1. Mun na an ka ɲi k’an masiri Jehova kelenpe lo la?

AN KA ɲi k’an masiri Jehova kelenpe lo la sabu ale lo y’an Danbaga ani niin Dibaga ye (Yir. 4:11). Nka, farati dɔ b’an seen kɔrɔ. Tiɲɛn lo ko an be Jehova kanu ani an be bonya la a kan. O bɛɛ n’a ta, koo dɔw be se k’an bali k’an masiri Jehova kelenpe la i ko an ka ɲi k’a kɛ cogo min na. O be se ka kɛ cogo di? A ka ɲi an k’o faamu. Nka, an k’a filɛ fɔlɔ a kɔrɔ ye min ye k’an masiri Jehova kelenpe la.

2. Ka kɛɲɛ ni Matiyo 4:10 ye, n’an masirinin lo Jehova kelenpe la, an bena mun lo kɛ?

² Bibulu ka fɔta la, k’an masiri Jehova la, o kɔrɔ ko k’a kanu kosɔbɛ. N’an masirinin lo Jehova kelenpe la, an bena ale kelenpe lo bato. An tɛna fɛɛn si wala mɔgɔ si kanu ka tɛmɛ a kan.​—Matiyo 4:10 kalan.

3. Mun na an b’an masiri Jehova la?

³ An t’an masiri Jehova la an kunfɛ. An b’o kɛ sabu an ye lɔnniya sɔrɔ a koo la. A jogow ka di an ye kosɔbɛ. Min ka di Jehova ye ani min man di a ye, an b’o lɔn ani an fana be koow jati o cogo la. A sagonata ye min ye adamadenw koo la, an b’o faamu ani an sɔnnin be o ma. A be sababu min di an ma an ka kɛ a teriw ye, an b’o jati nɛɛmaba ye (Talenw 3:32). An mana koo o koo faamu an Danbaga koo la, o b’a to an b’an magwɛrɛ a la kosɔbɛ.​—Zaki 4:8.

4. a) Sutana be tɛmɛ mun lo fɛ k’a to an kana Jehova kanu n’an dusu bɛɛ ye? b) An bena mun lo lajɛ barokun nin na?

 ⁴ Sutana lo be duniɲa nin kun na. A be tɛmɛ o duniɲa fɛ k’a ɲini k’an lafili an negelakow n’an ka fiɲɛw sababu fɛ (Efɛz. 2:1-3; 1 Zan 5:19). A b’a fɛ an ka fɛɛn wɛrɛw kanu, sanni an ka Jehova kelenpe kanu. Barokun nin na, an bena kuma fɛɛn fila koo la, Sutana be tɛmɛ minw fɛ k’a ɲini k’an lafili. A fɔlɔ, a b’an lasun ka wari kanu ani a filanan, a b’an lasun ka ɲɛnagwɛko kolonw sugandi.

5. Mun na an ka ɲi k’an yɛrɛ tanga wari kanuya ma?

⁵ A ka di an bɛɛ ye ka dumuni, fani ɲumanw ani boon ɲuman sɔrɔ. Nka, an ka ɲi k’an yɛrɛ tanga wari kanuya ma. Bi, mɔgɔ caaman be wari ni bololafɛnw lo kanu (2 Tim. 3:2). Yezu tun b’a lɔn k’o farati tun b’a ka kalandenw fana seen kɔrɔ. O kama, a ko: “Mɔgɔ si te se ka baara kɛ kuntigi fila ye, bari a bena kelen kɔniya ka kelen kanu, walima a bena nɔrɔ kelen na k’a mako bɔ kelen na. O cogo la fana, aw te se ka nafolo kanu, ka baara kɛ Ala ye.” (Mat. 6:24). N’a sɔrɔ dɔ be Jehova bato ani a be jijalibaw ni wagati caaman kɛ k’a ɲini ka kɛ nafolotigi ye fana. A be komi o tigi b’a ɲinina ka baara kɛ kuntigi fila ye. O la, a masirinin tɛ Jehova kelenpe la.

6. Yezu ye ladili min di Lawodise kafomɔgɔw ma, an be kalan juman lo sɔrɔ o la?

⁶ Saan kɛmɛkulu fɔlɔ laban fan fɛ, Lawodise kafomɔgɔw tun be wasoya kɛ. U tun b’a fɔ ko ‘u ye fɛntigiw ye, ko fɛɛn bɛɛ b’u fɛ, ko u wasara.’ Nka Jehova ni Yezu ɲɛɛ kɔrɔ, u tun ye “dɛsɛbagatɔw ni makaritɔw, fantanw, ni fiɲɛntɔw ani fɛɛrɛtɔw ye.” Yezu m’u ladi u ka  waritigiya kosɔn. A y’u ladi sabu u tun be wari kanu kojugu ani jɛnɲɔgɔnya min tun b’u ni Jehova cɛ, o tun be nagasira (Yir. 3:14-17). N’an y’a kɔrɔsi ko an b’a daminɛna ka wari kanu, a ka ɲi an k’an ka miiriya latilen. An kana o koo bila ka suma (1 Tim. 6:7, 8). N’o tɛ, Jehova tɛna sɔn an ka batoli ma sabu a b’a fɛ an k’ale kanu n’an “dusu bɛɛ ye.” (Mariki 12:30). Mun lo be se k’a to wariko be kɛ an ɲɛnako fɔlɔ ye?

7-9. I ye mun lo faamu diinan mɔgɔkɔrɔ dɔ ka koo la min tɔgɔ ko David?

⁷ An ka diinan mɔgɔkɔrɔ dɔ ka koo lajɛ. A tɔgɔ ko David ani a be Etazini. A ko ale tun y’a yɛrɛ bɛɛ di a ka baara la. U tun y’a kɛ ɲɛmɔgɔ ye a ka baarakɛyɔrɔ la. Jamana faamanw yɛrɛ y’a tando a ka baara ɲuman kosɔn. David ko: “O wagati la, n’ tun b’a miiri ko Jehova lo tun be n’ dugara o cogo la.” Nka, yala o tun ye Jehova ka duga lo ye tiɲɛn na wa?

⁸ Dɔɔni dɔɔni, David y’a faamu ko jɛnɲɔgɔnya min b’ale ni Jehova cɛ, o tun be nagasira ale ka baara kosɔn. A ko: “N’ tun be gwɛlɛya minw sɔrɔ n’ ka baara la, n’ tun be miiri u la lajɛnw na ani hali waajuli la. N’ tun be wari caaman sɔrɔ, nka, n’ hakili tun ɲagaminin lo kojugu ani gwɛlɛyaw tun be n’ ka furu kɔnɔ.”

⁹ David y’a faamu ko a ka ɲi k’a latigɛ fɛɛn minw kɔrɔtanin lo a fɛ kosɔbɛ. A ko: “N’ y’a latigɛ sɔbɛ la ka yɛlɛmani don n’ ka koow la.” A tun b’a fɛ k’a ka baara porogramu yɛlɛma ani a y’o fɔ a ka patɔrɔn ye. Mun lo sɔrɔla o la? U y’a gwɛn baara la! David ye mun lo kɛ do? A ko: “O loon dugusagwɛ bɛɛ, n’ ye  sɛbɛ dafa walisa ka kɛ piyɔniye kɔrɔsigi ye kudayi.” Walisa k’u ka musakaw sara, David n’a muso y’a daminɛ ka yɔrɔw jɔsi. Dɔɔni o kɔ, a kɛra kudayi piyɔniye ye ani kɔfɛ, a muso fana y’o baara daminɛ. Mɔgɔ caaman t’a fɛ ka baara min kɛ, David n’a muso y’a latigɛ k’o lo kɛ. Nka u be baara sugu min kɛ, o lo kɔrɔtanin tɛ u fɛ. U tun be sara min sɔrɔ u ka baara kɔrɔ la, o ye u ka sisan sara sigiyɔrɔma 10 lo ye. O n’a ta bɛɛ, u be sera k’u ka musakaw bɛɛ sara! U b’a fɛ ka Jehova ka baara lo kɛ u ɲɛnako fɔlɔ ye. U y’a ye ko minw b’a ka Masaya kɛ u ɲɛnako fɔlɔ ye, a b’a janto olu la.—Mat. 6:31-33.

10. An be se k’an dusukun latanga cogo di?

¹⁰ An ye waritigi ye wo, an ye fantan ye wo, an ka ɲi k’an dusukun latanga. An be se k’o kɛ cogo di do? Kana nafolo kanu. Kana i ka baloɲini baara bila Jehova batoli ɲɛ. Mun lo be se k’i dɛmɛ k’a lɔn n’i t’o lo kɛra? I yɛrɛ ɲininga ko: “Yala n’ ka teli ka miiri n’ ka baloɲini baara koo la lajɛnw na wala waajuli la wa? Yala n’ be hami siniko la tuma o tuma ani n’ b’a ɲini ka nafolo lajɛn n’ yɛrɛ ye sini kama wa? Yala ne ni n’ furuɲɔgɔn be bila ɲɔgɔn na wariko kosɔn wa? Mɔgɔw t’a fɛ ka baara min kɛ, yala n’ be sɔn k’o kɛ n’a b’a to n’ be se ka caaman kɛ Jehova ka baara la wa?” (1 Tim. 6:9-12). N’an be miirila o ɲiningaliw la, an k’a to an hakili la ko Jehova b’an kanu ani ko minw masirinin lo a la, a ye layidu ta u ye ko: “Ne tena i to i kelen, n tena i bila abada.” O lo kama ciden Pol y’a sɛbɛ ko: “Wari ɲiniko kana fiɲɛ don aw si tagamacogo la.”​—Eburuw 13:5, 6.

11. Ɲɛnagwɛkow be se ka nɔɔ juman lo to mɔgɔ kan?

¹¹ Jehova b’a fɛ an k’an ka ɲɛnamaya diyabɔ ani ɲɛnagwɛkow be se k’an ninsɔn diya kosɔbɛ. Ala ka Kuma yɛrɛ b’a fɔ ko: “Adamaden ka dumuni kɛ, ka minni kɛ, k’a ka baara diya bɔ,  o le y’a ka hɛrɛ ye.” (Waaj. 2:24). Nka, duniɲa ka ɲɛnagwɛkow fanba be se ka nɔɔ jugu to an kan. U be mɔgɔw sɔɔn tiɲɛ. Ala ka Kuma be fɛɛn minw haramuya, o ɲɛnagwɛkow be mɔgɔw jija u ka sɔn u ma ani u k’u kanu yɛrɛ.

12. Ka kɛɲɛ ni 1 Korɛntikaw 10:21, 22 ye, mun na an ka ɲi k’an ka ɲɛnagwɛkow sugandi ka ɲɛ?

¹² An b’a fɛ k’an masiri Jehova kelenpe lo la. O kama, an “te se ka [Jehova] ka dumuni kɛ ka tila ka jinaw ta kɛ.” (1 Korɛntikaw 10:21, 22 kalan). N’an be dumuni kɛ ni dɔ ye, tuma caaman na, o b’a yira ko an ye teriw ye. An man ɲi ka ɲɛnagwɛkow sugandi koo nunu be sɔrɔ minw na: fariyakow, kakalayakow, jinamoriya n’a ɲɔgɔnnakow wala koo kolon wɛrɛw. N’o tɛ, a bena kɛ komi an be jɛnna ni Ala juguw ye k’u ka dumuni kɛ. N’an y’o kɛ, an bena koo jugu kɛ an yɛrɛ la. Nka o dɔrɔn tɛ. Jɛnɲɔgɔnya min b’an ni Jehova cɛ, an bena o fana tiɲɛ.

13-14. a) Mun na an be se ka ɲɛnagwɛkow suma ni dumuni ye? b) Ka kɛɲɛ ni Zaki 1:14, 15 ye, mun na an ka ɲi k’an ka ɲɛnagwɛkow sugandi ka ɲɛ?

¹³ Mun na an be se ka ɲɛnagwɛkow suma ni dumuni ye? N’an be dumuni kɛra, an be se k’a latigɛ an bena fɛɛn min don an daa la. Nka, n’an y’o dumuni kɛ ka ban, an tɛ se k’a latigɛ a bena min kɛ an farisogo la. Dumuni ɲuman be se k’a kɛ an be to kɛnɛya la. Nka dumuni kunntan be se k’a to an be bana. N’an ye dumuni kɛ, n’a sɔrɔ an tɛna sin k’a nɔfɛkow ye. Nka, an bena o ye kɔfɛ le.

¹⁴ N’an be ɲɛnagwɛkow sugandira fana, an be se k’a latigɛ an bena min don an hakili la. Nka o kɔ, an ye ɲɛnagwɛko min don an hakili la, o bena nɔɔ to an ka miiriyaw n’an dusukunnakow kan. Ɲɛnagwɛko ɲuman bena barika kura don an na. Nka, ɲɛnagwɛko kunntan bena koo jugu kɛ an na (Zaki 1:14, 15 kalan). N’a sɔrɔ an tɛna sin k’o koo jugu ye, nka an bena o ye kɔfɛ le. O lo kama, Bibulu b’an lasɔmi ko: “Aw kana aw yɛrɛ nigɛ. Mɔgɔ te se ka yɛlɛ Ala ma. Mɔgɔ o mɔgɔ mana fɛɛn min dan, a bena o le tigɛ. Mɔgɔ min y’a ka koo bɛɛ kɛ farisogo koo ye, o tigi bena halaki.” (Gal. 6:7, 8). Jehova be koo minw kɔniya, ɲɛnagwɛko minw b’o yira, a kɔrɔtanin lo kosɔbɛ an ka ban u bɛɛ la!​—Zab. 97:10.

15. Jehova ye nilifɛn juman lo di an ma?

¹⁵ A ka di Jehova sagokɛla caaman ye ka JW Telewisɔn^® filɛ. O ye an ka telewisɔn ye min be sɔrɔ ɛntɛrɛnɛti kan. * Balimamuso dɔ tɔgɔ ko Marilyn ani a ko: “JW Telewisɔn y’a to n’ ninsɔn ka di kosɔbɛ. Fɛɛn o fɛɛn be bɔ o telewisɔn na, n’ be se k’o filɛ sabu fɛɛn ɲumanw dama lo be bɔ yen. N’a be n’ ɲɛɛ na ko n’ be n’ kelen na ani ni n’ fari fagara, n’ be forobakalan wala sɔgɔma batoli dɔ lamɛn yen min be n’ jija. O b’a to n’ b’a ye ko n’ magwɛrɛnin lo Jehova n’a ka ɔriganisasiyɔn na kosɔbɛ. JW Telewisɔn ye n’ ka ɲɛnamaya yɛlɛma pewu.” O telewisɔn ye Jehova ka nilifɛn dɔ ye. Yala i be to k’a filɛ wa? JW Telewisɔn na, videwo dɔw be bɔ kalo o kalo. Ka fara o kan, videwo wɛrɛw, fɛɛn lamɛntaw ani dɔnkili diimanw be yen, i be se ka minw filɛ ani k’u lamɛn tuma o tuma.

16-17. An be wagati min ta ka ɲɛnagwɛ, mun na an ka ɲi k’an janto o la kosɔbɛ? An be se k’o kɛ cogo di?

¹⁶ Tiɲɛn lo ko an b’an yɛrɛ ɲɛnagwɛ ni fɛɛn sugu minw ye, an ka ɲi k’u sugandi ka ɲɛ. Nka o dɔrɔn tɛ. An be wagati hakɛ min ta ka ɲɛnagwɛ, an ka ɲi k’an janto o fana na. N’o tɛ, an tɛna wagati caaman sɔrɔ ka Jehova ka baara kɛ. An be wagati min ta ka ɲɛnagwɛ, mɔgɔ caaman b’a ye ko a ka gwɛlɛ u ma k’u janto o la.  Balimamuso dɔ tɔgɔ ko Abigail ani a be ni saan 18 ye. A ko: “N’ sɛgɛnninba mana segi soo wulafɛ, telewisɔnfilɛ be n’ lafiya. Nka ni n’ ma kɔrɔsili kɛ, n’ be se ka to k’a filɛ lɛri caaman kɔnɔ.” Balima kanbele dɔ tɔgɔ ko Samuel ani a ko: “Tuma dɔw la, n’ be videwo den-dennin caaman filɛ ɛntɛrɛnɛti kan. N’ b’a daminɛ ka kelen filɛ ani sanni n’ yɛrɛ ka bɔ a kala ma, lɛri saba wala naani tɛmɛna ka ban.”

¹⁷ I be wagati min kɛ ɲɛnagwɛkow la, i be se k’i janto o la cogo di? A fɔlɔ, i be wagati hakɛ min ta ka ɲɛnagwɛ sisan, a ɲini k’o lɔn. Ɲɛyirali fɛ, a sɛbɛ i ye wagati min ta lɔgɔkun kelen kɔnɔ ka koo nunu kɛ: ka telewisɔn filɛ, ka taga ɛntɛrɛnɛti kan ani ka videwo tulonw kɛ i ka telefɔni wala tablɛti n’a ɲɔgɔnnaw kan. N’i y’a kɔrɔsi ko i be wagati caaman ta k’o koow kɛ, porogramu dɔ bila sen kan. Fɛɛn minw kɔrɔtanin lo ka tɛmɛ, a latigɛ k’olu kɛ fɔlɔ ani o kɔ, wagati dɔ latigɛ ɲɛnagwɛkow kama. Jehova deli a k’i dɛmɛ walisa i k’i ka porogramu labato. O la, i mako be wagati ani fanga min na, i bena o sɔrɔ walisa ka koo nunu kɛ: kelenna kalan, gwa kɔnɔ batoli, kafo ka lajɛnw ani waajuli baara. I be wagati min kɛ ɲɛnagwɛkow la, i tɛna i yɛrɛ jalaki o kosɔn fana.

18-19. An b’a yira cogo di ko an masirinin lo Jehova kelenpe lo la?

¹⁸ Ciden Piyɛri kumana Sutana ka duniɲa nin laban ani duniɲa kura nata koo la. O kɔ, a ko: “N teriw, o kama, aw labɛnnin ka to o makɔnɔni na, aw ye jija jalakiyɔrɔ kana sɔrɔ aw la Ala fɛ, aw ni Ala ka bɛn.” (2 Piyɛri 3:14). An ka tugu o ladilikan kɔ ani an k’an jija walisa an saniyanin ka to tagamacogo ani Alako ta fan fɛ. N’an b’o kɛ, an b’a yira ko an masirinin lo Jehova kelenpe lo la.

¹⁹ Sutana n’a ka duniɲa bena to k’an lasun an ka fɛɛn wɛrɛw bila Jehova batoli ɲɛ (Luka 4:13). Nka, an ka gwɛlɛyaw mana kɛ min o min ye, an tɛna fɛɛn si wala mɔgɔ si kanu ka tɛmɛ Jehova kan. An jijanin lo k’an masiri Jehova kelenpe lo la sabu ale kelenpe lo ka kan n’o ye!