JOKWA 38
Di lee̱ ná longe̱ le biso̱ tiki
Longe̱ le ná di be̱ne̱ jita la mambo ma bwam. To̱ ponda di be̱nno̱ mitakisan, je te̱ nde ná di bwane̱ mambo mō̱ ma longe̱ muńe̱nge̱. Ne̱ni jeno̱ ná di lee̱le̱ masoma ońola jabea la longe̱ e? Nje pe̱ ye njo̱m a boso ni matute̱le̱ biso̱ o bola nika e?
1.Ońola nje jangame̱nno̱ lee̱le̱ masoma ońola longe̱ e?
Jangame̱n lee̱le̱ masoma ońola longe̱ ebanja le nde jabea la Sango asu ńa ndolo, Yehova. Mo̱ nde e “tongo a longe̱,” ebanja mo̱ nde a weki nje ye̱se̱ ye longe̱. (Myenge 36:10) “Mo̱ nde a mabole̱ be̱se̱ longe̱ na we̱i na mambo me̱se̱.” (Bebolo 17:25, 28) Yehova a mabola biso̱ nje ye̱se̱ e mapule̱ ná di be̱ longe̱. A mabola pe̱ ná di we̱le̱ bwane̱ longe̱ muńe̱nge̱.—Langa Bebolo 14:17.
2.Ne̱ni jeno̱ ná di timbise̱le̱ Yehova masoma ońola jabea la longe̱ e?
Botea ponda ńo̱ngo̱ a no̱ngino̱ deme̱ lo̱ngo̱, Yehova a mombwea wa. Mudī musangi mu tute̱le̱ David, muboled’a Loba mō̱ o kwalane̱ mo̱ ná: “Miso̱ mo̱ngo̱ ma ta me̱ne̱ mińa mam me̱se̱, mi ta mi tilabe̱ o kalat’ango̱ obiana mi maya wekabe̱.” (Myenge 139:16) Longe̱ lo̱ngo̱ le Yehova tiki jita. (Langa Mateo 10:29-31.) A mabwa ndutu jita yete̱na moto a boṅsane̱ o bwa ńolo to̱ o bwa moto nupe̱pe̱. a (Bebusedi 20:13) Yehova a mabwa pe̱ ndutu yete̱na jokane̱ longe̱ lasu loko to̱ yete̱na di si no̱ngi jangame̱ye̱ o tata longe̱ la bane̱. Di malee̱le̱ masoma ońola jabea la longe̱ ke̱ di mabongwa longe̱ lasu di bola pe̱ la bane̱ edube.
ALA O NJIBA
Ombwea mbadi iwo̱ weno̱ ná o lee̱ ná jabea la longe̱ le wa tiki.
3. Ombwea ja lo̱ngo̱ la bwam
Ponda kriste̱n e makakane̱no̱ o bolea Yehova, e mabake̱ nde mo̱ longe̱ lao le̱se̱. Ye nde biana e boli nde Loba ńol’ao ka jabea. Langa Roma 12:1, 2, nde lo kwaleye pe̱ ońola min myuedi:
-
Nje yangame̱n tute̱le̱ wa o jombwea ja lo̱ngo̱ la bwam e?
-
O njika mbadi iwo̱ weno̱ ná o bola nika e?
4. No̱ngo̱ jangame̱ye̱ ná moto a si kusa mbeu a ńolo
Bibe̱l e mome̱le̱ biso̱ ná di si bola mambo ma mawane̱ mbeu a ńolo. Ombwa SINIMA ná o bie mambo mō̱ weno̱ ná o bola o samba mbeu a ńolo.
Langa Minia 22:3, nde lo kwaleye pe̱ ne̱ni bińo̱ na bane̱ leno̱ ná lo no̱ngo̱ jangame̱ye̱ o . . .
-
mboa.
-
wum’ebolo.
-
tuna la ńolo.
-
mutoa.
5. Bola longe̱ la muna nu si bedi yabe̱ edube
O mwenge mō̱, David a teleye̱ ná Yehova a mombwea nje ye̱se̱ e mabolane̱ niponda muna eno̱ koka o dibum la ńango. Langa Myenge 139:13-17, nde lo kwaleye pe̱ ońola min myuedi:
-
O miso̱ ma Yehova, longe̱ la moto di mabotea nde ponda ńango a mano̱ngo̱no̱ deme̱ lao nga ponda a mayabe̱no̱ e?
Mbenda Yehova a tano̱ a bola Israel e ta e tata bito ba meme̱ na bana ba ta babo̱ o dibum. Langa Bebusedi 21:22, 23, nde lo kwaleye pe̱ ońola min myuedi:
-
Ne̱ni Yehova a tano̱ e̱ne̱ moto nu mawane̱ kwed’a muna nu si bedi yabe̱, esibe̱ m’boṅsan e?
-
Ne̱ni a wusano̱ senga ke̱ moto a boli nika na m’boṅsan e? b
-
Nje o mo̱nge̱le̱no̱ ońola je̱ne̱ la mambo la Loba e?
Ye ná e po̱ ná to̱ muto nu mabole̱ longe̱ edube o̱nge̱le̱ ná angame̱n nde kwese̱ deme̱ ye̱ke̱i te̱. Langa Yesaya 41:10, nde lo kwaleye pe̱ ońola min myuedi:
-
Be te̱ ńakisane̱ muto ná a kwese̱ deme̱, omboa nja angame̱nno̱ wasa jongwane̱ e? Ońola nje pe̱ e?
BATO BA MAKWALA NÁ: “Muto a be̱n bwam o kwese̱ deme̱ ebanja ńol’ao ni.”
-
Nje e mabole̱ wa mbaki ná longe̱ la mut’a deme̱ na la muna ńe mo̱ o dibum be Yehova tiki e?
EBONGOLO
Bibe̱l e malee̱ biso̱ ná longe̱ le nde jabea la Yehova. Jangame̱n to̱ndo̱ longe̱ lasu na la bane̱, di bola mo̱ edube, di tata pe̱ mo̱.
Ndimbisedi
-
Ońola nje longe̱ la moto leno̱ Yehova tiki e?
-
Ne̱ni Yehova a masengano̱ ke̱ moto a bo moto nupe̱pe̱ na m’boṅsan e?
-
Ońola nje o matimbise̱le̱no̱ Loba masoma ońola jabea la longe̱ e?
BATA WASA
Ne̱ni jeno̱ ná di timbise̱le̱ Yehova masoma ońola jabea la longe̱ e?
Langa jalabe̱ la min myuedi: Mo̱ Loba e ná a lakise̱ muto nu kwese̱ deme̱ e?
“Nje Bibe̱l e makwalano̱ ońola kwese̱ la deme̱ e?” (Tema o mulomba)
E̱ne̱ ne̱ni jo̱nge̱le̱ la Loba ońola longe̱ jangame̱nno̱ die̱le̱ mbadi di malonge̱le̱no̱ ńolo.
E̱ne̱ ne̱ni Bibe̱l ńeno̱ ná ńongwane̱ moto nu mapule̱ bwe̱ ńolo.
“Na mapula wo̱—Mo̱ Bibe̱l ńe ná ńongwane̱ mba yete̱na na mapula bwa ńolo e?” (Tema o mulomba)
a Yehova a mombwea babe̱ne̱ milema mi ńo̱sedi. (Myenge 34:19) A maso̱ṅtane̱ ndutu ńe ná ni bola ná bato ba pule o bwa ńolo, a mapula pe̱ jongwane̱ babo̱. Langa tema “Na mapula wo̱—Mo̱ Bibe̱l ńe ná ńongwane̱ mba yete̱na na mapula bwa ńolo e?” ńe o dongo Bata Wasa o din jokwa, ná we̱ne̱ ne̱ni Yehova eno̱ ná ongwane̱ moto ná a si bwa ńolo.
b Ba bena ba kwese̱ deme̱ ba s’angame̱n taka o mulema buka dime̱ne̱. Yehova e ná a lakise̱ babo̱. O mapula te̱ bia mambo mape̱pe̱ jombwea nika, langa tema “Nje Bibe̱l e makwalano̱ ońola kwese̱ la deme̱ e?” o dongo Bata Wasa o din jokwa.
