse̱ “myango ma bwam.” (Mat. 24:14) Belongisan basu ba dikalo ba inte̱rne̱t be mabenga nde o bata o muso̱ngi na o mbad’a bolane̱. Ńo̱ng’asu ńe nde ná be waneye bato be̱se̱ tombwane̱. Ońola nika, ka ne̱ni te̱ Mambenda ońola Bolane̱ ma makwalano̱, we ná o lomea moto kalati tongwea na inte̱rne̱t to̱ lomea mo̱ ete̱se̱n e mongwane̱ mo̱ o so̱ kalati to̱ sinima o jw.org. Loma la bato ba lee̱le̱ ńo̱ngi o mulomba masu mwembabe̱, le nde we̱le̱ la mulatako oteten a babo̱ na mpo̱m ma tongo a mbaki ńa da la mudī, ńe nde “mūt’a jemea na jangwa.”