A ńandolo, nu to̱ndi Yehova:

Yesu mo̱ ná: “Lo me̱nde̱ bia mbale̱, nde mbale̱ e me̱nde̱ timbise̱ bińo̱ wonja.” (Yohane 8:32) A se̱ byala be membe̱ ka be! E, moto e ná a we̱le̱ bia mbale̱, to̱ e be̱ nde o min “mińa misukan” ma ponda bobe mpoṅ mu lańno̱. (2 Timoteo 3:1) Mo̱, o dia o mo̱nge̱le̱ ponda o so̱ino̱ mbale̱ ka nje te̱ Eyal’a Loba e matele̱ye̱no̱ mo̱ e? A se̱ muńe̱nge̱ munde̱ne̱ nika e tano̱!

Nde, kana yeno̱ mweńa ná di be̱ne̱ so̱ṅtane̱ di te̱nge̱n la Betiledi na no̱ngo̱ pe̱ dongo ponda te̱ o langwea bape̱pe̱ jombwea nika, jangame̱ne̱ pe̱ o die̱le̱ biso̱me̱ne̱ bupisane̱ Betiledi. Ná di bole nika, e mapula ná di je o ndol’a Loba. Nje nika e mapulano̱ kwala e? Byala Yesu a to̱pino̱ o bulu bo se̱le̱ na kwed’ao be mabola jalabe̱. A langwedi bamuloloma bao ba jemea ná: “Lo mane̱nge̱ te̱ mbend’am, ke̱ lo maja o ndol’am, kana mba na tano̱ na ne̱nge̱ mbend’a Tete̱, nde na ja o ndol’ao.”​—Yohane 15:10.

Maka ná Yesu a jai nde o ndol’a Loba tongwea na ne̱nge̱ mbend’a Sango. Biso̱ pe̱ jangame̱ne̱ nde bola mulemlem we̱nge̱. Ná di je o ndol’a Loba, jangame̱ne̱ die̱le̱ longe̱ lasu buńa te̱ bupisane̱ Betiledi. O y’ebiamu me̱ne̱ Yesu a kwali ná: “Lo bi te̱ nika, bonam na bińo̱, ke̱ lo mabola mo̱.”​—Yohane 13:17.

Di pite̱ ná nin kalati e me̱nde̱ jongwane̱ wa o benga we̱le̱ Betiledi o ebolo o longe̱ lo̱ngo̱ ná o je “o ndol’a Loba . . . ońola longe̱ la bwindea.”​—Yuda 21.