Bibe̱l e se̱le̱ bīse̱ ná ombusa kwed’a Kristo balēdi ba mpoṅ ba me̱nde̱ jingea o mulo̱ṅ má Kriste̱n na yue̱le̱ pe̱ belēdi ba mbale̱. (Bebolo 20:29, 30) Nika pe̱ nde e timbino̱ o be̱. Ba balēdi ba mpoṅ ba lati belēdi ba Yesu na mo̱nge̱le̱ ma basibi. Nika nde bebasi ba mpoṅ be botedino̱. (2 Timoteo 4:3, 4) Ne̱ni jeno̱ ná di be̱ mbaki ná di be̱n so̱ṅtane̱ di te̱nge̱n la nje Bibe̱l e mokwe̱le̱no̱ na mbale̱ e?

Yehova mo̱me̱ne̱ a busise̱ mbale̱ o pond’ao. A se̱le̱ o bīse̱ ná o ponda nisukan so̱ṅtane̱ la mbale̱ di me̱nde̱ to̱ndo̱. (Daniel 12:4) O mbu ma 1870, dibe̱le̱ la bato disadi o muwaso̱ ma mbale̱, di so̱i ná Bibe̱l e si masue̱le̱ jita la belēdi ba bebasi. Na mo̱ di botea o wasa so̱ṅtane̱ la belēdi ba mbale̱ ba Bibe̱l. Yehova a namse̱ ebol’abu.

Ba we̱le̱ milema mabu o jokwa Bibe̱l ná te̱ite̱i. Bokwe̱ Bibe̱l ba ta ba be̱ne̱ mbad’a jokwa ńena biso̱ pe̱ di mabupe̱no̱ we̱nge̱. Ba ta ba no̱ngo̱ tema ombusa tema. Ba so̱i te̱ epas’a Bibe̱l ye ndutu o so̱ṅtane̱, ba mombwea nde bepasi bepe̱pe̱ o tele̱ye̱ mo̱. Ba po̱i te̱ o jo̱nge̱le̱ diwo̱ le mulatako na bene̱ bepasi, ba matila nde mo̱. Bese̱le̱ ná Bibe̱l mo̱me̱ne̱ e bole beteledi. Ba timbi o so̱ mbale̱ jombwea dina la Loba, Janea lao, mwano mao ońola mbel’a moto, ebe̱yed’a bawedi na dipita ońola bepumbwedi. Muwaso mabu mu te̱se̱ babo̱ wonja na belēdi ba mpoṅ nikame̱ne̱ pe̱ na beboledi ba bobe.​—Yohane 8:31, 32.

O mbu ma 1879, Bokwe̱ Bibe̱l ba so̱ṅtane̱ ná ponda nin o camane̱ mbale̱ o wase ńe̱se̱. O mu mbu pe̱ nde ba botedino̱ busise̱ kalati ni belabe̱ na fre̱nsi ná, La Tour de Garde annonce le Royaume de Jéhovah. We̱nge̱ di mabīse̱ bato mbale̱ o 240 ba bekombo na o buka na 900 ba leme̱. Na mbale̱, so̱ṅtane̱ la mbale̱ di máto̱ndo̱!

• Ombusa kwed’a Yesu nje e po̱yedi belēdi ba Bibe̱l e?

• Nje yongwane̱ biso̱ o so̱ mbale̱ e?