Saan 30 ka Tɛmɛnkan seli kɛnin kɔ, Yezu n’a ka kalandenw bɔra Zeruzalɛmu. U ma sin ka kɔsegi u ka soow la Galile, nka u tagara Zude mara la. O yɔrɔ la, u ye mɔgɔ caaman batize. Zan Batizelikɛla b’o baara ɲɔgɔn lo kɛra kabi saan kelen ɲɔgɔn. N’a sɔrɔ a b’o kɛra Zurudɛn baji kɔkɛnɛ la ani a ka kalandenw dɔw bele be n’a ye.

Yezu yɛrɛ ma mɔgɔ si batize. A ka kalandenw lo tun b’o kɛ ka kɛɲɛ ni Yezu ka cikanw ye. Yahutu minw ye Musa ka sariya tiɲɛ ani u nimisara u ka jurumuw la, Yezu ni Zan tun b’olu lo kalanna o wagati la.—Kɛwaliw 19:4.

Nka, ɲangoya be Zan ka kalandenw na. U be ŋunuŋununa Yezu koo la ko: “Cɛɛ min tun be n’i ye . . . a b’a la fana ka mɔgɔw batize, bɛɛ be tagara ale kɔ.” (Zan 3:26). Nka, ɲangoya tɛ Zan na. Yezu be sera ka min kɛ, Zan ninsɔndiyara o kosɔn ani a b’a fɛ a ka kalandenw fana ka ninsɔndiya. A y’u hakili jigi ko: “Ne y’a fɔ tuma min na ko ne te Ala ka Mɔgɔ wolomanin nin ye, ko ne cira a ɲa le, aw ye ne seerew ye.” A y’o ɲɛfɔ cogo dɔ la bɛɛ be se ka min faamu. A ko: “Kɔnyɔmuso ye kɔɲɔcɛ ta le ye. Nga kɔɲɔcɛ tericɛ be lɔ gɛrɛfɛ, ka to ka mɛnni kɛ a fɛ. A nisɔn be diya bari a be mɛnni kɛra kɔɲɔcɛ fɛ. O nisɔndiya ɲɔgɔn le be n na. N nisɔn ka di kosɔbɛ.”—Zan 3:28, 29.

Zan be i ko kɔɲɔcɛ tericɛ. A kalo damanin ye nin ye a ninsɔndiyara k’a ka kalandenw yira Yezu la. U dɔw tugura Yezu kɔ ani u nana kɛ kerecɛn mɔlenw ye. Zan ka kalanden minw tora n’a ye, a b’a fɛ olu fana ka tugu Yezu kɔ. Zan ka baara kuun tun ye ka sira labɛn Yezu ye walisa a ka se k’a ka cidenya baara kɛ. Zan ko: “Wajibi lo, ale ka kunkɔrɔta sɔrɔ, ne ka dɔgɔya.”—Zan 3:30.

Zan wɛrɛ, min tun ye Yezu ka kalanden ye ka ban, ale ye kuma nunu sɛbɛ Yezu bɔyɔrɔ koo la: “Min nana ka bɔ san fɛ, o bɛ bɛɛ kun na. . . . Fa Ala bɛ a Denkɛ kanu, a ye fɛn bɛɛ don a bolo. Min dara a Denkɛ la, ɲɛnamaya banbali bɛ o tigi fɛ. Min tɛ sɔn ka Denkɛ kan minɛ, o tɛna ɲɛnamaya sɔrɔ, nka Ala ka diminya tolen bɛ o kan.” (Zan 3:31, 35, 36, ABM). O kumaw b’a yira fana Yezu lɔyɔrɔ ye min ye adamadenw kisili koo la. Bɛɛ ka ɲi k’o tiɲɛn kumaw lɔn!

Zan y’a ɲɛfɔ ko dɔ bena bɔ ale lɔyɔrɔ n’a ka baara la. Wagati damanin o kɔ, masacɛ Erɔdi y’a minɛ k’a don kaso la. Erɔdi ye Erɔdiyadi furu k’a sɔrɔ a balimacɛ Filipu ka muso lo. Komi Zan ye Erɔdi kɔrɔfɔ o ɲamɔgɔya furu kosɔn, a y’a minɛ k’a don kaso la. Yezu y’o mɛn minkɛ, ale n’a ka kalandenw bɔra Zude ka ‘taga Galile mara la.’—Matiyo 4:12; Mariki 1:14.