Satan na midī mao ma bobe ba si mapula ná o boleye Loba. Ba mapula o pandise̱ moto te̱ na Loba yete̱na ba we̱li. Ne̱ni ba makekano̱ bola nika e? Mbadi po̱ ńe nde tongwea na ebasi e kwedī. (2 Korinto 11:13-15) Ebasi e kwedi yete̱na e si mokwe̱le̱ mbale̱ ni wu o Bibe̱l. Ebasi e kwedī ye nde ka mo̱ni ma bobe​—to̱ mwe̱ne̱ne̱ nde bwam, mu si be̱n ebolo to̱ ewō̱. Mwe ná mu wánse̱ wa myambo jita.

Mpoṅ ma bebasi mu titina mu bwese̱ Yehova, Loba la mbale̱, muńe̱nge̱. Ponda Yesu a ta no̱ o mundi ma wase, ńaṅ l’ebasi diwo̱ di ta di pula bwa mo̱. Mo̱nge̱le̱ mabu ma ta nde ná mbad’abu ńa jowe̱ nde e ta e te̱nge̱ne̱. Ba ná: “Di be̱n nde sango po̱, Loba.” Mo̱ Yesu a kasi nika e? Ke̱m! A kwalane̱ babo ná: “Bińo̱ lo wu nde na sango’ańu Diabolo.” (Yohane 8:41, 44) O we̱nge̱ bato jita ba mo̱nge̱le̱ ná ba mowe̱ Loba, nde o mbale̱ ba mabolea nde Satan na midī mao ma bobe!​—1 Korinto 10:20.

 Kana bwele ba bobe bo mayano̱ bepuma ba bobe, ebasi e kwedī e malonga nde bato bena ba mabole̱ mambo ma bobe. Mundi ma wase mu londi na mpungu ońola mambo ma bobe bato ba mabolano̱. O be̱n mbamba, bewe̱nji, jiba, mabandan, ebwán na mulatako ma mińakisan. Jita la ba ba mabole̱ man mambo ma bobe be o ebasi, nde ebas’abu e si matute̱le̱ babo̱ o bola nje ye bwam. Ba titina ba be̱ mako̱m ma Loba o sumo te̱ ke̱ b’ese̱le̱ bola mambo ma bobe.​—Mateo 7:17, 18.

Ebasi e kwedī e mokwe̱le̱ bato o kane̱ njimbidi. Loba mo̱ ná di si kane̱ njimbidi. Nika e te̱nge̱n. Mo̱ wena o to̱ndo̱ ná, moto a si makwalisane̱ wa tōmtom nde a kwalisane̱ nde edinge̱ding’ango̱ e? Nu moto e ná a be̱ wa diko̱m la mbale̱ e? Ke̱m, a titina. Yehova a mapula ná bato ba kwalisane̱ mo̱, seto̱ njimbidi to̱ edinge̱dinge̱, yena e si be̱n longe̱.​—Bebusedi 20:4, 5.

Ebasi e kwedī e mokwe̱le̱ ná e te̱nge̱n o bwa bape̱pe̱ o pond’a bila. Yesu a kwali ná mako̱m ma Loba ma maleane̱le̱ ndolo mō̱ na nune̱. Di si mabwa bato di to̱ndi no̱. (Yohane 13:35) E si te̱nge̱n to̱ mo̱me̱ne̱ ná di bwe bato ba bobe. Ponda basingedi ba Yesu ba po̱ino̱ damea mo̱, a s’ese̱le̱ bokwedi bao ná bane o bwam ba lingea mo̱.​—Mateo 26:51, 52.

Ebasi e kwedī e mokwe̱le̱ ná babobe ba me̱nde̱ taka o we’a he̱l. Nde, Bibe̱l e mokwe̱le̱ ná bobe bo malenea kwedi. (Roma 6:23) Yehova e nde Loba la ndolo. Mo̱, Loba la ndolo le ná di takise̱ bato o bwindea e? Ke̱m! O Paradisi, ebasi ewo̱ nde e me̱nde̱ be̱, ye yena Yehova a do̱lisanno̱. (Bebīsedi 15:4) Ke̱ bebasi be̱se̱ be se̱medi omo̱ń a mpoṅ ma Satan be mábo̱.