YESU a ta a kwala buńa bō̱ ná: “Bola le bonam buka kusa.” (Bebolo 20:35) Ni mbal’a dibongo e mombwea mulatako masu na Yehova. Ońola nje e? Yehova a boli biso̱ jita la mabea ma mabwese̱ biso̱ muńe̱nge̱, nde je ná di bata be̱ muńe̱nge̱ ke̱ di boli Yehova jabea. Njika jabea jeno̱ ná di bola Yehova e? Minia 3:9 mo̱ ná: “Bola Yehova edube na bema bo̱ngo̱ [“ba mweńa,” NW].” “Bema [basu] ba mweńa” nika ńe nde pond’asu, nje di bino̱ bola, ngud’asu na myam masu. Di bolane̱ te̱ man me̱se̱ o sue̱le̱ jowe̱ la mbale̱, je nde o bola Yehova jabea, bola la nika pe̱ di mawanea biso̱ muńe̱nge̱ munde̱ne̱.

O nje e mombweye̱ myam masu, nje e me̱nde̱ jongwane̱ biso̱ ná di si dimbea bola Yehova jabea lasu e? Ńamuloloma Paulo a langwedi bato ba Korinto ná mō̱ ńabu te̱ a “ne̱nge̱ ombo’ao nje a we̱lino̱” o bola jabea la wonja. (1 Kor. 16:2) Nje weno̱ ná o bola yete̱na o mapula bata bia jombwea mbad’a bola la mabea ma wonja bupisane̱ wuma o majano̱ e? Son, ombwa edinge̱le̱ ye owase wan.

Mabea ma wonja tongwea na internet ma titi ná ma bolabe̱ o bekombo be̱se̱. Nde, mibia ońola mbadi ipe̱pe̱ ya bola mabea me ná mi so̱be̱ o dipapa la bola la mabea ma wonja le o internet. O bekombo bō̱, di dipapa di be̱n malabe̱ ma myuedi bato ba mabaise̱no̱ ponda ye̱se̱ jombwea bola la mabea ma wonja.