JOKWA 34

Ne̱ni jeno̱ ná di lee̱le̱ ná di to̱ndi Yehova e?

OKA

Mo̱ o bati to̱ndo̱ Loba botea ná weno̱ jokwa Bibe̱l e? Mo̱ o mapula bata jouse̱ mulatako mo̱ngo̱ na mo̱ e? Yete̱na e, bia ná nika Yehova a me̱ne̱no̱ ne̱ni ndolo o be̱nedino̱ mo̱ e mańakano̱, nika nde mo̱ pe̱ a me̱nde̱no̱ bata to̱ndo̱ wa na jombwea wa. Ne̱ni weno̱ ná o lee̱le̱ mo̱ ná o to̱ndi mo̱ e?

1.Ne̱ni jeno̱ ná di lee̱le̱ Yehova ná di to̱ndi mo̱ e?

Di malee̱le̱ ná di to̱ndi Yehova ke̱ di masengane̱ mo̱. (Langa 1 Yohane 5:3.) A si mańakisane̱ to̱ moto ná a sengane̱ mo̱. Nde a mabola mō̱ ńasu te̱ epolo o po̱so̱ nga a me̱nde̱ sengane̱ mo̱ to̱ ke̱m. Ońola nje e? Yehova a mapula ná di “sengane̱ na mulema.” (Roma 6:17) Nika e mapula kwala ná a mapula ná o sengane̱ mo̱, seto̱ ońolana wangame̱n bola nika, nde ońolana o to̱ndi mo̱. Janda la mabe̱le̱ ma londe̱ 3 na 4 ma nin kalati le nde ná mongwane̱ wa o lee̱le̱ ndol’ango̱ ońola Yehova tongwea na bola nje e mabwese̱ mo̱ muńe̱nge̱ na banga nje a si to̱ndino̱.

2.Ońola nje yeno̱ ná e be̱ ndutu o lee̱le̱ ndolo di be̱nedino̱ Yehova e?

“Ndut’a nute̱m na sim ye jita.” (Myenge 34:20) Biso̱ be̱se̱ di be̱n bo̱bo̱ di manane̱no̱. Je pe̱ ná di be̱ne̱ ná di lembe̱ pas’a bekusedi, si te̱me̱ la sim na mitakisan mipe̱pe̱. Ponda di be̱nno̱ mitakisan, ye ná e be̱ biso̱ ndutu o bola nje Yehova a mabaise̱no̱ biso̱. Ońolana je ná je̱ne̱ biana banga sengane̱ Yehova nde le lambo di bo̱bi. Nde o boli te̱ nje Yehova a mabaise̱no̱ wa, o malee̱le̱ nde ná o to̱ndi mo̱ buka mambo me̱se̱, na ná we mo̱ jemea. Mo̱ pe̱ a me̱nde̱ be̱ wa jemea. A si me̱nde̱ caka wa tomtom.—Langa Myenge 18:26.

ALA O NJIBA

Okwa ońola nje Yehova eno̱ muńe̱nge̱ ke̱ o masengane̱ mo̱, na nje ye ná yongwane̱ wa o bola nika.

3. Satan a num wa njo̱m

Di malanga o Bibe̱l o kalat’a Hiob ná Satan a num Hiob njo̱m, name̱ne̱ pe̱ na bato be̱se̱ ba mapule̱ boleye̱ Yehova. Langa Hiob 1:1, 6–2:10, nde lo kwaleye pe̱ ońola min myuedi:

Bupisane̱ Satan, ońola nje Hiob a tano̱ a sengane̱ Yehova e?—Ombwa Hiob 1:9-11.
Njika njo̱m Satan a manumano̱ bato be̱se̱, name̱ne̱ pe̱ na wa e?—Ombwa Hiob 2:4.

Langa Hiob 27:5b, nde lo kwaleye pe̱ ońola min myuedi:

Ne̱ni Hiob a lee̱le̱no̱ ná a ta a to̱ndo̱ Yehova na mbale̱ e?

Hiob a lee̱le̱ ná a ta a to̱ndo̱ Yehova ońolana a ta mo̱ jemea

Di malee̱le̱ ná di to̱ndi Yehova yete̱na je mo̱ jemea

4. Bwese̱ mulema ma Yehova muńe̱nge̱

Langa Minia 27:11, nde lo kwaleye pe̱ ońola min myuedi:

Yehova a masenga nde ne̱ni ke̱ we dibie̱ o sengane̱ pe̱ mo̱ e? Ońola nje pe̱ e?

5. We ná o be̱ Yehova jemea

Ndolo di be̱nedino̱ Yehova e matute̱le̱ biso̱ o te̱ye̱ bane̱ dikalo. Di mabola nika to̱ ponda nika e titino̱ bu ebanja di mapula be̱ mo̱ jemea. Ombwa SINIMA, nde lo kwaleye pe̱ ońola myuedi mi mabupe̱.

SINIMA: Lingea dube̱ lo̱ngo̱ to̱ ba te̱nge̱ne̱ nde wa (5:09)

Mo̱ e mápo̱ye̱ wa ná o bwe bo̱ngo̱ o te̱ye̱ bane̱ dikalo e?
O ni sinima, nje yongwane̱ Grayson o buka bo̱ngo̱ bao e?

Ye lambo di wam o be̱ Yehova jemea yete̱na di to̱ndi nje a to̱ndino̱ di singe̱ pe̱ nje a singe̱no̱. Langa Myenge 97:10, nde lo kwaleye pe̱ ońola min myuedi:

Bupisane̱ nje wokono̱, njika mambo mō̱ Yehova a to̱ndino̱ e? Njika mambo mō̱ pe̱ a singe̱no̱ e?
Ne̱ni weno̱ ná wokwa o to̱ndo̱ nje ye bwam na o singe̱ nje ye bobe e?

6. Di sengane̱ te̱ Yehova di matombwane̱

Sengane̱ la Yehova nde le lambo la bwam ponda ye̱se̱. Langa Yesaya 48:17, 18, nde lo kwaleye pe̱ ońola min myuedi:

Mo̱ je ná di dube̱ ná Yehova a bi ponda ye̱se̱ nje ye bwam ońol’asu e? Ońola nje pe̱ e?
Njika tombwane̱ jokwa lo̱ngo̱ la Bibe̱l na bia la Loba la mbale̱ Yehova ba wanedino̱ wa e?

BATO BA MAKWALA NÁ: “Bebolo bam be titi ná be bwese̱ Loba muńe̱nge̱ to̱ ndutu.”