Samuyɛli tora ka kantigiya kɛ Jehova ye a ka ɲɛnamaya kuru bɛɛ la. A kanbele tuma na, a banna ka Eli dencɛw Ofini ani Fineyasi ladegi u ka kɛwale juguw la (1 Sam. 2:22-26). Samuyɛli tun be bonyana ka taga ani Jehova tun be n’a ye (1 Sam. 3:19). Tuma min na a kɔrɔla, a tora ka baara kɛ Jehova ye kantigiya la hali k’a sɔrɔ a deenw tun t’o kɛra.—1 Sam. 8:1-5.

An be kalan juman lo sɔrɔ Samuyɛli koo la? N’i ye kanbele wala sunguru ye, la a la ko gwɛlɛya minw b’i kan Jehova b’o lɔn. O gwɛlɛyaw be min kɛ i la, a b’o faamu. A be se ka jagwɛlɛya d’i ma (Ezayi 41:10, 13). N’i ye bangebaga ye ani i deen dɔ ye tiɲɛn sira bila, i be se ka dususalo sɔrɔ Samuyɛli ka koo la. Samuyɛli tun tɛ se k’a deenw waajibiya u ka kantigiya kɛ Jehova ye. A y’o koo to Jehova bolo ani o wagati kelen na, a tora kantigiya la ani k’a sankolola Faa Jehova dusu diya. N’a sɔrɔ i ka ɲɛyirali ɲuman bena i deen lasun a ka kɔsegi Jehova ma.

VIDEWO NIN FILƐ: KALAN SƆRƆ KA BƆ U FƐ: SAMUYƐLI. O KƆ, ƝININGALI NUNU JAABI:

• Samuyɛli kanbele tuma na, a y’a yira cogo di ko a jaa ka gwɛlɛ?

• Danny y’a yira cogo di ko a jaa ka gwɛlɛ?

• Tuma min na Samuyɛli kɔrɔla, a ye ɲɛyirali ɲuman juman lo to an ye?

• Danny bangebagaw ye ɲɛyirali ɲuman juman lo to an ye?