Yezu batizenin kɔ, hakili senu tagara n’a ye kongokolon kɔnɔ. Kɔngɔ tun gwannin b’a la sabu a ma foyi dumu kabi tile 40. O tuma na, Sutana nana Yezu kɔrɔbɔ. A y’a fɔ Yezu ye ko: ‘N’i ye Ala Dencɛ ye tiɲɛn na, a fɔ ko kabakuru nunu ka yɛlɛma ka kɛ buru ye.’ Nka Yezu y’a jaabi ni Bibulu ka kumaw ye ko: ‘A sɛbɛra ko, walisa ka to niin na, i mako be fɛɛn na min ka fisa kosɔbɛ ni dumuni ye. Jehova be min bɛɛ fɔ, i mako b’a la k’o lamɛn.’

Kɔfɛ, Sutana ye Yezu kɔrɔbɔ. A ko: ‘N’i ye Ala Dencɛ ye tiɲɛn na, pan ka bɔ Alabatosoba kuun legelege la ka jigi. A sɛbɛra ko Ala bena a ka mɛlɛkɛw ci ka na i minɛ.’ Nka Yezu ye Bibulu ka kumaw ta tugun k’a fɔ a ye ko: ‘A sɛbɛra ko i man ɲi ka Jehova kɔrɔbɔ.’

O kɔ, Sutana ye duniɲa ka masayaw n’u ka nafolow n’u ka nɔɔrɔ yira Yezu la ani k’a fɔ ko: ‘N’i ye batoliko kelenpe kɛ ne ye, ne bena o masayaw bɛɛ n’u ka nɔɔrɔ di i ma.’ Nka Yezu y’a jaabi ko: ‘Taga ka bɔ yen Sutana! A sɛbɛra ko i ka ɲi ka Jehova kelenpe lo bato.’

O tuma na, Sutana tagara k’a to yen. Mɛlɛkɛw nana dumuni di Yezu ma. K’a ta o tuma, Yezu ye Ala ka Masaya kibaro diiman waajuli kɛ. A tun cira dugukolo kan k’o baara le kɛ. Yezu ka kalanw tun ka di mɔgɔw ye. A tun be taga yɔrɔ o yɔrɔ, u tun be tugu a kɔ.