YƆRƆ 9NAN
Jehova bato n’i ka denbaya ye
“Min ye sankolo ni dugukolo dan . . . aw k’ale bato.”—Yirali 14:7
I ko i y’a kalan kitabunin nin kɔnɔ, ladili caaman be sɔrɔ Bibulu kɔnɔ minw be se ka ele n’i ka denbaya dɛmɛ. Jehova b’a fɛ aw ka to hɛɛrɛ la. A ye layidu ta ko ni aw ye ale ka batoli koo kɛ aw ɲɛnako fɔlɔ ye, a “bena fɛɛn tɔw bɛɛ d’aw ma.” (Matiyo 6:33). Jehova b’a fɛ sɔbɛ la, i ka kɛ ale teri ye. Sababu minw dira i ma ka teriya kɛ ni Ala ye, kana a to u si ka taga k’i dan. Ka teriya kɛ ni Ala ye, o nɛɛma ɲɔgɔn tɛ yen adamaden fɛ.—Matiyo 22:37, 38.
1 JƐNƝƆGƆNYA MIN BE E NI JEHOVA CƐ, O BARIKA BONYA
BIBULU BE MIN FƆ: Jehova ko “ale bena kɛ aw Faa ye, aw fana bena kɛ a dencɛw n’a denmusow ye.” (2 Korɛntikaw 6:18). Ala b’a fɛ i ka kɛ ale teri sɔbɛ ye. Delili be se k’i dɛmɛ o koo la. Jehova be i jija ko i “kana Aladali dabila.” (1 Tesalonikaw 5:17). A b’a fɛ i k’i kɔnɔkow n’i haminankow fɔ ale ye (Filipikaw 4:6). N’i be Ala deli n’i ka denbayamɔgɔw ye, u bena a ye ko jɛnɲɔgɔnya ɲuman be yen e ni Ala cɛ.
N’i be kuma Ala fɛ, a ka ɲi fana i k’a lamɛn. I be se ka Ala lamɛn n’i be Bibulu ani Jehova Seerew ka gafew kalan (Zaburuw 1:1, 2). I be min kalanna, miiri o kan (Zaburuw 77:12, 13). I be se ka Ala lamɛn fana n’i be to ka taga Jehova Seerew ka lajɛnw na.—Zaburuw 122:1-4.
Jɛnɲɔgɔnya min be e ni Jehova cɛ, i be se k’o barika bonya cogoya wɛrɛ la fana: a kɔrɔtanin lo i ka Jehova kofɔ mɔgɔw ye. N’i tora k’o kɛ, i bena a ye ko i magwɛrɛnin lo Jehova la kosɔbɛ.—Matiyo 28:19, 20.
I BE SE KA MIN KƐ:
-
Wagati latigɛ loon o loon walisa ka Bibulu kalan ani ka delili kɛ
-
E n’i ka denbaya ka Alako bila lafiɲɛ ni ɲɛnagwɛ koow ɲɛ
2 A TO GWA KƆNƆ BATOLI K’I NAFA
BIBULU BE MIN FƆ: “Aw ye gwɛrɛ Ala la, ale fana bena gwɛrɛ aw la.” (Zaki 4:8). Porogramu kɛ gwa kɔnɔ batoli kama ani i jija ka tugu o porogramu kɔ tuma bɛɛ (Zɛnɛzi 18:19). Nka, kana dan o dɔrɔn ma. I ka loon o loon kokɛtaw la, a yira ko i masirinin lo Ala la. Kuma Ala koo la walisa k’i denbaya dɛmɛ a k’a masiri Ala la koɲuman. O kɛ “k’aw siginin to aw fɛ, walima k’aw to sira kan taama na, n’aw latuma na, n’aw wilituma.” (Deteronɔmu 6:6, 7). A ɲini ka Zozuwe ladegi. Ale ko: “Ne ni n ka somɔgɔw, anw kɔni bena Masaba le bato.”—Zozuwe 24:15.
I BE SE KA MIN KƐ:
-
A’ ye tugu porogramu ɲuman kɔ min bena denbayamɔgɔ kelen kelen bɛɛ mako wasa. A’ ye aw jija k’o kɛ tuma bɛɛ
