1-2. a) Mun lo b’an dɛmɛ ka gwɛlɛyaw muɲu loon o loon? A ɲɛfɔ. b) An bena mun lo lajɛ barokun nin na?

YALA i hakili jigira ka ye i ka gwɛlɛya dɔ la ani i y’a miiri ko: “N’ lanin b’a la ko n’ ma se k’o muɲu n’ yɛrɛ ma.” An fanba y’o ɲɔgɔn miiri ka ye. N’a sɔrɔ i y’o miiri sabu bana jugu dɔ tun b’i la wala i ka mɔgɔ sɔbɛ dɔ tun sara ani i sera k’o muɲu. N’i miirila o gwɛlɛya la, i b’a jati ko i sera k’o muɲu loon o loon sabu i ye “sebagaya kabakoman” sɔrɔ Jehova ka hakili senu barika la.​—2 Kor. 4:7-9.

² An mako be hakili senu na fana walisa duniɲa juguman nin kana nɔɔ to an kan (1 Zan 5:19). Ka fara o kan, an mako be fanga la walisa ka ‘nijuguw’ kɛlɛ (Efɛz. 6:12). Hakili senu b’an dɛmɛ cogo minw na k’o gwɛlɛyaw bɛɛ muɲu, an bena u la fila lajɛ barokun nin na. O kɔ, an bena a filɛ an be se ka min kɛ walisa ka hakili senu sɔrɔ bɛrɛbɛrɛ.

3. Jehova b’an dɛmɛ cogo minw na ka gwɛlɛyaw muɲu, u dɔ kofɔ.

³ Jehova ka hakili senu be fanga di an ma walisa an k’an ka kunkanbaaraw dafa gwɛlɛyaw bɛɛ n’a ta. Ciden Pol ka gwɛlɛyaw bɛɛ n’a ta, a tora ka baara kɛ Jehova ye. A tun b’a jati ko a tun be sera k’o kɛ sabu a y’a jigi la “Krista ka sebagaya” kan (2 Kor. 12:9). Pol ka voyazi filanan na a ka misɔndenya baara sen fɛ, a ye wagati caaman kɛ waajuli la. A ye baara kɛ fana walisa k’a mako wasa. A tora Akilasi ni Pirisili ka soo Korɛnti dugu la. Komi u bɛɛ tun be fanibugu lo dilan, a tun be baara kɛ n’u ye loon dɔw la (Kɛw. 18:1-4). Hakili senu ye fanga di Pol ma a sera k’a ka baloɲini baara n’a ka cidenya baara kɛ.

4. Ka kɛɲɛ ni 2 Korɛntikaw 12:7-9 ka fɔta ye, Pol ye gwɛlɛya juman lo sɔrɔ?

⁴ Vɛrise nunu kalan: 2 Korɛntikaw 12:7-9. Pol ko: “Balabu dɔ ye ne sɔrɔ [wala ‘ŋɔni dɔ donna ne farikolo la,’ Bible senuma].” O kɔrɔ ko di? Ni ŋɔni b’i farisogo la, o b’i tɔɔrɔ kosɔbɛ. O la, Pol tun b’a fɛ k’a fɔ le ko gwɛlɛyaba dɔ tun b’ale kan, o min tun b’a tɔɔrɔla. A k’o gwɛlɛya tun be i n’a fɔ “Sutana ka ciden” lo tun b’ale tɔɔrɔla. N’a sɔrɔ Sutana n’a ka jinaw lo tun m’o tɔɔrɔ la ciden Pol kan, o min tun be i n’a fɔ u ye ŋɔni lo turu a fari la. Nka, tuma min na u y’a ye ko gwɛlɛya be Pol kan, n’a sɔrɔ u banbara ka koo tɔɔ juguya. A tun be i n’a fɔ mɔgɔ dɔ be ŋɔni ɲɔndira ka don Pol fari la. Pol ye mun lo kɛ do?

5. Jehova ye Pol ka deliliw jaabi cogo di?

⁵ A daminɛ na, Pol tun b’a fɛ Jehova k’o “ŋɔni” bɔ ale fari la. A ko: “Ne ye Matigi [Jehova] daali siɲɛ saba ko a ka ne kɛnɛya.” O bɛɛ n’a ta, o ŋɔni bele tun be Pol farisogo la. Yala o kɔrɔ ko Jehova m’a ka deliliw jaabi wa? Jehova y’u jaabi. Tiɲɛn lo ko a m’o gwɛlɛya bɔ Pol kan. Nka, a ye fanga di a ma k’o muɲu. Jehova y’a fɔ a ye ko: “N ka nɛɛma b’i wasa, ne be n ka sebagaya yira i ka dɛsɛwaati la.” (2 Kor. 12:8, 9). Jehova ka dɛmɛ sababu la, Pol tun ninsɔndiyanin lo ani a hakili siginin tora!​—Filip. 4:4-7.

6. a) Jehova be se k’an ka deliliw jaabi cogo di? b) Layidu jumanw lo be sɔrɔ dakun nin ka vɛrisew kɔnɔ minw b’i barika bonya?

⁶ I ko Pol, yala i ye Jehova deli ko a ka gwɛlɛya dɔ bɔ i kan wa? N’a sɔrɔ i y’a deli o koo la siɲɛ caaman n’i dusu bɛɛ ye. Nka, o gwɛlɛya bele be yen wala a yɛrɛ be juguyara. Yala o kɔrɔ ko i koo man di Jehova ye wa? N’i b’o miiri, i hakili to Pol ka koo la. Jehova ye Pol ka deliliw jaabi. Siga t’a la, a bena ele fana taw jaabi! N’a sɔrɔ Jehova tɛna o gwɛlɛya bɔ i kan. Nka, i mako be fanga min na walisa k’o muɲu, a bena o d’i ma hakili senu barika la (Zab. 61:4, 5). A be se ka kɛ komi gwɛlɛyaw y’i ‘bugɔ k’i ben’ nka, Jehova tɛna i to yen.​—2 Kor. 4:8, 9; Filip. 4:13, NW.

7-8. a) Mun na an be se ka hakili senu suma ni fɔɲɔ ye? b) Hakili senu be baara kɛ cogo min na, Piyɛri y’o lakali cogo di?

⁷ Hakili senu b’an dɛmɛ cogo wɛrɛ juman lo la? An be se ka hakili senu suma ni fɔɲɔ ye. Fɔɲɔ min be fiyɛ kurun tagayɔrɔ fan fɛ, kurunbolila be se k’a to o ka kurun ɲɔndi fɔɔ ka se a seyɔrɔ la, hali ni baji be lamagara. O cogo kelen na, hakili senu b’an dɛmɛ an ka to ka Jehova sago kɛ gwɛlɛyaw bɛɛ n’a ta. A bena to k’o kɛ fɔɔ an be taga don duniɲa kura kɔnɔ.

⁸ Komi ciden Piyɛri tun ye jɛgɛminɛla ye, a tun be kurunboli lɔn ka ɲɛ. N’a sɔrɔ o lo kama tuma min na a y’a ɲɛfɔ hakili senu be baara kɛ cogo min na, a ye kumaden dɔw fɔ minw ɲɛsinna kurunboli ma. A y’a sɛbɛ ko: “A ma kɛ i n’a fɔ kirayakuma bɔra mɔgɔw fɛ, nga Nii Senuman yɛrɛ le y’a don u daa la u tora ka kuma Ala tɔgɔ la.” Gɛrɛkikan kumaden min bayɛlɛmana ko “don u daa la,” o kɔrɔ ko “k’a ta ka taga n’a ye wala k’a ɲɔndi.”​—2 Piyɛri 1:21.

9. Piyɛri tun b’a fɛ mɔgɔw ka miiri mun lo la tuma min na a ko hakili senu y’a “don u daa la” wala a y’u “ɲɔndi”?

⁹ Piyɛri ko hakili senu y’a “don u daa la” wala a y’u “ɲɔndi.” A tun b’a fɛ mɔgɔw ka miiri mun lo la? Kɛwaliw ka kitabu sɛbɛbaga Luka y’o gɛrɛkikan kumaden ɲɔgɔn lo fɔ tuma min na a ko u  ka kurunboli la, u labanna “k’a to fɔɲɔ ta ma.” (Kɛw. 27:15). Bibulu sɛgɛsɛgɛrikɛla dɔ ko Piyɛri kɛtɔ k’a sɛbɛ ko hakili senu “y’a don” Bibulu sɛbɛbagaw daa la, a ye gɛrɛkikan kumaden dɔ lo fɔ min tun b’a to mɔgɔw be miiri kurunboli koo la. Piyɛri tun b’a fɔra le ko i ko fɔɲɔ be kurun ɲɔndi cogo min na fɔɔ a seyɔrɔ la, hakili senu ye Bibulu sɛbɛbagaw ɲɛminɛ walisa u k’u ka baara kɛ. O Bibulu sɛgɛsɛgɛrikɛla y’a fɔ fana ko Bibulu sɛbɛbagaw tun be i n’a fɔ kurun minw ka “faniw foninin lo.” U tun labɛnnin lo k’a to hakili senu k’u ɲɛminɛ u ka baara la. Jehova y’a ta kɛ. A ye “fɔɲɔ,” o kɔrɔ hakili senu di u ma. Bibulu sɛbɛbagaw fana y’u ka baara kɛ, Ala tun y’o min kalifa u ma. U y’a to hakili senu y’u ɲɛminɛ.

10-11. An ka ɲi ka koo fila jumanw lo kɛ walisa hakili senu k’an ɲɛminɛ? Ɲɛyirali dɔ fɔ.

¹⁰ Bi, Jehova tɛ tɛmɛ hakili senu fɛ k’a to mɔgɔw ka Bibulu ka kitabuw sɛbɛ tugun. Nka, a bele be tɛmɛ hakili senu fɛ k’a sagokɛlaw ɲɛminɛ. Jehova bele b’a ta kɛra. An be se k’a ka hakili senu sɔrɔ cogo di? An ka ɲi ka banba k’an ninyɔrɔ kɛ. An b’o kɛ cogo di?

¹¹ An ka miiri ɲɛyirali nin na: Ni kurunbolila b’a fɛ fɔɲɔ ka kurun ɲɔndi, a ka ɲi ka koo fila kɛ. A fɔlɔ, a ka ɲi k’a ka kurun ɲɛsin fɔɲɔ tagayɔrɔ fan fɛ. A ka kurun tɛna taga a yɛrɛ ma n’a y’a to kurunlɔyɔrɔ la, yɔrɔ min na fɔɲɔ barika man bon. A filanan, a ka ɲi ka kurun faniw foni ani k’u yɛrɛkɛ ka ɲɛ. Ni kurun faniw fara fɔɲɔ na, kurun bena a daminɛ ka taga. O cogo kelen na, an bena to ka Jehova sago kɛ hakili senu ka dɛmɛ lo barika la. Walisa ka hakili senu sɔrɔ, an ka ɲi ka koo fila kɛ. A fɔlɔ, hakili senu be Ala sagokɛlaw ɲɛminɛ baara minw na, an k’o kɛ. A filanan, an ka ɲi k’an seen don o baaraw la bɛrɛbɛrɛ (Zab. 119:2). N’an b’o koow kɛ, hakili senu bena fanga di  an ma walisa an k’an ka gwɛlɛyaw bɛɛ muɲu. A bena an dɛmɛ fana an ka to ka Jehova sago kɛ kantigiya la fɔɔ an be taga don duniɲa kura kɔnɔ.

12. An bena mun lo lajɛ sisan?

¹² An y’a ye ko hakili senu be se k’an dɛmɛ cogo fila la. A be fanga di an ma ani a b’an dɛmɛ an ka to kantigiya la gwɛlɛyaw wagati la. A b’an ɲɛminɛ ani k’an dɛmɛ ka Jehova ka baara kɛ. O lo bena a to an be ɲɛnamaya banbali sɔrɔ. An bena koo naani lajɛ sisan, an ka ɲi ka minw kɛ walisa ka hakili senu sɔrɔ bɛrɛbɛrɛ.

13. Ka kɛɲɛ ni 2 Timote 3:16, 17 ye, Ala ka Kuma be se k’an nafa cogo di? Nka, an ka ɲi ka mun lo kɛ?

¹³ A fɔlɔ, an ka Ala ka Kuma sɛgɛsɛgɛ (2 Timote 3:16, 17 kalan). Gɛrɛkikan kumaden min bayɛlɛma ko “Ala yɛrɛ ka sebagaya,” o kɔrɔ ko “Ala dafiɲɛ.” Ala tɛmɛna a ka hakili senu fɛ k’a ka miiriyaw don Bibulu sɛbɛbagaw hakili la. O kama, n’an be Bibulu kalan ani ka miiri a kan, Ala ka kalanw be don an hakili n’an dusu la. O kuma minw sɛbɛra hakili senu barika la, u b’an lasun ka yɛlɛmaniw kɛ walisa k’an koo diya Jehova ye (Eburuw 4:12). Walisa ka hakili senu sɔrɔ bɛrɛbɛrɛ, an ka ɲi ka wagati ta ka Ala ka Kuma sɛgɛsɛgɛ tuma o tuma ani ka miiri a kan koɲuman. O la, a bena nɔɔ to an ka kumaw n’an ka kokɛtaw bɛɛ kan.

14. a) Mun na an be se k’a fɔ ko an be hakili senu sɔrɔ an ka lajɛnw na? b) Mun lo bena an dɛmɛ ka hakili senu sɔrɔ bɛrɛbɛrɛ lajɛnw na?

¹⁴ A filanan, an ka Ala bato n’an balimaw ye (Zab. 22:23). An be hakili senu sɔrɔ lajɛnw na (Yir. 2:29). Mun na an be se k’o fɔ? Sabu n’an be lajɛn na n’an balimaw ye, an be Jehova deli hakili senu na. An be Masaya dɔnkiliw la fana minw basiginin lo Ala ka Kuma kan ani an be kalanw lamɛn ka bɔ Bibulu kɔnɔ. Balimacɛ minw b’o kalanw kɛ, hakili senu lo y’olu sigi kafo kɔnɔ. O hakili senu lo be balimamusow fana dɛmɛ u k’u ka kalanw labɛn ani k’u kɛ. Walisa ka hakili senu sɔrɔ bɛrɛbɛrɛ, an ka ɲi k’an yɛrɛ labɛn koɲuman ka se ka lakalitaw kɛ lajɛnw na. O la, an labɛnnin lo ka hakili senu sɔrɔ. An bena kɛ i ko kurun min ka faniw foninin lo.

15. Hakili senu b’an dɛmɛ cogo di waajuli la?

¹⁵ A sabanan, an ka waajuli kɛ. N’an be baara kɛ ni Bibulu ye waajuli la ani ka mɔgɔw kalan, an b’a to hakili senu k’an dɛmɛ (Ɔrɔm. 15:18, 19). Walisa ka hakili senu sɔrɔ bɛrɛbɛrɛ, an ka ɲi ka waajuli kɛ tuma o tuma. Waajuli la, tuma o tuma n’an be se, an ka baara kɛ ni Bibulu ye. An bena se ka baro diimanw kɛ ni mɔgɔw ye n’an be basigi Lajɛnsɛbɛ ka barokɛcogo modɛliw kan.

16. An be se ka sin ka hakili senu sɔrɔ cogo di?

¹⁶ A naaninan, an ka Jehova deli (Mat. 7:7-11; Luka 11:13). An be se ka sin ka hakili senu sɔrɔ cogo min na, o ye k’a deli Jehova fɛ. Foyi tɛ se k’an ka deliliw bali u ka se Jehova ma wala k’an bali ka hakili senu sɔrɔ. Hakili senu be se k’an dɛmɛ hali n’an be kaso la. Sutana yɛrɛ tɛ se ka foyi kɛ k’an bali ka hakili senu sɔrɔ (Zaki 1:17). An ka ɲi ka delili kɛ cogo di walisa ka hakili senu sɔrɔ bɛrɛbɛrɛ? Walisa k’o ɲiningali jaabi, an k’a ɲini ka dɔ lɔn delili koo la an kɛtɔ ka ntalen dɔ lajɛ min be sɔrɔ Luka ka Evanzili dɔrɔn kɔnɔ. *

17. Yezu ye ɲɛyirali min ta Luka 11:5-9, 13 kɔnɔ, an be kalan juman lo sɔrɔ o la delili koo la?

¹⁷ Luka 11:5-9, 13 kalan. Yezu ye ɲɛyirali min ta, o b’a yira an ka ɲi ka Jehova deli hakili senu na cogo min na. Cɛɛ min kofɔra o ɲɛyirali kɔnɔ, a mako tun be min na, a y’o sɔrɔ sabu a tora k’a tericɛ ɲɛɛ gwan. A ma siran ka dɛmɛ ɲini a tericɛ fɛ hali k’a sɔrɔ dugu tun tilara. Yezu k’o ɲɛyirali ɲɛsinna delili ma cogo di? A ko: “Aw [ka to] k’aw ka makoyafɛn daali Ala fɛ, a bena o d’aw ma. Aw mako be fɛɛn min na, aw [ka to] k’o ɲini, aw ben’o sɔrɔ. Aw [ka to] ka daa kɔkɔ, daa bena yɛlɛ aw ye.” An be kalan juman lo sɔrɔ o la? N’an b’a fɛ hakili senu k’an dɛmɛ, an ka ɲi k’an jija ka to k’a deli Ala fɛ.

18. Ka kɛɲɛ ni Yezu ka ɲɛyirali ye, mun na an be se ka la a la ko Jehova bena hakili senu di an ma?

¹⁸ Yezu ye ɲɛyirali min ta, o b’an dɛmɛ fana k’a faamu fɛɛn min kama Jehova bena hakili senu di an ma. Yezu ye cɛɛ min kofɔ, ale tun b’a fɛ ka kɛ jatigi ɲuman ye. Ale fɛ, waajibi tun lo a ka dumuni di a ka lonan ma, o min nana dugutilama. Nka, foyi tun t’a fɛ. Yezu k’o cɛɛ sigiɲɔgɔn ye dumuni di a ma sabu o cɛɛ tora k’a deli. Yezu tun b’a fɛ ka mun lo yira? O cɛɛ sigiɲɔgɔn tun ye dafabali ye, nka a sɔnna k’a dɛmɛ sabu a tora k’a deli. N’o lo, an ka la a la ko minw be to ka hakili senu deli an Faa kanutigi fɛ, a bena o di u ma! O la, an ka la a la ko n’an be to ka hakili senu deli Jehova fɛ, a bena o di an ma.—Zab. 10:17; 66:19.

19. Mun na an be se ka la a la ko an bena se ka muɲuli kɛ?

¹⁹ Sutana b’an kɛlɛ tuma o tuma. An ka la a la k’o bɛɛ n’a ta, an bena se ka muɲuli kɛ. Mun na do? Sabu hakili senu b’an dɛmɛ cogo fila la. A fɔlɔ, an mako be fanga min na walisa ka gwɛlɛyaw muɲu, an b’o sɔrɔ hakili senu barika la. A filanan, hakili senu ye fanga ye min b’an dɛmɛ an ka to ka Jehova sago kɛ fɔɔ ka taga don duniɲa kura kɔnɔ. An k’an jija walisa ka hakili senu ka dɛmɛ sɔrɔ bɛrɛbɛrɛ!