Ponda Yehova a bokise̱no̱ ndabo a mbia, a bake̱ nde bayedi mbe̱ ma bana babu. (Kolose 3:20) Ye nde mbe̱ ma bayedi te̱ o jokwe̱le̱ mun’abu ná a to̱nde Yehova a be̱ pe̱ moto ńena ńou. (2 Timoteo 1:5; 3:15) Wangame̱ne̱ pe̱ jokwa bia nje ye mun’ango̱ ńa muto to̱so̱ ńa mome o mulema. O si dimbea ná eyembilan a bwam o malee̱le̱no̱ mo̱, ye mweńa jita. We nde ná wokwe̱le̱ mun’ango̱ Eyal’a Yehova bwam, yete̱na wame̱ne̱ o se̱le̱ we̱le̱ mo̱ o mulema mo̱ngo̱.—Myenge 40:9.

NJE BIBE̱L E MAKWALANO̱: “Be̱ makwasi o senga, nde muńo̱ngo̱ o to̱po̱.” (Yakobo 1:19) Wangame̱n o bola ná bana bo̱ngo̱ ba bie ná be ná ba kwalisane̱ wa na bo̱bise̱ la ńolo. Bangame̱n bia ná we makwasi o senga ke̱ ba be̱n ńo̱ngi o kwalisane̱ wa. Bola ná wuma i be̱ musango ńai ńena beno̱ ná ba pase̱le̱ jo̱nge̱le̱ labu o to̱ njika ponda. (Yakobo 3:18) Ba bi te̱ ná o me̱nde̱ kimea babo̱ na ná o le̱le̱m pe̱ o sa, nika ńena e bola ná ba si tele̱ye̱ wa mulema mabu. Be̱ we̱lisane̱, o langweye pe̱ bana bo̱ngo̱ ponda na ponda te̱ ná o to̱ndi babo̱.—Mateo 3:17; 1 Korinto 8:1.

NJE WENO̱ NÁ O BOLA:

• Le̱le̱me̱ o lambe̱ye̱ bana bo̱ngo̱ toi ponda ye̱se̱ ba be̱nno̱ ńo̱ngi o kwalisane̱ wa

• Kwalisane̱ bana bo̱ngo̱ ponda na ponda te̱, seto̱ bukate̱ ke̱ lambo le̱ne̱ne̱

NJE BIBE̱L E MAKWALANO̱: “Ńajangwa a mabola lambo te̱ na dutea.” (Minia 13:16) Ponda iwo̱ o me̱nde̱ be̱ne̱ ńo̱ngi o so̱ṅtane̱ jo̱nge̱le̱ le ombusa byala ba bana bo̱ngo̱ ná o so̱ besengedi babu ba mulema. Beso̱mbe̱ be ko̱lo̱ngo̱ne̱ kolise̱ bekwali to̱so̱ kwala nje ba si mo̱nge̱le̱no̱ na mbale̱. “Mubole̱ jalabe̱ obiana a maya senga, e nde ńelemā.” ­(Minia 18:13) O si pomane̱ jońa na malinga.—Minia 19:11.

NJE WENO̱ NÁ O BOLA:

• No̱ngo̱ bedomsedi o banga ke̱ mo̱ bwambo to̱so̱ lingane̱ mo̱, to̱ e be̱ nde ná mun’ango̱ e o kwala to̱ nje nde

• O̱nge̱le̱ besengedi bo̱ngo̱ ba mulema ponda wame̱ne̱ o tano̱ muna na nje e ta wa mweńa o miso̱, o mi mimbu

NJE BIBE̱L E MAKWALANO̱: “A mun’am, senga malea ma so̱ngo̱ o si me̱ngise̱ pe̱ t’eyal’a ńo̱ngo̱.” (Minia 1:8) Yehova a boli bayedi babane̱ doi omo̱ń a bana babu. Wangame̱ne̱ jokwe̱le̱ bana bo̱ngo̱ o bola wa edube na sengane̱ pe̱ wa. (Efeso 6:1-3) Bana ba bi ke̱ sango abu na ńango abu ba si lati o “jo̱nge̱le̱ diwo̱.” (1 Korinto 1:10) Yete̱na lo si maso̱ṅtane̱le̱, lo si lee̱le̱ nika oboso ba bana bańu ebanja ná nika ńena e ye̱use̱ bińo̱ o miso̱ mabu.

NJE WENO̱ NÁ O BOLA:

• Bińo̱ kwalea, lo so̱ṅtane̱le̱ pe̱ o ne̱ni lo me̱nde̱no̱ bongwa bana bańu

• Yete̱na mo̱nge̱le̱ mańu me diwengisan jombwea ne̱ni jokwe̱le̱ bana bańu, keka so̱ṅtane̱ jo̱nge̱le̱ la mom’ango̱ to̱so̱ la munj’ango̱

NJE BIBE̱L E MAKWALANO̱: “Lee̱ mūtu ngea angame̱nno̱ tongwea.” (Minia 22:6) Tongwe̱le̱ la jokwe̱le̱ la bana bo̱ngo̱ di si mapo̱ na mo̱me̱ne̱. Bińo̱ langame̱ne̱ o be̱ne̱ ye̱ke̱ite̱ mbad’a jokwe̱le̱ bana, beko̱kisedi pe̱ bangame̱ne̱ so̱lo̱ oten. (Myenge 127:4; Minia 13:1) Mbet’a dibongo e titi bukate̱ beko̱kisedi, e mapula pe̱ ná mun’ango̱ a so̱ṅtane̱ ońola nje o mate̱se̱no̱ mambenda. (Minia 28:7) Okwe̱le̱ pe̱ babo̱ o to̱ndo̱ Eyal’a Yehova na bia pe̱ so̱ṅtane̱ bete̱sedi ba Bibe̱l. (Myenge 1:2) Nika e me̱nde̱ jongwane̱ babo̱ o be̱ne̱ doi la mulema la bwam.—Bonahebe̱r 5:14.

NJE WENO̱ NÁ O BOLA:

• Bola me̱se̱ ná bana bo̱ngo̱ be̱ne̱ Loba ka Diko̱m la mbale̱ beno̱ ná ba lakisane̱

• Ongwane̱ babo̱ o bia jemba na samba nje ye̱se̱ yena e matute̱le̱ moto o bola bobe yená e maso̱be̱ o inte̱rne̱t na o milo­ngwa ma bekwali me oten. Lee̱ babo̱ ne̱ni panda na bato ba manangane̱ bana