1, 2. a) Nafa be kado sifa juman lo la e ɲɛɛ na? b) Mun na kunmabɔsara ye Ala ka nilifɛnw bɛɛ la nafaman ye?

DELILA ka kado juman sɔrɔ min ɲɔgɔn tɛ yen? Kado min be mɔgɔ nafa, waajibi tɛ a ka kɛ fɛɛn sɔngɔ gwɛlɛ ye. Nka, n’o kado b’i ninsɔndiya ani a b’i mako gwɛlɛ wasa, i b’a dibaga waleɲuman lɔn.

² Jehova ye nilifɛn caaman di an ma. An mako gwɛlɛ be u la kelen na ka tɛmɛ tɔɔw bɛɛ kan. O ye Ala ka nilifɛnw bɛɛ la nafaman ye: a y’a Dencɛ Yezu Krista ci an ma walisa an ka ɲɛnamaya banbali sɔrɔ (Matiyo 20:28 kalan, ABM). An bena o lo ye kalansen nin na. Jehova kɛtɔ ka Yezu ci k’a kɛ kunmabɔsara ye, a y’a yira ko a b’an kanu yɛrɛ le.

3. Mun na adamadenw be sa?

³ Kunmabɔsara ye fɛɛrɛ ye Jehova ye min kɛ walisa k’an kisi ka bɔ jurumu ni saya la (Efɛzikaw 1:7). Mun na an mako tun be kunmabɔsara la? Walisa k’o faamu, fɔɔ an k’a lɔn koo min kɛra Edɛn nankɔtu kɔnɔ kabi galen. An faa Adama n’an baa Awa ye jurumu kɛ. O kama, u sara. An fana be sa sabu an ye jurumu sɔrɔ cɛɛn ye u fɛ.—Kunnafoni wɛrɛw lajɛ, a 9nan.

4. Adama tun ye jɔn lo ye ani a tun be cogo di?

⁴ Tuma min na Jehova ye cɛɛ fɔlɔ Adama dan, a  ye fɛɛn nafamanba dɔ di a ma: o tun ye ɲɛnamaya dafanin lo ye. A fari n’a hakili dafanin tun lo. O kama, a tun tɛna bana, ka kɔrɔ ani ka sa abada. Komi Jehova lo tun ye Adama dan, Ala tun kɛra i n’a fɔ a faa (Luka 3:38). Jehova tun be to ka kuma n’a ye. Ala tun be min ɲini Adama fɛ, a y’o ɲɛfɔ a ye ka gwɛ. A fana ye baara ɲuman dɔ kalifa a ma.—Zɛnɛzi 1:28-30; 2:16, 17.

5. Bibulu ko Ala ye Adama “dan a yɛrɛ jaa la.” O kɔrɔ ko di?

⁵ Ala ye Adama “dan a yɛrɛ jaa la” (Zɛnɛzi 1:27). O kɔrɔ ko Adama tun be ni Ala ka jogow ɲɔgɔn ye, i n’a fɔ kanuya, hakilitigiya, tilenninya ani sebagaya. See tun dira Adama ma ka koow latigɛ a yɛrɛ ma. A tun tɛ komi orobo. Ala tun y’a dan cogo dɔ la min b’a to a be se k’a latigɛ ka koɲuman kɛ wala ka kojugu kɛ. N’a tun y’a latigɛ ka mɛnni kɛ Ala fɛ, a tun bena to niin na fɔɔ abada alijɛnɛ kɔnɔ.

6. Komi Adama ma mɛnni kɛ Ala fɛ, a bɔnɛna mun lo la? O nɔfɛkow kɛra mun lo ye an fɛ?

⁶ Komi Adama ma mɛnni kɛ Ala fɛ, Ala ye kiti tigɛ a kan ko a ka kan ni saya ye. O kɛra bɔnɛba ye a fɛ. Teriya sɔbɛ min tun be ale ni Ala cɛ, o tiɲɛna. A fana bɔnɛna a niin dafanin na ani a gwɛnna ka bɔ alijɛnɛ kɔnɔ (Zɛnɛzi 3:17-19). Adama ni Awa ka murutili kosɔn, jigiya foyi tun t’u la tugun. Adama ka murutili kɛra sababu ye “hakɛ daminɛna . . . diɲɛ na, saya fana nana hakɛ sababu la. O cogo la fana, saya sera mɔgɔ bɛɛ ma bari bɛɛ ye hakɛ kɛ.” (Ɔrɔmukaw 5:12). Adama ka jurumu fɛ, a y’a yɛrɛ ni an fana ‘feere’ k’an kɛ jurumu ni saya ka jɔɔnw ye (Ɔrɔmukaw 7:14, ABM). Nka, an be ni jigiya ye wa? Ɔnhɔn.

7, 8. N’u ko kunmabɔsara, o kɔrɔ ko di?

 ⁷ N’u ko kunmabɔsara, o kɔrɔ ko di? Kɔrɔ jɔnjɔn fila b’a la. A fɔlɔ, kunmabɔsara ye sɔngɔ ye min be sara walisa ka fɛɛn dɔ kɔsegi a tigi ma wala ka mɔgɔ dɔ hɔɔrɔnya. A filanan, min be di walisa ka fɛɛn dɔ sɔngɔ sara, o ye kunmabɔsara ye.

⁸ Adama ye jurumu kɛ ka saya lase an ma. A ye tiɲɛniba min kɛ, adamaden si tun tɛ se k’o juru sara. Nka, Jehova ye fɛɛrɛ dɔ kɛ walisa k’an kisi ka bɔ jurumu ni saya ka jɔnya la. An k’a filɛ kunmabɔsara koo ɲɛnabɔra cogo min na ani an be se ka nafa min sɔrɔ o la.

9. Kunmabɔsara tun ka ɲi ka kɛ mun ye?

⁹ Adama bɔnɛna a niin dafanin min na, an si tɛ se k’o sɔngɔ sara abada sabu an si dafanin tɛ (Zaburuw 49:8, 9). Adamaden dafanin wɛrɛ niin lo tun ka kan ka di. Adama bɔnɛna a niin min na, kunmabɔsara tun ka kan ka bɛn o lo ma tigitigi. O lo y’a to a be weele ko “kunmabɔsara dama kɛɲɛnin.”—1 Timote 2:6, NW.

10. Jehova ye kunmabɔsara koo ɲɛnabɔ cogo di?

¹⁰ Jehova ye kunmabɔsara koo ɲɛnabɔ cogo di? A Dencɛ Yezu min koo ka gwɛlɛ a ma kosɔbɛ, a y’o lo ci dugukolo kan. Ale lo ye a ka danfɛn fɔlɔ ye (1 Zan 4:9, 10). Yezu sɔnna ka bɔ a Faa kɔrɔ ka na dugukolo kan (Filipikaw 2:7). Jehova y’a niin ta sankolo la k’a don muso dɔ wolonugu kɔnɔ. O cogo la, Yezu wolola ka kɛ mɔgɔ dafanin ye, jurumu si tun t’a la.—Luka 1:35.

11. Cɛɛ kelen tun be se ka kɛ kunmabɔsara ye adamadenw bɛɛ fɛ cogo di?

 ¹¹ Adama ka murutili kosɔn, a deenw bɛɛ bɔnɛna ɲɛnamaya dafanin na. Yala mɔgɔ wɛrɛ tun be se ka adamadenw bɛɛ kisi ka bɔ saya la wa? Ɔnhɔn (Ɔrɔmukaw 5:19 kalan). Yezu ma jurumu kɛ ka ye. A y’a niin dafanin saraka k’o kɛ kunmabɔsara ye (1 Korɛntikaw 15:45). A niin dafanin tun be se ka kɛ sababu ye ka adamadenw bɛɛ kisi saya ma.—1 Korɛntikaw 15:21, 22.

12. Mun na Yezu tun ka kan ka tɔɔrɔ ten?

¹² Yezu ye tɔɔrɔba min muɲu fɔɔ ka taga sa, Bibulu b’o lakali. U y’a gosi ni busan ye fariya la. U y’a gwengwe yiri la ani a tɔɔrɔla fɔɔ ka sa (Zan 19:1, 16-18, 30). Mun na Yezu tun ka kan ka tɔɔrɔ ten? Sutana y’a fɔ ko adamaden si tɛna kantigiya kɛ Ala ye ni kɔrɔbɔliba y’a sɔrɔ. Yezu y’a yira ko mɔgɔ dafanin be se ka kantigiya kɛ Ala ye hali n’a ka tɔɔrɔ tɛmɛna a daan kan. Miiri k’a filɛ Jehova dusu diyara Yezu kɔrɔ cogo min na!—Talenw 27:11; Kunnafoni wɛrɛw lajɛ, a 15nan.

13. Kunmabɔsara sarala cogo di?

¹³ Kunmabɔsara sarala cogo di? Yezu y’a niin sɔngɔ di a Faa ma. Saan 33 an tile la, Yahutuw ka Nisan kalo tile 14nan loon na, Jehova y’a to Yezu juguw y’a faga (Eburuw 10:10). Tile saba o kɔ, Jehova y’a lakunu k’a kɛ danfɛn yebali ye tugun. Kɔfɛ, Yezu kɔsegira a Faa fɛ sankolo la. A tun y’a niin dafanin min saraka k’a to adamaden cogo la, a y’o sɔngɔ yira Jehova la (Eburuw 9:24). Komi kunmabɔsara sarala, an be se ka hɔɔrɔnya ka bɔ  jurumu ni saya ka jɔnya la.—Ɔrɔmukaw 3:23, 24 kalan.

14, 15. An ka kan ka mun lo kɛ walisa an ka jurumuw ka yafa an ma?

¹⁴ Ala y’o nilifɛn nafamanba di an ma ka ban. An k’a filɛ an be se ka nafa min sɔrɔ o la sisan ani loon nataw la.

¹⁵ An ka jurumuw be se ka yafa an ma. A man nɔgɔ ka koo ɲuman kɛ tuma bɛɛ. An be fili, ani tuma dɔw la an be kuma dɔw fɔ ani ka koo dɔw kɛ minw man ɲi (Kɔlɔsikaw 1:13, 14). An ka jurumuw be se ka yafa an ma cogo di? An ka kan ka nimisa sɔbɛ la ani k’an majigi ka yafa deli Jehova fɛ. O la, an be se ka la a la ko an ka jurumuw yafara an ma.—1 Zan 1:8, 9.

16. An ka kan ka mun lo kɛ walisa ka kɛ ni dusukun ɲuman ye?

¹⁶ An be se ka kɛ ni dusukun ɲuman ye. N’an dusukun b’an kɛlɛ koo jugu dɔ kosɔn, o koo be se k’an tɔɔrɔ. An jigi be se ka tigɛ ani an yɛrɛ be se k’a miiri ko nafa foyi t’an na. Nka kuun t’a la an k’an fari faga. N’an ye yafa deli Jehova fɛ, an ka la a la ko a bena sɔn ka yafa an ma (Eburuw 9:13, 14). An ka gwɛlɛya wala fiyɛn mana kɛ min o min ye, Jehova b’a fɛ an k’o fɔ ale ye (Eburuw 4:14-16). N’an y’o kɛ, an bena to hɛɛrɛ la ni Ala ye.

17. An be se ka duga jumanw sɔrɔ Yezu ka saya sababu fɛ?

¹⁷ An jigi b’a la ka ɲɛnamaya kɛ fɔɔ abada. “Jurumu sara ye saya ye, nka Ala ka nili fɛn ye ɲɛnamaya banbali de ye Yesu Krisita an Matigi la.” (Ɔrɔmukaw 6:23, ABM). Komi Yezu sara an kosɔn, an be se ka ɲɛnamaya banbali ni kɛnɛya dafanin  sɔrɔ (Yirali 21:3, 4). Nka an be se ka mun lo kɛ walisa k’o dugaw sɔrɔ?

18. An b’a lɔn cogo di ko Jehova b’an kanu?

¹⁸ Ni dɔ ye kado ɲuman di i ma, miiri k’a filɛ o b’i dusu diya cogo min na. Kunmabɔsara ye nilifɛnw bɛɛ la nafaman ye. An ka kan ka Jehova waleɲuman lɔn kosɔbɛ o kosɔn. Zan 3:16 b’a fɔ ko “Ala ye diɲɛ kanu haali, fɔɔ a y’a Deen kelenpe ci mɔgɔw ma.” Tiɲɛn na, Jehova b’an kanu haali, fɔɔ a y’a Dencɛ kanulen Yezu di an kosɔn. An b’a lɔn ko Yezu fana b’an kanu sabu a sɔnna ka sa an kosɔn (Zan 15:13). Jehova ye kunmabɔsara di minkɛ, o ka ɲi k’a to i ka la a la ko ale ni Yezu b’i kanu yɛrɛ le.—Galatikaw 2:20.

19, 20. a)  I be se ka kɛ Jehova teri ye cogo di? b) I be se k’a yira cogo di ko i limaniyanin lo Yezu ka kunmabɔ saraka koo la?

¹⁹ I y’a lɔn sisan ko Ala b’i kanu kosɔbɛ. I be se ka kɛ a teri ye cogo di? N’i tɛ mɔgɔ dɔ lɔn, a man nɔgɔ k’a tigi kanu. Zan 17:3 b’a fɔ ko an be se ka Jehova lɔn. N’i y’o kɛ, i bena se k’a kanu kosɔbɛ, i bena a ɲini k’i koo diya a ye, ani i bena kɛ a teri ye. O kama, to ka Bibulu kalan walisa ka dɔ fara i ka lɔnniya kan Jehova koo la.—1 Zan 5:3.

²⁰ I ka limaniya Yezu ka kunmabɔ saraka koo la. Bibulu b’a fɔ ko “min dara a Denkɛ la, ɲɛnamaya banbali bɛ o tigi fɛ.” (Zan 3:36, ABM). Ka limaniya Yezu la, o kɔrɔ ko di? O kɔrɔ ko Yezu ko an ka min kɛ, an ka kan k’o lo kɛ (Zan 13:15). An tɛ se k’a fɔ an daa la dɔrɔn ko an lanin lo Yezu la. Fɔɔ an ka dɔ kɛ dɔ ye. Bibulu b’a fɔ ko: “Dannaya salen don ni kɛwalew tɛ.”—Zaki 2:26, ABM.

21, 22. a) Mun na an ka kan ka taga Krista saya Hakilijigi lajɛn na min be kɛ saan o saan? b) An bena mun lo ye kalansen 6 ani 7nan na?

 ²¹ Taga Krista saya Hakilijigi lajɛn na. Yezu ka suu laban na, a y’a fɔ a ka kalandenw ye ko u k’u hakili to ale saya koo la. An b’o lo kɛ saan o saan. O lajɛn be weele ko Krista saya Hakilijigi lajɛn wala “Matigi ka surafana.” (1 Korɛntikaw 11:20, NW; Matiyo 26:26-28). Yezu b’a fɛ an k’an hakili to a la ko ale y’a niin dafanin di k’o kɛ kunmabɔsara ye an kosɔn. A ko: “Aw ye to ka nin kɛ k’aw hakili to ne la.” (Luka 22:19 kalan). N’i tagara o lajɛn na, i b’a yira ko i b’i hakili to kunmabɔsara koo la ani Jehova ni Yezu ka kanuyaba koo la.—Kunnafoni wɛrɛw lajɛ, a 16nan.

²² Kunmabɔsara ye nilifɛn nafamanba ye min ɲɔgɔn tɛ yen (2 Korɛntikaw 9:14, 15). Mɔgɔ miliyɔn caaman minw sara, a be se k’olu fana nafa. An bena o lo ye kalansen 6 ani 7nan na.