Ntɛnɛlon wulafɛ, Yezu bɔra Zeruzalɛmu ka kɔsegi Betani, o min be oliviyeyirikulu tilebɔ fan fɛ. N’a sɔrɔ a siira a teriw Lazari, Mariyamu ani Marita lo fɛ.

Sisan, an be Nisankalo tile 11nan le la, sɔgɔma. Yezu n’a ka kalandenw ye Zeruzalɛmu sira minɛ tugun. A bena taga Alabatoso kɔnɔ ani o bena kɛ a siɲɛ laban ye. A ka cidenya baara loon laban lo fana. Nka sanni u k’a kiti ani k’a faga, a bena Tɛmɛnkan seli kɛ fɔlɔ ani k’a ka saya hakilijigiko bila sen kan.

Ka Yezu n’a ka kalandenw to Zeruzalɛmu sira kan, Yezu tun ye torosun min danga kunu sɔgɔma, Piyɛri y’o kɔrɔsi. A ko: “Karamɔgɔ, a filɛ, i tun ye torosun min danga, a jara.”—Mariki 11:21.

Mun na Yezu y’a kɛ o yiri jara? A y’a ɲɛfɔ ko: “Tiɲɛ na, ne b’a fɔ aw ye ko n’aw lara ne la, n’aw te sigasiga fewu, ne ye min kɛ torosun na, aw bena se k’o ɲɔgɔn kabakow kɛ. Aw bena dɔ wɛrɛw yɛrɛ kɛ ka tɛmɛ a kan. Hali n’aw y’a fɔ kulu nin ye ko: ‘Wili ka bɔ yan ka taga ben kɔgɔji kɔnɔ,’ o bena kɛ. N’aw lara ne la, n’aw ye fɛɛn o fɛɛn daali Ala fɛ, a bena o d’aw ma.” (Matiyo 21:21, 22). Yezu tun kɔnna k’a fɔ u ye ko limaniya be se k’a kɛ kulu be wuli ka bɔ a nɔɔ na. A segira o kuma kelen kan.—Matiyo 17:20.

Yezu y’a kɛ yiri nin jara walisa k’a yira ko a kɔrɔtanin lo ka limaniya Ala la. A ko: “Aw mana Ala deli fɛn o fɛn na, a’ ye da a la ko aw ye o sɔrɔ, o na kɛ.” (Mariki 11:24, ABM). Yezu ka kalandenw bɛɛ ka ɲi ka hakili sɔrɔ o kuma na dɛ! Cidenw yɛrɛ lo ka ɲi ka hakili sɔrɔ o la sabu kɔrɔbɔliw bena u sɔrɔ yanni dɔɔni. Nka, torosun nin janin koo b’an dɛmɛ ka kalan wɛrɛ faamu limaniya koo la.

I ko torosun nin ye Yezu lafili cogo min na, Israɛl siya cogoya be mɔgɔ lafili fana. Israɛldenw ye layidu ta Ala ye ani u b’a kɛ i n’a fɔ u b’a ka sariyaw labatora. Nka u fanba y’a yira k’u limaniyanin tɛ ani ko u ka kɛwale man ɲi. U yɛrɛ banna Ala Dencɛ la! Yezu y’a kɛ o torosun jara sabu a tɛ den. A y’a yira o cogo la ko Israɛl siya bena laban ten le fana sabu a limaniyanin tɛ ani a ka kɛwalew man ɲi.

Dɔɔni o kɔ, Yezu n’a ka kalandenw donna Zeruzalɛmu. A tagara Alabatoso la, i ko a tun be deli k’a kɛ cogo min na ani a y’a daminɛ ka mɔgɔw kalan. Yezu tun ye min kɛ kunu warifalenbagaw la, n’a sɔrɔ sarakalasebagaw kuntigiw ani cɛkɔrɔbaw ma ɲinɛ o kɔ. U ye Yezu kɔrɔbɔ ko: “I be koo minw kɛ, jɔn le y’o sira d’i ma? Jɔn y’o kɛ see d’i ma?”—Mariki 11:28.

Yezu y’u jaabi ko: “Ne bena aw ɲininga koo kelen dɔrɔn na. N’aw ye ne jaabi, o tuma na, min ye sira di ne ma ka koo nunu kɛ, ne bena o fɔ aw ye. Jɔn le ye Zan ci ko a ka mɔgɔw batize, Ala lo wa, walima mɔgɔw lo? Aw ka ne jaabi.” Yezu kɛlɛbagaw tun b’a fɛ k’a minɛ jaan min na, olu yɛrɛ lo benna a kɔnɔ. Sarakalasebagaw ni cɛkɔrɔbaw y’a fɔ ɲɔgɔn ye ko: “N’an y’a jaabi ko Ala lo, a bena an ɲininga ko mun na an ma la a la. N’an y’a fɔ ko mɔgɔw lo fana, haya!” U b’o jatiminɛ kɛra sabu u be siran jama ɲɛ, “bari mɔgɔ bɛɛ tun be Zan jati kira tigitigi ye.”—Mariki 11:29-32.

Yezu kɛlɛbagaw ma se k’a jaabi koɲuman. U ko: “An t’a lɔn.” Yezu y’a fɔ u ye ko: “N’o lo, mɔgɔ min ye sira di ne ma ka koo nunu kɛ, ne fana tena o fɔ aw ye.”—Mariki 11:33.