Jalabe̱ la mi myuedi le ná di tukwa mbadi di me̱ne̱no̱ longe̱.

Mo̱ e te̱nge̱n o jo̱nge̱le̱ ná Loba nu weki man mambo ma mpesa me̱se̱ me o wase, ese̱le̱ ná di take e?

Bato bena ba si dube̱ Loba ba me̱ne̱ nde take ka njo̱m po̱ ńa kwala ná Loba a si mombwea biso̱—to̱so̱ ná a titi to̱ mo̱me̱ne̱. Ońol’abu take e malee̱ nde ná (1) Loba a si be̱n ngińa o bo̱le̱ mo̱, (2) a si mapula bo̱le̱ mo̱, to̱so̱ ná (3) a titi to̱ mo̱me̱ne̱.

Mo̱ ońola yin njo̱m nde bato ba matakano̱ na mbale̱ e?

Loba a si weki biso̱ ná di take.

A mapula ná di bwane̱ longe̱ muńe̱nge̱.

“Moto a si dian pe̱ bwam bope̱pe̱, buka te̱ o be̱ muńe̱nge̱ na mutam o pond’ao ńa longe̱, na ná moto e te̱ ná a da na ńo̱ na be̱ mutam o ntu mao mwe̱se̱, ke̱ nika pe̱ ńe nde jabea la Loba.”—MULANGWEDI 3:12, 13.

O bebotedi, Loba a ta a bola bato ba benama baboso baba bete̱medi ba longe̱ be ke̱nge̱nge̱.

A si ta a pula ná babo̱, to̱ bana babu ba take.

“Na Loba a namse̱ babo̱, mo̱ na babo̱ na: Bińo̱ be̱ yadi, lo to̱nde, lo londise̱ wase, lo sibise̱ pe̱ mo̱ owas’ańu.”—BEBOTEDI 1:28.

Bato ba benama baboso baba ba po̱si nde o kwe̱me̱ Loba.

Ba wanedi so̱ babo̱me̱ne̱ na mbot’abu ńe̱se̱ take ninde̱ne̱.

“Ońola nika, kana bobe bo po̱ino̱ nde o wase ońola moto mō̱, kwedi pe̱ ońola bobe, nika nde kwedi e tombedino̱ na bato be̱se̱, ońolana be̱se̱ ba boli bobe.”—ROMA 5:12. *

Loba a si weki biso̱ ná di die̱le̱ biso̱me̱ne̱.

Di si wekabe̱ ná di die̱le̱ biso̱me̱ne̱ ka nje te̱ di titino̱ ná di ja owas’a madiba.

“Mudangwedi a si mate̱se̱ye̱ mo̱me̱ne̱ matanga ma lo̱ndo̱ lao.”—YEREMIA 10:23.

Loba a si mapula ná di take.

A mapula ná di bole nje ye̱se̱ ye o ngud’asu ná di sambe mambo me ná ma bola ná di take.

“O̱, o sengane̱ te̱ myeka mam e! Musango mo̱ngo̱ mu wusa be̱ ka mo̱pi ma madiba.” —YESAYA 48:18.