Moto te̱ a be̱n bao bebo̱tedi a to̱ndino̱ na ńao mbad’a po̱ngo̱ mpesa. Di bupe̱ te̱ bete̱sedi ba Bibe̱l bō̱ be wam, je ná di be̱ne̱ bebo̱tedi be mabwese̱ biso̱ muńe̱nge̱, nde di do̱lisane̱ pe̱ Yehova. Jombweye so̱ te̱ be bete̱sedi.

1. Njika bete̱sedi bangame̱n die̱le̱ biso̱ ke̱ di mapo̱so̱ bebo̱tedi basu na je̱ne̱ne̱ lasu e?

Jangame̱n po̱so̱ ‘mbo̱ti yangame̱n, di bo̱to̱ ka babe̱ne̱ mbo̱mbo̱ a iso̱n na babie̱ jaleye̱ mańolo,’ di be̱ne̱ pe̱ ponda ye̱se̱ je̱ne̱ne̱ di malee̱ ná di “dube̱ Loba.” (1 Timoteo 2:9, 10) Jombweye bete̱sedi bene̱i be o min myemba: (1) Jangame̱n be̱ne̱ mbo̱ti “yangame̱n.” Ka nje te̱ o makino̱, Mboṅ a Yehova i be̱n ńai na ńai a bebo̱tedi; nde mbo̱t’asu na mbadi di mapo̱ngo̱no̱ mulopo ba masesa Loba di mowe̱no̱. (2) Bo̱to̱ “ka babe̱ne̱ mbo̱mbo̱ a iso̱n” nik’e mapula nde kwala ná di si mabo̱to̱ mbo̱ti i matute̱le̱ bane̱ o be̱ne̱ mo̱nge̱le̱ ma bobe to̱ i mabole̱ ná bato be̱ne̱ nde biso̱. (3) Di malee̱le̱ ná je “babie̱ jaleye̱ mańolo” ke̱ di si mabupe̱ pat’a bebo̱tedi ye̱se̱ na ya po̱ngo̱ mpesa i busi peńa. (4) Je̱ne̱ne̱ lasu jangame̱n lee̱le̱ ponda ye̱se̱ ná di “dube̱ Loba,” ná bane̱ be̱ne̱ ná di mowe̱ nde Loba la mbale̱.—1 Korinto 10:31.

2. Ne̱ni je̱ne̱ne̱ lasu leno̱ ná di tapa bonasango asu e?

To̱ná di be̱nno̱ bwam o po̱so̱ nje di mabo̱to̱no̱, di s’angame̱n dimbea ná bebo̱tedi basu be ná be tapa bane̱. Di mabola me̱se̱ ná di si lingise̱ to̱ moto, o diwengisan di ‘mabwane̱ nde nune̱ nupe̱pe̱ muńe̱nge̱ ońola bwam na ońola longisane̱.’—Langa Roma 15:1, 2.

3. Ne̱ni je̱ne̱ne̱ lasu leno̱ ná di bola bato ńo̱ng’a jowe̱ Yehova e?

Di mapo̱ngo̱ miwe̱n o bo̱to̱ mbo̱ti yangame̱n ponda ye̱se̱, nde di mombwea bebo̱tedi basu tobotobo ke̱ di mala o ndongame̱n na o dikalo. Di si mapula ná je̱ne̱ne̱ lasu di bole ná bato ba si senga mwe̱ndi ma mweńa di mawaneano̱ babo̱. Nde di mapula ná je̱ne̱ne̱ lasu di bole ná “belēdi ba Loba, Musunged’asu, be kuse edube.”—Tito 2:10.

 ALA O NJIBA

4. Je̱ne̱ne̱ la bwam di malee̱ ná di mabola Yehova edube

Nje ye njo̱m a boso ni matute̱le̱ biso̱ o jombwea je̱ne̱ne̱ lasu e? Langa Myenge 47:3, nde lo kwaleye pe̱ ońola min myuedi:

• Jo̱nge̱le̱ te̱ ná je nde baboledi ba Yehova, njika ngińa nika ńangame̱nno̱ be̱ne̱ omo̱ń a mbadi di mabo̱to̱no̱ e?

• Mo̱ o mo̱nge̱le̱ ná ye mweńa ná jombweye je̱ne̱ne̱ lasu ke̱ di mala o ndongame̱n na o dikalo e? Ońola nje pe̱ o makwalano̱ nika e?

 5. Ne̱ni no̱ngo̱ bedomsedi ba bwam jombwea bebo̱tedi basu na je̱ne̱ne̱ lasu

Ombwa SINIMA.

E be̱ ná mbo̱t’asu ye diye̱ to̱ ke̱m, yangame̱n be̱ bosangi na ńai ńangame̱n ońola bete̱medi te̱ di maso̱be̱no̱. Langa 1 Korinto 10:24 na 1 Timoteo 2:9, 10. Ombusa nika, kwalea pe̱ ońola njo̱m i matute̱le̱ biso̱ o banga mbo̱ti yena . . .

• i si sangi to̱ i titi ne̱te̱.

• i mawalame̱ne̱ moto, i wam, to̱ i matute̱le̱ bane̱ o be̱ne̱ mo̱nge̱le̱ ma mbindo.

To̱ná kriste̱n i titino̱ owas’a mbend’a Mose, ni mbenda e mabola ná di bie jo̱nge̱le̱ la Yehova. Langa Ndimbisedi 22:5, nde lo kwaleye pe̱ ońola min myuedi:

• Ońola nje jangame̱nno̱ banga bebo̱tedi na mbad’a po̱ngo̱ mulopo ba mabole̱ ná bome be̱ne̱ne̱ ka bito, bito pe̱ be̱ne̱ne̱ ka bome e?

Langa 1 Korinto 10:32, 33 na 1 Yohane 2:15, 16, nde lo kwaleye pe̱ ońola min myuedi:

• Ońola nje jangame̱nno̱ jombwea ná je̱ne̱ne̱ lasu di si lingise̱ bato o wuma di majano̱ to̱ o mwemba e?

• Njika ńai a bebo̱tedi na ya po̱ngo̱ mulopo bato jita ba be̱nno̱ wuma o majano̱ e?

• Mo̱ o mo̱nge̱le̱ ná ńai iwo̱ i s’angame̱n ońola kriste̱n e? Ońola nje pe̱ e?

 EBONGOLO

Di mano̱ngo̱ te̱ bedomsedi ba bwam jombwea bebo̱tedi basu na je̱ne̱ne̱ lasu, di malee̱le̱ ná di mabola Yehova na bane̱ edube.

Ndimbisedi

• Ońola nje bebo̱tedi basu na je̱ne̱ne̱ lasu beno̱ mweńa ońola Yehova e?

• Njika bete̱sedi bangame̱n die̱le̱ biso̱ ke̱ di mano̱ngo̱ bedomsedi jombwea je̱ne̱ne̱ lasu e?

• Ne̱ni je̱ne̱ne̱ lasu leno̱ ná di be̱ne̱ ngińa omo̱ń a mbadi bato ba me̱ne̱no̱ jowe̱ la mbale̱ e?