Wasa bia nje ye mbale̱
Nje ye njo̱m
O jita la ngedi, ndando e se̱medi nde o mambo ma titi mbale̱. Jombweye byembilan bō̱ ba nika:
-
Basango b’ebolo bō̱ ba dube̱ ná bito ba titi ná ba bola bebolo be mabaise̱ dibie̱ dinde̱ne̱ to̱ ngińa.
-
O Europa ńa kwaṅ, ba bake̱le̱ Bajū ná ba we̱le̱ po̱isin o bekukudu ba madiba, na babo̱ ba camane̱ diboa. Owas’a byanedi ba Nasi pe̱, ba num pe̱te̱ Bajū njo̱m ná babo̱ nde ba wan tue o Jaman. Yin njo̱m iba i boli ná ba we̱le̱ babo̱ ndando ńa mańaka, ńena ni si bo̱i ná bambam nate̱na we̱nge̱.
-
Bato jita ba makwala ná moto te̱ nu be̱n ele̱m a be̱n mulema ma bobe.
Bato bena ba madube̱ mpoṅ ka min, ba mabolane̱ byembilan be si te̱nge̱n o sue̱le̱ ndando ba mapo̱ngo̱no̱. Ba mo̱nge̱le̱ pe̱ ná moto a si me̱ne̱ te̱ mambo ka babo̱ ke̱ a si bi nde.
Bete̱sedi ba Bibe̱l
“Pas’a dibie̱ e si do̱li.”—MINIA 19:2.
Nika ńe nde ná nje e? Di si bi te̱ nje ye mbale̱, di mano̱ngo̱ bedomsedi ba bobe. Di dube̱ te̱ mpoṅ o mulopo ma nje ye mbale̱, di me̱nde̱ kaise̱ bato bobe.
Ne̱ni bia nje ye mbale̱ di mongwane̱no̱
Di bi te̱ nje ye mbale̱ ońola bato, di si me̱nde̱ pomane̱ dube̱ mambo ma titi mbale̱ bato jita ba makwalano̱ ońol’abu. Nde di so̱ṅtane̱ te̱ ná ba si langwedi biso̱ mbale̱ ońola pat’a bato po̱, je ná di botea baise̱ biso̱me̱ne̱ nga nje ye̱se̱ di tano̱ jo̱nge̱le̱ ońola yine̱ pat’a bato ipe̱pe̱ ye mbale̱.
Nje weno̱ ná o bola
-
O si dimbea ná mambo me̱se̱ ma makwalabe̱ ońola pat’a bato iwo̱ ma titi mbale̱ ońola babo̱ be̱se̱.
-
Emba ná we ná o si bie mambo me̱se̱ jombwea bane̱.
-
Wasa bia nje ye mbale̱ o wuma ye mbaki.
