Zoziyasi kɛra masa ye Zuda kun na a saan segi. O wagati la, mɔgɔw tun be jinamoriya kɛ ani u tun be boliw bato. Zoziyasi saan 16nan na, a y’a ɲini k’a lɔn a ka ɲi ka Jehova bato cogo bɛnnin min na. A saan 20nan na, boliw ni sarakabɔlan minw be jamana yɔrɔ bɛɛ la, a y’a daminɛ k’u halaki. A saan 26nan na, Alabatosoba yɔrɔ minw tiɲɛna, a ye labɛn kɛ walisa k’u lalaga.

Sarakalasebagaw kuntigiba Ilikiyawu ye Jehova ka sariya kitabu sɔrɔ Alabatosoba kɔnɔ. N’a sɔrɔ Musa lo y’o kitabu sɛbɛ n’a bolo ye. Masacɛ ka sekeretɛri Safan tagara n’o kitabu ye Zoziyasi fɛ ani a y’a daminɛ k’o sariya kalan ni kaanba ye. O kalan lamɛntɔ, Zoziyasi y’a faamu ko jamana mɔgɔw y’u kɔɔ di Jehova ma kabi saan caaman. Masacɛ Zoziyasi y’a fɔ Ilikiyawu ye ko: ‘Jehova diminin lo kosɔbɛ an kɔrɔ. Taga kuma n’a ye. A bena a fɔ an ka ɲi ka min kɛ.’ Jehova y’u jaabi kiramuso Ulida sababu fɛ ko: ‘Zuda mɔgɔw y’u kɔɔ di ne ma. Ne bena u ɲangi o kosɔn, nka ne tɛna o kɛ Zoziyasi ka tile la sabu a y’a yɛrɛ majigi.’

Masacɛ Zoziyasi y’o cii mɛn minkɛ, a ye Zuda mɔgɔw lajɛn Alabatosoba kɔnɔ. O kɔ, a y’a kaan bɔ ka Jehova ka sariya kalan jamana mɔgɔw bɛɛ ye. Zoziyasi ni jama ye layidu ta ko u bena mɛnni kɛ Jehova fɛ n’u dusu bɛɛ ye.

Zuda mɔgɔw tun ma Tɛmɛnkan seli kɛ kabi saan caaman.  Nka tuma min na Zoziyasi y’a kalan sariya kɔnɔ ko u ka kan k’o seli kɛ saan o saan, a y’a fɔ jamana mɔgɔw ye ko: ‘An bena Tɛmɛnkan seli kɛ Jehova tɔgɔ la.’ O kɔ, Zoziyasi ye saraka caaman labɛn ani a ye dɔnkililabagaw sigi Alabatosoba kɔnɔ. O kɔ, jamana mɔgɔw ye Tɛmɛnkan seli ni Buru funubali ɲɛnagwɛ kɛ tile wolonfila kɔnɔ. Tɛmɛnkan seli nin ɲɔgɔn tun ma deli ka kɛ kabi Samuyɛli ka wagati la. Tiɲɛn na, Ala ka sariya tun ka di Zoziyasi ye. Yala a ka di i ye k’a ɲini ka Jehova lɔn wa?