Sanjiba tɛmɛnin kɔ, Nuhun dencɛw ye deen caaman sɔrɔ. U ka denbayamɔgɔw cayara ani u y’a daminɛ ka jɛnsɛn dugukolo faan bɛɛ la i ko Jehova tun y’a fɔ u ye cogo min na.

Nka denbaya mɔgɔ dɔw ma mɛnni kɛ Jehova fɛ. U y’a fɔ ɲɔgɔn ye ko: ‘A’ ye na an ka dugu sigi ani ka to yen. An bena sangasojan dɔ lɔ min janya be se fɔɔ sankolo la. O la, an bena tɔgɔba sɔrɔ.’

 O mɔgɔw tun be fɛɛn min kɛra, o ma diya Jehova ye. O kama, a y’a latigɛ k’o lalɔ. I b’a lɔn a ye min kɛ wa? A barila k’a kɛ o mɔgɔw ye kaan sifa caaman fɔ. Komi u tun tɛ se ka ɲɔgɔn faamu tugun, u ye o sangasojan lɔli dabila. U tun be dugu min lɔra, o tɔgɔ lara ko Babɛli, o kɔrɔ ko “Ɲagamini.” Mɔgɔw y’a daminɛ ka jɛnsɛn ani ka taga sigi dugukolo faan bɛɛ la. Nka u tora ka kojugu kɛ u sigiyɔrɔ kuraw la. Yala mɔgɔ si tun tɛ yen min bele tun be Jehova kanu wa? An bena o faamu kalansen nata kɔnɔ.