Nate̱na wan, jombwedi mambo ma mongwane̱ biso̱ o jalabe̱ min myuedi ná, Nja ńe Loba e? Di bote- di nde na jokwa o Bibe̱l ná dina lao ná Yehova, na ná ede̱mo ao e buki be̱se̱ ye nde ndolo. Jombwedi pe̱ nje a bolino̱ na yena a me̱nde̱no̱ pe̱ bola ońola bwam ba mbel’a moto. To̱ná di be̱nno̱ mambo jita o jokwa jombwea Loba, we ná o baise̱ na wame̱ne̱ njika tombwane̱ o be̱nno̱ ke̱ o bati jokwa.

Yehova a kakane̱ ná “o pulise̱ te̱ mo̱, a mese̱le̱ ná o so̱ mo̱.” (1 Myango 28:9) Dutea te̱ jabea la tiki o me̱nde̱no̱ kusa ke̱ o pulise̱ Loba, wokwa pe̱ bia mo̱​—o mabe̱ “Yehova . . . diko̱m”! (Myenge 25:14) Njika tombwane̱ ni ńai a mulatako mweno̱ ná mu wanea wa e?

Bonam ba mbale̱. Bibe̱l e mabele̱ Yehova ná “Loba la bonam.” (1 Timoteo 1:11) Be̱ la diko̱m lao na jembilane̱ pe̱ beboledi bao ba me̱nde̱ wanea wa bonam ba mbale̱ bo mawaneye̱ wa tombwane̱ o besengedi, o mo̱nge̱le̱, na o eyobo. (Myenge 33:12) We pe̱ ná o we̱le̱ be̱ne̱ longe̱ le bonam yete̱na o sambi mbad’a longe̱ ńe ná ni wanea wa mbeu a ńolo, o be̱ne̱ bede̱mo ba bwam, na mulatako ma bwam na bane̱. O me̱nde̱ be̱ jo̱nge̱le̱ diwo̱ na mulo̱ngedi nu kwali ná: “Ye mba bwam o be̱ Loba be̱be̱.”​—Myenge 73:28.

Dibongo bupisane̱ ńo̱ng’a moto te̱. Yehova a kakane̱ baboledi bao ná: “Na mabola wa malea na jombwa wa na miso̱ mam.” (Myenge 32:8) Nika e mapula nde kwala ná Yehova a mombwea muboled’ao te̱, a mabongwa pe̱ mo̱ bupisane̱ ńo̱ng’ao. (Myenge 139:1, 2) Nde niponda o me̱nde̱no̱ be̱ne̱ mulatako ma bwam na Yehova, o me̱nde̱ so̱ ná e na wa ponda ye̱se̱.

Kie̱le̱ ni maye̱ ńa betańsedi. Yehova Loba a si mongwane̱ wa buka te̱ o be̱ne̱ longe̱ le bonam na mutam nin we̱nge̱, a mabola pe̱ ná o we̱le̱ be̱ne̱ kie̱le̱ ni maye̱ ńa betańsedi. (Yesaya 48:17, 18) Bibe̱l e makwala ná: “Nde longe̱ la bwindea le nde ná ba bie wa, Loba la mbale̱ mō̱ me̱ne̱, na nu o lomno̱, Yesu Kristo.” (Yohane 17:3) O nin pond’a bobe, dipita lena Loba a mabolano̱ biso̱ le nde ka diyo lena di mabole̱ biso̱ ‘ngińa na jembame̱.’​—Bonahebe̱r 6:19.

Ngus’a njo̱m yin ya mweńa o jokwa bia Loba bwam na be̱ pe̱ mo̱ diko̱m. We wonja o kwala na to̱ njika Mboṅ a Yehova to̱ pe̱pe̱le̱ jw.org ońola mibia ma mbata me ná mongwane̱ wa.