E mapula miwe̱n o be̱ne̱ diko̱m; e mapula pe̱ miwe̱n o jane̱ diko̱m. Miwe̱n mo̱ngo̱ o timba na tika be̱ diko̱m la Loba mi me̱nde̱ namsabe̱. Yesu mo̱ na ba ba dube̱ mo̱ ná : “Mbale̱ e me̱nde̱ tese̱ bińo̱ wonja. ”(Yohane 8:32) Nika e mapula nde kwala ná nje e?

We ná o be̱ wonja we̱nge̱ me̱ne̱. We ná o te̱me̱ wonja na belēdi be kwedi na lobango Satan a lańse̱no̱. We ná o te̱me̱ wonja na ka ni si be̱n dipita ńa lodun la bato lo si bi Yehova (Roma 8:22). Mako̱m ma Loba ma tem wonja na “bo̱ngo̱ ba kwedi.”​—Bonahebe̱r 2:14, 15.

We ná o te̱me̱ wonja o was’a peńa ńa Loba. E se̱ wonja betańsedi o me̱nde̱no̱ be̱ne̱ o mińa mi mapo̱ e! O Paradisi, o me̱nde̱ te̱me̱ wonja na bila, diboa, na ebwán. Wonja na tue na njai. Wonja na bodun na kwedi. Wonja na bo̱ngo̱, mabandan, na ka ni si te̱m na sim. Bibe̱l e makwala ońola Loba ná : “O matele̱ dia longo, na wa o londise̱ ńong’a bewekedi be̱se̱ be longe̱.”​—Myenge 145:16.

Mako̱m ma Loba ma me̱nde̱ be̱ longe̱ o bwindea. Longe̱ la bwindea le  nde jabea la tiki Loba a me̱nde̱no̱ bola be̱se̱ ba mapulise̱ mulatako ma diko̱m na mo̱ (Roma 6:23). Dutea te̱ nje longe̱ di si be̱n su di me̱nde̱no̱ be̱ ońol’ango̱!

O me̱nde̱ be̱ne̱ ponda o bola jita la mambo. Ponda po̱ o ben ńo̱ngi o jokwa joba elongisan ya musiki ewo̱. To̱ so̱ o mapula nde o jokwa pena bedinge̱dinge̱ to̱ be̱ mot’a wedi. We ná o to̱ndo̱ jokwa jombwea byembe to̱ myele. To̱ so̱ ponda po̱ o mapula yenga na je̱ne̱ mindi na bato be diwengisan. Be̱ne̱ longe̱ la bwindea di me̱nde̱ bola ná man mambo me̱se̱ ma we̱le̱ bolane̱!

O me̱nde̱ be̱ne̱ ponda o be̱ne̱ jita la mako̱m. Be̱ o longe̱ o bwindea di me̱nde̱ bola ná o bie jita la bato bape̱pe̱ bena ba timbi be̱ mako̱m ma Loba. O me̱nde̱ bia mabea ba yabane̱no̱, na bede̱mo babu ba bwam, babo pe̱ ba be̱ mako̱m mo̱ngo̱. O me̱nde̱ to̱ndo̱ babo̱, babo̱ pe̱ ba to̱ndo̱ wa (1 Korinto 13:8). Be̱ne̱ longe̱ di si be̱n su di me̱nde̱ bola wa ponda o be̱ diko̱m la moto te̱ o wase! Di buki me̱se̱, na ńo̱ṅo̱n i matomba no̱ mulatako mo̱ngo̱ ma diko̱m na Yehova mu me̱nde̱ benga sikime̱ye̱. Nga o be̱ to̱ diko̱m la Loba o bwindea!