1, 2. Yezu y’a yira cogo di ko a ye ɲɛminɛbaga hakilitigi ye?

 MIIRI k’a filɛ, ele ni mɔgɔ wɛrɛw bɔra jamana dɔ la ka taga dugu cɛɲumanba dɔ filɛ. Komi aw siɲɛ fɔlɔ lo ka taga yen, aw ye mɔgɔ dɔ ɲini min b’o dugu lɔn ka ɲɛ walisa a k’aw ɲɛminɛ. O tigi mana min o min fɔ, aw b’o lamɛn koɲuman. Aw ma taga yɔrɔ minw na fɔlɔ, ele n’i tɔɲɔgɔnw b’aw yɛrɛ ɲininga koo caaman na o yɔrɔw koo la. Nka, aw mana aw ɲɛminɛbaga ɲininga, a tɛ sin ka kuma. A be kɔnɔni kɛ wagati bɛnnin na ka sɔrɔ k’aw jaabi. Tuma dɔw la, a b’a to n’aw gwɛrɛla o yɔrɔw la, a be sɔrɔ ka kuma u koo la. Dugu lajɛtɔ, ɲɛminɛbaga ka hakilitigiya tora k’aw kabakoya: Aw mako b’a la ka min lɔn, a b’o fɔ aw ye wagati ani yɔrɔ bɛnnin na.

² Kerecɛn sɔbɛw be komi minw tagara dugu cɛɲumanba dɔ filɛ. An kɔrɔtɔnin lo ka dɔ lɔn tugun Ala ka Masaya koo la. Bibulu b’o Masaya weele ko: “Dugu . . . min lɔra ka ɲa.” (Eburuw 11:10). Tuma min na Yezu tun be dugukolo kan, a y’a ka kalandenw dɛmɛ u ye koo caaman faamu o Masaya koo la. Yala a y’u ka ɲiningaliw bɛɛ jaabi ani a sinna ka koo bɛɛ fɔ u ye o Masaya koo la wa? Ayi. A ko: “Koo caaman be ne fɛ k’o fɔ aw ye, nga aw tena se k’o bɛɛ faamu sisan.” (Zan 16:12). Yezu ye ɲɛminɛbaga ɲuman ye ani a ka hakilitigiya ɲɔgɔn tɛ yen danfɛnw cɛma. O kama, a ka kalandenw tun tɛ se ka koo minw faamu fɔlɔ, a ma o fɔ u ye.

3, 4. a) Yezu tora ka mɔgɔ kantigiw kalan Ala ka Masaya koo la cogo di? b) An bena mun lo lajɛ sapitiri nin na?

³ Kuma minw be sɔrɔ Zan 16:12 kɔnɔ, Yezu y’o fɔ a ka suu laban na dugukolo kan. A sanin kɔ, a tun bena to ka mɔgɔ kantigiw kalan Ala ka Masaya koo la cogo di? A y’a ka cidenw hakili sigi ko: “Nii Senuman min be Ala ka tiɲɛ yira mɔgɔw la, . . . a ben’a to aw be tiɲɛ bɛɛ lɔn.” (Zan 16:13). Jehova ka hakili senu be komi ɲɛminɛbaga min be mɔgɔw dɛmɛ ka koow faamu dɔɔni dɔɔni. Yezu ka kalandenw mako b’a la ka fɛɛn o fɛɛn lɔn Ala ka Masaya koo la, Yezu be tɛmɛ hakili senu fɛ k’u kalan o la. A b’o kɛ wagati bɛnnin na.

⁴ An k’a filɛ Jehova ka hakili senu ye kerecɛn sɔbɛw dɛmɛ cogo min na u ye koo caaman faamu Masaya koo la. A fɔlɔ,  Masaya sigira sen kan tuma min na, an bena a ye an y’o faamu cogo min na. O kɔ, minw bena sigi o Masaya kun na ani minw bena kɛ a marakɔnɔmɔgɔw ye, an bena a ye olu ye mɔgɔ minw ye ani u be ni jigiya minw ye. Ka kantigiya kɛ Masaya koo la, Krista ka kalandenw y’o kɔrɔ faamu cogo di? An bena o lo lajɛ laban na.

5, 6. a) Bibulu Kalandenw tun be ni miiriya bɛnbali jumanw lo ye Masaya sigiko ani sumantigɛ wagati koo la? b) Yala o miiriyaw b’a yira ko Yezu tun t’a ka kalandenw ɲɛminɛna wa? A ɲɛfɔ.

⁵ Kabi tumajan, Bibulu Kalandenw tun y’a fɔ ko Bibulu ka kiraya kuma jɔnjɔn dɔ bena dafa saan 1914. An y’o lo ye sapitiri 2nan na. Nka o wagati la, u tun b’a miiri ko Yezu sigira masaya la kabi saan 1874, ko a y’a daminɛ ka mara kɛ sankolo la saan 1878 ani k’o Masaya tun bena sigi sen kan bɛrɛbɛrɛ saan 1914, ɔkutɔburukalo la. U tun b’a miiri fana ko sumantigɛ daminɛna saan 1874 ani ko a bena ban saan 1914, wagati min na kerecɛn mɔlenw bɛɛ tun bena lajɛn sankolo la. O miiriyaw tun bɛnnin tɛ. Nka, yala o b’a yira ko Yezu tun t’o mɔgɔ kantigiw ɲɛminɛna ni hakili senu ye wa?

⁶ Ayi, o tɛ! An ye ɲɛyirali min ta a daminɛ na, an ka segi o kan. Minw tun be dugu filɛra, olu tun be kɔn ka koo dɔw miiri ani u tun kɔrɔtɔnin lo ka koo dɔw lɔn. Yala o kɔrɔ ko min tun be yɔrɔ yirala u la, ale tɛ ɲɛminɛbaga ɲuman ye wa? Ayi, o tɛ. O cogo kelen na, tuma dɔw la, Ala sagokɛlaw b’a ɲini ka koo dɔw faamu Jehova sagonata koo la. Hali n’u b’o kɛ k’a sɔrɔ wagati ma se fɔlɔ hakili senu k’u ɲɛminɛ u k’o koo faamu, a gwɛnin lo ko Yezu b’u ɲɛminɛna. O kama, mɔgɔ kantigiw be sɔn u k’u ka miiriya latilen ani u b’u yɛrɛ majigi k’u ka miiriya yɛlɛma.—Zaki 4:6.

7. Ala ka mɔgɔw tora ka koo jumanw lo faamu Alakow la?

⁷ Saan 1919 tɛmɛnin kɔ, Ala ka mɔgɔw tora ka koo caaman faamu Alako ta fan fɛ (Zaburuw 97:11 kalan). Saan 1925, barokun dɔ bɔra Kɔrɔsili Sangaso kɔnɔ min ye mɔgɔw dɛmɛ kosɔbɛ. A kuun ko: “La naissance de la nation” (Siya bangeli). O barokun kumana bibulusen dɔw koo la minw b’a yira tiɲɛn na ko Masiya ka Masaya sigira sen kan saan 1914. O b’a yira ko Yirali sapitiri 12 ka kiraya kuma dafara. a O kiraya be muso dɔ kofɔ min be sankolo la ani a be deen wolola. O barokun y’a ɲɛfɔ fana ko Jehova sagokɛlaw ye kɔrɔbɔliw ni gwɛlɛya minw sɔrɔ kɛlɛba wagati la, o b’a yira ko Sutana gwɛnna ka bɔ sankolo la. A dimininba lo sabu “a b’a lɔn ko a halakilon tɔɔ man jan tugu.”—Yir. 12:12.

8, 9. a) Masaya kɔrɔtanin lo fɔɔ ka se hakɛ min ma, o yirala ka gwɛ cogo di? b) An bena ɲiningali jumanw lo lajɛ?

⁸ Masaya kɔrɔtanin lo fɔɔ ka se hakɛ juman ma? Saan 1928, Kɔrɔsili Sangaso y’a daminɛ k’a yira ko an bena kisili min sɔrɔ kunmabɔsara barika la, Masaya koo kɔrɔtanin lo ka tɛmɛ o kan. Masiya ka Masaya sababu lo la, Jehova bena a tɔgɔ saniya, k’a ka Masabaya lafasa ani k’a sagonata bɛɛ dafa adamadenw koo la.

 ⁹ Jɔn lo bena mara kɛ ni Krista ye? Jɔn lo bena kɛ Masaya marakɔnɔmɔgɔw ye? Yezu ka kalandenw ka ɲi k’u jija baara juman lo la?

10. Kabi saan caaman, Ala sagokɛlaw ye mun lo faamu mɔgɔ 144 000 koo la?

¹⁰ Saan caaman ka kɔn 1914 ɲɛ, kerecɛn sɔbɛw tun y’a faamu ko Yezu ka kalanden kantigi mɔgɔ 144 000 lo bena sugandi ka taga kuntigiya kɛ n’a ye sankolo la. b U tun y’a faamu fana ko u hakɛ ye mɔgɔ 144 000 yɛrɛ yɛrɛ lo ye, ani ko u sugandili koo daminɛna kabi saan kɛmɛkulu fɔlɔ la.

11. Minw tun bena kɛ Krista ka kɔɲɔmuso ye, cii min kalifara u ma dugukolo kan, u ye faamuyali sɔrɔ dɔɔni dɔɔni o koo la cogo di?

¹¹ Minw tun bena kɛ Krista ka kɔɲɔmuso ye, k’u to dugukolo kan, cii juman lo kalifara olu ma? U y’a kɔrɔsi ko Yezu tun y’a yira ko waajuli baara kɔrɔtanin lo kosɔbɛ ani k’o ɲɛsinna sumantigɛ wagati ma (Mat. 9:37; Zan 4:35). I ko an y’a ye sapitiri 2nan na, wagati dɔ la, u tun b’a miiri ko sumantigɛ wagati bena mɛɛn saan 40 kɔnɔ ani k’o baara bena laban ni kerecɛn mɔlenw lajɛnnin ye sankolo la. Nka, sumantigɛ tora ka kɛ saan 40 tɛmɛnin kɔ. O kama, u mako tun be faamuyali kura la. Sisan, an b’a faamu ko sumantigɛ wagati daminɛna saan 1914. Bile faranna ka bɔ biin jugu la. O kɔrɔ, kerecɛn mɔlen kantigiw faranna ka bɔ kerecɛn tɔgɔtigiw la. O kɔ le, kerecɛn mɔlen tɔɔw lajɛnnin daminɛna.

12, 13. Yezu ye ntalen minw la npogotigi tan ani sanukuruw koo la, u dafara duniɲa laban wagati la cogo di?

¹² Kabi saan 1919, Yezu tora ka jɔncɛ kantigiman hakiliman ɲɛminɛ walisa a ka sinsin waajuli baara kan. Yezu tun y’o baara kalifa kerecɛn mɔlenw ma saan kɛmɛkulu fɔlɔ la (Mat. 28:19, 20). A y’a yira o kerecɛn mɔlenw mako tun bena kɛ jogo minw na walisa ka se k’o baara dafa. A y’o yira cogo di do? A ye ntalen dɔ la npogotigi tan dɔw koo la. O ntalen na, a y’a yira ko kerecɛn mɔlenw ka ɲi ka to ɲɛɛ na Alako to fan fɛ, o kɔrɔ, ka kɛ ni limaniya barikaman ye. O lo bena u dɛmɛ k’u ka laɲinita dafa, o min ye ka kɔɲɔya dumuni kɛ ni Krista ye sankolo la. O bena kɛ tuma min na Krista n’a ka “kɔɲɔmuso” bena u ka furu siri. O kɔɲɔmuso ye mɔgɔ 144 000 nunu ye (Yir. 21:2). Yezu ye ntalen dɔ la fana  sanukuru tan koo la. A y’a yira ko kerecɛn mɔlenw ka ɲi ka kisɛya waajuli baara la, a ye o min kalifa u ma.—Mat. 25:1-30.

¹³ Saan kɛmɛkulu tɛmɛnin na, kerecɛn mɔlenw y’a yira k’u tora ɲɛɛ na Alako ta fan fɛ ani k’u kisɛyanin lo. Siga t’a la, Jehova bena u duga o kosɔn! Nka, mɔgɔ 144 000 minw bena kuntigiya kɛ ni Krista ye, yala sumantigɛ tun bena dan olu tɔɔw lajɛnnin lo ma wa?

14, 15. Jɛnkulu naani jumanw lo tun kofɔra gafe nin kɔnɔ: Le mystère accompli (Ala ka gundo dafara)?

¹⁴ Yirali 7:9-14 be kuma “jamaba” dɔ koo la. Saan caaman kɔnɔ, cɛɛw ni muso kantigiw y’a ɲini k’a lɔn o “jamaba” ye mɔgɔ minw ye. Kuma caaman fɔra o jamaba koo la an ka gafew kɔnɔ. Nka, u tun bɛnnin tɛ sabu wagati tun ma se Yezu fɛ k’a yira o jamaba ye mɔgɔ minw ye. Nka sisan, an b’a faamu cogo nɔgɔman na o “jamaba” ye mɔgɔ minw ye. O faamuyali gwɛnin lo ani a ka di an ye.

¹⁵ Saan 1917, gafe Le mystère accompli (Ala ka gundo dafara) y’a yira ko jɛnkulu fila lo bena taga sankolo la ani ko jɛnkulu fila fana lo bena to dugukolo kan. O jɛnkulu naani mɔgɔw tun ye jɔnw lo ye? Jɛnkulu fɔlɔ tun ye mɔgɔ 144 000 ye minw bena mara kɛ ni Krista ye. Jɛnkulu filanan tun ye jamaba mɔgɔw ye. O wagati la, an tun b’a miiri ko mɔgɔ minw bele be kerecɛn tɔgɔtigiw ka legiliziw kɔnɔ, olu lo ye jamaba mɔgɔw ye. U tun limaniyanin lo dɔɔni. Nka, u ka limaniya barika tun man bon fɔɔ k’u lasun u ka bɔ ngalon diinan na. O kama, u tun bena taga sankolo la nka, u tun tɛna lɔyɔrɔba sɔrɔ. Jɛnkulu sabanan tun ye galen cɛmɔgɔbaw ye i n’a fɔ cɛɛ kantigiw: Ibrayima, Musa ani dɔ wɛrɛw. Olu tun bena kuntigiya kɛ jɛnkulu naaninan mɔgɔw kun na, dugukolo kan. A tun be jati ko jɛnkulu naaninan mɔgɔw ye adamaden tɔɔw ye.

16. An ye faamuyali jumanw lo sɔrɔ saan 1923 ani saan 1932?

¹⁶ An be ni faamuyali min ye bi, hakili senu ye Krista ka kalandenw dɛmɛ cogo di k’o sɔrɔ? O kɛra dɔɔni dɔɔni le. Saan 1923, Kɔrɔsili Sangaso kumana jɛnkulu dɔ koo la min jigi t’a la ka taga sankolo la. O jɛnkulu bena to dugukolo kan ani Krista bena mara kɛ a kun na. Saan 1932, Kɔrɔsili Sangaso kumana Yonadabu koo la min y’a masiri Zewu la, Ala tun ye min mɔ k’a kɛ Israɛl masacɛ ye. Yonadabu y’o kɛ walisa ka Zewu dɛmɛ ka ngalon diinan kɛlɛ (2 Mas. 10:15-17). O barokun y’a yira ko jɛnkulu dɔ be yen an ka wagati la min be komi Yonadabu, ani ko Jehova barika la, o jɛnkulu bena “kisi Arimagedɔn kɛlɛ la” ka ɲɛnamaya kɛ dugukolo kan.

17. a) Saan 1935, an ye faamuyali juman lo sɔrɔ? b) Kerecɛn kantigiw ye faamuyali kura min sɔrɔ jamaba koo la, o ye mun lo kɛ u la? (Koorilen nin lajɛ: “ U dusu diyara kosɔbɛ!”)

¹⁷ Saan 1935, an ye faamuyali wɛrɛ sɔrɔ. Lajɛnba dɔ la Wasintɔn, u y’a ɲɛfɔ ko kerecɛn minw ka jigiya ye ka ɲɛnamaya kɛ dugukolo kan, olu lo ye jamaba mɔgɔw ye. Olu lo sumana ni sagaw ye Yezu ka ntalen na, a ye min la sagaw  ni baaw koo la (Mat. 25:33-40, Biblu Ala ta Kuma). Jamaba mɔgɔw lo ye “saga dɔ wɛrɛw” ye, Yezu y’a fɔ minw koo la ko: “Fɔɔ n ka na n’u ye.” (Zan 10:16). Kalankɛla Joseph Rutherford y’a fɔ ko: “Minw bɛɛ jigi b’a la ka ɲɛnamaya kɛ kudayi dugukolo kan, u ka hakɛ to ka wuli ka lɔ.” Minw tun be lajɛnba la, u fanba wulila ka lɔ. Balimacɛ Rutherford ko: “A’ y’a filɛ! Jamaba mɔgɔw ye nin ye!” Sisan, mɔgɔ caaman y’a lɔn u ka jigiya ye min ye ani o diyara u ye kosɔbɛ.

18. Krista ka kalandenw y’u seko bɛɛ kɛ waajuli baara la cogo di? Mun lo sɔrɔla o la?

¹⁸ Kabi o wagati, Krista y’a ka kalandenw ɲɛminɛ walisa u k’u seko bɛɛ kɛ ka jamaba mɔgɔw lajɛn. O jamaba mɔgɔw lo bena kisi tɔɔrɔba wagati la. A daminɛ na, mɔgɔ minw tun lajɛnna ka ban, u tun man ca. Balimacɛ Rutherford yɛrɛ y’a fɔ loon dɔ ko: “A be komi o ‘jamaba’ mɔgɔw man ca ten dɛ!” Nka kabi o wagati, Jehova ye waajuli baara duga kosɔbɛ! Kerecɛn mɔlenw ani “saga dɔ wɛrɛw” kɛra “kulu kelen ye, ani dɛndɛbaga kelen” lo b’u kɔ i ko Yezu tun y’a fɔ cogo min na. O sera ka kɛ Yezu ni hakili senu barika lo la.

19. An be se ka mun lo kɛ walisa dɔ ka to ka fara jamaba mɔgɔw hakɛ kan?

¹⁹ Mɔgɔ kantigiw fanba bena ɲɛnamaya kɛ kudayi alijɛnɛ kɔnɔ dugukolo kan. Krista n’a ka marakɛɲɔgɔn mɔgɔ 144 000 lo bena u mara. Bibulu b’a yira ka gwɛ ko mɔgɔ dɔw ka jigiya ye ka ɲɛnamaya kɛ dugukolo kan. Krista ye Ala ka mɔgɔw ɲɛminɛ cogo min na walisa u k’o koo faamu, o b’an ninsɔn diya kosɔbɛ. Nɛɛmaba lo an fɛ k’o jigiya kofɔ mɔgɔw ye waajuli la! An k’an seko bɛɛ kɛ o baara la. O la, dɔ bena to ka fara jamaba mɔgɔw hakɛ kan ani mɔgɔ caaman bena to ka Jehova tɔgɔ tando ni kaanba ye!—Luka 10:2 kalan.

20. Mun ni mun lo be Sutana ka ɔriganisasiyɔn kɔnɔ? Kerecɛn be se k’a yira cogo di ko a be kantigiya kɛ Ala Masaya koo la?

²⁰ Dɔɔni dɔɔni, Ala sagokɛlaw tora ka koo caaman faamu Ala ka Masaya koo la. U mako tun b’a la k’a faamu fana a kɔrɔ ye min ka kantigiya kɛ o Masaya koo la, o min be sankolo la. O la, saan 1922, Kɔrɔsili Sangaso y’a ɲɛfɔ ko ɔriganisasiyɔn fila lo be yen: Jehova ta, ani Sutana ta. Duniɲa nin ka jagokow, a ka diinankow, n’a ka politikikow lajɛnnin lo ye Sutana ka ɔriganisasiyɔn ye. Mɔgɔ o mɔgɔ b’a fɛ ka kantigiya kɛ Ala ka Masaya koo la, o tigi man ɲi k’a seen don Sutana ka ɔriganisasiyɔn na cogo bɛnbali la (2 Kor. 6:17). O kɔrɔ ko di do?

21. a) Jɔncɛ kantigiman be Ala sagokɛlaw lasɔmi cogo di jagokɛlababaw koo la? b) Saan 1963, Kɔrɔsili Sangaso tun ye mun lo yira ka gwɛ Babilɔniba koo la?

²¹ Jɔncɛ kantigiman be tɛmɛ gafew ni fɛɛn wɛrɛw fɛ ka jagokɛlababaw ka nanbarakow yira ka gwɛ. A b’an lasɔmi fana ko an kana boli boli bololafɛnw nɔfɛ i ko duniɲa mɔgɔw fanba b’a kɛ cogo min na (Mat. 6:24). An ka gafew be to ka ngalon diinanw ka kalanw bɔ kɛnɛ kan fana. Saan 1963, Kɔrɔsili Sangaso y’a yira ka gwɛ ko Babilɔniba tɛ kerecɛn tɔgɔtigiw dɔrɔn ye. Nka ngalon diinanw bɛɛ jɛnkulu lo. Ala sagokɛlaw ka jamana ani u ka siya mana kɛ min o min ye, a  y’u dɛmɛ cogo di u bɔra Babilɔniba kɔnɔ? A y’u saniya cogo di ka bɔ ngalon diinan ka kɛwale nɔgɔninw bɛɛ la? An bena o ɲiningaliw lajɛ gafe nin sapitiri 10nan kɔnɔ.—Yir. 18:2, 4.

22. Cikan min be sɔrɔ Ɔrɔmukaw 13:1 kɔnɔ, Bibulu Kalandenw fanba tun y’o faamu cogo di kɛlɛba fɔlɔ wagati la?

²² An be se ka mun lo fɔ politikikow la, o min ye Sutana ka ɔriganisasiyɔn faan dɔ ye? Yala kerecɛn sɔbɛw be se k’u niin don duniɲa ka kɛlɛkow la wa? Kɛlɛba fɔlɔ wagati la, Bibulu Kalandenw tun y’a faamu ko Krista ka kalanden sɔbɛw man ɲi k’u mɔgɔɲɔgɔn faga (Mat. 26:52). Nka, u fanba tun b’a miiri ko u tun ka ɲi ka sɔn sɔrɔdasiya ma, ka sɔrɔdasifani don ani ka marifa ta. U tun b’o miiri sabu olu fɛ, o cogo le la u be Ɔrɔmukaw 13:1 ka cikan sira tagama, o min ko an ka kolo “faamaw” ye. Nka n’u tun tagara kɛlɛ la, sanni u k’u juguw faga, u tun ka ɲi ka marifa ci sanfɛ.

23, 24. Kɛlɛba filanan wagati la, an tun be Ɔrɔmukaw 13:1 faamu cogo di? Yezu y’a ka kalandenw dɛmɛ u ye faamuyali juman lo sɔrɔ o vɛrise koo la?

²³ Tuma min na kɛlɛba filanan daminɛna saan 1939, Kɔrɔsili Sangaso ye sɛgɛsɛgɛri kɛ ka dunya ani a y’a yira ka gwɛ ko kerecɛnw man ɲi k’u seen don cogo si la duniɲa ka kɛlɛkow la. O koow ɲɛfɔra wagati bɛnnin na yɛrɛ le! O kɛra sababu ye mɔgɔ caaman minw fagara o kɛlɛ la, Krista ka kalandenw m’u seen don o fagari la. Saan 1929, a tun fɔra an ka gafew kɔnɔ ko faaman minw kofɔra Ɔrɔmukaw 13:1 kɔnɔ, duniɲa nin ka faamanw tɛ, nka o ɲɛsinna Jehova ni Yezu lo ma. An mako tun b’a la k’o koo faamu bɛrɛbɛrɛ.

²⁴ Saan 1962, hakili senu ye Krista ka kalandenw ɲɛminɛ  u ye Ɔrɔmukaw 13:1-7 faamu ka ɲɛ. Novanburu tile 15 ka Kɔrɔsili Sangaso ani desanburu tile fɔlɔ ta y’o koo ɲɛfɔ ka ɲɛ (marisi tile fɔlɔ ani tile 15nan faransɛkan na). Ala sagokɛlaw y’a faamu Yezu ka kumaw fɛ ko u man ɲi ka kolo faamanw ye koo bɛɛ la. Yezu tun ko: “Fɛɛn min ye masacɛ ta ye, aw k’o di masacɛ ma, ka Ala ta di Ala ma.” (Luka 20:25). Kerecɛn sɔbɛw y’a faamu sisan ko jamana ka faamanw lo kofɔra Ɔrɔmukaw 13:1-7 kɔnɔ. U y’a faamu fana ko u ka ɲi ka kolo u ye, nka u man ɲi k’o kɛ koo bɛɛ la. Ni jamana ka faamanw ko an kana mɛnni kɛ Jehova fɛ, an b’u jaabi i ko cidenw tun y’a kɛ cogo min na. U tun ko: “Anw te se ka ban Ala sago la ka adamadenw ta kɛ.” (Kɛw. 5:29). Gafe nin sapitiri 13 ni 14nan na, an bena a ye Ala sagokɛlaw y’a yira cogo min na k’u t’u niin don duniɲa ka koow la.

25. Hakili senu y’an dɛmɛ ka koo caaman minw faamu Ala ka Masaya koo la, mun na o b’i ninsɔn diya?

²⁵ Krista y’a ka kalandenw dɛmɛ u ye fɛɛn minw bɛɛ faamu saan kɛmɛkulu tɛmɛnin na, miiri o la. An y’a faamu Ala ka Masaya sigira sen kan sankolo la wagati min na, ani fɛɛn min kama o Masaya kɔrɔtanin lo. An y’a faamu bɛrɛbɛrɛ mɔgɔ kantigiw be ni jigiya fila minw ye: dɔw bena taga sankolo la ani dɔ wɛrɛw bena to dugukolo kan. An y’a faamu fana cogo min na an be se ka kantigiya kɛ Ala ka Masaya koo la. An be kolo jamana ka faamanw ye, nka an t’o kɛ koo bɛɛ la. An be kalan nafaman minw faamu bi, Yezu Krista ye jɔncɛ kantigiman dɛmɛ walisa a k’u faamu ani k’an kalan u la. I yɛrɛ ɲininga ko: “Ni Yezu tun ma jɔncɛ kantigiman ɲɛminɛ, yala an tun bena o kalan nafamanw faamu wa?” An ninsɔn ka di yɛrɛ le sabu Krista ni hakili senu b’an ɲɛminɛna!