Ne̱ni bola ná jokwa lo̱ngo̱ la Bibe̱l di bate be̱ muse̱ṅ na muńe̱nge̱

OKA

YOSUA e oboso ba kekise̱ dinde̱ne̱. Angame̱n o die̱le̱ tumba la Israel o Mundi ma Dikaki to̱na mitakisan minde̱ne̱ mi menge̱le̱ mo̱. Nde Yehova a boli mo̱ mbaki ná a me̱nde̱ tombwane̱, na mo̱ embe̱ mo̱ na ben byala ná: ‘Embame̱ so̱ nde, o kake pe̱ mulema. Bola na tē̱tē̱ kaponda mbend’am. Dutea ońol’ao mwese na bulu, wombwe ná o bole kaponda me̱se̱ ma tilabe̱ oten. Nika nde o me̱nde̱no̱ tombwane̱ o bebolo bo̱ngo̱ be̱se̱ na be̱ pe̱ mutam.’—Yos. 1:7, 8.

O nin “pond’a bobe,” biso̱ pe̱ di be̱n makekisan mande̱ne̱. (2 Tim. 3:1) Mulemlem kana Yosua, je ná di tombwane̱ yete̱na di bupe̱ malea Yehova a bolino̱ mo̱. Jangame̱n o langa Bibe̱l ponda te̱, na we̱le̱ pe̱ o ebolo bete̱sedi be mongwane̱ biso̱ o buka ma makekisan.

Nde, jita lasu di memba ná di titi bokwe̱ Bibe̱l ba bwam, na ná e titi biso̱ lambo di bo̱bi o jokwa. Nde, kana jokwa la Bibe̱l leno̱ mweńa jita, ombwa edinge̱le̱ “ Keka man malea” ná o kuse malea mō̱ me ná mabola ná jokwa lo̱ngo̱ la Bibe̱l di waneye wa tombwane̱ na bwese̱ pe̱ wa muńe̱nge̱.

Mulo̱ngedi mo̱ ná: “Die̱le̱ mba o nge’a byanedi bo̱ngo̱, ebanja na to̱ndi mo̱.” (Mye. 119:35) Jokwa l’Eyal’a Loba le ná di wanea wa muńe̱nge̱ munde̱ne̱. O me̱nde̱ kusa ka bowe̱n, misanga ma tiki ma mudī o me̱nde̱no̱ so̱, ke̱ o puli o Eyal’a Loba.

To̱ná o si be̱nno̱ m’bē̱ ma die̱le̱ tumba ka Yosua, o be̱n te̱ nde mo̱ngo̱ makekisan o lembe̱. Mulemlem kana Yosua, okwa, o we̱le̱ pe̱ o ebolo nje e tilabe̱ ońola tombwane̱ lo̱ngo̱. O boli te̱ nika, wa pe̱ o me̱nde̱ tombwane̱ o bebolo bo̱ngo̱ be̱se̱ na be̱ pe̱ mutam.

KEKA MAN MALEA

Se̱le̱ kane̱ oboso ná o mokwa. Bibe̱l e bambe̱ mo̱nge̱le̱ ma Loba la ngum, mena a tilise̱no̱ oten ońola tombwane̱ lo̱ngo̱. Ońola nika, o malanga te̱ Bibe̱l, wasa jongwane̱ lao ná o so̱ṅtane̱ mo̱, o kombe̱ mo̱, na we̱le̱ pe̱ mo̱ o ebolo o longe̱ lo̱ngo̱.—Esra 7:10.
Baise̱ wame̱ne̱ myuedi ke̱ o malanga Bibe̱l to̱ kalati i se̱medi o Bibe̱l: ‘Nje yen epasi e mokwe̱le̱no̱ mba jombwea Yehova e? Ne̱ni e masue̱le̱no̱ mwe̱ndi m’Eyal’ao e? Ne̱ni neno̱ ná na bolane̱ man mo̱nge̱le̱ o jongwane̱ bape̱pe̱ e?’
Dutea o nje o mokwano̱. Se̱le̱ jese̱le̱ bolanga, o duteye: ‘Njika mo̱nge̱le̱ mena ma mapo̱ mba o mulopo e? Ońola nje ma mo̱nge̱le̱ ma mapo̱no̱ mba o mulopo e? Ne̱ni nika e mombweano̱ longe̱ lam di tombi, bete̱medi bam ba tatan, na nje ye ná e po̱ kie̱le̱ e? Ne̱ni neno̱ ná na we̱le̱ ben bete̱sedi ba Bibe̱l na man malea o ebolo o longe̱ lam e?’ (Hiob 23:5; Mye. 49:4) Ombwa nga we ná o tele̱ye̱ ońola nje Yehova a mome̱le̱no̱ tumba lao ná di sambe beboledi bō̱ to̱ betune̱ be ná be ko̱ye̱ mo̱ ke̱ di bupe̱ bedangwedi be diwengisan na bete̱sedi bao.—Ndim. 32:28, 29.
Bolane̱ mo̱nge̱le̱ mo̱ngo̱ ke̱ o malanga bepasi be malangwe̱ mambo ma tombi. K’eyembilan, we ná we̱ne̱ o mo̱nge̱le̱ ne̱ni bonasango a Yose̱f beno̱ o jandisane̱ mo̱ Bonaismael e? (Bbot. 37:18-28) Nje o me̱ne̱no̱ e, o masengano̱ e, na njik’enumba e mapo̱ wa o mpemba e? We̱le̱ wame̱ne̱ o epol’a bato beno̱ o kwalea. Nje ba maduteano̱ na ne̱ni pe̱ ba masengano̱ e? Yi ńai a mo̱nge̱le̱ i makenjise̱ jokwa lo̱ngo̱ na jongwane̱ pe̱ wa o so̱lo̱ o njib’a jokwa.
Bolane̱ belongisan ba jokwa be bolabe̱ ná o po̱nge muwaso o njiba. Ko̱lo̱ngo̱ne̱ belongisan be o eyem’ango̱ bena be o musinga na be busisabe̱ o mapapa. Baise̱ bape̱pe̱ jongwane̱ ná wokwe bolane̱ mo̱ bwam. K’eyembilan, Index des publications des Témoins de Jéhovah to̱ Guide de recherche pour les Témoins de Jéhovah ba mongwane̱ wa o so̱ nje e tilabe̱ jombwea tema iwo̱, name̱ne̱ pe̱ na beteledi ba jita la bepasi ba Bibe̱l. Bolane̱ beteledi ba mbata be ombusa Bibe̱l New World Translation of the Holy Scriptures yete̱na e maso̱be̱ o eyeme̱ o bino̱. Be belongisan be mabola biso̱ beteledi ba mweńa jombwea mindi, ponda, kilo, mame̱ne̱, na nika.
Po̱ngo̱ ndimbisedi ńa mato̱ti ma mweńa ná nika ńongwane̱ wa o jo̱nge̱le̱ nje wokono̱. Langwea bape̱pe̱ nje wokono̱, nika ńe muse̱ṅ. Mo̱ o so̱i jo̱nge̱le̱ weno̱ ná o bolane̱ o dikalo e? Na nin mbadi, o si makombe̱ buka te̱ mato̱ti ma mweńa o mulopo, nde o mabolane̱ pe̱ mo̱ o jongwane̱ bape̱pe̱.