A FILƐ, mun lo be kɛra yan? Cɛɛ nunu bɛɛ ye Israɛl ka kɛlɛdenw lo ye. Cɛɛ minw birinin lo, olu be jii minna. Kititigɛla Zedeyɔn lo lɔnin be u kɔrɔ. A b’u ka jii mincogo filɛra.

A filɛ ka ɲɛ faranfasi min be cɛɛ nunu ka jii mincogo la. Dɔw y’u daa biri jii kan. Nka, kelen ye jii cɛ a tigɛ kɔnɔ ka to k’a min, o la a be se ka koow kɔrɔsi a lamini na. O tun kɔrɔtalen lo sabu Jehova tun y’a fɔ Zedeyɔn ye ko cɛɛ minw be jii min n’u be kɔrɔsili kɛ, a k’olu dɔrɔn lo sugandi. Ala ko cɛɛ tɔɔw ka kan ka taga soo. An k’a filɛ mun kama.

Tɔɔrɔba tun be Israɛldenw kan tugun sabu u ma kolo Jehova ye. Madiyankaw ye see sɔrɔ u kan ani u tora k’u tɔɔrɔ. O kama, Israɛldenw kasira Jehova nɔfɛ ka dɛmɛ ɲini ani Jehova ye u lamɛn.

Jehova y’a fɔ Zedeyɔn ye ko a ka kɛlɛdenw lajɛn ani Zedeyɔn ye cɛɛ 32 000 lajɛn. Nka, kɛlɛbolo min tun be nana Israɛl kɛlɛ, o tun ye mɔgɔ 135 000 ye. O bɛɛ n’a ta, Jehova y’a fɔ Zedeyɔn ye ko: ‘I ka kɛlɛdenw ka ca kojugu.’ Mun na Jehova y’o fɔ do?

A y’o fɔ sabu ni Israɛldenw tun ye see sɔrɔ kɛlɛ la, u tun be se k’a miiri ko olu yɛrɛ seko lo. U tun be se k’a miiri ko u mako tɛ Jehova ka dɛmɛ na walisa ka see sɔrɔ kɛlɛ la. O kama Jehova y’a fɔ Zedeyɔn ye ko: ‘I k’a fɔ cɛɛw bɛɛ ye ko siranya be minw na, olu ka taga soo.’ Zedeyɔn y’o fɔ tuma min na, mɔgɔ 22 000 tagara soo. Cɛɛ 10 000 tora ni Zedeyɔn ye walisa ka Madiyankaw ka kɛlɛden 135 000 kɛlɛ.

Nka, a filɛ Jehova ye min fɔ tugun: ‘Halibi jama nin ka ca kojugu.’ O kama a y’a fɔ Zedeyɔn ye ko a ka taga n’u ye jii minyɔrɔ la kɔda nin na. Mɔgɔ minw bɛɛ tun bena u daa biri jii kan k’a min, Zedeyɔn tun ka kan k’olu bila ka taga soo. Jehova ye layidu ta Zedeyɔn ye ko: ‘Ne bena Madiyankaw don i bolo, mɔgɔ 300 nunu le barika la, minw ye jii min n’u be kɔrɔsili kɛ.’

Kɛlɛ loon sera. Zedeyɔn ye a ka cɛɛ 300 tilan jɛnkulu saba. A ye buru fiyɛta ni daga di u kelen kelen ma, kala mananinw tun be o daga nunu kɔnɔ. Dugutilama, u ye u juguw lamini. O kɔ, wagati kelen na u bɛɛ jɛnna ka buru fiyɛ ka u ka dagaw ci ani ka kule ko: ‘Jehova ka murujan ani Zedeyɔn ta!’ Madiyankaw panna ka wuli, u jaa tigɛra, u hakili ɲagamina ani u y’a daminɛ ka boli. Israɛldenw ye see sɔrɔ kɛlɛ la.