1. O nje weno̱ ná o dutea ombusa wa no̱ngo̱ ponda o jokwa nin kalati e?

O JOKWA lo̱ngo̱ la nin kalati, woko jita la mbale̱ i tilabe̱ o Bibe̱l ka, longe̱ la bwindea Loba a kakane̱no̱ biso̱, nje e mapo̱ye̱ bawedi, nikame̱ne̱ pe̱ na dipita la bepumbwedi. (Mulangwedi 9:5; Lukas 23:43; Yohane 5:28, 29; Bebīsedi 21:3, 4) Pondapo̱ o mábotea o jukea o ndongame̱n a Mboṅ a Yehova, o mádube̱ pe̱ ná ba be̱n jowe̱ la mbale̱. (Yohane 13:35) Yen ebe o mábotea be̱ne̱ mulatako ma bo̱ibo̱i na Yehova, o máno̱ngo̱ pe̱  bedomsedi ná o mapula o bolea mo̱. We so̱ ná o dutea ná, ‘Nje nangame̱nno̱ bola tatan o bolea Loba e?’

2. Ońola nje mot’a Etiopia a tano̱ a pula dubisabe̱ e?

² Nika nde mot’a Etiopia mō̱ ńa mińa ma Yesu a dutedino̱. Ombusa bepumbwedi ba Yesu, mokwed’a Yesu Filipo a te̱ye̱ nu moto dikalo. Filipo a lee̱le̱ mo̱ mboṅ i mabamse̱ ná Yesu a ta nde Mesia. Nje nu mot’a Etiopia okono̱ e tapi mo̱ mulema kańena a kwala o dibokime̱ne̱ ná: “Ombwa, madiba man; nje e meke̱ mba o dubisabe̱ e?”​—Bebolo 8:26-36.

3. (a) Njika byanedi Yesu a bolino̱ bokwedi bao e? (b) Ne̱ni moto angame̱nno̱ dubisabe̱ e?

³ Bibe̱l e mokwe̱le̱ ná se̱ṅse̱ṅ ná o mapula te̱ o bolea Yehova, wangame̱ne̱ o dubisabe̱. Yesu a langwedi bokwedi bao ná: “Timbise̱ [bato ba] matumba me̱se̱ bokwedi bam, lo dubise̱ babo̱.” (Mateo 28:19) Yesu a boli pe̱ eyembilan ninka ná mo̱me̱ne̱ pe̱ a dubisabe̱. A ta a dubisabe̱ o madiba, nika ná a kwesabe̱ mutibe, seto̱ ná a ta a myasabe̱le̱ madiba o mulopo. (Mateo 3:16) O we̱nge̱, Kriste̱n e madubisabe̱ te̱, ńangame̱ne̱ dubabe̱ mususu, to̱so̱ kwesabe̱ mutibe o madiba.

4. Nje dubise̱ lo̱ngo̱ di malee̱le̱no̱ bane̱ e?

⁴ O dubisabe̱ te̱, nika e malee̱le̱ bane̱ ná na mbale̱ o mapula o be̱ diko̱m la Loba, na bolea pe̱ mo̱. (Myenge 40:8, 9) We so̱ ná o baise̱ o wame̱ne̱ ná, ‘Nje nangame̱nno̱ o bola ná na dubisabe̱ e?’

5. (a) Nje wangame̱nno̱ se̱le̱ bola oboso ná o madubisabe̱ e? (b) Ońola nje ndongame̱n a Kriste̱n yeno̱ mweńa e?

⁵ Oboso ná o madubisabe̱, wangame̱ne̱ se̱le̱ jokwa bia Yehova na Yesu. O mábotea o bola nika tongwea na jokwa la Bibe̱l. (Langa Yohane 17:3.) Nde nika  e si dongame̱n. Bibe̱l e makwala ná wangame̱ne̱ “londisabe̱ na so̱ṅtane̱ [di te̱nge̱n]” la jemea la Yehova. (Kolose 1:9) Ndongame̱n a Mboṅ a Yehova i me̱nde̱ jongwane̱ wa o be̱ne̱ mulatako ma bo̱ibo̱i na Yehova. Njo̱m po̱ ni ńa mweńa wangame̱nno̱ o jukea o yi ndongame̱n ponda na ponda te̱.​—Bonahebe̱r 10:24, 25.

6. Njika dime̱ne̱ la so̱ṅtane̱ la Bibe̱l wangame̱nno̱ o be̱ne̱ oboso ná o madubisabe̱ e?

⁶ O ka mbale̱, Yehova a si mengane̱ wa ná o bie mambo me̱se̱ me o Bibe̱l obiana o madubisabe̱. A s’engane̱ mot’a Etiopia ná a bie mambo me̱se̱ obiana a madubisabe̱. (Bebolo 8:30, 31) Di me̱nde̱ pe̱ benga jokwa jombwea Loba o bwindea. (Mulangwedi 3:11) Nde ná o dubisabe̱, wangame̱ne̱ o jokwa na jemea pe̱ belēdi baboso ba Bibe̱l.​—Bonahebe̱r 5:12.

7. Ne̱ni jokwa lo̱ngo̱ la Bibe̱l longwane̱no̱ wa e?

⁷ Bibe̱l e makwala ná: “Esibe̱ dube̱ [Loba] a titi ná a do̱lisane̱ biso̱.” (Bonahebe̱r 11:6) Ońola nika wangame̱ne̱ be̱ne̱ dube̱ oboso ná o madubisabe̱. Bibe̱l e malangwea biso̱ ná jita la bato ba mundi ma kwaṅ ma Korinto ba ta ba senga nje bokwedi ba Yesu bokwe̱le̱no̱, na babo̱ ba botea “dube̱, ba dubisabe̱.” (Bebolo 18:8) Mulemlem pe̱ nde jokwa lo̱ngo̱ la Bibe̱l longwane̱no̱ wa o dube̱ makaki ma Loba, nikame̱ne̱ pe̱ na ngiń’a jabea la Yesu, lena le ná di sunga biso̱ o bobe na kwedi.​—Yosua 23:14; Bebolo 4:12; 2 Timoteo 3:16, 17.

8. Nje e me̱nde̱ tute̱le̱ wa o langwea bape̱pe̱ nje wokono̱ e?

⁸ Nika weno̱ o bata jokwa Bibe̱l na je̱ne̱ pe̱ ne̱ni  e mongwane̱no̱ wa o longe̱ lo̱ngo̱, dube̱ lo̱ngo̱ di mabata be̱ ngińa. O me̱nde̱ o pula langwea bane̱ jombwea nje weno̱ o jokwa. (Yeremia 20:9; 2 Korinto 4:13) Nde nja wangame̱nno̱ langwea e?

9, 10. (a) Nja weno̱ ná o botea langwea nje weno̱ o jokwa e? (b) Nje bola yete̱na o mapula o te̱ dikalo na mwemba e?

⁹ We ná o pula langwea mbia mo̱ngo̱, mako̱m mo̱ngo̱, moyo mo̱ngo̱ ma mboa, to̱so̱ mako̱m mo̱ngo̱ m’ebolo jombwea nje weno̱ o jokwa. Nika ńe bwam, nde bola nika o ponda ye̱se̱ na muyao na ndolo pe̱. Ponda e me̱nde̱ po̱ o me̱nde̱no̱ we̱le̱ botea te̱ dikalo na mwemba. We̱n te̱ ná wā be̱be̱ o bola nika, we ná o kwalisane̱ Mboṅ a Yehova ńe o jokwe̱le̱ wa Bibe̱l, langwea mo̱ ná o me̱nde̱ o to̱ndo̱ no̱ngo̱ dongo o ebol’a dikalo na mwemba. Yete̱na nu moto a mo̱nge̱le̱ ná wā be̱be̱, na ná we pe̱ o die̱le̱ longe̱ lo̱ngo̱ bupisane̱ bete̱sedi ba Bibe̱l, bińo̱ na mo̱ lo me̱nde̱ o ja mwemba na batudu baba ba mwemba.

¹⁰ Nje e me̱nde̱ bolane̱ ke̱ lo mája mwemba e? Batudu ba me̱nde̱ o kwala na wa o jombwa nga o maso̱ṅtane̱ na dube̱ pe̱ belēdi baboso ba Bibe̱l, nga o longe̱ lo̱ngo̱ la buńa te̱ o mabola nje Bibe̱l e makwalano̱, na yete̱na na mbale̱ o mapula o be̱ mō̱ ńa Mboṅ a Yehova. O̱nge̱le̱ ná batudu ba mombwea belongi ba mwemba be̱se̱, nikame̱ne̱ pe̱ na wa; o si bwa so̱ bo̱ngo̱ o kwalisane̱ babo̱. (Bebolo 20:28; 1 Petro 5:2, 3) Ombusa bo boja, batudu ba me̱nde̱ o langwea wa nga we ná o botea te̱ dikalo na mwemba.

11. Ońola nje yeno̱ mweńa jita o wana mawengisan o longe̱ lasu oboso ná di mate̱ dikalo na mwemba e?

¹¹ Batudu be ná ba langwea wa ná e mapula ná o bate wana mawengisan o longe̱ lo̱ngo̱ oboso ná  o mabotea te̱ dikalo na mwemba. Ońola nje yeno̱ mweńa jita o wana man mawengisan e? Ońolana di makwalisane̱ te̱ bane̱ jombwea Loba, je nde o to̱po̱ o dina la Yehova, jangame̱n pe̱ die̱le̱ longe̱ lasu o mbadi ni mawaneye̱ mo̱ edube.​—1 Korinto 6:9, 10; Galatia 5:19-21.

12. Ońola nje e mapulano̱ ná bato be̱se̱ bate̱le̱ e?

¹² Lambo dipe̱pe̱ le wangame̱nno̱ o bola oboso ná o madubisabe̱. Ńamuloloma Petro a kwali ná: “Bińo̱ ate̱le̱ so̱, lo tukwe, ná myobe mańu mi dimsabe̱.” (Bebolo 3:19) Nje nika e mapulano̱ o kwala ná jate̱le̱ e? Nika e mapula nde o kwala ná jombwe̱ na mulema mwe̱se̱ ońola to̱ njika bobe di bolino̱. K’eyembilan, yete̱na o be̱n longe̱ la wite̱ musonje, ke̱ e mapula so̱ ná wate̱le̱. To̱ e be̱ nde ná o longe̱ lo̱ngo̱ le̱se̱ o we̱ o ngud’ango̱ ńe̱se̱ o bola nje e te̱nge̱n, o be̱n te̱ nde ná wate̱le̱, ońolana biso̱ be̱se̱ di mawusa, jangame̱n pe̱ baise̱ Loba ná a lakise̱ biso̱.​—Roma 3:23; 5:12.

13. Nje nika e mapulano̱ kwala ná o ‘tukwe’ e?

¹³ Mo̱, e dongame̱n buka te̱ ná wombwe̱ ońola nje o bolino̱ e? Ke̱m. Petro a kwali ná wangame̱n pe̱ o ‘tukwa.’ Nika e mapula kwala ná wangame̱n o banga to̱ njika bedangwedi ba bobe o tano̱ o be̱ne̱, o boteye pe̱ o bola nje ye bwam. Di no̱nge yen eyembilan, dutea ná we o wala o lo̱ndo̱ o wuma iwo̱ ka nged’ango̱ ńa boso. Nde nine̱ ponda, o so̱ ná o si no̱ngedi nge’a bwam. Nje o me̱nde̱no̱ bola e? Yeke̱i te̱ o me̱nde̱ bwa lo̱ndo̱, o te̱me̱, o tukwa ngea, na wa o no̱ngea nge’a bwam. Mulemlem pe̱ nde yeno̱ ke̱ o mokwa Bibe̱l, we ná o so̱ ná e mapula ná o tukwe bede̱mo bō̱ na  mambo mō̱ o longe̱ lo̱ngo̱. Emea o ‘tukwa’​—nika ná, o wane mawengisan ma mapule̱​—o boteye pe̱ o bola nje e te̱nge̱n.

14. Ne̱ni o mabake̱no̱ wame̱ne̱ na Loba e?

¹⁴ Tanga dipe̱pe̱ la mweńa wangame̱nno̱ o no̱ngo̱ oboso ná o madubisabe̱ le nde bake̱ la wame̱ne̱ na Yehova. Bake̱ la wame̱ne̱ na Yehova, nika ńe nde bola la mo̱ kakane̱ o muka ná o mowe̱ nde mo̱me̱ne̱ mō̱ buka te̱, bola la jemea lao pe̱ nde di mabe̱ lambo le mweńa buka me̱se̱ o longe̱ lo̱ngo̱.​—Ndimbisedi 6:15.

15, 16. Nje e matute̱le̱ moto o bake̱ mo̱me̱ne̱ na Loba e?

¹⁵ Bola la Yehova kakane̱ o bolea mo̱me̱ne̱ mō̱ buka te̱, le nde ka bola la moto o to̱ndino̱ kakane̱ o tombise̱ mińa me̱se̱ o diane̱no̱ o longe̱ lo̱ngo̱ mwemba na mo̱. Dute̱a ná mome e o yengea muto ońola diba. Nika mome eno̱ o bata jokwa bia bede̱mo ba muto, a mabotea o to̱ndo̱ mo̱, a pula o ba mo̱. To̱ná no̱ngo̱ la be bedomsedi di titino̱ lambo disadi, nu mome a memea o bambe̱ mu m’bē̱ ońolana o to̱ndi nu muto.

¹⁶ Nika weno̱ o jokwa jombwea Yehova, o mabotea o to̱ndo̱ mo̱, o pula pe̱ bola me̱se̱ ngud’ango̱ e madie̱le̱no̱ wa o bolea mo̱. Nika e me̱nde̱ tute̱le̱ wa o bola mo̱ o muka kakane̱ la bolea mo̱. Bibe̱l e makwala ná to̱ nja nu mapule̱ o bupe̱ Yesu angame̱ne̱ o ‘to̱bo̱ mo̱me̱ne̱.’ (Marko 8:34) Nje nika e mapulano̱ kwala e? Nika e mapula nde o kwala ná sengane̱ la Yehova nde o we̱le̱no̱ ka lambo laboso o longe̱ lo̱ngo̱. Nje Yehova a mapulano̱ ye mweńa buka ńo̱ng’ango̱ na mambo o mabupe̱no̱.​—Langa 1 Petro 4:2.

17. Ońola nje bato bō̱ ba si mabake̱no̱ babo̱me̱ne̱ na Yehova e?

¹⁷ Bato bō̱ ba si mabake̱ babo̱me̱ne̱ na Yehova, ońolana ba mabwa bo̱ngo̱ ná ba titi ná ba ne̱nge̱ kakane̱ ba bolino̱ mo̱ o bolea mo̱. Ba si mapula o bwese̱ Yehova ndutu, to̱so̱ be ná ba dutea ná ba si bake̱ te̱ babo̱me̱ne̱ na Yehova, a si me̱nde̱ o baise̱ babo̱ bolangi ba nje ba mabolano̱.

18. Nje e me̱nde̱ jongwane̱ wa o buka bo̱ngo̱ ba bwese̱ Yehova ndutu e?

¹⁸ Ndolo o to̱ndino̱ Yehova e me̱nde̱ o jongwane̱ wa o buka bo̱ngo̱ ba bwese̱ mo̱ ndutu. Kana o to̱ndino̱ mo̱, o me̱nde̱ o bola me̱se̱ ngud’ango̱ e we̱lino̱ o ne̱nge̱ kakane̱ lo̱ngo̱ o bolino̱ mo̱. (Mulangwedi 5:4; Kolose 1:10) O si me̱nde̱ o bolane̱ jo̱nge̱le̱ ná ye ndutu jita o bola jemea la Yehova. Ńamuloloma Yohane a tili ná: “Ndol’asu na Loba ńe nde ná, di ne̱nge̱ mbend’ao, nde mbend’ao i titi bwambi.”​—1 Yohane 5:3.

19. Ońola nje o s’angame̱nno̱ bwa bo̱ngo̱ o bake̱ wame̱ne̱ na Yehova e?

¹⁹ O si be̱n ńo̱ngi o be̱ ke̱nge̱nge̱ o bake̱ wame̱ne̱ na Yehova. A si mengane̱ biso̱ tomtom ná di bole buka nje ngud’asu e madie̱le̱no̱ biso̱. (Myenge 103:14) A me̱nde̱ jongwane̱ wa o bola nje e te̱nge̱n. (Yesaya 41:10) Lakisane̱ Yehova na mulema mo̱ngo̱ mwe̱se̱, nde “a me̱nde̱ ne̱nge̱le̱ mangea mo̱ngo̱!”​—Minia 3:5, 6.

20. Ombusa wa bake̱ Yehova wame̱ne̱, njika tanga di mabupe̱ e?

²⁰ Mo̱, o mo̱nge̱le̱ ná wā be̱be̱ o bake̱ wame̱ne̱ na Yehova e? Ombusa wa bake̱ Yehova wame̱ne̱, wā be̱be̱ o no̱ngo̱ tanga di bupe̱. Wangame̱n o dubisabe̱.

21, 22. Ne̱ni o ‘mapuse̱le̱no̱’ o mpoma dube̱ lo̱ngo̱ e?

 ²¹ Bola ná mutudu nu madie̱le̱ dibe̱le̱ la batudu o mwemba mo̱ngo̱ a bie ná o mábake̱ Yehova wame̱ne̱, o mapula pe̱ o dubisabe̱. A me̱nde̱ o bola ná batudu bō̱ bombweye mwemba na wa belēdi baboso ba Bibe̱l. Yete̱na be jo̱nge̱le̱ diwo̱ ná wā be̱be̱, ba me̱nde̱ o langwea wa ná we ná o dubisabe̱ o jako̱to̱ne̱ di maye̱ la Mboṅ a  Yehova. Ekwali e me̱nde̱ be̱ o jako̱to̱ne̱ e mabole̱ beteledi ba dubise̱. Mubole̱ y’ekwali a me̱nde̱ o baise̱ ba be be̱be̱ o dubisabe̱ myuedi mi wam miba. Tongwea na jalabe̱ mi myuedi miba nde o me̱nde̱no̱ o “puse̱le̱” o mpoma dube̱ lo̱ngo̱.​—Roma 10:10.

²² Denge̱ o madubisabe̱. O me̱nde̱ o dubabe̱ mususu o madiba. Dubise̱ di me̱nde̱ o lee̱le̱ moto te̱ ná o  mábake̱ Yehova wame̱ne̱, wā pe̱ nde mō̱ ńa Mboṅ a Yehova.

23. Nje dubisabe̱ o “dina la Tete̱ na la Muna na la mudī-musangi” di mapulano̱ kwala e?

²³ Yesu a kwali ná bokwedi bao ba me̱nde̱ o dubisabe̱ o “dina la Tete̱ na la Muna na la mudī-musangi.” (Langa Mateo 28:19.) Nje nika e mapulano̱ kwala e? Nika e mapula nde kwala ná, o memba doi la byanedi la Yehova n’epolo Yesu a be̱nno̱ o mwano ma Loba, nikame̱ne̱ pe̱ na ne̱ni Loba a mabolane̱no̱ mudī mao musangi o londise̱ mpuli mao.​—Myenge 83:19; Mateo 28:18; Galatia 5:22, 23; 2 Petro 1:21.

24, 25. (a) Njika beteledi dubise̱ di be̱nno̱ e? (b) Nje di me̱nde̱no̱ kwalea o jokwa disukan e?

²⁴ Dubise̱ di be̱n beteledi be mweńa jita. Ponda o makwesabe̱no̱ mutibe, nika e mapula nde kwala ná o wedi o longe̱ o tano̱ o se̱le̱ be̱ne̱ kwaṅ; to̱so̱ ná wese̱le̱ mo̱. Ponda o mabusano̱ o madiba, o me̱nde̱ o botea longe̱ la peńa o bola jemea la Loba. Nika e malee̱le̱ nde ná o me̱nde̱ o bolea Yehova botea na ni ponda. O̱nge̱le̱ ná o si bake̱ wame̱ne̱ moto, bebokedi, to̱so̱ ebolo. O bake̱ nde Yehova longe̱ lo̱ngo̱.

²⁵ Bake̱ la Loba wame̱ne̱ di me̱nde̱ o jongwane̱ wa o longa mulatako ma bo̱ibo̱i na mo̱. (Myenge 25:14) Nika e si mapula o kwala ná moto a me̱nde̱ nde o kusa jongise̱ ońolana a dubisabe̱. Ńamuloloma Paulo a tili ná: “[Benga] bolea jongise̱ lańu na bo̱ngo̱ na soasoane̱.” (Filipi 2:12) Dubise̱ le nde buka te̱ bebotedi. Nde, ne̱ni weno̱ ná o tika be̱ be̱be̱ na Yehova e? Jokwa disukan la nin kalati di me̱nde̱ jalabe̱ mi myuedi.