Kwedi ńe nde diwengisan la longe̱. Kwedi ńe nde ka iyo̱ i po̱ti (Yohane 11:11-14). Bawedi ba titina ba we̱le̱ senga, je̱ne̱, to̱po̱, to̱ dutea to̱ lambo (Mulangwedi 9:5, 10). Ebasi e kwedī e mokwe̱le̱ ná bawedi ba m’ala o mundi ma mudī o ja na bambambe̱ babu. Nika e titi nje Bibe̱l e mokwe̱le̱no̱.

Ba ba wedi ba titina b’ongwane̱ biso̱, ba titi pe̱ to̱ ná ba bolane̱ biso̱ bobe. Ka ko̱lo̱ngo̱ne̱ bato ba ben beboledi ba losango na mabea ba mo̱nge̱le̱no̱ ná ma me̱nde̱ bwese̱ bawedi muńe̱nge̱. Nika e si mabwese̱ Loba muńe̱nge̱ ebanja nika e se̱medi nde omo̱ń a mpoṅ mō̱ ma Satan. E titi pe̱ to̱ ná e bwese̱ bawedi muńe̱nge̱, etum te̱ ba titino̱ pe̱ longe̱. Di s’angame̱n bwa bawedi bo̱ngo̱ to̱ jowe̱ babo̱. Jangame̱n nde jowe̱ Loba buka te̱.​—Mateo 4:10.

Bawedi ba me̱nde̱ pe̱te̱ be̱ longe̱. Yehova a me̱nde̱ jumwe̱le̱ bawedi o be̱ longe̱ o wase ni timbisabe̱ paradisi. Ni ponda ńe be̱be̱. (Yohane 5:28, 29; Bebolo 24:15) Loba a dongame̱n jumwe̱le̱ ba bamáwo̱ mulemlem ka neni weno̱ ná wumwe̱le̱ moto ńe o iyo̱.​—Marko 5:22, 23, 41, 42.

Jo̱nge̱le̱ ná di si mawo̱ le nde mpoṅ Satan Diabolo a camane̱no̱. Satan na midī mao ma bobe ba matute̱le̱ bato o jo̱nge̱le̱ ná midī ma bawedi me longe̱, mi mangwa pe̱ diboa na ndutu ipe̱pe̱. Satan a mawo̱ndo̱ bato, ngedi iwo̱ tongwea na ndo̱ti na me̱ne̱. Yehova a makokise̱ ba ba mawase̱ o kwalisane̱ bawedi.​—Ndimbisedi 18:10-12.