MƆGƆ minw be sɛgɛsɛgɛri kɛ saan ɲɛɛ ni yɔrɔ cogoya koo la, u dɔ be jaa dɔ lajɛra. A y’a ye ko sanfɔɲɔba dɔ be ɲɛsinna mara dɔ ma, mɔgɔw ka ca yɔrɔ min na. Komi a be jɔrɔla o mɔgɔw koo la, a b’a seko bɛɛ kɛra k’u lasɔmi sanni o balawo ka cun u kan.

O cogo kelen na, Jehova be mɔgɔw lasɔmina bi dugukolo kan balawo dɔ koo la min ɲɔgɔn ma kɛ ka ye. A b’o kɛra cogo di? Mun na an be se ka la a la ko a be wagati tora mɔgɔw ye walisa u ka dɔ kɛ dɔ ye? Walisa k’o ɲiningaliw jaabiliw sɔrɔ, an ka Jehova ka lasɔmini kuma dɔw lajɛ a ye minw fɔ galen.

An be se ka Ala ka kitikow suma ni “sanfɔɲɔba” ye. Bibulu sɛbɛwagati la, minw tun be tugu ka Jehova ka sariyaw tiɲɛ, Jehova ye balawo caaman lase olu ma (Talenw 10:25; Zer. 30:23). O koow bɛɛ la, a y’o mɔgɔw lasɔmi wagatijan sanni o balawo ka cun u kan ani a y’a fɔ u ye u ka ɲi ka min kɛ walisa ka kolo ale ye (2 Mas. 17:12-15; Neemi 9:29, 30). A y’o kɛ walisa k’u jija u ka yɛlɛmani bɛnninw kɛ ani u k’a faamu ko kɔrɔtɔko lo. Jehova tɛmɛna a sagokɛla kantigiw fɛ dugukolo kan k’a ka kitikow lase o mɔgɔw ma.​—Amɔsi 3:7.

Nuhun tun y’o cɛɛ kantigi dɔ ye. A ka wagati mɔgɔw tun ka fari ani u tun be kakalayakow kɛ. Saan caaman kɔnɔ, a y’a jaa gwɛlɛya k’u lasɔmi ko sanjiba dɔ bena ben dugukolo kuru bɛɛ kan (Zɛnɛzi 6:9-13, 17). A y’a jija k’a fɔ u ye fana u ka ɲi ka min kɛ walisa ka kisi. O yɛrɛ lo kama Nuhun weelela kɔfɛ ko “min tun be tilenninyako fɔ.”​—2 Piyɛri 2:5.

Nuhun ka jijali bɛɛ n’a ta, mɔgɔw ma Ala ka kuma ta sɔbɛ la. U y’a yira ko u tun limaniyanin tɛ fewu! O kama, “jiba nana u halaki.” (Mat. 24:39; Eburuw 11:7). U satuma surunyanin, u tun tɛ se k’a fɔ ko Ala m’u lasɔmi.

Wagati wɛrɛw la, Jehova ye mɔgɔw lasɔmi dɔɔni dɔrɔn ka kɔn a ka kitikow ɲɛ. O bɛɛ n’a ta, a ye wagati to u ye walisa u ka se k’u ka kɛwalew yɛlɛma. Ɲɛyirali fɛ, Jehova ye tɔɔrɔ tan minw lase Ezipitikaw ma, a tun kɔnna k’u lasɔmi u kelen kelen bɛɛ koo la. An ka kuma tɔɔrɔ 7nan koo la. Jehova ye Musa ni Arɔn ci ka taga Farahuna n’a ka mɔgɔw lasɔmi ko sanbɛrɛ bena ben ka halakiliba kɛ. O sanbɛrɛ tun bena daminɛ o loon dugusagwɛ. O la, yala an be se k’a fɔ ko Ala ye wagati to u ye walisa u ka se ka dogoyɔrɔ sɔrɔ ani ka kisi wa? Bibulu b’a fɔ ko: “Masaba ka kuma ye siranya bila Ezipiti masacɛ ka mɔgɔbaba minw na, olu teliyara k’u ka jɔɔnw n’u ka begɛnw ladon soo kɔnɔ. Nga minw m’a ka kuma jati, olu y’u ka jɔɔnw n’u ka begɛnw to kongo la.” (Ɛkiz. 9:18-21). A gwɛnin lo ko Jehova tun y’u lasɔmi bɛrɛbɛrɛ ani a tun ye wagati to u ye. O lo kama minw sinna ka dɔ kɛ dɔ ye, olu ma tɔɔrɔ i ko tɔɔw.

Jehova ye Farahuna n’a ka mɔgɔw lasɔmi dɔɔni ka kɔn tɔɔrɔ 10nan ɲɛ. Nka, u ye hakilintanya kɛ, u m’o ta sɔbɛ la (Ɛkiz. 4:22, 23). O kama, u dencɛ fɔlɔw sara. O kɛra dusukasiko ye dɛ! (Ɛkiz. 11:4-10; 12:29). Yala u tun ye wagati sɔrɔ walisa k’u janto o lasɔmini kuma na wa? Ɔnhɔn! Musa tun teliyara ka Israɛldenw lasɔmi o tɔɔrɔ 10nan koo la ani a y’a fɔ u ye u ka ɲi ka min kɛ walisa k’u ka denbayaw kisi. (Ɛkiz. 12:21-28). Mɔgɔ joli lo y’u janto Jehova ka lasɔmini kuma na? Ka kɛɲɛ ni jatiminɛ dɔw ye,  mɔgɔ miliyɔn 3 ɲɔgɔn ye mɛnni kɛ Jehova fɛ ani u bɔra Ezipiti. O mɔgɔw tun ye Israɛldenw, “siya wɛrɛ caaman” ani Ezipitika dɔw ye.​—Ɛkiz. 12:38.

O koow b’a yira ko sanga ni wagati bɛɛ, Jehova ye wagati to mɔgɔw ye walisa u k’u janto ale ka lasɔmini kumaw na (Deter. 32:4). Mun na do? Ciden Piyɛri y’a ɲɛfɔ ko Jehova “t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9). Tiɲɛn na, Ala b’a janto mɔgɔw la. A tun b’a fɛ u ka nimisa ani u ka sɔn ale ka lasɔmini kumaw ma sanni a ka kitikow ka daminɛ.​—Ezayi 48:17, 18; Ɔrɔm. 2:4.

Bi fana, Jehova be mɔgɔw lasɔmina dugukolo kuru bɛɛ kan. Bɛɛ ka kan k’a janto o la sabu kɔrɔtɔko lo. Ka Yezu to dugukolo kan, a ye mɔgɔw lasɔmi ko an ka duniɲa nin bena halaki “tɔɔrɔba” wagati la (Mat. 24:21). O la, a ye kiraya kuma dɔ fɔ an ye o kitiko nata koo la. O kiraya kuma b’a yira an na ka gwɛ an bena fɛɛn minw ye ani fɛɛn minw bena an sɔrɔ ni tɔɔrɔba wagati surunyana. A ye koo jɔnjɔn dɔw kofɔ minw tun bena kɛ duniɲa kɔnɔ. An ɲɛɛ b’o koow la bi.​—Mat. 24:3-12; Luka 21:10-13.

Ka kɛɲɛ n’o kiraya kuma ye, Jehova be mɔgɔ bɛɛ jijara u k’a latigɛ k’ale sago kɛ ani u ka mɛnni kɛ ale fɛ. Minw b’o kɛ, a b’a fɛ u ka ɲɛnamaya kɛ cogo fisaman na kabi sisan. A b’a fɛ fana u ka dugaw sɔrɔ sini ma a ka duniɲa kura kɔnɔ, o min na tilenninya dama lo bena kɛ (2 Piyɛri 3:13). Walisa ka mɔgɔw dɛmɛ u ka la a ka layiduw la, Jehova be kibaro dɔ lase u ma, o min bena a to u be kisi. O ye Masaya “kibaru diman” lo ye. Yezu tun kɔnna k’a fɔ k’o kibaro “bena fɔ diɲɛ yɔrɔ bɛɛ la, waasa Alalɔnbaliw bɛɛ k’a koo mɛn.” (Mat. 24:14). Ala y’a sagokɛla sɔbɛw labɛn walisa u k’ale ka kuma lase mɔgɔw ma. Sisan, u b’o kɛra jamana 240 ɲɔgɔn na. A b’a fɛ mɔgɔ caamanba k’u janto a ka lasɔmini kumaw na. O la, u bena se ka kisi balawo nata la, o min na a bena kiti tigɛ tilenninya la.​—Sof. 1:14, 15; 2:2, 3.

K’a lɔn ni Jehova be wagati to mɔgɔw ye walisa u ka dɔ kɛ dɔ ye, o lo kɔrɔtanin tɛ. An y’a ye ko a be wagati to u ye tuma bɛɛ. Min kɔrɔtanin lo, o ye nin ye: Yala mɔgɔw bena u janto Ala ka lasɔmini kumaw na sisan sanni wagati ka tɛmɛ wa? An minw ye Ala ka cidenw ye, an ka to ka mɔgɔ caamanba dɛmɛ walisa u ka kisi duniɲa nin laban na.