Y’epasi e makwala ná: “O me̱ne̱ te̱ tusabe̱ la batuedi na penge̱ la mbale̱ na la muka mu te̱m o’kombo, o si ńaka ońol’ao. Ebanja ńasam mō̱ te̱ e owas’a nune̱ nu buki mo̱, nde nu peti jasame̱ e omo̱ń a babo̱ be̱se̱.”​—Mul. 5:8.

O je̱ne̱ la mot’a benama, yen epasi e mapula nde kwalea manea mena ma be̱n doi la byanedi. Nde di bati te̱ dutea, di me̱ne̱ ná e mabonde̱ pe̱ mbale̱ jombwea Yehova, nika e malo̱ko̱ biso̱ na bola pe̱ biso̱ mbaki.

Mulangwedi 5:8 e makwalea nde ońola mwanedi nu mabande̱ mutuedi, na nu mapenge̱ muka mu te̱m. Nu mwanedi a s’angame̱n dimbea ná moto nupe̱pe̱ nu be̱n epolo yasam buka mo̱ to̱ doi la byanedi buka mo̱ o janea e o je̱ne̱ mo̱. Mbale̱ ńe nde ná manea mape̱pe̱ me mena masam buka mo̱. Nje ye ndutu ye nde ná man manea me̱se̱ me nde bato ba titi mbale̱, ba mabanda pe̱ ba bena be owas’abu.

Nde to̱ mambo ma be̱ nde bobe nē̱, je ná di be̱ne̱ lo̱ko̱mea ońolana di bi ná Yehova a me̱ne̱ bāsam ba maneye̱ bato. Je ná jakwane̱ Yehova, di we̱le̱ mutaka masu omo̱ń ao. (Mye. 55:23; Fil. 4:6, 7) Di bi ná “miso̱ ma Yehova ma mayo̱mbo̱ o wase ńe̱se̱, o jembe̱ ba bena ba boli mo̱ mulema mabu mwe̱se̱.”​—2 Mya. 16:9.

Ke̱ di maso̱ṅtane̱ so̱ ná Mulangwedi 5:8 e mo̱nge̱le̱ nde biso̱ bete̱medi ba manea ma nin wase​—janea te̱ di be̱n dipe̱pe̱ le omo̱ń ao. Nje ye mweńa buka me̱se̱ ye nde ná y’epasi e mongwane̱ biso̱ o so̱ṅtane̱ ná Yehova asam buka be̱se̱, e, mo̱ nde a peti jasame̱. E o die̱le̱ tatan tongwea na Mun’ao, Yesu Kristo, Kiṅ’a Janea la Loba. Ńangum nu me̱ne̱ be̱se̱ na me̱se̱, a te̱m na sim o me̱se̱, name̱ne̱ pe̱ na Mun’ao.