Bome na bito ba bolane̱le̱ kakane̱ la diba ba me̱ne̱ nde diba labu ka mulatako mwe po̱ko̱po̱ko̱; nika e mawanea pe̱ babo̱ mbo̱le̱. Mubaedi te̱ e mbaki ná nune̱ a me̱nde̱ londise̱ kakane̱ lao, to̱ e be̱ nde o pond’a mitakisan.

Babaedi bō̱ ba me̱ne̱ ná be eto̱m o ja mwemba ońolana mako̱m na mbia mabu ba si me̱nde̱ bwane̱ jabane̱ labu muńe̱nge̱. Nde kakane̱ lena di se̱medi o ndolo na o edube nde le mweńa buka me̱se̱.

BETE̱SEDI BA BIBE̱L: “Mome pe̱ a s’ese̱le̱ munj’ao.”​—1 Korinto 7:11.

“O si mapomane̱ linga yete̱na o mabola kakane̱ lo̱ngo̱ la diba edube. O le̱le̱m o lakise̱ na o baise̱ milakisan. O me̱ne̱ nde mitakisan ka mikidi nde seto̱ ka mambo ma mawane̱ kwed’a diba.”​—Mika.

Mitakisan mi po̱i te̱, babaedi bena ba si bolane̱le̱ kakane̱ ba le̱le̱m o kwala ná, ‘Bede̱mo basu be si ta bowan,’ na babo̱ ba wasa ne̱ni bwa diba labu.

“Bō̱ ba malatise̱ na jo̱nge̱le̱ ná mambo ma si dango te̱ ba mabwa nde diba. Bato ba latise̱ te̱ na jo̱nge̱le̱ la bwa diba, ke̱ ye nde ná ba si boli kakane̱ labu edube botea o bebotedi.”​—Jen.

KEKA WAME̱NE̱

Niponda leno̱ o mutango . . .

• O yo̱ki o jombwe̱ ná o bai mom’ango̱ to̱so̱ munj’ango̱ e?

• O yo̱ki bolane̱ jo̱nge̱le̱ ná we ná o be̱ na moto nupe̱pe̱ e?

• O yo̱ki kwala mambo ka “Na madia wa” to̱so̱ “Na mala wasa nu nu me̱nde̱ to̱nde̱ mba” e?

Yete̱na walabe̱ ná, e, o myuedi mō̱ to̱ buka nika, ke̱ ponda so̱ nin ńa bola kakane̱ lo̱ngo̱ edube.

KWALA NA NU O BAINO̱

• Mo̱ kakane̱ di bolane̱le̱no̱ le o wo̱ye̱ e? Ye te̱ nika, ońola nje e?

• Njika matanga jeno̱ ná di no̱ngo̱ tatan ná di kakane̱ di be̱ ngińa e?

MALEA

• Lomea nu o baino̱ ponda iwo̱ mwe̱ndi ma ndolo

• Te̱se̱ duta la nu o baino̱ o tebed’ango̱ ń’ebolo ná o lee̱le̱ kakane̱ lo̱ngo̱

• Bele̱ mo̱ o telefon buńa te̱ ke̱ we o wum’ebolo to̱ wuma ipe̱pe̱

BETE̱SEDI BA BIBE̱L: “Di lena Loba a latino̱, moto a s’aba so̱ mo̱.”​—Mateo 19:6.