1.  Babilon ninde̱ne̱ ńe nde nje e?

2.  Njika ponda Mesia a tano̱ angame̱n je̱ne̱ne̱ o wase e?

3.  Beboledi ba do̱kita be mabolane̱ maya

4.  Jabane̱ la diba

5.  Mińa minde̱ne̱ na mangando

6.  Maboa ma matombeye̱

7.  Bekwali ba ńunga na ba bekaisedi

 1. Babilon ninde̱ne̱ ńe nde nje e?

Ne̱ni di bino̱ ná “Babilon ninde̱ne̱” ńe nde bebasi be kwedi be̱se̱ e? (Bebīsedi 17:5) Jombweye mambo ma malee̱ nika:

• E maso̱be̱ o wase ńe̱se̱. Bibe̱l e makwala ná Babilon ninde̱ne̱ e jai omo̱ń a “mamuti na bekombo.” E be̱n “janea omo̱ń a kiṅ’a wase.”—Bebīsedi 17:15, 18.

• E titi bebokedi ba politik to̱ ba ńunga. “Kiṅ’a wase” na bato ba ńunga ba si me̱nde̱ bumbisabe̱ mwemba na mo̱.—Bebīsedi 18:9, 15.

• E mapo̱tise̱ bato na Loba. E mabelabe̱ ná mut’a mbamba ebanja e lati na manea ná e kuse mo̱ni na beto̱ti bepe̱pe̱. (Bebīsedi 17:1, 2) E mawo̱ndo̱ bato ba matumba me̱se̱. E wan pe̱ kwed’a bato jita.—Bebīsedi 18:23, 24.

Timba o jokwa 13 to̱ti 6

 2. Njika ponda Mesia a tano̱ angame̱n je̱ne̱ne̱ o wase e?

Bibe̱l e ta e bīse̱ ná Mesia a me̱nde̱ nde po̱ o su la 69 ma woki.—Langa Daniel 9:25.

• Njika ponda mu 69 ma woki mu botedino̱ e? O mbu 455 B.P.A, ponda go̱bina Nehemia a po̱ino̱ o Yerusalem o longa mu mundi peńa.—Daniel 9:25; Nehemia 2:1, 5-8.

• Ponda ininga mu 69 ma woki mwindino̱ e? O bedinge̱ ba Bibe̱l bō̱, buńa bō̱ bwe nde mbu mō̱. (Miso̱ngi 14:34; Hesekiel 4:6) Woki te̱ ńe so̱ nde mbu samba. O yen edinge̱, mu 69 ma woki mwindi nde 483 ba mbu (69 x 7).

• Njika ponda mu 69 ma woki mu bo̱ino̱ e? Di so̱nge̱le̱ te̱ 483 ba mbu botea o mbu 455 B.P.A. di mapo̱ nde o mbu 29 P.A. a Nika ńe pe̱ nde ná te̱ite̱i mbu mwena Yesu a dubisabe̱no̱!—Lukas 3:1, 2, 21, 22.

Timba o jokwa 15 to̱ti 5

 3. Beboledi ba do̱kita be mabolane̱ maya

Beboledi ba do̱kita bō̱ be mabolane̱ maya ma muboedi mo̱me̱ne̱. Seto̱ be̱se̱ nde kriste̱n i makasano̱. K’eyembilan kriste̱n e si mabola maya mao, e si memea pe̱ to̱ ná ba kombe̱ maya mao ná ba bolane̱ mo̱ ke̱ ba nidoma mo̱.—Ndimbisedi 15:23.

Nde kriste̱n ńe ná ńemea beboledi bepe̱pe̱ ka no̱ngo̱ la maya o wasa diboa, hemodialyse, hemodilution, bolane̱ la maya ma busi o pond’a doma to̱ bolane̱ la masin ma matimbane̱ mulema na besaosao. Kriste̱n te̱ nde ńangame̱n no̱nge̱ bedomsedi ba ne̱ni ba me̱nde̱no̱ bolane̱ maya mao o pond’a doma, ońola muwaso ma maboa, to̱ ońola beboledi bepe̱pe̱. Son a diwengisan ye ná e be̱ o mbadi do̱kita te̱ di mabolano̱. Ońola nika kriste̱n ńangame̱n wasa bia bwambwam ne̱ni ba me̱nde̱no̱ bolane̱ maya mao, obiana e memea ná ba no̱nge mo̱ maya ońola muwaso ma maboa, ba dome mo̱, to̱ eboledi epe̱pe̱. Kriste̱n te̱ ńombweye myuedi mi mabupe̱:

• Dongo diwo̱ la maya mam le te̱ yo̱mbo̱ wala o bepongolo, nde masin ma mayo̱mbise̱ mo̱ membe̱ ońola son a ponda, mo̱ doi lam la mulema di me̱nde̱ bola ná ne̱ne̱ ná ma maya ma dia nde mam e, ná ma s’angame̱n komabe̱ “o wase” e?—Ndimbisedi 12:23, 24.

• Yete̱na eboled’a do̱kita ewo̱ e mabaise̱ ná dongo diwo̱ la maya mam di no̱ngo̱be̱, di sangisabe̱, nde ba timbise̱le̱ mba mo̱ o ńolo, mo̱ doi lam la mulema lokwabe̱le̱ na Bibe̱l di me̱nde̱ kaise̱ mba nga di me̱nde̱ jese̱le̱ ná nemeye y’eboledi e?

Timba o jokwa 39 to̱ti 3

 4. Jabane̱ la diba

Eyal’a Loba e makwala ná mome na muto ba s’angame̱n jabane̱, e makwala pe̱ ná bwē ná babane̱ te̱ to̱ mō̱ ńabu a si be̱n wonja o ba to̱ babe̱ pe̱te̱. (1 Korinto 7:10, 11) Nde o bete̱medi bō̱, kriste̱n iwo̱ ye̱n ná ye bwam ná yabane̱.

• Banga la bongwa mbia na m’boṅsan: Mome a mabanga sombwea mbia mao ńai mu si mabe̱ne̱no̱ pe̱ to̱ mambo ma longe̱ la buńa te̱.—1 Timoteo 5:8.

• Njo ninde̱ne̱: Moto a mabe̱ njo ńai eno̱ ná a sengise̱ munj’ao to̱ mom’ao sese to̱ bwa mo̱.—Galatia 5:19-21.

• Wasa ye̱ke̱i te̱ o bo̱le̱ mulatako moto a be̱nno̱ na Yehova: Moto a mabola me̱se̱ na me̱se̱ ná munj’ao to̱ mom’ao a si bolea pe̱ Yehova.—Bebolo 5:29.

Timba o jokwa 42 to̱ti 3

  5. Mińa minde̱ne̱ na mangando

Kriste̱n i si mano̱ngo̱ dongo o mińa minde̱ne̱ mena Yehova a si do̱lisane̱no̱. Nde kriste̱n te̱ nde ńangame̱n bolane̱ doi lao la mulema lokwabe̱le̱ na Bibe̱l o bia ne̱ni bolea o bete̱medi bō̱ bena be mulatako na mi mińa minde̱ne̱. Byembilan bō̱ ben:

• Moto a some̱le̱ wa buńa bonde̱ne̱ ba bwam. We ná walabe̱ ná “Na som” buka te̱. Yete̱na a baise̱ wa myuedi, we ná o teleye̱ mo̱ ońola nje o si mabolise̱no̱ ni ngando.

• Mom’ango̱ to̱ munj’ango̱ nu titi Mboṅ a Yehova a mapula ná wale na mo̱ o da na mbia mao o buńa bonde̱ne̱ bō̱. Doi lo̱ngo̱ la mulema di die̱le̱ te̱ wa ná wale, we ná o langwea mom’ango̱ to̱ munj’ango̱ ná beboledi bena be titi ba kriste̱n be me̱nde̱ te̱ be̱, o si me̱nde̱ no̱ngo̱ dongo oten.

• So̱ngo̱ ń’ebolo a boli wa musawedi ma mbata o pond’a ngando ya su la mbu to̱ o ngando ipe̱pe̱. Mo̱ wangame̱n banga mo̱ e? O titi eto̱m. Wemedi te̱ mu musawedi, mo̱ so̱ngo̱ ń’ebolo a me̱nde̱ nde je̱ne̱ ná we nde bolise̱ ni ngando e? Nga e nde bola wa mo̱ o lee̱ ná a mabwane̱ ebol’ango̱ muńe̱nge̱ e?

• Moto a boli wa jabea o pond’a ngand’a mbu. E ná a langwea wa ná: “Na bi ná o si mabolise̱ ngand’a mbu, nde na mapula bola wa din jabea.” Yen ebe nu moto a mapula nde lee̱le̱ wa muyao buka te̱. O mune̱ mudi, mo̱ o mo̱nge̱le̱ ná a mapula nde we̱le̱ dube̱ lo̱ngo̱ o kekise̱ to̱ bola ná o no̱nge dongo o bolise̱ la ni ngando e? O bo̱le̱ te̱ jombwea nika ńe̱se̱, wame̱ne̱ nde o mano̱nge̱ bedomsedi o kasa di jabea to̱ ke̱m. Di mapula be̱ne̱ doi la mulema di sangi na be̱ Yehova jemea o bedomsedi basu be̱se̱ di mano̱ngo̱no̱.—Bebolo 23:1.

Timba o jokwa 44 to̱ti 1

 6. Maboa ma matombeye̱

Kana di to̱ndino̱ bato, di mano̱ngo̱ jangame̱ye̱ jita ná di si tombe̱le̱ babo̱ maboa. Di mabola nika e be̱ ná di bi ná di be̱n diboa di matombeye̱ to̱ ke̱ di mo̱nge̱le̱ ná le biso̱ o ńolo. Di mabola nde nika ebanja mbend’a Bibe̱l e makwala ná: “To̱ndo̱ munaso̱ngo̱ ka wame̱ne̱.”—Roma 13:8-10.

Ne̱ni moto nu be̱n diboa di matombeye̱ a malee̱no̱ ná a mabupe̱ ni mbenda e? A s’angame̱n wasa o sokane̱ bane̱ to̱ sopa babo̱. A s’angame̱n pe̱ to̱ linga yete̱na bato bō̱ ba si mabele̱ mo̱ ombo’abu ońolana ba mapula tata mbia mabu. Obiana a madubisabe̱, angame̱n langwea mudie̱le̱ dibe̱le̱ la batudu ná a be̱n diboa di matombeye̱; na nika, ba me̱nde̱ te̱se̱ ná a dubisabe̱ o mbadi ni matate̱ bane̱ bato ba madubisabe̱. Obiana a mabotea yengea moto ońola diba, moto nu mo̱nge̱le̱ ná e ná a be̱ne̱ diboa di matombeye̱ angame̱n wala o do̱kita ná bombwe mo̱ maya ná a bie bete̱medi bao. A boli te̱ nika, a malee̱ nde ná a si mombwea bwam ba mo̱me̱ne̱ buka te̱ nde a mombwea pe̱ “mambo ma bane̱ bape̱pe̱.”—Filipi 2:4.

Timba o jokwa 56 to̱ti 2

 7. Bekwali ba ńunga na ba bekaisedi

Je te̱ o ńunga na moto, to̱ e be̱ nde na kriste̱n nipe̱pe̱, je ná di samba bekwali ke̱ di tili bedomsedi be̱se̱ di mano̱ngo̱no̱ o kalati. (Yeremia 32:9-12) Nde ye ná e po̱ ná kriste̱n i be̱ne̱ si so̱ṅtane̱le̱ jombwea mo̱ni to̱ mambo mape̱pe̱. Yangame̱n pomane̱ sangilane̱ mambo na babo̱me̱ne̱.

Nde ne̱ni jangame̱nno̱ no̱ngea bekwali bende̱ne̱ ka milemsan to̱ minda e? (Langa Mateo 18:15-17.) Yesu a boli biso̱ matanga malalo jangame̱nno̱ bupe̱:

1. Wasa domse̱ y’ekwali na bińo̱me̱ne̱.—Ombwa mwemba 15.

2. Lo si we̱li te̱, baise̱ jongwane̱ la kriste̱n po̱ ńou to̱ iba.—Ombwa mwemba 16.

3. Yete̱na y’ekwali e si dom te̱ nde, niponda nde lo mabele̱no̱ batudu.—Ombwa mwemba 17.

O ngedi jita, di si malane̱ bonasango asu o bekaisedi ebanja nika e makwese̱ dina la Yehova na mwemba mbindo. (1 Korinto 6:1-8) Nde o bete̱medi bō̱, ye ná e pula ná ekwali yale o bekaisedi; k’eyembilan bwa la diba, wonja o jane̱ bana, te̱se̱ mo̱ni ońola da, kusa la mo̱ni ombusa mbeu a ńolo, kwese̱ la diyo to̱ tila la testament. Kriste̱n ńalo te̱ o bekaisedi o domse̱ bekwali ka ben na musango, ke̱ e si kwe̱m malea ma Bibe̱l.

Bobe bonde̱ne̱ bo bolane̱ te̱, ka nangane̱ moto na mińakisan, bolane̱ muna lambo la njo to̱ lena di titi ko̱nji, bolane̱ moto njo, jiba dinde̱ne̱ to̱ ebwan, nde kriste̱n ńalane̱ nink’ekwali o go̱bina ke̱ e si kwe̱m malea ma Bibe̱l.

Timba o jokwa 56 to̱ti 3