ALE̱N mo̱ ná: “na ta ná bwa bo̱ngo̱ o po̱ o wan wuma. Na si ta na bia nga na me̱nde̱ be̱ne̱ mako̱m to̱ kasabe̱.”  * Ale̱n e o keka ná a ko̱lo̱ngo̱ne̱ mwemba mao ma peńa mwena mwe etum a 1 400 ba km na mbo’ao.

Wa pe̱ we ná o be̱ne̱ mulemlem ma bo̱ngo̱ yete̱ná o tuko mwemba. Nje so̱ ye ná yongwane̱ wa o ko̱lo̱ngo̱ne̱ mo̱ e? Nje weno̱ ná o bola yete̱ná ko̱lo̱ngo̱ne̱ la mo̱ le ndutu buka nje o tano̱ wenge̱le̱ e? Ye pe̱ te̱ ná o si tuko mwemba, ne̱ni weno̱ ná wongwane̱ ba ba mapo̱ peńa ná ko̱lo̱ngo̱ne̱ di wameye babo̱ e?

K’eyembilan: Ba dubo te̱ bwele o wala de̱ mo̱ o wuma ipe̱pe̱, byadi bao be mawo̱. O dubwa la bwele, myanga mao mi make̱be̱, ná bo si be̱ ndutu o bambe̱. Nde dibokime̱ne̱ bo made̱be̱no̱ pe̱te̱, bo mabotea o ya myanga mipe̱pe̱. Mulemlem pe̱ nde jeno̱ ná di bwa ndutu ke̱ di tuko mwemba. “Myanga” mo̱ngo̱ mi ta mi mayamba o mwemba o tano̱ ońolana o ta o be̱ne̱ mulatako ma bwam na mako̱m mo̱ngo̱, mambo mo̱ngo̱ ma mudī pe̱ ma te̱me̱. Tatan e mapula ná o ye myanga ma pená ná o ńake o wum’a peńa. Nje so̱ e me̱nde̱ jongwane̱ wa o bola nika e? We̱le̱ la bete̱sedi ba Bibe̱l o ebolo. Jombweye te̱ bō̱.

Nu ńena nu malange̱ Eyal’a Loba ponda te̱ e nde “ka bwele bo de̱be̱ o mbasan ma mo̱pi, bwena bo maye̱ bepuma o pond’ao ni te̱nge̱n, byadi bao pe̱ be si mawo̱; to̱ nje pe̱ a mabolano̱ e matombwane̱.”​—Mye. 1:1-3.

Ka nje te̱ bwele bo mańo̱no̱ madiba ma mo̱pi ná bo ńake, Kriste̱n pe̱ ńangame̱n o dese̱ mo̱me̱ne̱ tongwea na Eyal’a Loba ná e tike be̱ ngińa o mbad’a mudī. Ońola nika, benga langa Bibe̱l buńa te̱, wukeye pe̱ o ndongame̱n ponda te̱. Tika be̱ne̱ jowe̱ la ndabo a mbia na jokwa la wame̱ne̱. Mambo mena o tano̱ o bola o bwam ba jembe̱ mulatako mo̱ngo̱ na Loba we̱ni o tano̱, mo̱ pe̱ nde wangame̱nno̱ bola o wuma o po̱ino̱ peńa.

“Muńo̱se̱ bape̱pe̱ a malo̱ko̱be̱ ńo̱ngi.” ​—Min. 11:25.

O me̱nde̱ be̱ ngińa o dube̱, o pomane̱ pe̱ ko̱lo̱ngo̱ne̱ yete̱ná o te̱ dikalo na iwiye̱. Kevin, ńe mutudu mo̱ ná: “Nje yongwane̱ biso̱ na munj’am ye nde ná di no̱ngi ebol’a paonia y’epas’a ponda dibokime̱ne̱ di po̱ino̱ o mwemba ma peńa. Di pomane̱ bia bonasango, paonia, na mōnda ma dikalo.” Roger, ńalo o mwemba ma peńa etum a 1 600 ba km na wuma a tano̱ a ja, mo̱ ná: “Wala la dikalo ponda te̱ le nde mbad’a bwam ńa ko̱lo̱ngo̱ne̱ mwemba ma peńa. Bola pe̱ ná batudu ba bie ná we be̱be̱ o jongwane̱ o to̱ njika mbadi nde, k’eyembilan o sangise̱ la Ndabo a Janea, timbane̱ ekwal’a moto nupe̱pe̱ ke̱ a titi, to̱ jongwane̱ moto o jukea o ndongame̱n. Bonasango na bonańango be̱n te̱ mot’a peńa a le̱le̱m o jongwane̱, ba mapomane̱ kasa mo̱.”

“Tele̱ milema mańu na bwē.”​—2 Kor. 6:13.

Bonde̱ ndol’ango̱ ńa bonasango. Ombusa Melisa na mbia mao boka o mwemba ma peńa, ba we̱ ná ba kuse mako̱m ma peńa. Mo̱ ná: “Di mabitane̱ na bonasango o bebotedi na o su la  ndongame̱n. Nika e mongwane̱ ná di si somane̱le̱ buka te̱, nde ná di kwalisane̱le̱.” Nika ńongwane̱ mbia o pomane̱ bia mina ma bonasango. O mbat’a nika, ba kumo pe̱ bele̱ bonasango o mbo’abu ná ba bate bitane̱le̱, nika pe̱ ńongwane̱ babo̱ o jembe̱ mulatako na mako̱m mabu ma peńa. A bati pe̱ ná: “Di no̱ngi no̱mb’abu ya telefon, di bola pe̱ babo̱ yasu, ná ba we̱le̱ bele̱ biso̱ ońola mambo ma mombweye̱ mwemba na mape̱pe̱.”

E titi te̱ wa bu o kwalisane̱ bato ba peńa, we ná o botea na ńamwe̱le̱ son a lo̱. K’eyembilan, ńamwe̱le̱ lo̱ to̱ e be̱ nde ná o si boṅsane̱ o bola nika. Nika e mabola ná bato ba siseye wa o mbasan. O ka ye̱se̱, “boso bo telam bo mado̱lise̱ mulema.” (Min. 15:30.) Rahe̱l ńalo etum na wuma a kokedino̱ mo̱ ná: “Ne pī; ponda iwo̱, nangame̱n nde ńakisane̱ mbame̱ne̱ o kwalisane̱ bonasango na bonańango o mwemba mam ma peńa. Na mawasa moto nu jai mo̱me̱ne̱ o Ndabo a Janea, nu titi o kwalisane̱ to̱ moto; ńena ńe pī ka mba.” Mo̱ je ná di ńo̱ngo bedomsedi o kwala na mot’a peńa o bebotedi to̱ o su la dongame̱n te̱ e?

O mune̱ mudī, we ná o be̱ muńe̱nge̱ o kwala na mot’a peńa o yi wok’a boso ombusa po̱ lao. Nde na ponda, kana a titino̱ pe̱ “mot’a peńa,” o dimbea mo̱. Ońola nika, wangame̱n o po̱ngo̱ miwe̱n o benga be̱ne̱ mako̱m ma peńa.

Myele mō̱ mi be̱n ńo̱ng’a ponda buka mine̱ ná myanga mabu mi yambe o mińangadu ma peńa mi de̱be̱no̱. Mulemlem pe̱, bato be̱se̱ ba si mako̱lo̱ngo̱ne̱ mwemba ma peńa o mulemlem ma pambo a ponda. Yete̱ná yā son a ponda o tukono̱ mwemba, nde e be̱ ná e dia te̱ nde wa ndutu o ko̱lo̱ngo̱ne̱ mo̱, we̱le̱ la ben bete̱sedi ba Bibe̱l o ebolo le ná longwane̱ wa:

“Di si wo̱lo̱ o bola bwam; ebanja di me̱nde̱ jumbwa o ponda ni te̱nge̱n ke̱ di si wo̱li.” ​—Gal. 6:9.

Bola wame̱ne̱ ponda o ko̱lo̱ngo̱ne̱ mawengisan buka nje o tano̱ wengane̱. K’eyembilan, bamuloloma ba busi o esukul’a Gilead ba maja o bekombo wuma ba lomabe̱no̱ mbu to̱ mininga, to̱ biana ba mala pe̱pe̱le̱ mbia mabu. Bola la nika di mongwane̱ babo̱ o be̱ne̱ mulatako ma bwam na bonasango ba y’ekombo na ko̱lo̱ngo̱ne̱ pe̱ bede̱mo ba y’ekombo.

Alejandro, ńena nu mátukwe̱ myemba jita, a memba ná moto a titi ná a te̱se̱ ponda ńa ko̱lo̱ngo̱ne̱ mawengisan. Mo̱ ná: “Ombusa biso̱ tukwa mwemba pe̱te̱, munj’am mo̱ na mba ná ‘mako̱m mam me̱se̱ me nde o mune̱ mwemba!” O̱nge̱le̱ munj’ao ná mulemlem ma lambo nde a kwalino̱ ye mbu miba we̱nge̱ ponda ba tukono̱ mwemba. Nde oteten a mi mimbu miba, a lee̱le̱ bato bape̱pe̱ ndolo, na ba be̱n ba bato ba timba be̱ mo̱ mako̱m ma batabata.

“O si kwala ná: ońola nje mińa mi tombi mi tano̱ bwam buka ma tatan e? Ebanja seto̱ dibie̱ nde di tute̱le̱ wa o baise̱ nika.” ​—Mul. 7:10.

O si kobisane̱ mwemba ma peńa na ma kwaṅ. K’eyembilan, bonasango o mwemba mo̱ngo̱ ma peńa be ná ba be̱ pī to̱ bokenju buka nje o ko̱lo̱ngo̱ne̱no̱. Soke̱ nde miso̱ mo̱ngo̱ o bede̱mo babu ba bwam, ka ne̱ni te̱ o mengane̱no̱ babo̱. Diwengisan la mwemba di boli ná bō̱ ba baise̱  babo̱me̱ne̱ ná ‘mo̱ na to̱ndi bonasango [be̱se̱]’ e?​—1 Pet. 2:17.

“Ue̱le̱, nde di mabolabe̱ bińo̱.”​—Lukas 11:9.

Benga kane̱ ońola jongwane̱. David ńe mutudu mo̱ ná: “O si keka bambe̱ mu mūna wame̱ne̱ mō̱. Je nde ná di tongwe̱le̱ bola jita la mambo buka te̱ na jongwane̱ la Yehova. Kane̱ ońola nika!” Rahe̱l di kwaledino̱ o mo̱ń e mbombo na nika. Mo̱ ná: “Biso̱ na mom’am di ta nde je̱ne̱ biana di titi belongi ba mwemba. Di kane̱ Yehova tobotobo ońola nika, na ben byala ná ‘ Son, bola ná di bie nga je o bola mambo ma meke̱ bape̱pe̱ ná ba siseye biso̱ o mbasan.’ Ombusa nika, di keki o bata tombise̱ ponda jita na bonasango na bonańango.”

A bayedi, yete̱ná ye ndutu ná bana bańu ba ko̱lo̱ngo̱ne̱ mawengisan, bińo̱ no̱ngo̱ ponda o kane̱ ońola nika. Bińo̱ ongwane̱ pe̱ babo̱ o be̱ne̱ mako̱m ma peńa, bola ná ba be̱ne̱ epolo o longe̱le̱ ńolo na bato bape̱pe̱ o mbadi ni malongisane̱.

Nje weno̱ ná o bola o bwam ba jongwane̱ bapo̱i peńa o mwemba e? Botea po̱ labu, lee̱le̱ wame̱ne̱ ka diko̱m la mbale̱. Ná o bole nika, dutea te̱ njika mambo o wusano̱ to̱ndo̱ ná ba boleye wa ke̱ o po̱i peńa o mwemba, nde o bole nika. (Mat. 7:12) Mo̱ we ná o bele̱ babo̱ o jukea o jowe̱ lo̱ngo̱ la ndabo a mbia to̱ jombwa sinima ńa mo̱di ńa JW Elimb’a bedinge̱dinge̱ e? We ná o po̱so̱ te̱ dikalo na babo̱ e? O bele̱ te̱ babo̱ o da mwemba na wa, ba me̱nde̱ jo̱nge̱le̱ edī ango̱ ya kasa la be̱n ponda bwaba. Njika jongwane̱ dipe̱pe̱ weno̱ ná o wanea bapo̱i peńa e?

Karlos mo̱ ná: “Ponda di po̱ino̱ o mwemba ma peńa, munańango mō̱ a boli biso̱ mina ma sapi i be̱n misusedi mi sibi. Nika ńongwane̱ biso̱ jita.” Ba bena ba mawe̱ o mindi mi be̱n ngō̱ ńe diwengisan, bena ba be̱ muńe̱nge̱ o bia ne̱ni bo̱to̱ bupisane̱ wei, mulo̱lo̱ko̱ to̱ mbua. We pe̱ ná wongwane̱ babo̱ o bata be̱ jangwa o dikalo na langwea babo̱ myango ma mundi, name̱ne̱ pe̱ na tele̱ye̱ babo̱ madube̱ ma bebasi me o mu mundi.

Ye buka mbu mō̱ Alen di kwaledino̱ o bebotedi, eno̱ o mwemba mao ma peńa. Mo̱ ná: “Na ta nangame̱n be̱ mot’a boso o sisea bonasango na bonańango be̱be̱. Nde tatan, bā nde ka mbia, nika e mabwese̱ pe̱ mba muńe̱nge̱.” Alen a so̱ṅtane̱ ná to̱ná a tukono̱ mwemba, a si bo̱lo̱ne̱ diko̱m to̱ diwo̱. O diwengisan, a kusi nde ma peńa, mena ma me̱nde̱ tike̱ be̱ mako̱m mao o bwindea.