OŃOLA Bonayuda bena ba ta o Mundi ma Dikaki, mbu mu ta nde mu botea o pond’a bwa la mińangadu na ń’esa, nik’e ta nde o Ńe̱te̱ki/Maye̱se̱ bupisane̱ elange̱mbu ya nin pond’asu.

Bato ba ta nde ba so̱nge̱le̱ mińa ma mo̱di bupisane̱ muyo̱mbo̱ ma so̱nga la mo̱di, mwena mwe bwaba ba 12 ma myo̱di (29 to̱ 30 ma mińa mo̱di te̱) Ba ta nde ba so̱nge̱le̱ mińa ma mbu bupisane̱ wei. Nde mbu mu se̱medi o muyo̱mbo̱ ma so̱nga la mo̱di mwe isungu kobisan na ma wei. Ba ta so̱ bangame̱n so̱ mwano ná ba late yi mbad’a so̱nge̱le̱ ibane̱. Ná ba tongwe̱le̱, ba ta bangame̱n bata mińa to̱ jinge̱le̱ mo̱di mō̱ mupe̱pe̱ ponda na ponda te̱, k’eyembilan obiana mbu ma peńa mu maya botea. Mu muso̱ngi mu ta mongwane̱ o te̱se̱ elange̱mbu bupisane̱ pond’esa na ńa mumbwa.

Nde o mińa ma Mose, Loba a ta a langwea tumba lao ná mbu m’ebasi mwangame̱n nde botea na mo̱di ma Abib, to̱ Nisan (Bbu. 12:2; 13:4) Ngando ńena ni ta o ni ponda e ta nde ńa mumbwa ma wondi.​—Bbu. 23:15, 16.

Emil Schürer, ńadibie̱ mō̱ a kwali ná e si ta ndutu o bia we̱ni jinge̱le̱ mo̱di ma mbata o elange̱mbu. A bati pe̱ ná: “Ngando a Pasa ńena ni ta ni bolisabe̱ o pond’a mo̱di mu londino̱, o mo̱di ma Nisan (14 Nisan), pe̱ e ta nde ńangame̱n be̱ o ponda ńena bulu na mwese ba mindano̱ ńai po̱ . . . Baju ba ta be̱ ba so̱i te̱ o su la mbu ná Pasa e me̱nde̱ nde ko̱ oboso ba ponda ńena bulu na mwese ba mindano̱ ńai po̱, ba minge̱le̱ mo̱di mu londe̱ [13] oboso ba Nisan.”

Mboṅ a Yehova i mombwea ben bete̱sedi o pond’a te̱se̱ la buńa ba Da la Sango, lena di yo̱ki nde ko̱ o 14 ma Nisan bupisane̱ elange̱mbu ya Bonayuda. Bobia ba bon buńa bo yoki bīsabe̱ myemba ma wase ńe̱se̱ oboso ba ponda. *

Nde ne̱ni Bonayuda ba tano̱ ba bia ponda mo̱di mu mabo̱no̱ na ponda mo̱di ma peńa mu maboteano̱ e? O nin we̱nge̱ ná di bie nika di mombwa nde elange̱mbu e po̱ngo̱be̱ na pepa to̱ yena ye biso̱ o elongisan a dia, ka telefon. Nde o mińa ma Bibe̱l, e si ta bu o bia.

O pond’a mpupe ma dibumbe, myo̱di mi ta nde mi be̱ne̱ 30 ma mińa. (Bbot. 7:11, 24; 8:3, 4) Ombusa ponda, Bonayuda ba si ta ba be̱ne̱ elange̱mbu ya 30 ma mińa. Bupisane̱ kalenda ńa Bonahebe̱r, ba ta nde ba botea so̱nge̱le̱ mo̱di ponda ba me̱ne̱no̱ so̱nga la mo̱di. Ba ta so̱ nde ba so̱nge̱le̱ 29 to̱ 30 ma mińa denge̱ ba mabotea so̱nge̱le̱ mo̱di ma peńa.

Buńa bō̱, David na Yonatan ba ta ba to̱pea ońola mo̱di: “Kie̱le̱ ye nde mate̱ ma mo̱di.” (1 Sam. 20:5, 18) E me̱ne̱ne̱ ná o ebwe’a mbu e londe̱ 11 B.P.A, ba ta nde ba so̱nge̱le̱ myo̱di oboso ba ponda. Ne̱ni Bonaisrael ba wusano̱ we̱le̱ bia mate̱ ma mo̱di, nika ńe nde bebotedi ba mo̱di e? Misna, ńe nde kalati ni bambe̱ mambenda na bede̱mo ba Bonayuda, e malangwa ne̱ni. E malangwa ná ombusa wa la Bonayuda o mikoma o Babilon, mwemba ma bakaisedi bande̱ne̱ nde mu ta mombwea nika. O pambo a ponda ńa myo̱di samba mena ngando i tano̱ i bolisabe̱, mwemba ma bakaisedi bande̱ne̱ mu ta be̱ mu ja o buńa ba mo̱di bo londe̱ 30. Ba bome nde ba ta ba be̱ne̱ mboṅ a te̱se̱ njika ponda mo̱di ma peńa mu maboteano̱. O nje ba tano̱ ba se̱me̱ye̱ e?

Bato bena ba ta ba te̱me̱ o bepolo basam o Yerusalem ńe̱se̱ ba ta be̱ bombwa mo̱ń bulu o wasa je̱ne̱ songa la mo̱di lena di ta longwane̱ o so̱nge̱le̱ bebotedi ba mo̱di. Dibokime̱ne̱ ba tano̱ be̱ne̱ mo̱ ba ta ba bīse̱ mwemba ma bakaisedi bande̱ne̱. Ponda ba bakaisedi ba tano̱ be̱ne̱ ná ba mábe̱ne̱ mboṅ eyeka i mabamse̱ ná so̱nga la mo̱di di mábusa, ba mabīse̱ so̱ ná mo̱di ma peńa mu mábotea. Nje bakaisedi ba tano̱ ba bola  yete̱na mawindi meki batatedi o je̱ne̱ songa la mo̱di la peńa e? Ba ta nde ba domse̱ ná mu mo̱di mwena mwe o po̱ o su mu be̱n nde 30 ma mińa, na mo̱di ma peńa mu botea.

Misna e matele̱ye̱ ná, mwemba ma bakaisedi bande̱ne̱ mu ta nde mu bīse̱ bebotedi ba mo̱di ma peńa tongwea na wea yena ba tano̱ ba bota o sasa mudongo ma njabi, be̱be̱ na Yerusalem. O bene̱ bepolo basam ba Israel ńe̱se̱ ba ta be̱ ba bota wea o lańse̱ bo bobia. Ombusa ponda, ba ta nde ba loma bato ba mye̱ndi. Bonayuda o Yerusalem name̱ne̱ pe̱ na ba bena ba ta ba camane̱ o bepolo bepe̱pe̱ ba ta ba bia njika ponda mo̱di ma peńa mu botedino̱. Babo̱ be̱se̱ ba ta so̱ ba we̱le̱ bolise̱ ngando abu o mulemlem ma ponda.

Ebambu e bolabe̱ owan ye ná yongwane̱ wa o so̱ṅtane̱ myo̱di, ngando, na midiyo kaponda elange̱mbu ya Bonayuda o mińa ma Israel.