1, 2. An be se ka mun lo kɛ walisa ka to Ala ka kanuya la?

AN BƐƐ b’a fɛ ka kɛ kɛnɛya la ani ka fanga sɔrɔ. O kama an be dumuni ɲanaman kɛ, an b’an farikolo ɲɛnagwɛ tuma o tuma, ani an b’an janto an ka kɛnɛyako la. O koo tɛ ɲɛ jijali kɔ. Nka komi o b’an nafa, o kama an t’an fari faga. Nka an ka ɲi ka fanga sɔrɔ ani ka to kɛnɛya la cogoya wɛrɛ la fana.

² An sera ka Jehova lɔn, o ye koɲuman ye. Nka o tɛ koo bɛɛ bannin ye. Jɛnɲɔgɔnya min be an n’ale cɛ, fɔɔ an ka to k’o barika bonya. Zude ye kerecɛnw jija ko: “Aw ka to Ala ka kanuya la.” Ani, a y’a ɲɛfɔ an be se k’o kɛ cogo min na. A ko: “Aw ka jija ka taga ɲa aw jigi ka to Ala kan sɔbɛ la.” (Zude 20, 21). An be se ka mun lo kɛ walisa k’an ka limaniya barika bonya?

3-5. a) Sutana b’a fɛ i ka Jehova ka sariyakolow jati cogo di? b) E be mun lo miiri Jehova ka sariyaw n’a ka sariyakolow koo la?

³ A kɔrɔtanin lo i ka la a la tigitigi ko Jehova ka sariyakolow ɲɔgɔn tɛ yen. Sutana b’a fɛ i k’a miiri k’u ka gwɛlɛ kojugu. A b’a fɛ i k’a miiri fana ko min ka fisa i ma, o ye k’a latigɛ i yɛrɛ ma min ka ɲi wala  min man ɲi e yɛrɛ ɲɛɛ na. Kabi Edɛn nankɔtu kɔnɔ, Sutana b’a fɛ k’o miiriya lo don mɔgɔw kuun na (Zɛnɛzi 3:1-6). A jijanin lo k’o lo kɛ hali bi.

⁴ Joo be Sutana fɛ wa? Jehova ka sariyakolow ka gwɛlɛ kojugu wa? Ayi. Miiri k’a filɛ: i be yaalala zaradɛn ɲuman dɔ kɔnɔ. I ɲɛɛ be giriyasi jamanjan dɔ la min be i bali ka se yɔrɔ dɔ ma. N’a sɔrɔ i ben’a miiri ko: “Mun na o giriyasi kɛra ka sira datugu?” O yɔrɔnin bɛɛ, i ye jara dɔ kasikan mɛn giriyasi kɔfɛ. Sisan, i bena mun lo miiri o giriyasi bilakun na? A bena diya i ye k’a ye k’o giriyasi b’i latangara jara ma! An be se ka Jehova ka sariyakolow suma n’o giriyasi ye, ani ka Sutana suma n’o jara ye. Ala ka Kuma b’an lasɔmi ko: “Aw k’aw yɛrɛ kɔlɔsi dɛ! Aw labɛnnin ka to. Bari aw jugu Sutana be munumununa i n’a fɔ jara, a b’a fɛ ka dɔ le minɛ k’a ɲimi.”—1 Piyɛri 5:8.

⁵ Jehova b’a fɛ an ka ɲɛnamaya diyabɔ a ɲɛɛ ma. A t’a fɛ Sutana k’an lafili. O kama a ye sariyaw ni sariyakolow sigi walisa k’an tanga ani k’an dɛmɛ ka kɛ hɛɛrɛ la (Efɛzikaw 6:11). Kalanden Zaki y’a sɛbɛ ko: “Mɔgɔ min be sariya sɔbɛsɔbɛ kɔnɔnakuma lamɛn, . . . ani ka to k’a bato, o tigi kɔni bena hɛrɛ sɔrɔ a ka kɛwaliw la.”—Zaki 1:25.

6. Mun lo be se k’an dɛmɛ ka la a la kosɔbɛ ko Jehova ka sariyakolow nafa ɲɔgɔn tɛ yen?

⁶ N’an b’a to Jehova k’an ɲɛminɛ, an ka ɲɛnamaya kɛcogo be fisaya. Ani, teriya min be an n’ale cɛ, o be barika sɔrɔ. Ɲɛyirali fɛ, a b’a ɲini an fɛ an k’ale deli tuma bɛɛ. N’an b’o kɛ, o b’an nafa (Matiyo 6:5-8; 1 Tesalonikaw 5:17). Jehova ko an ka to ka  ɲɔgɔn lajɛn walisa k’ale bato ani ka ɲɔgɔn jija. A fana ko an ka waajuli kɛ ani ka mɔgɔw kalan. N’an b’o cikanw labato, o b’an ninsɔndiya (Matiyo 28:19, 20; Galatikaw 6:2; Eburuw 10:24, 25). Miiri k’a filɛ o koow y’an dɛmɛ k’an ka limaniya barika bonya cogo min na. O b’a to an be la a la kosɔbɛ ko Jehova ka sariyakolow nafa ɲɔgɔn tɛ yen.

7, 8. Mun lo be se k’an dɛmɛ an kana siran kɔrɔbɔli nataw ɲɛ?

⁷ N’a sɔrɔ an be siran ko an ka limaniya bena na kɔrɔbɔ ani ko an tɛna se k’o koo muɲu. N’i delila ka kɛ n’o miiriya ɲɔgɔn ye, Jehova ka kuma nunu to i hakili la: “Ne Masaba ye aw ka Ala ye. Ne b’aw kalan aw ka nafa kama. Ne b’aw bila sira, aw taayɔrɔw la.  Hun! N’aw tun ye mɛnni kɛ n ka ladiliw la, aw ka hɛrɛ tun bena kɛ i ko baji, aw ka tilenninya tun bena kɛ i ko kɔgɔji [kuruw].”—Ezayi 48:17, 18.

⁸ N’an be mɛnni kɛ Jehova fɛ, an ka hɛɛrɛ bena kɛ i ko baji, min tɛ ja. Ani, an ka tilenninya bena kɛ i ko jikuruw, minw be taga ka na ben kɔgɔjida la tuma bɛɛ. Koo o koo mana an sɔrɔ, an be se ka kantigiya kɛ. Bibulu b’a fɔ an ye ko: “E k’i ka koow to Masaba bolo, a bena i dɛmɛ. A te mɔgɔɲuman to a be ben abada.”—Zaburuw 55:23.

9, 10. Ka kɛ kerecɛn kɔgɔnin ye, o kɔrɔ ko di?

⁹ Jɛnɲɔgɔnya min be e ni Jehova cɛ, n’i tora k’o barika bonya, i bena se ka taga ɲɛ ka kɛ kerecɛn kɔgɔnin ye (Eburuw 6:1). Ka kɛ kerecɛn kɔgɔnin ye, o kɔrɔ ko di?

¹⁰ An tɛ kɛ kerecɛn kɔgɔnin ye sabu an kɔrɔbayara dɔrɔn. Walisa ka kɛ kerecɛn kɔgɔnin ye, fɔɔ an ka Jehova kɛ an teri sɔbɛ ye ani k’an jija ka koow jati i ko ale b’u jati cogo min na (Zan 4:23). Ciden Pol y’a sɛbɛ ko: “Mɔgɔ min be taama ka kɛɲɛ ni farisogo sago ye, o tigi ka miiriya be to o le kan, nga min be taama ka kɛɲɛ ni Nii Senuman sago ye, o tigi ka miiriya be to Ala ka koo le kan.” (Ɔrɔmukaw 8:5). Kerecɛn kɔgɔnin ka ɲɛnako fɔlɔ tɛ ɲɛnagwɛkow wala bololafɛnw ye. Nka a ɲɛnako fɔlɔ ye ka Jehova sago kɛ ani ka desizɔn ɲumanw ta (Talenw 27:11; Zaki 1:2, 3 kalan). A t’a to mɔgɔw k’a lasun ka koo jugu kɛ. A b’a lɔn min ka ɲi ani a b’a jija k’o lo kɛ.

11, 12. a) See min be kerecɛn ye ka koow “lɔn ka bɔ ɲɔgɔn na,” ciden Pol ye mun lo fɔ o koo la? b) Ka kɛ kerecɛn kɔgɔnin ye ani ka kɛ farikoloɲanagwɛla ye, mun na o koo bɔnin be ɲɔgɔn ma?

 ¹¹ Ka kɛ kerecɛn kɔgɔnin ye, o tɛ ɲɛ jijali kɔ. Ciden Pol y’a sɛbɛ ko: “Nga mɔgɔkɔrɔbaw be dumuni gwiliman dumu. U delila o la minkɛ, u ye hakili sɔrɔ ka ɲumaman ni juguman lɔn ka bɔ ɲɔgɔn na.” (Eburuw 5:14). Ciden Pol ko “u delila o la.” O kuma b’an hakili jigi farikoloɲanagwɛla ka jijaliw koo la.

¹² An mana farikoloɲanagwɛla ŋana ye a be spɔr kɛra, an b’a faamu ko a ye wagati caaman lo ta k’a yɛrɛ degi o la. A ma wolo ten. Deen wolotuma na, a tɛ koow kɛcogo lɔn tigitigi n’a bolow ani a seenw ye. Nka dɔɔni dɔɔni, a be fɛɛnw minɛcogo degi ani ka tagamacogo degi fana. Fɔrɔmasɔn be se k’a dɛmɛ ka kɛ farikoloɲanagwɛla ye. O cogo kelen na, n’an b’a fɛ ka kɛ kerecɛn kɔgɔnin ye, o tɛ ɲɛ fɔrɔmasɔn kɔ ani o be wagati ta.

13. Mun lo bena an dɛmɛ ka kɛ ni Jehova ka miiriya ye?

¹³ Gafe nin kɔnɔ, an y’a ye an be se ka miiri ani ka koow jati i ko Jehova b’a kɛ cogo min na. Dɔɔni dɔɔni, an ye Jehova ka sariyakolow faamu ani u diyara an ye. N’an b’a fɛ ka koo dɔ latigɛ, an k’an yɛrɛ ɲininga ko: “Bibulu ka sariyaw wala sariyakolo jumanw lo ɲɛsinna o koo ma? Ne be se k’u sira tagama cogo di? Jehova b’a fɛ ne ka mun lo kɛ?”—Talenw 3:5, 6; Zaki 1:5 kalan.

14. An be se k’an ka limaniya barika bonya cogo di?

¹⁴ An bena to k’an ka limaniya barika bonya fɔɔ abada. I ko dumuni ɲanaman b’an dɛmɛ ka fanga sɔrɔ cogo min na, n’an b’a ɲini ka lɔnniya sɔrɔ Jehova koo  la, o b’an dɛmɛ k’an ka limaniya barika bonya. Tuma min na an y’a daminɛ ka Bibulu kalan, an ye lɔnniya jɔnjɔn sɔrɔ Jehova n’a ka siraw koo la. Nka o kɔ, an mako b’a la ka koow faamu ka dunya. Ciden Pol tun kaan be o lo ma tuma min na a ko: “Mɔgɔkɔrɔbaw be dumuni gwiliman dumu.” An ye min kalan, n’an b’o sira tagama, an be hakilitigiya sɔrɔ. Bibulu b’a fɔ ko: “Hakilitigiya kɔrɔtanin lo ka tɛmɛ fɛɛn bɛɛ kan.”—Talenw 4:5-7; 1 Piyɛri 2:2.

15. Mun na a kɔrɔtanin lo an ka Jehova n’an balimaw kanu sɔbɛ la?

¹⁵ Hali ni fanga be mɔgɔ la ani a ka kɛnɛ, a bele ka kan k’a yɛrɛ balo ka ɲɛ n’o tɛ a barika bena dɔgɔya. O cogo kelen na, kerecɛn kɔgɔnin b’a lɔn ko a ka kan k’a jija walisa ale ni Jehova ka teriya kana nagasi. Ciden Pol b’an hakili jigi ko: “A’ ye aw yɛrɛw sɛgɛsɛgɛ ka aw yɛrɛw kɔrɔbɔ k’a filɛ yala ni aw bɛ dannaya sira kan.” (2 Korɛntikaw 13:5, ABM). Nka an mako tɛ limaniya barikaman dɔrɔn lo la. An be ni kanuya min ye Jehova n’an balimaw koo la, o kanuya barika ka kan ka to ka bonya. Ciden Pol y’a fɔ ko: “Hali ni ne ye . . . fɛɛn bɛɛ lɔnniya sɔrɔ, hali ni ne lara Ala la kosɔbɛ, fɔɔ ka se ka kuluw wili k’u bɔ u lɔyɔrɔ la, ni kanuya te ne dusu la, o bɛɛ ye gwansan ye.”—1 Korɛntikaw 13:1-3.

16. Sutana b’a fɛ an ka mun lo miiri?

¹⁶ Sutana b’a fɛ an k’a miiri ko an mana an jija cogo o cogo k’an koo diya Ala ye, o tɛ Ala ɲɛɛ fa. A b’a fɛ an k’an fari faga ani an k’a miiri ko an ka gwɛlɛyaw tɛ se ka ɲɛnabɔ cogo si la. A t’a fɛ an ka la  an kerecɛnɲɔgɔnw na ani a t’a fɛ an ka ninsɔndiya (Efɛzikaw 2:2). Sutana b’a lɔn ko miiriya juguw be se k’an mako sa ani k’a kɛ teriya min be an ni Ala cɛ, o be tiɲɛ. Nka Jehova ye fɛɛn dɔ di an ma min be se k’an dɛmɛ ka miiriya juguw kɛlɛ: o ye jigiya ye.

17. Jigiya nafa ye mun lo ye?

¹⁷ An be ni jigiya min ye, Bibulu b’o suma ni nɛgɛfugulan ye. Nɛgɛfugulan be sɔrɔdasi kuun tanga kɛlɛkɛyɔrɔ la. Bibulu b’o nɛgɛfugulan weele ko “kisili jigi.” (1 Tesalonikaw 5:8, ABM). Jehova ye layidu minw ta an ye, n’an jigi lanin b’u kan, o be se k’an tanga ani k’an dɛmɛ ka miiriya juguw kɛlɛ.

18, 19. Jigiya ye Yezu barika bonya cogo di?

¹⁸ Jigiya ye barika don Yezu la. A ka suu laban na dugukolo kan, a ye gwɛlɛya caaman sɔrɔ. A teri sɔbɛ dɔ y’a janfa. Dɔ wɛrɛ yɛrɛ y’a fɔ ko a t’a lɔn. Tɔɔw  bolila k’a to yen. A fasodenw wulila a kama ko u k’a tɔɔrɔ k’a faga. Mun lo y’a dɛmɛ k’o tɔɔrɔw bɛɛ muɲu? Bibulu b’a fɔ ko: “A sɔnna ka tɔɔrɔ gwengwenlɔgɔ kan, a ma maloya yɛrɛ jati, bari nisɔndiya min tun b’a kɔnɔna, a ɲaa tun b’o la. Sisan, a siginin be Ala kinibolo la.”—Eburuw 12:2.

¹⁹ Yezu tun b’a lɔn ko n’a ye kantigiya kɛ, o bena nɔɔrɔ la a Faa kan ani k’a yira ko Sutana ye ngalontigɛla ye. O jigiya ye ninsɔndiyaba di a ma. A tun b’a lɔn fana ko dɔɔni o kɔ, a tun bena kɛ n’a Faa ye sankolo la. O jigiya y’a dɛmɛ ka muɲuli kɛ. I ko Yezu, an ka kan k’an hakili to an ka jigiya la. O bena an dɛmɛ ka gwɛlɛya sifa bɛɛ muɲu.

20. Mun lo be se k’i dɛmɛ i jigi kana tigɛ?

²⁰ Jehova ɲɛɛ b’i ka limaniya n’i ka muɲuli la (Ezayi 30:18; Malasi 3:10 kalan). A y’a daa di  ko “e mako be fɛɛn minw na, a bena o d’i ma.” (Zaburuw 37:4). O kama, i hakili to i ka jigiya kan. Sutana b’a fɛ i jigi ka tigɛ ani i k’a miiri ko Jehova ka layiduw tɛna dafa abada. Nka, kan’a to miiriya jugu ka see sɔrɔ i kan. N’i y’a ye ko i jigi be ɲini ka tigɛ, Jehova deli a k’i dɛmɛ. I hakili to Filipikaw 4:6, 7 ka kumaw na: “Aw hakili kana ɲagami koo si la, nga aw ye Ala daali ani ka barika la a ye, k’aw makoyako bɛɛ fɔ a ye. O la, Ala ka hɛrɛ min tɛmɛna mɔgɔw ka faamuyali ma, o le bena aw tanga hamikojugu ma, Yezu Krista barika la.”

21, 22. a) Jehova sagonata ye mun lo ye dugukolo koo la? b) E cɛsirinin lo ka mun lo kɛ?

²¹ To ka wagati ta ka miiri i ka siniɲasigi ɲuman koo la. Yanni dɔɔni, bɛɛ bena Jehova Ala lo bato (Yirali 7:9, 14). Miiri k’a filɛ ɲɛnamaya bena kɛ cogo min na duniɲa kura kɔnɔ. A bena diya fɔɔ a tɛ se ka fɔ! Sutana n’a ka jinaw ani juguya si tɛna kɛ yen tugun. I tɛna bana, ani i tɛna sa. Nka loon o loon, i ninsɔndiyanin bena wuli ni fanga kura ye. Bɛɛ bena jɛn ka dugukolo kɛ alijɛnɛ ye. Bɛɛ bena dumuni ɲanaman ni soo ɲuman sɔrɔ. Mɔgɔw tɛna juguya ani u tɛna fariya ɲɔgɔn ma. Nka u bena ɲɔgɔn minɛ ni kanuya ye sɔbɛ la. Wagati dɔ bena se, mɔgɔ fɛɛn o fɛɛn be dugukolo kan, u bɛɛ bena “Ala denw ta hɔrɔnya nɔɔrɔ sɔrɔ.”—Ɔrɔmukaw 8:21, ABM.

²² Jehova b’a fɛ i k’ale kɛ i teri sɔbɛ ye. O kama, i seko bɛɛ kɛ ka mɛnni kɛ Jehova fɛ ani k’i magwɛrɛ a la loon o loon. An kelen kelen bɛɛ ka to Ala ka kanuya la fɔɔ abada!—Zude 21.