Waajulibaara lajɛnw ye Jehova ka labɛn dɔ ye i n’a fɔ an ka lajɛn tɔɔw bɛɛ. O labɛn sababu fɛ, an be ɲɔgɔn jija kanuya ni kɛwale ɲumanw na (Eburuw 10:24, 25). O lajɛnw ka ɲi ka mɛɛn miniti duuru wala wolonfila ɲɔgɔn. O tuma na le u be balimaw tilan tilan, k’a fɔ u ye u ka ɲi ka waajuli kɛ kiin min kɔnɔ ani u be delili kɛ. (N’o lajɛn be tugu kafo ka lajɛn dɔ kɔ, waajuli baara lajɛn ka kan ka surunya ka tɛmɛ o kan.) O lajɛn ɲɛminɛbaga ka ɲi ka baro kɛ hakilinata dɔw kan minw bena weleweledalaw nafa o loon yɛrɛ la. Misali la, a be se ka kɛ ko minw bena u seen don waajuli la samedilon, u fanba ma waajuli kɛ kabi lɔgɔkun tɛmɛnin. N’o lo, n’a sɔrɔ a ka fisa i k’a yira u la u be se ka min fɔ waajuli la. Aw be se ka baro kɛ hakilinata nafamanba jumanw lo kan waajuli baara lajɛnw tuma na?

• Barokɛcogo modɛli dɔ, an ka Lajɛnsɛbɛ kɔnɔ

• An be se ka basigi kibaruya kura dɔ kan cogo min na walisa ka baro dadon

• Sɔsɔli kuma dɔ jaabicogo

• Baro daminɛcogo ni mɔgɔ dɔ ye min lanin tɛ Ala la, min b’a miiri ko bɛgɛnw lo yɛlɛma yɛlɛmana ka kɛ mɔgɔw ye, min be kaan wɛrɛ fɔ, wala min be diinan dɔ la mɔgɔw fanba tɛ min lɔn i ka mara la

• Baarakɛcogo ni jw.org wala JW Library^® kɔnɔnafɛn dɔ ye, wala ni Bibulu yɛrɛ ye

• Baarakɛcogo n’an ka kalankɛminan dɔ ye

• Cogo min na an be se k’an seen don waajuli baara faan tigitigi dɔw la, i n’a fɔ: waajuli kɛcogo telefɔni na wala lɛtɛrɛw sababu fɛ, forobayɔrɔw la ani viziti kuraw wala bibulukalanw kɛcogo

• Ladili minw ɲɛsinna koo nunu ma: faratikow, kɛcogo ɲumanw, miiriya ɲumanw mɔgɔw koo la, baro yɛlɛmacogo, a n’a ɲɔgɔnnaw

• Kalansen dɔ wala videwo dɔ ka bɔ kitabunin nin na: I jija kalangwɛ ni mɔgɔw kalancogo la

• I be se k’i tɔɲɔgɔn jija ani k’a dɛmɛ cogo min na waajuli la walisa a k’a ka waajuli kɛcogo fisaya

• Vɛrise dɔ, min ɲɛsinna waajuli baara ma wala wale diiman dɔ