1. Jehova b’a to an ka mun lo kɛ?

JEHOVA b’a to an k’a latigɛ an bena an ka ɲɛnamaya kɛ cogo min na. A b’a yira an na an be se ka desizɔn ɲumanw ta cogo min na. N’an ye desizɔnw ta minw ka di a ye, a b’an dɛmɛ k’u dafa (Zab. 119:173). O la, n’an be Bibulu ka hakilitigiya kumaw sira tagama, an bena desizɔn ɲumanw ta.​—Eburuw 5:14.

2. Desizɔn dɔ tanin kɔ, a be se ka gwɛlɛya an ma ka mun lo kɛ?

² Hali n’an ye desizɔn ɲuman dɔ ta, an ye min daminɛ, a be se ka gwɛlɛya an ma k’o laban. An ka ɲɛyirali dɔw lajɛ: Balima kanbele dɔ y’a latigɛ ka Bibulu kuturu bɛɛ kalan. A y’a daminɛ k’o kɛ lɔgɔkun damanin kɔnɔ, nka o kɔ, a y’a dabila. Balimamuso dɔ y’a latigɛ ka kɛ kudayi piyɔniye ye. Nka, a bena o daminɛ tuma min na, a tora k’o yɛlɛma. Diinan mɔgɔkɔrɔw jɛnkulu dɔ y’a latigɛ ɲɔgɔn fɛ k’u bena to ka taga bɔ balimaw ye walisa k’u jija. Nka kalo caaman o kɔ, u bele m’o daminɛ. O koo saba tɛ kelen ye. Nka, koo dɔ b’a to u bɔnin be ɲɔgɔn ma. O koo saba bɛɛ la, desizɔn dɔ tara, nka min latigɛra, o ma kɛ. O gwɛlɛya ɲɔgɔn ye Korɛnti kerecɛnw sɔrɔ saan kɛmɛkulu fɔlɔ la. An k’a filɛ an be se ka kalan min sɔrɔ u fɛ.

3. Korɛntikaw ye desizɔn juman lo ta? Nka mun lo kɛra o kɔ?

³ Saan 55 faan fɛ Krista tile la, Korɛntikaw ye desizɔnba dɔ ta. U y’a mɛn ko tɔɔrɔ ni fantanya be balimaw kan Zeruzalɛmu ani Zude. U y’a mɛn fana ko kafo dɔw be wari lajɛnna walisa k’o balimaw dɛmɛ. Ɲumanya tun be  Korɛntikaw na ani u tɛgɛ tun labilanin lo. O kama, u y’a latigɛ k’u balimaw dɛmɛ. U ye ciden Pol ɲininga u be se ka min kɛ. Pol ye cikanw di u ma ani a ye Titi ci walisa a k’u dɛmɛ u k’u ka bolomafaraw lajɛn (1 Kor. 16:1; 2 Kor. 8:6). Nka kalo damanin o kɔ, Pol y’a mɛn ko Korɛntikaw tun ye min latigɛ, u bele m’o kɛ. U ka bolomafara tun ma labɛn wagati latigɛnin na. O kama, a be komi a tun tɛna se ka fara kafo tɔɔw ta kan walisa u ka taga n’a ye Zeruzalɛmu.​—2 Kor. 9:4, 5.

4. Ka kɛɲɛ ni 2 Korɛntikaw 8:7, 10, 11 ye, Pol ye Korɛntikaw jija u ka mun lo kɛ?

⁴ Korɛntikaw tun ye desizɔn ɲuman lo ta. Pol yɛrɛ y’u tando sabu u tun limaniyanin lo kosɔbɛ ani u tɛgɛ tun foninin lo sɔbɛ la. Nka, a y’u jija fana k’u ye min daminɛ, u k’o laban (2 Korɛntikaw 8:7, 10, 11 kalan). O b’a yira ko a be se ka gwɛlɛya hali kerecɛn kantigiw ma k’u ka desizɔn labato.

5. An bena ɲiningali jumanw lo lajɛ?

⁵ I ko Korɛntikaw, a be se ka gwɛlɛya an ma k’an ka desizɔn labato. Mun na do? Komi an ye dafabaliw ye, an ka teli ka koow bila ka suma. Barinankow fana be se k’a to an tɛ se k’an ka desizɔn labato (Waaj. 9:11; Ɔrɔm. 7:18). An be se k’an ka desizɔn sɛgɛsɛgɛ cogo di walisa k’a lɔn n’an ka ɲi k’a yɛlɛma? An ye min daminɛ, an be se k’o laban cogo di?

6. N’a sɔrɔ tuma juman lo la an ka ɲi k’an ka desizɔn dɔ yɛlɛma?

⁶ Desizɔn dɔw kɔrɔtanin lo ani an tɛna u yɛlɛma fewu. Ɲɛyirali fɛ, an ye desizɔn min ta ka Jehova sago kɛ, an tɛ bɔ o kan. An jijanin lo fana ka kantigiya kɛ an furuɲɔgɔn ye (Mat. 16:24; 19:6). Nka, n’a sɔrɔ an ka ɲi ka desizɔn dɔw yɛlɛma sabu koow be yɛlɛma. Mun lo be se k’an dɛmɛ ka desizɔn ɲumanw ta?

7. An ka ɲi ka mun lo deli Jehova fɛ ani mun na?

⁷ Hakilitigiya deli Jehova fɛ. Jehova ka hakili senu barika la, Zaki y’a sɛbɛ ko: “N’o y’a sɔrɔ n’aw dɔ dɛsɛnin lo hakilitigiya la, o tigi k’a daali Ala fɛ, a ben’a d’a ma. A tigɛ man gwɛlɛ, a be mɔgɔ bɛɛ sɔn ka ɲa.” (Zaki 1:5). An bɛɛ “dɛsɛnin lo hakilitigiya la” faan dɔw la. O la, n’i be desizɔn tara ani n’i b’a filɛra n’i ka ɲi k’a yɛlɛma, dɛmɛ ɲini Jehova fɛ. A bena i dɛmɛ i ka desizɔn ɲumanw ta.

8. An ka ɲi ka sɛgɛsɛgɛri jumanw lo kɛ ka sɔrɔ ka desizɔnw ta?

⁸ Sɛgɛsɛgɛri kɛ koɲuman. Ala ka Kuma lajɛ, an ka gafew kalan ani kuma ni lannamɔgɔ dɔw ye (Talenw 20:18). A kɔrɔtanin lo i k’o sɛgɛsɛgɛriw kɛ ka sɔrɔ ka desizɔn ta koo nunu dɔ la: ka baara wɛrɛ kɛ, ka yɛlɛma yɔrɔ wɛrɛ la wala k’a latigɛ i bena kalan min kɛ walisa ka to k’i mako waso i ka cidenya baara la.

9. N’an b’an kɔnɔ gwɛ an yɛrɛ ye, o bena an nafa cogo di?

⁹ I ka ŋaniyaw sɛgɛsɛgɛ. An ka ŋaniyaw kɔrɔtanin lo Jehova fɛ (Talenw 16:2). A b’a fɛ an k’an kɔnɔ gwɛ koo bɛɛ la. O la, n’an be desizɔnw tara, an ka ɲi k’an kɔnɔ gwɛ an yɛrɛ, ani mɔgɔ wɛrɛw ye an ka ŋaniyaw koo la. N’o tɛ, a bena gwɛlɛya an ma k’an ka desizɔnw labato. Ɲɛyirali fɛ, balima kanbele dɔ be se k’a latigɛ ka kɛ kudayi piyɔniye ye. Nka wagati damanin o kɔ, a be gwɛlɛya a ma k’a ka lɛriw sɔrɔ ani a tɛ ninsɔndiya yɛrɛ sɔrɔ tugun waajuli la. N’a sɔrɔ a y’a miiri ko min y’a lasun ka kɛ piyɔniye ye, o ye ko a  b’a fɛ k’a koo diya Jehova ye. Nka, a be se ka kɛ ko min y’a lasun tiɲɛn tiɲɛn na, o ye ko a tun b’a fɛ k’a koo diya a bangebagaw wala mɔgɔ wɛrɛ lo ye.

10. Mun lo ka ɲi k’an lasun ka yɛlɛmaniw kɛ?

¹⁰ An ka miiri Bibulu kalanden dɔ la min y’a latigɛ ka sigarɛtimin dabila. Lɔgɔkun kelen wala fila kɔnɔ, a banbara a ma sigarɛti min. Nka, o kɔ, a y’a daminɛ tugun. A laban, a sera ka sigarɛtimin dabila pewu! A be Jehova kanu ani a b’a fɛ k’a koo diya a ye minkɛ, o lo y’a dɛmɛ ka see sɔrɔ a ka delinanko jugu kan.​—Kɔlɔs. 1:10; 3:23.

11. Mun na i ka ɲi ka kɛ ni laɲinita tigitigiw ye?

¹¹ Kɛ ni laɲinita tigitigiw ye. N’i be ni laɲinita tigitigiw ye, a bena nɔgɔya i ma k’u dafa. Ɲɛyirali fɛ, n’a sɔrɔ i y’a latigɛ ka to ka Bibulu kalan siɲɛ caaman. Nka, ni porogramu tigitigi dɔ t’i fɛ, i ye min latigɛ, n’a sɔrɔ i tɛna se k’o kɛ. * Diinan mɔgɔkɔrɔw be se k’a latigɛ ka to ka taga bɔ balimaw ye walisa k’u jija. Nka wagati damanin o kɔ, u bele m’a daminɛ k’o kɛ. Walisa k’u ka desizɔn labato, u ka ɲi k’u yɛrɛ ɲininga ko: “Yala an y’a latigɛ an bena taga bɔ balima minw ye wa? An bena taga bɔ u ye tuma min na tigitigi, yala an y’o latigɛ wa?”

12. N’a sɔrɔ a ka ɲi an ka mun lo kɛ ani mun na?

¹² I seko daan lɔn. An b’a fɛ ka fɛɛn minw kɛ, an si tɛ ni wagati, setigiya ani fanga ye k’u bɛɛ kɛ. O kama, i seko daan lɔn ani koow kɛ k’a dama kɛɲɛ. N’i y’a ye ko i tɛna se k’i ka desizɔn dɔ dafa, n’a bɛnnin lo, n’a sɔrɔ a ka ɲi i k’a yɛlɛma (Waaj. 3:6). Miiri k’a filɛ: I y’i ka desizɔn dɔ sɛgɛsɛgɛ, i ye yɛlɛmani don a la ani sisan i y’a ye ko i be se k’a dafa. An ka koo duuru lajɛ minw be se k’i dɛmɛ k’o kɛ.

13. I mako be fanga min na walisa k’i ka desizɔn labato, i be se k’o sɔrɔ cogo di?

¹³ Jehova deli a ka fanga d’i ma i k’i ka desizɔn labato. I ye min latigɛ, a be se k’o “kɛ see” d’i ma (Filip. 2:13). O la, Jehova deli a k’a ka hakili senu d’i ma walisa i mako be fanga min na, i k’o sɔrɔ. Hali n’a b’i ɲɛɛ na ko i ka delili ma jaabi fɔlɔ, to ka delili kɛ. Yezu y’a fɔ ko an ka to ka ‘daariri kɛ, [hakili senu] bɛna di an ma.’​—Luka 11:9, 13, Biblu Ala ta Kuma.

14. Sariyakolo min be sɔrɔ Talenw 21:5 kɔnɔ, o be se k’i dɛmɛ cogo di i k’i ka desizɔn labato?

¹⁴ Porogramu kɛ (Talenw 21:5 kalan). I ye koo o koo daminɛ, walisa k’o laban, i ka ɲi ka porogramu kɛ. O kɔ, i ka ɲi ka koow kɛ ka kɛɲɛ n’o porogramu ye. O cogo kelen na, n’i ye koo dɔ latigɛ, i mako be fɛɛn o fɛɛn na walisa k’o kɛ, o sɛbɛ. Ni baaraba dɔ b’i fɛ, a tilantilan. N’i tilara u dɔ la, i bena a ye i ye baara hakɛ min kɛ. Pol ye Korɛntikaw jija ko u ka wari dɔ bila gɛrɛfɛ “lɔgɔkun loon fɔlɔ bɛɛ.” A ko u kana kɔnɔni kɛ ale natuma na ka sɔrɔ ka bolomafaraw minɛ (1 Kor. 16:2). N’i ye baaraba dɔ tilantilan, i tɛna a miiri ko i tɛ se k’a kɛ.

15. N’i y’a latigɛ i ka ɲi ka koo minw kɛ, i be se ka mun lo kɛ o kɔ?

¹⁵ I y’a latigɛ ka koo minw kɛ, o sɛbɛ. O la, a bena nɔgɔya i ma k’o koow kɛ (1 Kor. 14:40). Ɲɛyirali fɛ, a ɲinina diinan mɔgɔkɔrɔw jɛnkulu fɛ, u ka mɔgɔ kelen sugandi u cɛma walisa u ye min o  min latigɛ, a k’o sɛbɛ. U ye min latigɛ, mɔgɔ min ka ɲi k’o kɛ ani o ka ɲi ka ban tuma min na, o fana ka ɲi ka sɛbɛ. Ni diinan mɔgɔkɔrɔw b’o cikan labato, u ye min latigɛ, a ka nɔgɔ u fɛ k’o kɛ (1 Kor. 9:26). I be se k’o ɲɔgɔn kɛ. Ɲɛyirali fɛ, i ka ɲi ka min kɛ loon o loon, i be se k’o sɛbɛ. I ka ɲi ka fɛɛn fɔlɔ min kɛ, o sɛbɛ sanfɛ. O la, i ye min daminɛ, a bena nɔgɔya i ma k’o laban ani i bena se ka fɛɛn caaman kɛ wagati kunkurunin kɔnɔ.

16. I ye min latigɛ, walisa k’o laban, i ka ɲi ka mun lo kɛ? Ɔrɔmukaw 12:11 b’o yira ka gwɛ cogo di?

¹⁶ I jija. I ye porogramu min kɛ, walisa ka tugu o kɔ ani i ye min latigɛ walisa k’o laban, i ka ɲi ka jijaliw kɛ (Ɔrɔmukaw 12:11 kalan). Pol y’a fɔ Timote ye ko a ka to k’a “jija” ani a ka banba k’a ka mɔgɔw kalancogo fisaya. An b’a fɛ ka koo o koo kɛ Jehova ye, an be se ka Pol ka ladiliw sira tagama.​—1 Tim. 4:13, 16.

17. An ye min latigɛ, ladili min be sɔrɔ Efɛzikaw 5:15, 16 kɔnɔ, o be se k’an dɛmɛ cogo di k’o dafa?

¹⁷ Baara ɲuman kɛ n’i ka wagati ye (Efɛzikaw 5:15, 16 kalan). I b’a fɛ ka min kɛ, wagati latigɛ o kama ani kana o wagati yɛlɛma. Kana a fɔ ko i be wagati ɲuman lo kɔnɔna ka sɔrɔ k’o kɛ. N’a sɔrɔ i tɛna o wagati ɲɔgɔn sɔrɔ ka ye (Waaj. 11:4). Koo minw kɔrɔtanin tɛ kosɔbɛ, kana a to u k’i ka wagati bɛɛ ta ani u k’i sɛgɛn. N’o tɛ, koo minw kɔrɔtanin lo kosɔbɛ, i tɛna se k’olu kɛ (Filip. 1:10). N’i be se, a latigɛ k’u kɛ tuma min na mɔgɔ si tɛna i degun. A fɔ tɔɔw ye ko i b’a fɛ k’i kuun bɛɛ don i ka baara la. I ka telefɔni faga ani i ka e-mail ni rezo sosiyow lajɛ kɔfɛ. *

18-19. I ye min latigɛ, mun lo be se k’i dɛmɛ i k’a ɲini k’o dafa hali n’a man nɔgɔ?

¹⁸ I ka desizɔn nafa bena kɛ min ye, miiri o la. N’i ye desizɔn ta, a be komi i be tagara voyazi la. I ka desizɔnw nafa be komi i be tagara yɔrɔ min na. N’i b’a fɛ sɔbɛ la ka se i tagayɔrɔ la, hali n’u ye sira datugu, i bena sira wɛrɛ ta walisa ka se yen. O cogo kelen na, n’an be to ka miiri an ka desizɔnw nafa la, an tɛna an fari faga joona n’an ye gwɛlɛyaw sɔrɔ.​—Gal. 6:9.

¹⁹ A man nɔgɔ ka desizɔn ɲumanw ta. Walisa k’u dafa, o fana tɛ kɔlɔkɔlɔko ye. Nka, Jehova ka dɛmɛ barika la, i ye min latigɛ, i mako be hakilitigiya ni fanga min na walisa k’o dafa, i be se k’o sɔrɔ.