1. Yezu ka suu laban na dugukolo kan, a tun be jɔrɔla mun lo la?

YEZU ka suu laban na dugukolo kan, a tun b’a lɔn ko a bena taga k’a ka kalandenw to yen. O kama, a tun be jɔrɔla u ka siniɲasigi koo la. A y’a fɔ u ye ko: “Aw te diɲɛ ta ye.” (Zan 15:19). Kɔfɛ, a y’a Faa deli a ka kalandenw koo la ko: “U tɛ diɲɛ taw ye i ko ne tɛ diɲɛ ta ye cogo min na.” (Zan 17:15, 16, ABM). Yezu tun b’a fɛ ka mun lo fɔ?

2. Yezu tun kaan be “diɲɛ” juman lo ma?

² Yezu tun kaan be “diɲɛ” min ma, o ye adamadenw ye minw tɛ Ala lɔn ani u be Sutana fanga kɔrɔ (Zan 14:30; Efɛzikaw 2:2; Zaki 4:4; 1 Zan 5:19). An be se k’a yira cogo di ko an “tɛ diɲɛ ta ye”? Kalansen nin na, an bena koo nunu lajɛ: An be kantigiya kɛ Ala ka Masaya ye ani an t’an seen don politikikow la. An b’an yɛrɛ tanga duniɲa ka miiricogo ma. An ka fanidoncogo n’an sawura bɛnnin lo ani an be wariko jati cogo bɛnnin na. Ka fara o kan, Ala ye kɛlɛkɛminan minw di an ma, an b’u ta.—Kunnafoni wɛrɛw lajɛ, a 16nan.

3. Yezu tun be politikikow jati cogo di?

³ Tuma min na Yezu tun be dugukolo kan, a y’a kɔrɔsi ko gwɛlɛya caaman be mɔgɔw kan ani ko koow man nɔgɔ u fɛ. A tun b’a janto u la sɔbɛ la ani a tun b’a fɛ k’u dɛmɛ. Yala Yezu kɛra politiki kuntigi ye wa? Ayi. A tun b’a lɔn ko mɔgɔw mako be min na tigitigi, o ye Ala ka Masaya lo ye. O Masaya ye gofɛrɛnɛman ye. Yezu tun bena kɛ o Masaya kuntigi ye ani o Masaya lo kɛra a ka waajuli barokun ye (Daniyɛli 7:13, 14; Luka 4:43; 17:20, 21). Yezu m’a seen don politikikow la, a yɛrɛ y’a mabɔ politikikow la pewu. A y’a fɔ Ɔrɔmu ka gofɛrɛnɛrɛ Pɔnsi Pilati ye ko: “Ne ka masaya te diɲɛ nin ta ye.” (Zan 18:36). A ka kalandenw fana tun t’u seen don politikikow la. Lɔnniya gafe dɔ y’a fɔ ko kerecɛn fɔlɔw “tun tɛ sɔn politiki baara si ma.” (On the Road to Civilization). Bi fana, kerecɛn sɔbɛw b’o ɲɔgɔn lo kɛ. An be Ala ka Masaya lafasa ni kantigiya ye ani an t’an seen don politikikow la.—Matiyo 24:14.

4. Kerecɛn sɔbɛw be dɛmɛ don Ala ka Masaya koo la cogo di?

⁴ Gofɛrɛnɛmanw y’u ka lasigidenw ci jamana minw na, o lasigidenw t’u seen don o jamanaw ka politikikow la. Kerecɛn mɔlenw ka koo bɔnin be o lasigidenw ta ma sabu u jigi b’a la ka kuntigiya kɛ ni Krista ye sankolo la. O kama, ciden Pol y’a fɔ kerecɛn mɔlenw ye ko: “An kɛra Krista ka lasigidenw ye.” (2 Korɛntikaw 5:20). Kerecɛn mɔlenw ye Ala ka gofɛrɛnɛman ka lasigidenw ye. U t’u seen don politikikow ani gofɛrɛnɛmanw ka koow la (Filipikaw 3:20). Nka, u ye mɔgɔ miliyɔn caaman dɛmɛ ka  lɔnniya sɔrɔ Ala ka gofɛrɛnɛman koo la. “Saga dɔ wɛrɛ mɔgɔw” be kerecɛn mɔlenw dɛmɛ o baara la. O “saga dɔ wɛrɛ mɔgɔw” jigi b’a la ka ɲɛnamaya banbali kɛ duniɲa kura kɔnɔ. Olu fana t’u seen don politikikow la (Zan 10:16; Matiyo 25:31-40). Tiɲɛn na, kerecɛn sɔbɛ si t’a ɲini k’a seen don politikikow la.—Ezayi 2:2-4 kalan.

5. Mun na kerecɛn sɔbɛw tɛ sɔn ka taga kɛlɛ la?

⁵ Kerecɛn sɔbɛw b’u kerecɛnɲɔgɔnw jati u ka denbaya mɔgɔw ye. U bɔyɔrɔ n’u ka kokɛcogo mana kɛ min o min ye, u bɛnnin lo (1 Korɛntikaw 1:10). N’an tun ka ɲi ka taga kɛlɛ la, an tun bena an kerecɛnɲɔgɔnw lo kɛlɛ, o minw y’an balimaw ye. Yezu do y’a fɔ ko an k’u kanu (Zan 13:34, 35; 1 Zan  3:10-12). Nka o dɔrɔn tɛ. Yezu y’a fɔ ko a kalandenw ka ɲi k’u juguw yɛrɛ kanu.—Matiyo 5:44; 26:52.

6. Minw y’u yɛrɛkun di Jehova ma, u be gofɛrɛnɛmanw jati cogo di?

⁶ Hali n’an t’an seen don politikikow la, an b’an jija ka kɛ fasoden ɲumanw ye. Ɲɛyirali fɛ, an be gofɛrɛnɛmanw bonya minkɛ, an b’u ka sariyaw labato ani ka lanpo sara. Nka, an b’an janto tuma bɛɛ ka “Ala ta di Ala ma.” (Mariki 12:17; Ɔrɔmukaw 13:1-7; 1 Korɛntikaw 6:19, 20). Fɛɛn minw ye “Ala ta” ye, u dɔw ye: ka Ala bato, k’a kanu ani ka mɛnni kɛ a fɛ. An labɛnnin lo ka bɔnɛ an niin na sanni ka ban Ala ta ma.—Luka 4:8; 10:27; Kɛwaliw 5:29; Ɔrɔmukaw 14:8 kalan.

7, 8. Duniɲa ka miiricogo ye mun lo ye ani a be mɔgɔw lasun ka koow kɛ cogo di?

⁷ K’an mabɔ Sutana ka duniɲa na, o kɔrɔ ko an t’a to duniɲa ka miiricogo k’an kuun yɛlɛma. O miiricogo be bɔ Sutana lo la, a be mɔgɔ lasun ka koow jati ani ka koow kɛ cogo dɔ la. Minw tɛ Jehova sago kɛ, o miiricogo y’u kuun bɛɛ yɛlɛma. Nka kerecɛnw tɛ sɔn o miiricogo ma. Ciden Pol y’a fɔ ko: “An kɔni, an ye hakili min sɔrɔ [an ka miiricogo], o te diɲɛ ta ye, nga an ye Ala ka Nii lo sɔrɔ.”—1 Korɛntikaw 2:12; Efɛzikaw 2:2, 3; Kunnafoni wɛrɛw lajɛ, a 17nan .

⁸ Duniɲa ka miiricogo be mɔgɔw lasun ka kɛ kuncɛbaw ye, ka muruti ani k’u yɛrɛ dɔrɔn nafa ɲini. A b’u lasun u k’a miiri k’u mako t’a la ka kolo Ala ye. Sutana b’a fɛ mɔgɔw k’u yɛrɛ sago kɛ ani u  kana miiri a nɔfɛkow la. A b’a fɛ mɔgɔw k’a miiri ko “farisogo nigɛlakow ni ɲadenw ka miyɛntɔya” nafa ka bon ni fɛɛn bɛɛ ye (1 Zan 2:16; 1 Timote 6:9, 10). Sutana b’a fɛ ka Jehova sagokɛlaw yɛrɛ lo lafili ani k’u lasun u ka miiri i ko ale be miiri cogo min na.—Zan 8:44; Kɛwaliw 13:10; 1 Zan 3:8.

9. Duniɲa ka miiricogo be se ka nɔɔ to an kan cogo di?

⁹ Duniɲa ka miiricogo be yɔrɔ bɛɛ i ko fɔɲɔ. N’an m’an jija sɔbɛ la, a bena nɔɔ to an kan (Talenw 4:23 kalan). O be se ka daminɛ ni koo dɔw ye minw tɛ basi ye an ɲɛɛ na. Ɲɛyirali fɛ, an be se ka sɔn mɔgɔ dɔw ka miiriya n’u ka kɛcogo ma k’a sɔrɔ u tɛ Jehova sagokɛlaw ye (Talenw 13:20; 1 Korɛntikaw 15:33). Fɛɛn nunu fana be se ka nɔɔ to an kan: porno, kerecɛn murutininw ka kalanw, wala spɔr minw be kɛ ni ɲɔgɔndan miiriya ye.—Kunnafoni wɛrɛw lajɛ, a 18nan.

10. An be se k’an yɛrɛ tanga duniɲa ka miiricogo ma cogo di?

¹⁰ O la do, an be se ka mun lo kɛ walisa duniɲa ka miiricogo kana an kuun yɛlɛma? An ka ɲi ka to Jehova gɛrɛfɛ ani ka koow kɛ ka kɛɲɛ n’a ka hakilitigiya ye. An ka ɲi ka delili kɛ tuma bɛɛ walisa ka hakili senu sɔrɔ. An bolo degunnin ka ɲi ka to Jehova ka baara la fana. Jehova ye Sebagayabɛɛtigi ye. An lanin b’a la ko a be se k’an dɛmɛ walisa duniɲa ka miiricogo kana an kuun yɛlɛma.—1 Zan 4:4.

11. Duniɲa ka miiricogo be mɔgɔw lasun ka fani don cogo di?

¹¹ An ka fanidoncogo n’an sawura b’a yira fana ko  an tɛ duniɲa ta ye. Mɔgɔ caaman be fani don walisa tɔɔw k’u filɛ, walisa ka kakalaya miiriya don mɔgɔw kuun na wala k’a yira k’olu ye nafolotigiw ye. Dɔ wɛrɛw ka fanidoncogo b’a yira k’u murutinin lo. Dɔw mako t’u sawura koo la hali dɔɔni: u ka faniw ferekenin lo wala u nɔgɔnin lo. An man kan k’u ladegi cogo si la.

12, 13. Sariyakolo jumanw lo be se k’an dɛmɛ k’a lɔn an ka ɲi ka fani min don?

¹² An minw ye Jehova sagokɛlaw ye, an b’a fɛ ka  fani don cogo bɛnnin na tuma bɛɛ. O ka ɲi ka kɛ faniw ye minw ferekenin tɛ, u saniyanin lo, ani u tɛ mɔgɔ kɔnɔ gwan. An ka fanidoncogo ka ɲi k’a yira ko an majiginin lo ani ko an ye hakilitigi ye. O la, an b’a yira ko an “be siran Ala ɲa.”—1 Timote 2:9, 10; Zude 21.

¹³ An ka fanidoncogo be se k’a to mɔgɔw be kɛ ni miiriya ɲuman wala miiriya jugu ye Jehova n’a sagokɛlaw koo la. An b’a fɛ ka koo “bɛɛ kɛ ka boɲa la Ala kan.” (1 Korɛntikaw 10:31). Ka fani don cogo bɛnnin na, o kɔrɔ ko k’i janto tɔɔw ka dusukunnakow n’u ka miiriyaw la. O kama, n’an b’a fɛ ka fani dɔ don, wala k’an masiri cogo dɔ la, an k’a to an hakili la ko o be se ka nɔɔ to tɔɔw kan.—1 Korɛntikaw 4:9; 2 Korɛntikaw 6:3, 4; 7:1.

14. N’an b’a fɛ ka fani dɔ don ka taga lajɛn na wala waajuli la, an ka ɲi k’an yɛrɛ ɲininga mun lo la?

¹⁴ An ka ɲi ka fani don cogo di ka taga lajɛnw na wala waajuli la? An ka fanidoncogo b’a to mɔgɔw b’an filɛ kojugu wa? A be mɔgɔw kɔnɔ gwan wa? Yala an b’a miiri k’o tɛ mɔgɔ wɛrɛ ka koo ye wa? (Filipikaw 4:5; 1 Piyɛri 5:6). Tiɲɛn lo ko an b’a fɛ an sawura ka ɲɛ. Nka an ka kerecɛn jogow lo ben’a to an koo be diya mɔgɔw ye. Jehova b’o jogow lo kɔrɔsi n’a b’an filɛ. O jogow b’a yira an ye mɔgɔ min ye tigitigi, o kɔrɔ, ‘sɔnɲumantigiw, minw ka di Ala ye haali.’—1 Piyɛri 3:3, 4.

15. Mun na Jehova t’a fɔ an ye an ka ɲi ka fani don cogo tigitigi min na?

¹⁵ An ka ɲi ka fani minw don, ani an man ɲi ka minw don, Jehova ma cikan caaman di an ma o koo la. Nka a ye Bibulu ka sariyakolow di an ma minw be  se k’an dɛmɛ ka desizɔn ɲumanw ta (Eburuw 5:14). An be ni kanuya min ye Jehova n’an mɔgɔɲɔgɔnw koo la, Jehova b’a fɛ o lo k’an lasun ka desizɔnw ta: desizɔn denninw wala desizɔnbaw (Mariki 12:30, 31 kalan). Duniɲa kuru bɛɛ kɔnɔ, Jehova sagokɛlaw bɔyɔrɔw n’u diyanankow tɛ kelen ye. O kama, u ka fanidoncogow tɛ kelen ye. O filɛ ka di ani o be mɔgɔ ninsɔndiya yɛrɛ le!

16. Duniɲamɔgɔw be wari jati cogo di? Nka Yezu ye mun lo fɔ wari koo la? An ka ɲi k’an yɛrɛ ɲininga mun lo la?

¹⁶ Sutana b’a fɛ mɔgɔw k’a miiri ko wari ni  bololafɛnw lo be na ni hɛɛrɛ ye. Nka Jehova sagokɛlaw b’a lɔn ko tiɲɛn tɛ. An lanin be Yezu ka kuma nunu na: “Hali ni nafolo ka ca mɔgɔ fɛ cogo o cogo, o te se ka kɛ a tigi nii suturanin ye.” (Luka 12:15). Wari tɛ se k’a to an be hɛɛrɛ sɔbɛ sɔrɔ. A tɛ se ka teri sɔbɛw, dusulafiya ani ɲɛnamaya banbali di an ma. Tiɲɛn lo ko an mako be bololafɛn dɔw la, ani an b’a fɛ ka ɲɛnamaya diyabɔ. Nka, Yezu y’a fɔ an ye ko an bena hɛɛrɛ sɔrɔ n’an be jɛnɲɔgɔnya ɲuman kɛ ni Ala ye ani n’an ɲɛnako fɔlɔ ye ka Ala bato (Matiyo 5:3; 6:22). I yɛrɛ ɲininga ko: “Duniɲamɔgɔw be wari jati cogo min na, o be nɔɔ to ne kan wa? N’ ka barow ni n’ ka miiriyaw fanba ɲɛsinna wariko lo ma wa?”—Luka 6:45; 21:34-36; 2 Zan 6.

17. N’i tɛ wari jati i ko duniɲamɔgɔw, i ka ɲɛnamaya bena fisaya cogo di?

¹⁷ N’an tɛ wari jati i ko duniɲamɔgɔw, ani n’an be Jehova ka baara kɛ an ɲɛnako fɔlɔ ye, kuun bena sɔrɔ an ka ɲɛnamaya la (Matiyo 11:29, 30). An bena wasa, an hakili bena sigi ani an dusu bena lafiya (Matiyo 6:31, 32; Ɔrɔmukaw 15:13). An tɛna hami kojugu bololafɛnw koo la (1 Timote 6:9, 10 kalan). An bena tɔɔw sɔn ani o bena an ninsɔndiya (Kɛwaliw 20:35). An ka ɲɛnamaya kɛcogo ben’a to an be wagati caaman sɔrɔ ka kɛ n’an ka mɔgɔ kanulenw ye. O yɛrɛ be se k’a to an be sinɔgɔ ka ɲɛ.—Waajulikɛla 5:12.

18. Sutana ka laɲinita ye mun lo ye?

¹⁸ Jɛnɲɔgɔnya min be an ni Jehova cɛ, Sutana b’a  ɲinina k’o tiɲɛ. O kama, an ka ɲi k’an seko bɛɛ kɛ k’o jɛnɲɔgɔnya latanga. An be kɛlɛ kɛra ni “jinɛw” lo ye (Efɛzikaw 6:12, ABM). Sutana n’a ka jinaw t’a fɛ an ka hɛɛrɛ ni ɲɛnamaya banbali sɔrɔ (1 Piyɛri 5:8). Fanga b’u la ani u b’an kɛlɛla. Nka Jehova ka dɛmɛ sababu fɛ, an be se ka see sɔrɔ u kan!

19. Efɛzikaw 6:14-18 be mun lo fɔ kerecɛnw ka “kɛlɛkɛminanw” koo la?

¹⁹ Fɔlɔfɔlɔ la, sɔrɔdasiw tun b’u ka kɛlɛkɛminanw ta walisa k’u yɛrɛ latanga kɛlɛ la. O cogo kelen na, Jehova ye ‘kɛlɛkɛminan’ minw di an ma, an b’u ta an kun (Efɛzikaw 6:13). U bena an latanga. Efɛzikaw 6:14-18 b’a fɔ o kɛlɛkɛminanw koo la ko: “Aw ye jija ka tiɲɛ kɛ aw ka cɛsirilan ye, ani tilenninya ka kɛ aw ka nigɛkunbɛnnan ye. Aw ye jija ka kibaru diman fɔ, min ye hɛrɛkuma ye, o ka kɛ i n’a fɔ aw ka sennasanbara. Lanaya min b’aw la, aw k’o kɛ i n’a fɔ kɛlɛden ka nigɛkunbɛnnan, ka se ka Sutana ka biɲɛ tasumaman bɛɛ faga n’o ye. Aw ka kisili nigɛfugulan biri, ani ka Nii Senuman ka murujan ta min ye Ala ka kuma ye. Aw ka Ala daali kosɔbɛ tuma bɛɛ Nii Senuman barika la ni daalili sifa bɛɛ ye.”

20. Mun lo ben’a to an ka “kɛlɛkɛminanw” k’an latanga?

²⁰ Ni sɔrɔdasi dɔ ɲinɛna a ka kɛlɛkɛminan dɔ kɔ ani a fari yɔrɔ dɔ latanganin tɛ, a jugu bena a ɲini k’a sɔgɔ o yɔrɔ lo la. N’an b’a fɛ an ka “kɛlɛkɛminanw” k’an latanga, an man kan ka ɲinɛ u si kɔ. U ka ɲi ka kɛ an kun tuma bɛɛ ani an ka ɲi k’u ladon ka ɲɛ. An bena to o kɛlɛ la fɔɔ Sutana ka duniɲa nin ka halaki ani Sutana n’a ka jinaw ka  bɔ yen (Yirali 12:17; 20:1-3). O kama, n’an be nege jugu wala fiɲɛ dɔw kɛlɛla, an man kan k’an fari faga!—1 Korɛntikaw 9:27.

21. Mun lo bena an dɛmɛ ka see sɔrɔ Sutana kan?

²¹ An kelen n’an kelen, an tɛ se ka Sutana kɛlɛ. Nka Jehova ka dɛmɛ sababu fɛ, an be se. Walisa ka to kantigiya la, fɔɔ an ka Jehova deli, k’a ka Kuma kalan, ani ka jɛn n’an balimaw ye (Eburuw 10:24, 25). O lo bena an dɛmɛ ka kantigiya kɛ Ala ye ani k’an ka limaniya lafasa.

22, 23. a) An labɛnnin be se ka to tuma bɛɛ cogo di walisa k’an ka limaniya lafasa? b) An bena mun lo lajɛ kalansen nata la?

²² An labɛnnin ka to k’an ka limaniya lafasa tuma bɛɛ (Zan 15:19). Jehova Seerew be min latigɛ koo dɔw la, o be dan na ni mɔgɔw fanba ta ye. I yɛrɛ ɲininga ko: “Ne b’a faamu ka ɲɛ fɛɛn min kama an b’o desizɔn ta wa? Bibulu ni jɔncɛ kantigiman be min fɔ, ne lanin b’a la k’o ye tiɲɛn ye wa? Kunkɔrɔta lo ne fɛ ka kɛ Jehova Seere ye wa? (Zaburuw 34:3; Matiyo 10:32, 33). Ne be se k’an ka lannakow ɲɛfɔ mɔgɔw ye wa?”—Matiyo 24:45; Zan 17:17; 1 Piyɛri 3:15 kalan.

²³ Koo caaman na, an ka ɲi ka min kɛ walisa k’an mabɔ duniɲa na, o gwɛnin lo. Nka koo dɔw la, o gwɛnin tɛ ten. Sutana b’a ɲini k’an lafili cogo caaman na. A ka fɛɛrɛ dɔ ye ɲɛnagwɛkow lo ye. An be se k’an ka ɲɛnagwɛkow sugandi ni hakilitigiya ye cogo di? An bena o lo lajɛ kalansen nata la.