1-3. Yezu ye waajuli baara jɛnsɛn cogo di ani o b’a to an b’an yɛrɛ ɲininga mun ni mun lo la?

 SAAN fila kɔnɔ, Yezu ye waajuli kɛ Galile kuru bɛɛ la (Matiyo 9:35-38 kalan). A tun be taga dugu denninw ni dugubaw la ka mɔgɔw kalan kalansow kɔnɔ ani ka Masaya kibaro diiman fɔ. A tun mana taga yɔrɔ o yɔrɔ, jama tun be taga a sɛgɛrɛ. Yezu yɛrɛ y’a fɔ ko “suman tigɛta ka ca,” ani ko an mako be baarakɛla caaman na.

² Yezu ye waajuli baara jɛnsɛn. Cogo di do? A y’a ka ciden 12 nunu ci “ka taga Ala ka masaya koo fɔ.” (Luka 9:1, 2). N’a sɔrɔ cidenw tun b’u yɛrɛ ɲiningara u bena se k’o baaraba kɛ cogo min na. Sanni Yezu k’u bila ka taga, a ye fɔrɔmasɔn di u ma i ko ale yɛrɛ tun ye fɔrɔmasɔn sɔrɔ a sankolola Faa fɛ cogo min na.

³ O b’a to an b’an yɛrɛ ɲininga ko: Yezu ye fɔrɔmasɔn juman lo sɔrɔ a Faa fɛ? Yezu ye fɔrɔmasɔn juman lo di a ka cidenw ma? Bi bi nin na, yala Masiya be fɔrɔmasɔn di a ka kalandenw ma u ka se k’u ka cii dafa wa? N’o lo, a b’o kɛ cogo di?

4. Yezu ye fɔrɔmasɔn sɔrɔ a Faa fɛ tuma juman ani yɔrɔ juman?

⁴ Yezu yɛrɛ y’a fɔ ka gwɛ ko a Faa le ye ale kalan. A ko: “N Faa ye min fɔ n ye, ne b’o le fɔ.” (Zan 8:28). Yezu ye fɔrɔmasɔn sɔrɔ a Faa fɛ tuma juman ani yɔrɔ juman? Siga t’a la, Yezu ka fɔrɔmasɔn daminɛna dɔɔni dɔrɔn a dannin kɔ (Kɔlɔs. 1:15). Komi ale lo ye Ala ka danfɛn fɔlɔ ye, a ye wagati caaman sɔrɔ ka an ‘Kalanbagaba’ lamɛn ani k’a kɔrɔsi (Ezayi 30:20). O y’a to Yezu ye fɔrɔmasɔn sɔrɔ min ɲɔgɔn tɛ yen a Faa ka jogow, a ka kokɛcogow ani a sagonata koo la.

5. Yezu nana baara min kɛ dugukolo kan, a Faa ye fɔrɔmasɔn juman lo di a ma o koo la?

⁵ Jehova ye fɔrɔmasɔn di a Dencɛ ma wagati bɛnnin na walisa a ka se k’a ka cii dafa dugukolo kan. An ka kiraya kuma dɔ lajɛ, min b’a yira jɛnɲɔgɔnya min be an Kalanbagaba ani a Dencɛ fɔlɔ bangelen cɛ (Ezayi 50: 4, 5 kalan). A fɔra o kiraya kuma kɔnɔ ko Jehova tun b’a Dencɛ kunu “sɔgɔma o sɔgɔma.” O b’a to an be miiri kalanfa dɔ koo la min b’a ka kalanden kunu sɔgɔmada joona walisa k’a kalan. A fɔra gafe dɔ kɔnɔ ko: “A kɛra komi Jehova . . . b’a sigi klasi kɔnɔ i n’a fɔ lakɔliden dɔ, k’a kalan waajuli kɛcogo la ani a ka ɲi ka min fɔ waajuli la.” O sankolola “lakɔli la,” Jehova ye a Dencɛ kalan a “ka kan ka kuma minw fɔ.” (Zan 12:49). A y’a Dencɛ kalan fana mɔgɔw kalancogo la. a Yezu ye fɔrɔmasɔn min sɔrɔ, tuma min na a tun be dugukolo kan, a y’o sira tagama a ka waajuli baara la. A ye fɔrɔmasɔn di a ka kalandenw ma, olu fana ka se k’u ka waajuli baara dafa.

6, 7. a) Yezu ye fɔrɔmasɔn juman lo di a ka cidenw ma ani a y’u labɛn mun lo kama? b) Bi bi nin na, Yezu y’a janto mun lo la a ka kalandenw ka fɔrɔmasɔn koo la?

⁶ Yezu ye fɔrɔmasɔn juman lo di a ka cidenw ma? Ka kɛɲɛ ni Matiyo sapitiri 10nan ye, Yezu ye cikan tigitigi dɔw di u ma waajuli baara koo la. A y’a fɔ u ye u ka ɲi ka waajuli kɛ yɔrɔ min na (vɛrise 5 ni 6nan), u ka ɲi ka min fɔ (vɛrise 7nan), ko u ka ɲi k’u jigi la Jehova kan (vɛrise 9 ni 10nan), u ka ɲi ka kuma mɔgɔw fɛ cogo min na (vɛrise 11-13nan), ni mɔgɔw banna k’u lamɛn, u ka ɲi k’o koo ta cogo min na (vɛrise 14 ni 15nan), ani fana u ka ɲi ka min kɛ ni mɔgɔw b’u kɛlɛla (vɛrise 16-23nan). b Yezu ye fɔrɔmasɔn ɲuman min di a ka cidenw ma, o y’u dɛmɛ u sera ka kibaro diiman fɔ yɔrɔ bɛɛ saan kɛmɛkulu fɔlɔ wagati la.

⁷ Bi do? Ala ka Masaya Masacɛ Yezu ye baaraba dɔ lo kalifa a ka kalandenw ma. O ye ka “Ala ka kibaru diman . . . fɔ diɲɛ yɔrɔ bɛɛ la.” (Mat. 24:14). Yala an ka Masacɛ ye fɔrɔmasɔn di an ma o koo la wa? Ɔnhɔn! K’a to sankolo la, a y’a janto a ka kalandenw ka fɔrɔmasɔn sɔrɔ waajuli baara kɛcogo la kiinw kɔnɔ, ani kunkanbaara kɛrɛnkɛrɛnninw dafacogo koo la kafo kɔnɔ.

8, 9. a) Ala ka Mara cidenyabaara lakɔli kuun jɔnjɔn ye mun lo ye? b) Lajɛn minw be kɛ lɔgɔkun kɔnɔ, o y’i dɛmɛ cogo di ka sanga sɔrɔ i ka waajuli baara la?

⁸ Kabi wagatijan, Jehova ka ɔriganisasiyɔn be fɔrɔmasɔn di a sagokɛlaw ma waajuli baara kama. A b’o kɛ kafokulu lajɛnbaw, tile saba lajɛnbaw ani kafo ka lajɛnw sababu fɛ, i n’a fɔ lajɛn minw be kɛ lɔgɔkun kɔnɔ. Nka kabi saan 1940, an ka sigiyɔrɔsoba y’a daminɛ ka fɔrɔmasɔn di balimaw ma lakɔliw sababu fɛ.

⁹ Ala ka Mara cidenyabaara lakɔli. I ko an y’a ye cogo min na sapitiri tɛmɛnin na, o lakɔli daminɛna saan 1943. Yala o lakɔli kuun ye ka fɔrɔmasɔn di kalandenw ma walisa u ka se k’u ka kalanw kɛ ka ɲɛ kafo kɔnɔ dɔrɔn wa? Ayi. Kuma ye nilifɛn ye min bɔra Ala yɔrɔ. Ala ka Mara cidenyabaara lakɔli kuun tun ye ka fɔrɔmasɔn di Jehova sagokɛlaw ma walisa u ka tɛmɛ o nilifɛn fɛ ka Jehova tando  waajuli la (Zab. 150:6). Balimacɛw ni balimamuso minw y’u tɔgɔ sɛbɛ o lakɔli la, o y’u dɛmɛ ka se Masaya waajuli baara la koɲuman. Bi bi nin na, o lakɔli be kɛ lɔgɔkun kɔnɔ lajɛn tuma na.

10, 11. Jɔn lo be se ka taga Gilead lakɔli la sisan, ani o fɔrɔmasɔn kuun ye mun lo ye?

¹⁰ Gilead lakɔli. An be lakɔli min weele bi ko Gilead lakɔli, o daminɛna saan 1943, tɛnɛlon feburukalo tile fɔlɔ. A daminɛ na, o lakɔli kuun tun ye ka fɔrɔmasɔn di piyɔniyew ni kudayi cidenya baarakɛla wɛrɛw ma walisa k’u ci ka taga kɛ misɔndenw ye jamana wɛrɛw la. Nka kabi saan 2011 ɔkutɔburukalo la, minw be kudayi cidenya baara la ka ban i n’a fɔ dan na piyɔniyew, kafokulu kɔrɔsibagaw n’u musow, betɛlidenw ani misɔnden minw ma deli k’o lakɔli kɛ ka ye, olu lo be se ka taga o lakɔli kɛ.

¹¹ Gilead lakɔli kuun ye mun lo ye? O lakɔli kalanfakɔrɔ dɔ y’a fɔ ko: “Ka kalandenw dɛmɛ u ka Ala ka Kuma sɛgɛsɛgɛ koɲuman walisa k’u ka limaniya barika bonya, ani k’u dɛmɛ fana u ka kɛ ni jogow ye u mako bena kɛ minw na walisa ka se ka see sɔrɔ gwɛlɛyaw kan u ka cidenya baara la. Ka fara o kan, o lakɔli kuun jɔnjɔn ye ka waajuli baara nege don kalandenw na kosɔbɛ.”—Efɛz. 4:11.

12, 13. Gilead lakɔli ye dɛmɛ juman lo don duniɲa kuru bɛɛ waajuli baara la? Misali dɔ fɔ.

¹² Gilead lakɔli ye dɛmɛ juman lo don duniɲa kuru bɛɛ waajuli baara la? Kabi saan 1943, balima 8 500 lo ye fɔrɔmasɔn sɔrɔ o lakɔli la c ani u cira ka taga jamana 170 ni kɔ la duniɲa kuru bɛɛ kɔnɔ. U ye ladili minw sɔrɔ, u b’o sira tagamana, u be waajuli kɛra ni kisɛya ye ani u be tɔɔw dɛmɛna olu fana k’o ɲɔgɔn kɛ. Yɔrɔ minw na weleweledalaw man ca wala weleweledalaw tɛ yen yɛrɛ, tuma caaman na, misɔndenw lo be waajuli baara ɲɛminɛ yen.

¹³ An k’a filɛ min kɛra Zapɔn jamana na. Kɛlɛba filanan tuma na, waajuli baara tun lalɔra o jamana na. Saan 1949 utikalo la, weleweledala minw tun be o yɔrɔ la, u tun ma se mɔgɔ 10 yɛrɛ ma. Nka o saan laban na, misɔnden 13 cira ka taga yen ani u ye waajuli kɛ ni kisɛya ye. O kɔ, u ye misɔnden caaman wɛrɛw ci ka taga o jamana na. A daminɛ na, u y’u jija ka waajuli kɛ dugubabaw lo la fɔlɔ. O kɔ, u sɔrɔla ka taga dugu wɛrɛw la. U y’u ka Bibulu kalandenw ani kafomɔgɔw jija u k’u seen don piyɔniye baara la. U ka kisɛya n’u ka jijali ma kɛ fuu ye sabu bi bi nin na, weleweledala 216 000 ni kɔ lo be Zapɔn jamana na ani weleweledala kɛmɛ kɛmɛ kan, 40 ye piyɔniyew ye! d

14. Ala ka Mara lakɔliw be mun lo yira ka gwɛ? (Koorilen nin lajɛ fana ɲɛɛ 188 kan: “ Masaya weleweledalaw ye fɔrɔmasɔn sɔrɔ lakɔli minw na.”)

¹⁴ Ala ka Mara lakɔli wɛrɛw. Balima minw ye piyɔniyew ka lakɔli, kerecɛn furuninw ka Bibuluko lakɔli, ani cɛgwanaw ka Bibuluko lakɔli kɛ, o y’u dɛmɛ k’u ka jɛnɲɔgɔnya sabati ni Jehova ye. e O y’u dɛmɛ fana ka kisɛya  walisa ka se ka waajuli baara ɲɛminɛ. O lakɔliw bɛɛ b’a yira ka gwɛ ko an ka Masacɛ y’a ka kalandenw labɛn bɛrɛbɛrɛ walisa u ka se k’u ka waajuli baara dafa.—2 Tim. 4:5.

15. Balimacɛ minw be ni kunkanbaaraw ye, olu b’a fɛ ka Yezu ladegi mun lo la?

¹⁵ A to i hakili la ko a fɔra Ezayi ka kiraya kuma kɔnɔ ko Yezu ye fɔrɔmasɔn sɔrɔ Ala fɛ. A ye Yezu degi kuma na, ‘janko a ka se ka sɛgɛnbagatɔw jaa gwɛlɛya n’o kumaw ye.’ (Ezayi 50:4). Yezu ye ladili minw sɔrɔ, a y’o sira tagama tuma min na a tun be dugukolo kan. Minw niin tun ‘tɔɔrɔnin lo ni sɛgɛn b’u kan,’ a ye olu lafiya (Mat. 11:28-30). Balimacɛ minw be ni kunkanbaaraw ye, u b’a fɛ ka Yezu ladegi u kɛtɔ k’u balimaw lafiya u ka kumaw n’u ka kɛwalew fɛ. O lo kama lakɔli caaman sigira sen kan walisa k’o balimacɛw dɛmɛ o la.

16, 17. Masaya cidenyabaara lakɔli kuun ye mun lo ye? (Jukɔrɔla kunnafoni fana lajɛ).

¹⁶ Masaya cidenyabaara lakɔli. O lakɔli ka klasi fɔlɔ daminɛna saan 1959, marisikalo tile 9, Lansing  worodugu fan fɛ, Niyɔriki mara la. Kalo kelen kɔnɔ, u tun be fɔrɔmasɔn di kɔrɔsibaga tagamakɛlaw ni kafo ka baaradenw ma. A daminɛ na, o lakɔli tun be kɛ angilikan na le. Nka kɔfɛ, u nana to k’o kɛ kaan wɛrɛw la duniɲa kuru bɛɛ kɔnɔ. f

¹⁷ Saan 1962 ka Annuaire des Témoins de Jéhovah y’a yira Masaya cidenyabaara lakɔli kuun ye min ye. A fɔra o gafe kɔnɔ ko: “Duniɲa ɲagaminin nin na, Jehova Seerew ka kafo kɔrɔsibaga ka kan k’a ka ɲɛnamaya labɛn ka ɲɛ walisa a ka se k’a janto kafomɔgɔ kelen kelen bɛɛ la ani k’u dusu saalo. Nka a man kan k’a to kafo ka baaraw k’a bali k’a ka denbayamɔgɔw mako wasa. O kama, a ka ɲi ka koow kɛ k’a dama kɛɲɛ. Duniɲa kuru bɛɛ kɔnɔ, kafo ka baaradenw be ni sababu ye ka Masaya cidenyabaara lakɔli kɛ. U be fɔrɔmasɔn min sɔrɔ o lakɔli la, o b’u dɛmɛ u ka se k’u ka kunkanbaaraw dafa i ko a ɲinina kɔrɔsibagaw fɛ cogo min na Bibulu kɔnɔ!”—1 Tim. 3:1-7; Titi 1:5-9.

18. Masaya cidenyabaara lakɔli be Ala sagokɛlaw bɛɛ nafa cogo di?

 ¹⁸ Masaya cidenya baara lakɔli be Ala sagokɛlaw bɛɛ lo nafa. Cogo di do? Diinan mɔgɔkɔrɔw ni kɔrɔsigi cidenw be ladili minw sɔrɔ o lakɔli la, n’u b’o sira tagama, i ko Yezu, u b’u balimaw dusu saalo u ka kumaw n’u ka kɛwalew fɛ. Ni diinan mɔgɔkɔrɔ wala kɔrɔsigi ciden dɔ ye kuma diiman dɔ fɔ an ye, n’u y’an lamɛn koɲuman wala n’u nana bɔ an ye walisa k’an jija, yala o t’an dusu sɔrɔ wa? (1 Tes. 5:11). O balimacɛw ye dugaba yɛrɛ lo ye kafomɔgɔw fɛ!

19. Kalanko ɲɛnabɔbagaw ka kɔmite be lakɔli wɛrɛ jumanw lo ɲɛminɛ? Ani o lakɔliw kuun ye mun lo ye?

¹⁹ Ala ka Mara lakɔli wɛrɛw. Koow Ɲɛnabɔla Jɛnkuluw be tɛmɛ Kalanko ɲɛnabɔbagaw ka kɔmite fɛ ka lakɔli wɛrɛw ɲɛminɛ. Balima minw be ni kunkanbaara caaman ye ɔriganisasiyɔn kɔnɔ, o lakɔliw b’u dɛmɛ k’u ka kunkanbaaraw dafa ka ɲɛ. O lakɔliw kuun ye ka diinan mɔgɔkɔrɔw, kafokulu kɔrɔsibagaw, ani Betɛli ka kɔmite mɔgɔw dɛmɛ u ka se k’u ka kunkanbaaraw bɛɛ dafa. O be balimacɛw dɛmɛ fana, u ka se k’u ka Alako barika bonya ani ka Bibulu ka sariyakolow sira tagama walisa Ala ye sagakulu min kalifa u ma, u ka se k’u janto o la koɲuman.—1 Piyɛri 5:1-3.

20. Mun na Yezu y’a fɔ ko an bɛɛ ye Jehova ka “kalandenw ye” ani ele jijanin lo ka mun lo kɛ?

²⁰ A gwɛnin lo ko Masiya b’a janto walisa a ka kalandenw ka fɔrɔmasɔn ɲuman sɔrɔ. O fɔrɔmasɔnw bɛɛ daminɛna sankolo la ka sɔrɔ ka se dugukolo kan: Jehova ye fɔrɔmasɔn di a Dencɛ ma, ani Dencɛman ye fɔrɔmasɔn di a ka kalandenw ma. O lo kama Yezu y’a fɔ ko an bɛɛ ye Jehova ka “kalandenw ye.” (Zan 6:45; Ezayi 54:13). An ka Masacɛ ye fɔrɔmasɔn min di an ma, an bɛɛ k’an jija o k’an nafa bɛrɛbɛrɛ. An k’a to an hakili la k’o fɔrɔmasɔnw bɛɛ kuun jɔnjɔn ye k’an dɛmɛ an k’an ka Alako barika bonya walisa an ka se k’an ka waajuli baara dafa bɛrɛbɛrɛ.