FOROBA fɛti minw be kɛ duniɲa yɔrɔ caaman na bi, diinan fɛtiw ani fɛti wɛrɛw, u caaman jujɔn tɛ bɔ Bibulu kɔnɔ. N’o lo, u jujɔn bɔra min do? Ni see b’i ye ka sɛgɛsɛgɛri kɛ lɔnniya gafew kɔnɔ, i bena a ye u be min fɔ foroba fɛti dɔw koo la minw be kɛ e ka jamana kɔnɔ. An ka ɲɛyirali dɔw lajɛ.

Paki fɛti. Lɔnniya gafe dɔ (The Encyclopædia Britannica) b’a fɔ ko “Layidu Kura yɔrɔ si tɛ kuma Paki fɛti kɛli koo la.” Paki fɛti koo daminɛna cogo di? A jujɔn bɔra kafiriya koow lo la. Hali ni mɔgɔw b’a fɔ ko u b’o fɛti kɛ walisa k’u hakili jigi Yezu sukununi koo la, landako minw be kɛ o fɛti sen fɛ u tɛ kerecɛnya koo ye.

Saan kura seli. Saan kura seli loon n’a landaw tɛ kelen ye jamanaw bɛɛ la. Lɔnniya gafe dɔ (The World Book Encyclopedia) be kunnafoni nin di o saan kura fɛti daminɛ koo la: “Saan 46 Krista tile ɲɛ, Ɔrɔmu masacɛ Jules César y’a latigɛ ko zanwiyekalo tile fɔlɔ ka kɛ saan kura daminɛ loon ye. Ɔrɔmukaw tun ye o loon kɛ u ka batofɛn Zanus tando loon ye: Zanus tun ye dondaw ni koow daminɛ ala ye u fɛ. Zanus tɔgɔ lo tara ka la zanwiyekalo kan. O batofɛn tun be ni ɲɛda fila ye: kelen sinnen be ɲɛɛ fɛ ani tɔɔ kelen sinnen be kɔfɛ.” O cogo la, saan kura seli jujɔn basiginen be kafiriyakow lo kan.

Fɛti wɛrɛw. Fɛti minw be kɛ duniɲa kuru bɛɛ kɔnɔ, an tɛ se ka baro kɛ u bɛɛ kan. Nka, fɛti minw be adamadenw wala u ka jɛnkuluw tando, u bɛnnen tɛ Jehova ma (Zeremi 17:5-7; Kɛwaliw 10:25, 26). I kana ɲinɛ fana ko diinanw ka seliw jujɔn lo b’a to Ala be sɔn u la walima a be ban u la (Ezayi 52:11; Yirali 18:4; ABM ). Bibulu ka miiriya minw be sɔrɔ gafe nin kalansen 16nan kɔnɔ, u bena i dɛmɛ k’a faamu Ala be min miiri n’an b’an seen don fɛti dɔw la minw tɛ diinankow ye.