JOKWA 12
Nje e me̱nde̱ jongwane̱ wa o walane̱ jokwa lo̱ngo̱ la Bibe̱l oboso e?
Jokwa la Bibe̱l le muse̱ṅ. Nde le ná di si be̱ lambo di bo̱bi o bola ponda ye̱se̱. Ponda iwo̱, we ná o baise̱ nga o me̱nde̱ walane̱ jokwa lo̱ngo̱ la Bibe̱l oboso. Nde ońola nje yeno̱ mweńa ná o po̱nge miwe̱n o walane̱ mo̱ oboso e? Nje pe̱ ye ná yongwane̱ wa o be̱ titimbe̱ to̱ na mitakisan e?
1. Ońola nje jokwa la Bibe̱l leno̱ mweńa e?
“Eyal’a Loba ye longe̱ na ngińa.” (Bonahebe̱r 4:12) Bibe̱l ńe mweńa ońolana e mabīse̱ mo̱nge̱le̱ ma Loba na nje a masengano̱ ońol’ango̱. E si mongwane̱ wa buka te̱ o be̱ne̱ so̱ṅtane̱, nde na dibie̱ la mbale̱ pe̱ na dipita. Nde buka nika, Bibe̱l e mongwane̱ wa o be̱ diko̱m la Yehova. O mokwa te̱ Bibe̱l, o mese̱le̱ nde ná ngiń’ao e tukwe longe̱ lo̱ngo̱ o mbad’a bwam.
2. Ońola nje jangame̱nno̱ jemba mweńa ma mbale̱ ye o Bibe̱l e?
Mbale̱ ye o Bibe̱l ye nde ka bema ba tiki. Ońola nika nde Bibe̱l e mome̱le̱no̱ biso̱ ná: “Anda mbale̱, nde o s’andise̱ mo̱.” (Minia 23:23) Jo̱nge̱le̱ te̱ mweńa ma yi mbale̱ ye o Bibe̱l, di mapo̱ngo̱ miwe̱n o walane̱ jokwa lasu oboso, to̱ o ponda di makusano̱ mitakisan.—Langa Minia 2:4, 5.
3. Ne̱ni Yehova eno̱ ná ongwane̱ wa o walane̱ jokwa lo̱ngo̱ oboso e?
Yehova ńe Muweked’ango̱ ńangum na diko̱m lo̱ngo̱, a mapula jongwane̱ wa o jokwa bia mo̱. E ná a bola wa “jemea na [ngiń’a] bola.” (Langa Filipi 2:13.) Ońola nika so̱, yete̱na ponda iwo̱ e mapula pe̱te̱ wa ńo̱ngi o jokwa to̱ o we̱le̱ nje o mokwano̱ o ebolo, e ná ongwane̱ wa. Yete̱na e mapula pe̱te̱ wa ngińa o buka mitakisan, e pe̱ ná a bola wa mo̱. Baise̱ Yehova ponda ye̱se̱ o muka ná ongwane̱ wa o walane̱ jokwa lo̱ngo̱ la Bibe̱l oboso.—1 Tesalonika 5:17.
ALA O NJIBA
Okwa ne̱ni weno̱ ná walane̱ jokwa lo̱ngo̱ la Bibe̱l oboso to̱ e be̱ nde ná o walame̱n to̱ ke̱ bato ba mate̱nge̱ne̱ wa. Nde wombweye pe̱ ne̱ni Yehova a me̱nde̱no̱ jongwane̱ wa o be̱ titimbe̱.
4. Bola ná jokwa lo̱ngo̱ la Bibe̱l di be̱ wa mweńa jita
Ponda iwo̱ je ná je̱ne̱ ná di walame̱n nái di si be̱nno̱ ponda ndongo ońola jokwa la Bibe̱l. Nje ye ná yongwane̱ biso̱ e? Langa Efeso 5:16, nde lo kwaleye pe̱ ońola min myuedi:
-
O mo̱nge̱le̱ ná ońola njika mambo mō̱ me mweńa jita wangame̱nno̱ “bolane̱ ponda bwam” e?
-
Nje weno̱ ná o bola ná o no̱nge jokwa lo̱ngo̱ la Bibe̱l mweńa jita e?
-
O londe̱ te̱ mulonga na mukoko nde o pula bata madale, madale ma si me̱nde̱ jingea
-
Nde o se̱le̱ te̱ we̱le̱ madale, o mabe̱ne̱ epolo o bata mukoko. Nika pe̱ nde, o we̱le̱ te̱ mambo me mweńa jita o epol’a boso o longe̱ lo̱ngo̱, o me̱nde̱ we̱le̱ bola mo̱ nde o diane̱ pe̱ ponda ońola mane̱
Jokwa la Bibe̱l di mabola ná di londise̱ ńo̱ng’asu ya mudī, nika ńe nde ńo̱ng’asu ńa bia na jowe̱ Loba. Langa Mateo 5:3, nde lo kwaleye pe̱ ońola min myuedi:
-
Nje di matombwane̱no̱ ke̱ di no̱ngi jokwa lasu la Bibe̱l mweńa jita e?
5. Be̱ titimbe̱ owas’a mitakisan
Ponda iwo̱, bane̱ be ná ba keka bo̱bise̱ wa ná o s’okwa pe̱ Bibe̱l. Ombwa eyembilan a Francesco. Ombwa SINIMA, nde lo kwaleye pe̱ ońola myuedi mi mabupe̱.
-
O ni sinima, nje mako̱m ma Francesco na mbia mao ba bolino̱ ponda a langwedino̱ babo̱ nje a tano̱ okwa e?
-
Njika bowe̱n a kusino̱ ońola be̱ lao la titimbe̱ e?
Langa 2 Timoteo 2:24, 25, nde lo kwaleye pe̱ ońola min myuedi:
-
Nje mbia na mako̱m mo̱ngo̱ ba mo̱nge̱le̱no̱ ońola mambo weno̱ jokwa e?
-
Bupisane̱ yen epas’a Bibe̱l, ne̱ni wangame̱nno̱ bolea yete̱na moto a titi muńe̱nge̱ ná we o jokwa Bibe̱l e? Ońola nje pe̱ e?
6. Lakisane̱ Yehova ná ongwane̱ wa
Nika di masiseano̱ Yehova be̱be̱, di mabata be̱ne̱ ńo̱ng’a do̱lisane̱ mo̱. Nde ye ná e be̱ biso̱ ndutu o tukwa longe̱ lasu ná di be̱ kaponda bete̱sedi ba Loba. Yete̱na nika e mápo̱ye̱ wa, o si bo̱bo̱. Yehova a me̱nde̱ jongwane̱ wa. Ombwa SINIMA, nde lo kwaleye pe̱ ońola myuedi mi mabupe̱.
-
O ni sinima, njika mawengisan Jim a po̱ngino̱ ná a do̱lisane̱ Yehova e?
-
Nje e matape̱ wa o eyembilan ao e?
Langa Bonahebe̱r 11:6, nde lo kwaleye pe̱ ońola min myuedi:
-
Nje Yehova a mabolano̱ ba bena ba “mapulise̱ mo̱” na mbale̱, nika ńe nde ba bena ba makeke̱ na ngińa o bia mo̱ na do̱lisane̱ mo̱ e?
-
Nje nika e malee̱no̱ wa jombwea ne̱ni Yehova a masengano̱ ke̱ a me̱ne̱ wa o mapo̱ngo̱ miwe̱n o jokwa Bibe̱l e?
MOTO E NÁ A BAISE̱ NÁ: “Ońola nje o mokwano̱ Bibe̱l e?”
-
O malabe̱ nde ná nje e?
EBONGOLO
To̱ná jokwa la Bibe̱l di titino̱ lambo di bo̱bi ponda ye̱se̱, le ná longwane̱ wa o be̱ne̱ longe̱ le bonam o bwindea. Benga lakisane̱ Yehova, nde a me̱nde̱ bola wa bowe̱n.
Ndimbisedi
-
Ońola nje mbale̱ ye o Bibe̱l yeno̱ wa tiki e?
-
Ne̱ni weno̱ ná wemba mambo me mweńa jita e?
-
Ońola nje wangame̱nno̱ baise̱ Yehova jongwane̱ ná walane̱ jokwa lo̱ngo̱ la Bibe̱l oboso e?
BATA WASA
Ombwea myano mine̱i mongwane̱ bato jita o bia bolane̱ pond’abu na dibie̱.
“Ne̱ni bolane̱ pond’ango̱ na dibie̱” (Umwe̱!, Ngo̱nde̱ 2014)
E̱ne̱ ne̱ni Yehova ongwane̱no̱ muto mō̱ nu ta nu be̱ne̱ mome nu si ta nu so̱ṅtane̱ miwe̱n a tano̱ a po̱ngo̱ o do̱lisane̱ Loba.
E̱ne̱ ne̱ni moto mō̱ a tombwane̱no̱ ońola titimbe̱ ńa munj’ao.
Ponda iwo̱, ba manuma Mboṅ a Yehova njo̱m ná i mabule̱le̱ mbia. Mo̱ nika ńe mbale̱ e?
“Mo̱ Mboṅ a Yehova ye nde babule̱le̱ mbia nga ba mongwane̱ nde o bata lata mo̱ e?” (Tema o mulomba)
