1-2. (a) Njika bete̱medi be ta o Yudea ponda ńamuloloma Paulo a tiledino̱ Bonahebe̱r leta e? (b) Ońola nje di leta di po̱ino̱ o ponda ni te̱nge̱n e?

 KRISTE̱N ya Bonahebe̱r yena i ta i ja o Yerusalem na o Yudea i ta i lembe̱ ponda bobe mimbu mi bupe̱ kwed’a Yesu. Ombusa bokisabe̱ la mwemba ma kriste̱n, mitakisan minde̱ne̱ mi botedi pe̱te̱. (Bebolo 8:1) Lambo ka 20 ma mbu ombusa ponda, bokwedi ba Kristo ba lembe̱ pas’a bekusedi, yen ebe ni ta ni wa na njai ninde̱ne̱ ni ta ni ko̱ o ekombo. (Bebolo 11:27-30) Nde, o lambo ka 61 P.A., kriste̱n i ta i kusa pambo a ponda ńa musango kobisan na nje ba wusano̱ lembe̱ o mińa mi maye̱. O ni ponda, Yehova a tute̱le̱ ńamuloloma Paulo o tilea babo̱ leta—di leta di ta nde nje e ta e pula babo̱ o ni ponda.

² Di leta la Bonahebe̱r di po̱i nde o ponda ni te̱nge̱n ońolana musango mwena yi kriste̱n i tano̱ i be̱ne̱ mu si wusa jinda. Paulo a boli malea ma bwam ma wusa jongwane̱ kriste̱n o lembe̱ mitakisan mi wusa ko̱ye̱ babo̱ son a ponda. Ńamsabe̱ la ebe̱yed’a mambo ya Bonayuda lena Yesu a tano̱ a bīse̱, di ta be̱be̱. (Lukas 21:20) Mbale̱ ńe nde ná, e be̱ Paulo to̱ kriste̱n ya Bonayuda, ba si ta ba bia na te̱ite̱i ponda di ńamsabe̱ di me̱nde̱no̱ po̱. Nde, i kriste̱n i ta yangame̱n bolane̱ ni ponda o boṅsane̱ babo̱me̱ne̱ tongwea ná be̱ne̱ bede̱mo ka dube̱ na titimbe̱.—Bon. 10:25; 12:1, 2.

3. Ońola nje leta la Bonahebe̱r leno̱ mweńa jita ońola kriste̱n ya we̱nge̱ e?

 ³ Son a ponda di me̱nde̱ lembe̱ ndenge̱ ninde̱ne̱ ni buki ni ńena kriste̱n ya Bonahebe̱r i lembe̱no̱. (Mat. 24:21; Bbī. 16:14, 16) Jombweye so̱ malea ma bwam Yehova a bolino̱ yi kriste̱n mena me pe̱ ná mongwane̱ biso̱.

“DI SISEYE OBOSO O MAMBO MĀSAM”

4. Njika makekisan Bonayuda be kriste̱n ba kusino̱ e? (Ombwa pe̱ duta.)

⁴ Bonayuda bena ba timbi kriste̱n ba lembe̱ mitakisan minde̱ne̱. O pambo a ponda po̱, Bonayuda ba ta nde tumba lena Yehova a po̱sino̱. O Yerusalem nde Kiṅe̱ ńena Yehova a tano̱ a te̱se̱ e tano̱ ńanea, oten pe̱ nde tempe̱l ni ta epol’a jowe̱ la bosangi e tano̱. Bonayuda be̱se̱ ba jemea ba ta ba bupe̱ mbend’a Mose ńena badiedi ba ebasi ba tano̱ ba teleye̱ babo̱. Be belēdi be ta bombwea nje ba madano̱, jo̱nge̱le̱ labu jombwea bwendi, na mulatako mabu na Basibi. Nde, Yehova a si ta pe̱ a kasa mabea ma Bonayuda ombusa kwed’a Yesu. Nik’e ta so̱ nde makekisan ońola kriste̱n ya Bonayuda, yena i ta i ko̱lo̱ngo̱ne̱ bupe̱ mbenda. (Bon. 10:1, 4, 10) E ta to̱ kriste̱n you, ka ńamuloloma Petro, ndutu o ko̱lo̱ngo̱ne̱ ma mawengisan. (Bebolo 10:9-14; Gal. 2:11-14) Ońola be belēdi ba peńa, yi kriste̱n i ta i takisabe̱ na badiedi ba ebas’a Bonayuda.

5. Njika jangame̱ye̱ kriste̱n i tano̱ yangame̱n no̱ngo̱ e?

⁵ Kriste̱n ya Bonahebe̱r i ta i takisabe̱ na bepepa ba bato beba. Yaboso e ta nde badiedi b’ebas’a Bonayuda bena ba ta be̱ne̱ babo̱ ka bato bena ba to̱bi dube̱ labu la Bonayuda. O ta pe̱ o be̱ne̱ kriste̱n iwo̱ yena i ta i kwala ná bokwedi ba Yesu ba ta bangame̱n benga bupe̱ mambo mō̱ ma mbend’a Mose, yen ebe o samba mitakisan. (Gal. 6:12) Nje e wusa jongwane̱ kriste̱n ya jemea o tingame̱ na mbale̱ e?

6. Njika jome̱le̱ Paulo a bolino̱ bonasango ao e? (Bonahebe̱r 5:14–6:1)

 ⁶ O leta lena a tiledino̱ kriste̱n ya Bonahebe̱r, Paulo ome̱le̱ bonasango na bonańango ao ná bokwe Eyal’a Loba o njiba ba duteye pe̱ ońol’ao. (Langa Bonahebe̱r 5:14–6:1.) Paulo a bolane̱ Betiledi ba Bonahebe̱r o teleye̱ bonasango ao ná mbadi kriste̱n i mowe̱no̱ Yehova e buki mbadi Bonayuda ba tano̱ bowe̱ mo̱. a Paulo a ta a bia ná be̱ne̱ la so̱ṅtane̱ la mbale̱ la njiba di wusa jongwane̱ kriste̱n o jemba belēdi ba mpoṅ na banga bupe̱ mo̱.

7. Njika mitakisan di be̱nno̱ we̱nge̱ e?

⁷ Kapo̱ ka kriste̱n ya Bonahebe̱r, biso̱ pe̱ di be̱n bato ba mate̱nge̱ne̱ biso̱ tongwea na lańse̱ la mo̱nge̱le̱ na myango ma mate̱nge̱ne̱ bete̱sedi ba Yehova. Ba bato ba yo̱ki nde to̱po̱ te̱nge̱ne̱ bete̱sedi basu be se̱medi o Bibe̱l jombwea bedangwedi ba makwala ná je ndando je pe̱ njo. Bedangwedi na mo̱nge̱le̱ ma nin wase ba mabata nde po̱to̱ etum na mbad’a je̱ne̱ la mambo la Loba ńena ńe ke̱nge̱nge̱. (Min 17:15) Ye so̱ mweńa ná, di be̱ ńai ni dongame̱n o jemba na banga bupe̱ mo̱nge̱le̱ mena bate̱nge̱ne̱ biso̱ ba mabolane̱no̱ o bwam ba bo̱bise̱ biso̱ to̱ bola ná di si bolea pe̱ Yehova.—Bon. 13:9.

8. Ne̱ni jeno̱ ná di bata joa o mbad’a mudī e?

⁸ Biso̱ pe̱ jangame̱n bupe̱ malea Paulo a bolino̱ kriste̱n ya Bonahebe̱r, ma benga joa o mbad’a mudī. Nika ńe nde be̱ne̱ so̱ṅtane̱ la mbale̱ la njiba na wasa be̱ne̱ je̱ne̱ la mambo la Yehova. Jangame̱n benga bola nika to̱ ombusa biso̱ bake̱ biso̱me̱ne̱ na dubisabe̱. E be̱ mimbu mininga di mábe̱ne̱no̱ o mbale̱, biso̱ be̱se̱ jangame̱n benga langa na jokwa Eyal’a Loba ponda ye̱se̱. (Mye. 1:2) Di ko̱lo̱ngo̱ne̱ te̱ o jokwa Bibe̱l nik’e me̱nde̱ jongwane̱ biso̱ o jouse̱ ede̱mo yena Paulo a kikino̱ o leta lena a tiledino̱ Bonahebe̱r, nika ńe nde: dube̱.—Bon. 11:1, 6.

“DI BE̱NE̱ DUBE̱ O SUNGA MALONGE̱ MASU”

9. Ońola nje e tano̱ e pula kriste̱n ya Bonahebe̱r dube̱ dinde̱ne̱ e?

⁹ E ta e pula kriste̱n ya Bonahebe̱r dube̱ dinde̱ne̱ o sungabe̱ o ndenge̱ ni wusa ko̱ye̱ Yudea. (Bon. 10:37-39) Yesu ome̱le̱ bokwedi bao ná ponda ba me̱nde̱no̱ je̱ne̱ ná Yerusalem e dingabe̱le̱ na milo̱ṅ ma bila, bangame̱n ńa mīla o midongo. Ma malea ma ta mombwea kriste̱n ye̱se̱, e be̱ yi yena i ta o mundi ma Yerusalem to̱ o Yudea, mundi ma mbasan. (Lukas 21:20-24) Bato bena milo̱ṅ ma bila meno̱ pula ko̱ye̱ ba mawasa nde betatedi oteten a mundi mu be̱n bedima ka Yerusalem. Jome̱le̱ la ńa mīla o midongo di wusa je̱ne̱ne̱ ka jo̱nge̱le̱ la bobe, e ta so̱ e pula babo̱ dube̱ dinde̱ne̱ o bupe̱ di jome̱le̱ la Yesu.

10. Nje dube̱ dinde̱ne̱ di wusano̱ tute̱le̱ kriste̱n o bola e? (Bonaheber 13:17)

¹⁰ E ta pe̱ e pula ná kriste̱n ya Bonahebe̱r i lakisane̱ ba bena Yesu a tano̱ a bolane̱ o die̱le̱ mwemba. Yen ebe ba bena ba ta ba die̱le̱ ba boli bediedi jombwea njika ponda ńa mīla na ne̱ni bola nika o bwam ba jongwane̱ mwemba mwe̱se̱ o bupe̱ jome̱le̱ lena Yesu a bolino̱. (Langa Bonahebe̱r 13:17.) Eyal’a Grikia ba bolane̱no̱ o Bonahebe̱r 13:17 ná “sengane̱” e mombwea nde moto nu masengane̱ na mbaki ońolana a lakisane̱ nu nu mabole̱ mo̱ bediedi. Nik’e mapula kwala ná a si masengane̱ mo̱ buka te̱  ońolana nu moto a be̱n doi o bola mo̱ bediedi. Kriste̱n ya Bonahebe̱r i ta so̱ yangame̱n lakisane̱ ba bena ba madie̱le̱ obiana ndenge̱ ninde̱ne̱ e mapo̱. Yete̱na o pond’a musango yi kriste̱n i ta i bupe̱ bediedi ba ba bena ba ta ba die̱le̱ babo̱, nik’e wusa be̱ babo̱ lambo di bo̱bi o bola nika o pond’a mitakisan.

11. Ońola nje yeno̱ mweńa we̱nge̱ ná kriste̱n i be̱ne̱ dube̱ dinde̱ne̱ e?

¹¹ We̱nge̱ biso̱ pe̱ di be̱n ńo̱ng’a dube̱ kapo̱ ka kriste̱n ya Bonahebe̱r. Je nde o ponda ńena bato ba mabangano̱—ba mayo̱ye̱no̱ pe̱—jome̱le̱ la Bibe̱l jombwea su la yen ebe̱yed’a mambo. (2 Pet. 3:3, 4) O mbata na nika, to̱ná Bibe̱l e malangweano̱ biso̱ mambo mō̱ ma me̱nde̱ tombe̱ o pond’a ndenge̱ ninde̱ne̱, jita la mambo mape̱pe̱ me mena di si bino̱. Jangame̱n be̱ne̱ dube̱ dinde̱ne̱ ná su la yen ebe̱yed’a mambo di me̱nde̱ po̱ o ponda ni te̱nge̱n na ná Yehova a me̱nde̱ jombwea biso̱.—Hab. 2:3.

12. Nje e me̱nde̱ jongwane̱ biso̱ o sungabe̱ o ndenge̱ ninde̱ne̱ e?

¹² Jangame̱n pe̱ jouse̱ dube̱ lasu o mwano mwena Yehova a mabolane̱no̱ we̱nge̱ o die̱le̱ biso̱, nika ńe nde “mūt’a jemea na jangwa.” (Mat. 24:45) Ponda ndenge̱ ninde̱ne̱ e me̱nde̱no̱ botea, yen ebe di me̱nde̱ kusa bediedi be masunge̱ longe̱ lasu, ka nje te̱ kriste̱n ya Bonahebe̱r i kusino̱ ponda bato ba Roma ba po̱ino̱. Tatan nde jangame̱nno̱ bata lakisane̱ bediedi di makusane̱no̱ ba bena ba madie̱le̱ bebokedi ba Yehova. Yete̱na di si malakisane̱ babo̱ to̱ bupe̱ bediedi ba mabolano̱ biso̱ tatan, e me̱nde̱ be̱ biso̱ ndutu o bupe̱ be bediedi o pond’a ndenge̱ ninde̱ne̱.

13. Ońola nje malea me o kalat’a Bonahebe̱r 13:5 ma tano̱ ma te̱nge̱ne̱ e?

¹³ Ni ponda ba tano̱ benge̱le̱ bediedi ba ńa mila, kriste̱n ya Bonahebe̱r i ta pe̱ yangame̱n be̱ne̱ longe̱ di wam, na banga pe̱ “to̱ndo̱ la bema.” (Langa Bonahebe̱r 13:5.) Bō̱ babu ba lembe̱ jai na tue. (Bon. 10:32-34) To̱ná ba tano̱ be̱be̱ o lembe̱ pond’a bobe ońola myango ma bwam, yen ebe bō̱ babu ba botedi dutea ne̱ni be̱ne̱ mo̱ni jita o bwam ba tata babo̱me̱ne̱ na tue na mbeu a ńolo. Nde mo̱ni mu si wusa tata babo̱ na ndenge̱ ninde̱ne̱ ni ta ńangame̱n po̱. (Yak. 5:3) Mbale̱ ńe nde ná, e wusa be̱ ba bena ba to̱ndi bema ndutu o ńa mīla, na dia milongi mabu na mabe̱ne̱ mabu ombusa.

14. Ne̱ni dube̱ dinde̱ne̱ leno̱ ná di be̱ne̱ ngińa omo̱ń a bedomsedi basu jombwea be̱ne̱ la bema e?

¹⁴ Di dube̱ te̱ na mbaki ńe̱se̱ ná su la yen ebe̱yed’a mambo le be̱be̱, nik’e me̱nde̱ tute̱le̱ biso̱ o banga to̱ndo̱ la bema. O pond’a ndenge̱ ninde̱ne̱, bato ba me̱nde̱ “pimba silb’abu o mangea” ońolana ba me̱nde̱ so̱ṅtane̱ ná “silb’abu to̱ gol abu ba si me̱nde̱ we̱le̱ sunga babo̱ o buńa ba malinga ma Yehova.” (Hes. 7:19) O mulopo ma ko̱te̱le̱ jita la mo̱ni, jangame̱n no̱ngo̱ bedomsedi ba be̱ne̱ longe̱ di wam nde o mulemlem a ponda di be̱ pe̱ skwe̱. Nik’e mapula kwala ná di si ko̱ o lambi la no̱ngo̱ beto̱m be s’angame̱n to̱ tombise̱ ponda o jombwea mabe̱ne̱ masu. Di no̱nge pe̱ jangame̱ye̱ ná di si tingame̱ na mabe̱ne̱ masu. (Mat. 6:19, 24) Yen ebe dube̱ lasu di me̱nde̱ we̱le̱be̱ o kekise̱ jombwea bema na mambo mape̱pe̱ niponda jeno̱ jenge̱le̱ su la yen ebe̱yed’a mambo.

“E MAPULA NÁ LO BE̱ TITIMBE̱”

15. Ońola nje e tano̱ e pula ná kriste̱n ya Bonahebe̱r i be̱ titimbe̱ e?

¹⁵ Dube̱ la kriste̱n ya Bonahebe̱r di wusa  we̱le̱be̱ o kekise̱ niponda bete̱medi ba Yudea be tano̱ be bata be̱ ngińa. (Bon. 10:36) To̱ná kriste̱n ya Bonahebe̱r iwo̱ i lembe̱no̱ mitakisan minde̱ne̱, jita labu di timbi nde kriste̱n ponda musango mu tano̱. Paulo a kwali ná to̱ná ba lembe̱no̱ mitakisan minde̱ne̱ mena mi we̱le̱ dube̱ labu o kekise̱, ba si ta ba mátaka kapo̱ ka Yesu, nika ńe nde ná nate̱na o kwedi. (Bon. 12:4) Bato ba Bonayuda ba ta ba bata linga ba bata pe̱ be̱ njo, ońolana jita la Bonayuda ba ta ba timba kriste̱n. Mimbu to̱ mininga ombusa, dibo̱to̱ la bato di ko̱ye̱ Paulo o Yerusalem ponda a tano̱ a te̱ dikalo. Buka na 40 ma Bonayuda ba kwali ná “ba komabe̱le̱ eboma, yete̱na ba dedi to̱ ńo̱ esibe̱ ná ba bo Paulo.” (Bebolo 22:22; 23:12-14) To̱ná ba tano̱ ba singabe̱ ba takisabe̱ pe̱, yi kriste̱n i ta yangame̱n benga ko̱to̱me̱ ońola jowe̱, te̱ dikalo la myango ma bwam, na benga jouse̱ dube̱ labu.

16. Ne̱ni leta la Bonahebe̱r leno̱ ná longwane̱ biso̱ o je̱ne̱ tombwane̱ mitakisan mi mawanano̱ e? (Bonahebe̱r 12:7)

¹⁶ Nje e wusa jongwane̱ kriste̱n ya Bonahebe̱r o lembe̱ mitakisan ba tano̱ ba be̱ne̱ e? Paulo a ta a pula ná be̱ne̱ tombwane̱ lena lembe̱ la mitakisan di wusano̱ wanea babo̱. A teleye̱ so̱ ná Loba e ná ese̱le̱ ná dube̱ labu di wele̱be̱ o kekise̱ o bwam ba longa babo̱. (Langa Bonahebe̱r 12:7.) Be belongedi be ná bongwane̱ o be̱ne̱ na jouse̱ bede̱mo bena Loba a dolisanno̱. E wusa be̱ kriste̱n ya Bonahebe̱r lambo di bo̱bi o lembe̱ yete̱na be̱n tombwane̱ lena mitakisan mi wusano̱ wanea babo̱.—Bon. 12:11.

17. Nje Paulo oko̱no̱ jombwea lembe̱ la mitakisan e?

¹⁷ Paulo ome̱le̱ kriste̱n ya Bonahebe̱r ná i lembe̱ mitakisan na ngiń’a mulema esibe̱ bo̱bo̱. A ta a te̱nge̱ne̱ o bola babo̱ ma malea. Kana a se̱le̱no̱ takise̱ kriste̱n, a ta a bia nje ba lembe̱no̱. A ta pe̱ a bia ne̱ni lembe̱ mitakisan. A lembe̱ ńai na ńai a mitakisan  ombusa mo̱ timba kriste̱n. (2 Kor. 11:23-25) Paulo a ta so̱ a bia bwambwam nje e ta e pula o lembe̱. Ome̱le̱ yi kriste̱n ná, ye te̱ lembe̱ mitakisan, ba lakisane̱ nde Yehova seto̱ babo̱me̱ne̱. Paulo a wusa kwala na ngiń’a mulema ná: “Sango [Yehova] nde e jongwane̱ lam, na si mabwa bo̱ngo̱.”—Bon. 13:6.

18. Mo̱ bia la nje e me̱nde̱ bolane̱ kie̱le̱ ni maye̱ le ná longwane̱ biso̱ o lembe̱ mitakisan e?

¹⁸ Bonasango asu bō̱ be o lembe̱ mitakisan tatan. Je ná di sue̱le̱ babo̱ tongwea na mika masu, to̱ ponda iwo̱, wanea babo̱ jongwane̱ di mapule̱ babo̱. (Bon. 10:33) Nde Bibe̱l e makwala ná bwē ná, “be̱se̱ bena ba mapule̱ dangwane̱ longe̱ la dube̱ la Loba o Kristo Yesu ba me̱nde̱ kusa mitakisan.” (2 Tim. 3:12) Ońola nika, biso̱ be̱se̱ jangame̱n boṅsane̱ ońola pond’a bobe ńe o po̱. Di benge lakisane̱ Yehova na mulema mwese̱, na be̱ pe̱ mbaki ná a me̱nde̱ jongwane̱ biso̱ o lembe̱ to̱ njika mitakisan mi me̱nde̱ ko̱ye̱ biso̱. O ponda ni te̱nge̱n a me̱nde̱ lo̱ko̱ baboledi bao ba jemea be̱se̱.—2 Tes. 1:7, 8.

19. Nje jeno̱ ná di bola o bo̱ṅsane̱ ońola ndenge̱ ninde̱ne̱ e? (Ombwa pe̱ duta.)

¹⁹ Esibe̱ penda leta la Bonahebe̱r Paulo a tilino̱ longwane̱ kriste̱n ya ebwe’a mbu yaboso o boṅsane̱ ońola ndenge̱ ninde̱ne̱ ni wusa ko̱ye̱ babo̱. Paulo ome̱le̱ bonasango ao ná bokwe Eyal’a Loba o njiba, ba bate pe̱ so̱ṅtane̱ mo̱. Bola la nika di wusa jongwane̱ babo̱ o jemba na banga bupe̱ belēdi bena be wusa bo̱bise̱ dube̱ labu. Ome̱le̱ pe̱ babo̱ ná bouse̱ dube̱ labu ná ba pomane̱ bupe̱ bediedi ba Yesu na ba ba bena ba madie̱le̱ mwemba. Ongwane̱ pe̱ babo̱ o lembe̱ mitakisan na titimbe̱, nde be̱ne̱ pe̱ mi mitakisan ka epolo e bolabe̱ babo̱ o longabe̱ na Sango abu ńa ndolo. Biso̱ pe̱ di bupe̱ ma malea ma mawe̱ o Bibe̱l. Di me̱nde̱ so̱ we̱le̱ lembe̱ na jemea nate̱na o su.—Bon. 3:14.