Israɛldenw bɔra Sinayi kulu yɔrɔ la ani u ye Paran kongokolon cɛtigɛ ka taga yɔrɔ dɔ la, min be weele ko Kadɛsi. O yɔrɔ la, Jehova y’a fɔ Musa ye ko: ‘Ne bena Kanaan jamana min di Israɛldenw ma, cɛɛ 12 ci ka taga o lajɛ. Cɛɛ kelen bɔ siya kelen kelen bɛɛ la.’ Musa ye cɛɛ 12 sugandi ani a y’a fɔ u ye ko: ‘ A’ ye taga Kanaan k’a filɛ ni sɛnɛfɛnw be ɲɛ o yɔrɔ la. A’ y’a filɛ ni fanga b’o yɔrɔ mɔgɔw la wala ni fanga t’u la, n’u be fanibuguw kɔnɔ wala n’u be dugubaw le la.’ O kolajɛbaga mɔgɔ 12 tagara Kanaan. Zozuwe ni Kalɛbu tun be u cɛma.

Tile 40 tɛmɛnin kɔ, kolajɛbagaw kɔsegira ka na ni torow, gerenadiw ani ɛrɛzɛnw ye. U y’a fɔ ko: ‘Jamana nin ka ɲi, nka fanga b’o mɔgɔw la ani u ka duguw kogow ka jan.’ O kɔ, Kalɛbu ko: ‘An be se u kɔrɔ. An ka taga sisan sisan!’ I b’a lɔn fɛɛn min kama Kalɛbu y’o fɔ wa? A y’o fɔ sabu ale ni Zozuwe y’u jigi la Jehova kan. Nka kolajɛbaga 10 tɔɔw ko: ‘Ɔn ɔn! O mɔgɔw ye mɔgɔ jamanjanbaw ye. An tun be komi tɔɔnw u ɲɛɛ na.’

Israɛldenw fari fagara. U y’a daminɛ ka ŋunuŋunu ani k’a fɔ ɲɔgɔn ye ko: ‘An ka kuntigi wɛrɛ sigi an kun na ka kɔsegi Ezipiti. Waajibi lo ka taga o yɔrɔ la u b’an faga wa?’ Zozuwe ni Kalɛbu  y’a fɔ ko: ‘Aw kana muruti Jehova ma, aw kana siran fana. Jehova bena an tanga.’ Nka Israɛldenw tun t’a fɛ ka Zozuwe ni Kalɛbu lamɛn. U yɛrɛ tun b’a fɛ k’u faga!

Jehova ye mun lo kɛ do? A y’a fɔ Musa ye ko: ‘Ne ye fɛɛn caaman kɛ Israɛldenw ye. O n’a ta bɛɛ, u bele tɛ mɛnni kɛra ne fɛ. O kama, u bena saan 40 kɛ kongokolon kɔnɔ fɔɔ ka sa yen. Ne ye layidu ta ko n’ bena jamana min di u ma, u deenw, Zozuwe ani Kalɛbu dɔrɔn lo bena don o jamana kɔnɔ.’