Yehova a boli bato ba benama jabea la mańaka, lena le nde jabea la to̱po̱ bwambo. Mbadi di mabolane̱no̱ di jabea ńe so̱ mweńa o miso̱ mao. (Langa Yakobo 1:26.) Ne̱ni jeno̱ ná di bola Yehova edube na byala basu e?

1. Ne̱ni jangame̱nno̱ bolane̱ jabea la to̱po̱ bwambo e?

Bibe̱l e malangwea biso̱ ná: “Bińo̱ omane̱le̱ na longisane̱ mō̱ na nune̱.” (1 Tesalonika 5:11) Mo̱ o bi bato bena ba be̱n ńo̱ngi ná bembe̱ babo̱ e? Nje weno̱ ná o bola ná ba senge bwam e? Langwea babo̱ ná be wa mweńa. We pe̱ ná o langwea babo̱ njik’ede̱mo abu o to̱ndino̱. Mo̱ we o jo̱nge̱le̱ epas’a Bibe̱l yena ye ná yembe̱ moto mō̱ o bino̱ e? Di be̱n jita la bepasi weno̱ ná o bolane̱. O si dimbea pe̱ to̱ ná mbadi o makwalano̱ lambo ńe ná e lo̱ko̱ moto jita. To̱po̱ so̱ ponda ye̱se̱ na muyao.—Minia 15:1.

2. Njika byala jangame̱nno̱ banga e?

Bibe̱l e makwala ná: “Eyal’a bobe e si busa o mudumbu mańu.” (Langa Efeso 4:29.) Nik’e mapula nde kwala ná di s’angame̱n be̱ne̱ beto̱pedi ba mbindo to̱ bolane̱ byala o bwam ba lingise̱ bane̱ to̱ bwese̱ babo̱ ndutu. Jangame̱n pe̱ banga miso̱si na minda.—Langa Minia 16:28.

3. Nje e me̱nde̱ jongwane̱ biso̱ o be̱ne̱ byala be malongisane̱ e?

O jita la ngedi nje di makwalano̱ e malee̱ nde nje ye biso̱ o mulema na o mo̱nge̱le̱. (Lukas 6:45) Jangame̱n so̱ po̱ngo̱ miwe̱n ná jo̱nge̱le̱ nde mambo ma bwam, nika ńe nde mambo mena ma te̱m ná sim, me ko̱nji, ma to̱ndo̱be̱ na ma mawe̱le̱ sesabe̱. (Filipi 4:8) Ná jo̱nge̱le̱ nde ninka mambo, jangame̱n bia po̱so̱ mbadi di malonge̱le̱no̱ ńolo, name̱ne̱ pe̱ na mako̱m masu. (Minia 13:20) Ye pe̱ bwam ná di se̱le̱ dutea obiana di mato̱po̱, di baise̱ pe̱ biso̱me̱ne̱ ne̱ni byala basu be me̱nde̱no̱ tapa bane̱. Bibe̱l e makwala ná: “Eto̱pe̱to̱pe̱ ye bowoli ka po̱, nde eyem’a badibie̱ e majesane̱ bwam.”—Minia 12:18.

 ALA O NJIBA

4. Alea eyem’ango̱

E yo̱ki po̱ye̱ biso̱ be̱se̱ ná di kwale lambo nde jombwe̱ mo̱ ombusa ponda. (Yakobo 3:2) Langa Galatia 5:22, 23, nde lo kwaleye pe̱ ońola min myuedi:

• Njika bede̱mo oteten a ben o mapulano̱ baise̱ Yehova ná ongwane̱ wa o be̱ne̱, ná o we̱le̱ jalea eyem’ango̱ e? Ne̱ni beno̱ ná bongwane̱ wa e?

Langa 1 Korinto 15:33, nde lo kwaleye pe̱ ońola min myuedi:

• Ne̱ni mako̱m mo̱ngo̱ na mbadi o malonge̱le̱no̱ ńolo beno̱ ná ba be̱ne̱ ngińa omo̱ń a mbadi o mato̱po̱no̱ e?

Langa Mulangwedi 3:1, 7, nde lo kwaleye pe̱ ońola min myuedi:

• O njika bete̱medi yeno̱ ná e be̱ bwam o ja ná pī to̱ o jenge̱le̱ ponda ni te̱nge̱n o to̱po̱ e?

 5. To̱po̱ mambo ma bwam ońola bane̱

6. Kwalisane̱ mbia mo̱ngo̱ na muyao

 EBONGOLO

Byala be be̱n ngińa. Jangame̱n se̱le̱ dutea obiana di mato̱po̱, di po̱so̱ pe̱ ponda di mato̱po̱no̱ na mbadi di mabolano̱ nika.

Ndimbisedi

• O njika mbadi iwo̱ weno̱ ná o bolane̱ eyem’ango̱ o jongwane̱ bane̱ e?

• Njika pat’a byala o mapulano̱ banga e?

• Nje ye ná yongwane̱ biso̱ o to̱po̱ na muyao na o be̱ne̱ byala be malongisane̱ ponda ye̱se̱ e?