1. Dusukasiko jumanw lo be Jehova sagokɛla kantigi caaman kan?

DUNIƝA kuru bɛɛ kɔnɔ, tɔɔrɔ ani dusukasi be Jehova sagokɛla caaman kan. I m’o kɔrɔsi i ka kafo kɔnɔ wa? Bana jugu be balima dɔw la wala u ka mɔgɔ sɔbɛ dɔ sara. Dɔw fana dusu kasinin lo kosɔbɛ sabu u somɔgɔ wala u teri sɔbɛ dɔ ye tiɲɛn sira bila. Dɔ wɛrɛw tɔɔrɔnin lo balawokow kosɔn. O balimaw bɛɛ mako be dususalo la. An be se k’u dɛmɛ cogo di?

2. Mun na ciden Pol mako tun be dususalo la tuma dɔw la?

² Ciden Pol ye gwɛlɛya caaman sɔrɔ minw y’a niin bila farati la (2 Kor. 11:23-28). “Ŋɔni dɔ” fana tun b’a farikolo la, a tun ka ɲi k’o min muɲu. N’a sɔrɔ o ŋɔni tun ye bana dɔ lo ye (2 Kor. 12:7, Bible senuma). Demasi tun be baara kɛ ni Pol ye. Nka, a faranna Pol la “bari a ye diɲɛ kanu ka tɛmɛ.” O koo ye Pol dusu kasi (2 Tim. 4:10). Pol tun ye kerecɛn mɔlen ye ani a jaa tun ka gwɛlɛ. A tun labilanin lo ka tɔɔw dɛmɛ, nka tuma dɔw la, ale yɛrɛ fari fagara.​—Ɔrɔm. 9:1, 2.

3. Jehova ye Pol dɛmɛ ani k’a dusu saalo cogo di?

³ Ciden Pol mako tun be dɛmɛ ni dususalo min na, a y’o sɔrɔ. Cogo di do? Siga t’a la, Jehova tɛmɛna a ka hakili senu fɛ ka barika don Pol la (2 Kor. 4:7; Filip. 4:13, NW). Jehova tɛmɛna a kerecɛnɲɔgɔnw fɛ fana k’a dusu saalo. Pol ko a balima dɔw y’ale “jigi tugulaw” ye  (Kɔlɔs. 4:11). A y’o balima minw tɔgɔ fɔ, u dɔw ye Arisitaraki, Tisiki ani Mariki ye. U ye Pol barika bonya u kɛtɔ k’a dɛmɛ a y’a ka gwɛlɛyaw muɲu. Jogo jumanw lo y’o kerecɛn saba dɛmɛ u kɛra dususalobaga ɲumanw ye? An be se k’u ka ɲɛyirali ladegi cogo di n’an b’an jijara ka ɲɔgɔn dɛmɛ ani ka ɲɔgɔn dusu saalo?

4. Arisitaraki y’a yira cogo di ko a ye Pol teri sɔbɛ ye?

⁴ Arisitaraki tun ye Tesaloniki kerecɛn dɔ ye ani Pol teri sɔbɛ tun lo. Tesaloniki dugu be Maseduwani mara la. Pol ka voyazi 3nan na a ka misɔndenya baara sen fɛ, a tagara Efɛzi dugu la. O wagati lo la Bibulu kumana Arisitaraki koo la a siɲɛ fɔlɔ la. Jama ye Arisitaraki minɛ ka taga n’a ye (Kɛw. 19:29). Tuma min na u y’a bila, a ma boli ka Pol to yen walisa k’a niin kisi. Nka, a tora ni Pol ye kantigiya la. Kalo damanin o kɔ, Pol juguw tun b’a ɲinina k’a faga Gɛrɛsi mara la. O n’a ta bɛɛ, Arisitaraki tora n’a ye (Kɛw. 20:2-4). Saan 58 fan fɛ Krista tile la (K.T.L.), Pol tun ye kasoden ye ani u y’a bila ka taga Ɔrɔmu. Arisitaraki y’a bila sira o tagamajan na ani u tagatɔ, kurun tiɲɛna n’u ye (Kɛw. 27:1, 2, 41). Tuma min na u sera Ɔrɔmu, a be komi a ye wagati dɔ kɛ ni Pol ye kaso la (Kɔlɔs. 4:10). A tɛ bari an na k’a ye k’o teri sɔbɛ ye Pol dusu saalo!

5. Ka kɛɲɛ ni Talenw 17:17 ye, an be se ka kɛ teri sɔbɛ ye tɔɔw fɛ cogo di?

⁵ I ko Arisitaraki, an be se ka kɛ teri sɔbɛ ye an balimaw fɛ, n’an be to n’u ye wagati ɲumanw ani “waatigwɛlɛnw” na (Talenw 17:17 kalan). Ni gwɛlɛya b’an balima dɔ kan, a mako be se ka kɛ dususalo la, hali wagatijan o gwɛlɛya tɛmɛnin kɔ. kansɛri bana ye Frances * bangebaga fila bɛɛ faga. A facɛ lo kɔnna ka sa ani kalo saba o kɔ, a bamuso fana sara. Frances ko: “Ne ka miiri la, ni kɔrɔbɔliba y’an sɔrɔ, o b’an tɔɔrɔ wagatijan kɔnɔ. Hali ni n’ bangebagaw sara a wagati mɛɛnna, n’ teri sɔbɛ minw tɛ ɲinɛ ko n’ bele be tɔɔrɔla, n’ b’olu waleɲuman lɔn kosɔbɛ.”

6. Kantigiya b’an lasun ka mun lo kɛ?

 ⁶ Teri kantigiw be jijalibaw kɛ walisa k’u balimaw dɛmɛ. Ɲɛyirali fɛ, balimacɛ dɔ tɔgɔ ko Peter ani dɔgɔtɔrɔ y’a fɔ a ye ko bana dɔ b’a la. A ko yanni dɔɔni, o bana bena juguya ani k’a faga. A muso Kathryn y’a fɔ ko: “An ka kafo balimacɛ dɔ n’a muso lo tun tagara n’an ye dɔgɔtɔrɔso tuma min na dɔgɔtɔrɔ y’a fɔ ko Peter man kɛnɛ. U sinna k’a latigɛ ko u tɛna an to an kelen o wagati gwɛlɛ na. An mako tun b’u la tuma o tuma, u tun be yen.” N’an be ni teri sɔbɛw ye minw be se k’an dɛmɛ ka gwɛlɛyaw muɲu, o b’an dusu saalo yɛrɛ le!

7-8. Ka kɛɲɛ ni Kɔlɔsikaw 4:7-9 ka fɔta ye, Tisiki y’a yira cogo di ko a ye lannamɔgɔ ye?

⁷ Tisiki tun ye kerecɛn ye ani a tun be bɔ Azi mara la. Pol tun lanin b’a la kosɔbɛ (Kɛw. 20:4). Saan 55 fan fɛ K.T.L., Pol ye labɛn kɛ walisa ka bolomafaraw lajɛn janko Zude mara balimaw ka dɛmɛ sɔrɔ. N’a sɔrɔ a y’a to Tisiki ye dɛmɛ don o baaraba la (2 Kor. 8:18-20). Kɔfɛ, tuma min na Pol tun be kaso la Ɔrɔmu a siɲɛ fɔlɔ la, Tisiki tun y’a ka ciraden ye. A tun be Pol ka lɛtɛrɛw n’a ka jijali kumaw ci kafow ma Azi mara la.​—Kɔlɔs. 4:7-9.

⁸ Pol tun be se ka la Tisiki la tuma bɛɛ (Titi 3:12). U ka wagati la, kerecɛnw bɛɛ tun tɛ lannamɔgɔw ye i ko Tisiki. Saan 65 fan fɛ K.T.L., Pol tun be kaso la a siɲɛ filanan na. A y’a sɛbɛ ko Azi mara la, kerecɛn caaman tun be ban ka jɛnɲɔgɔnya kɛ n’ale ye. N’a sɔrɔ u tun be siran Pol kɛlɛbagaw lo ɲɛ (2 Tim. 1:15). Nka, Pol tun be se k’a jigi la Tisiki kan ani a yɛrɛ ye kunkanbaara wɛrɛ kalifa a ma (2 Tim. 4:12). Siga t’a la, a tun ka di Pol ye kosɔbɛ ka kɛ ni teri sɔbɛ ye i ko Tisiki.

9. An be se ka Tisiki ladegi cogo di?

⁹ An be se ka Tisiki ladegi an kɛtɔ ka kɛ  teri sɔbɛ ye tɔɔw fɛ. Ɲɛyirali fɛ, an t’an daa di dɔrɔn ko an bena an balimaw dɛmɛ gwɛlɛyaw wagati la. An be koo tigitigi dɔw kɛ fana walisa k’u dɛmɛ (Mat. 5:37; Luka 16:10). Mɔgɔ minw mako be dɛmɛ na, n’u y’a lɔn ko an bena u dɛmɛ, o b’u dusu saalo kosɔbɛ. Balimamuso dɔ y’o ɲɛfɔ ko: “I hakili siginin lo sabu i b’a lɔn ko mɔgɔ min ko a bena i dɛmɛ, ale bena o kɛ wagati latigɛnin na.”

10. Ka kɛɲɛ ni Talenw 18:24 ye, gwɛlɛya wala dusukasi be minw kan, olu be se ka dususalo sɔrɔ min?

¹⁰ Gwɛlɛya wala dusukasi be minw kan, olu ka teli ka dususalo sɔrɔ n’u b’u dusukunnakow fɔ u teri sɔbɛ dɔ ye (Talenw 18:24 kalan). Bijay dusu kasira kosɔbɛ sabu a dencɛ gwɛnna ka bɔ kafo kɔnɔ. A ko: “N’ mako tun b’a la ka n’ dusukunnakow fɔ n’ lannamɔgɔ dɔ ye.” Carlos bɔnɛna kunkanbaara dɔ la kafo kɔnɔ sabu a ye fili dɔ kɛ. O kunkanbaara tun ka di a ye kosɔbɛ. A ko: “N’ mako tun b’a la ka n’ dusukunnakow fɔ lannamɔgɔ dɔ ye min tɛna n’ jalaki.” A y’o dɛmɛ sɔrɔ diinan mɔgɔkɔrɔw fɛ. U y’a dɛmɛ ka see sɔrɔ a ka gwɛlɛya kan. A ye min fɔ diinan mɔgɔkɔrɔw ye, k’a lɔn k’u tɛna o wangola, o y’a dusu saalo.

11. An be se ka kɛ teri sɔbɛ ye cogo di?

¹¹ Walisa ka kɛ teri sɔbɛ ye, fɔɔ an ka muɲu. Tuma min na Zhanna cɛɛ tagara k’a to yen, a ye dususalo sɔrɔ a kɛtɔ k’a dusukunnakow fɔ a teri sɔbɛw ye. A ko: “U y’u dusu suma ka n’ lamɛn hali k’a sɔrɔ n’ tun be segira kuma kelen lo kan siɲɛ caaman.” Ele fana be se ka kɛ teri ɲuman ye n’i be lamɛnni kɛ koɲuman.

12. Mariki tun ye jɔn lo ye ani a y’a yira cogo di ko a b’a fɛ ka baara kɛ tɔɔw ye?

¹² Mariki tun ye kerecɛn ye ani Yahutu tun lo ka bɔ Zeruzalɛmu. A somɔgɔ Barinabasi tun ye misɔnden ye ani a tun lɔnnin lo kosɔbɛ (Kɔlɔs. 4:10). A be komi Mariki somɔgɔw tun ye waritigiw ye. O n’a t’a bɛɛ, bololafɛnw tun t’a ɲɛnako fɔlɔ ye. A ka ɲɛnamaya kuru bɛɛ la, a y’a yɛrɛ di ka tɔɔw dɛmɛ. A tun ka di a ye ka baara kɛ tɔɔw ye. Ɲɛyirali fɛ, siɲɛ caaman na, a ye ciden Pol ani ciden Piyɛri dɛmɛ u ka baara la. N’a sɔrɔ, a y’u dɛmɛ k’u makoɲɛfɛnw sɔrɔ (Kɛw. 13:2-5; 1 Piyɛri 5:13). Pol ko Mariki ye ‘baara kɛ n’ale ye yan Ala ka Masaya kosɔn’ ani ko a y’ale ‘jigi tugula’ dɔ ye.​—Kɔlɔs. 4:10, 11.

13. Mariki ye baara min kɛ kantigiya la, 2 Timote 4:11 b’a yira cogo di k’o diyara Pol ye?

¹³ Mariki kɛra Pol teri sɔbɛ dɔ ye. Ɲɛyirali fɛ, siɲɛ laban min na Pol tun be kaso la Ɔrɔmu saan 65 fan fɛ K.T.L., a y’a ka bataki filanan sɛbɛ Timote ma. O bataki kɔnɔ, a y’a ɲini Timote fɛ a ka na Ɔrɔmu ani a ka na ni Mariki ye (2 Tim. 4:11). Siga t’a la, Mariki tun ye baara min kɛ kantigiya la, o diyara Pol ye. O kama, a tun b’a fɛ Mariki ka kɛ n’ale ye o wagati gwɛlɛw na. Mariki ye Pol dɛmɛ cogo nafamanw na. N’a sɔrɔ a ye dumuni wala sɛbɛrikɛminanw di a ma. Pol ye dɛmɛ ani jijali minw sɔrɔ, siga t’a la, o kɛra sababu ye a ye muɲuli kɛ loon minw kɔnna a fagatuma ɲɛ.

14-15. An be se ka tɔɔw dɛmɛ cogo tigitigi minw na, Matiyo 7:12 b’an dɛmɛ ka mun lo faamu o koo la?

¹⁴ Matiyo 7:12 kalan. Wagati gwɛlɛw na, a ka di an ye ni mɔgɔw b’an dɛmɛ  cogo tigitigi dɔw la. Ryan facɛ barila ka sa aksidan dɔ la. Ryan ko: “N’i be tɔɔrɔla, i tun be to ka koo minw kɛ loon o loon, i tɛ se k’u caaman kɛ tugun. Ni mɔgɔ dɔ ye koo dɔ kɛ k’i dɛmɛ, hali ni koo dennin lo, o b’i dusu saalo kosɔbɛ.”

¹⁵ N’an be kɔrɔsili kɛ, siga t’a la, an bena a lɔn an be se ka tɔɔw dɛmɛ cogo tigitigi minw na. Ɲɛyirali fɛ, Peter ni Kathryn minw kofɔra ka tɛmɛ, olu si tun tɛ se ka mobili boli tugun. Tuma o tuma n’u tun ka ɲi ka taga dɔgɔtɔrɔso, balimamuso dɔ tun y’a latigɛ k’u dɛmɛ. A ye labɛn kɛ walisa kafo balima minw y’u yɛrɛ di k’o balimaw dɛmɛ, olu ka to ka taga n’u ye. Yala o labɛn ye Peter ni Kathryn nafa wa? Kathryn ko: “A kɛra i n’a fɔ donnin dɔ lo tun bɔra an kuun na.” A to i hakili la tuma bɛɛ ko hali n’i be koo den-denninw lo kɛ ka tɔɔw dɛmɛ, i be se k’u dusu saalo kosɔbɛ.

16. An be kalan juman lo sɔrɔ Mariki fɛ dususalo koo la?

¹⁶ N’a sɔrɔ Yezu ka kalanden Mariki bolo tun degunnin lo kosɔbɛ. Koo caaman tun b’a fɛ ka kɛ Jehova ka baara la i n’a fɔ ka Evanzili sɛbɛ, a tɔgɔ lara min kan. O n’a ta bɛɛ, Mariki ye wagati ta ka Pol dusu saalo ani Pol tun b’a lɔn ko a tun be se ka dɛmɛ ɲini a fɛ. Tuma min na u ye balimamuso Angela somɔgɔ dɔ faga, mɔgɔ dɔw y’a dusu saalo. Angela b’u waleɲuman lɔn kosɔbɛ o kosɔn. A ko: “N’i teriw b’a fɛ k’i dɛmɛ sɔbɛ la, a ka nɔgɔ ka kuma u fɛ. I b’a ye ko u b’a fɛ k’i dɛmɛ ani ko u tɛ siran k’o kɛ.” An be se k’an yɛrɛ ɲininga ko: “Yala n’ ka teli ka n’ kerecɛnɲɔgɔnw dusu saalo cogo tigitigi dɔw la wa?”

17. N’an be miiri 2 Korɛntikaw 1:3, 4 kɔnɔnakumaw na, o b’an lasun cogo di ka tɔɔw dusu saalo?

¹⁷ A ka nɔgɔ ka balimaw sɔrɔ minw mako be dususalo la. Mɔgɔw ye dususalo kuma minw fɔ an ye, an be se k’o fɔ tɔɔw ye fana. Balimamuso Nino  mamamuso sara. A ko: “Jehova be se ka tɛmɛ an fɛ ka tɔɔw dusu saalo n’an b’a to a k’o kɛ.” (2 Korɛntikaw 1:3, 4 kalan). Frances min kofɔra ka tɛmɛ, ale ko: “2 Korɛntikaw 1:4 ka kumaw ye tiɲɛn ye. Mɔgɔw ye dususalo kuma minw fɔ an ye, an be se ka tɔɔw dusu saalo n’u ye.”

18. a) Mun na dɔw be se ka siran ka tɔɔw dusu saalo? b) An be se ka tɔɔw dusu saalo sɔbɛ la cogo di? Ɲɛyirali dɔ fɔ.

¹⁸ Hali n’an be siran, a ka ɲi an ka sababuw ɲini ka tɔɔw dusu saalo. Ɲɛyirali fɛ, n’a sɔrɔ an be siran ko an tɛna a lɔn an ka ɲi ka min fɔ wala ka min kɛ dusukasibagatɔ dɔ ye. Balimacɛ Paul ye diinan mɔgɔkɔrɔ ye. A hakili b’a la tɔɔw ye jijali minw kɛ walisa k’a dusu saalo a facɛ sanin kɔ. A ko: “A tun man nɔgɔ u ma ka kuma n’ fɛ. Hali n’u tun t’a lɔn u bena min fɔ, u tun b’a fɛ sɔbɛ la ka n’ dusu saalo ani ka n’ dɛmɛ. O diyara n’ ye kosɔbɛ.” Dugukoloyɛrɛyɛrɛba dɔ kɛra balimacɛ Tajon ka yɔrɔ la. A ko: “Tiɲɛn na, loon minw tugura o dugukoloyɛrɛyɛrɛ kɔ, mɔgɔw ye sms, lɛtɛrɛw wala e-mail minw ci n’ ma, n’ hakili t’u bɛɛ la. Nka, n’ hakili be min na, o ye k’u b’u janto n’ na. O lo kama u y’u mako don n’ na.” An be se ka kɛ dususalobaga ɲumanw ye n’an b’a yira ko an b’an janto tɔɔw la.

19. Mun na i jijanin lo ka kɛ tɔɔw ‘jigi tugula’ ye?

¹⁹ Duniɲa nin laban wagati surunyana. O kama, koow bena to ka juguya ka taga ani duniɲa bena to ka gwɛlɛya (2 Tim. 3:13). An mako be dususalo la tuma bɛɛ fana sabu an ye mɔgɔ dafabaliw ye ani an be to ka filiw kɛ. Fɛɛn minw ye ciden Pol dɛmɛ a tora kantigiya la fɔɔ ka taga se a saya ma, u dɔ ye ko a kerecɛnɲɔgɔnw y’a dusu saalo. An k’an jija ka kɛ kantigi ye i ko Arisitaraki, ka kɛ lannamɔgɔ ye i ko Tisiki ani ka sɔn ka baara kɛ tɔɔw ye i ko Mariki. O la, an bena se k’an balimaw dɛmɛ u ka to kantigiya la.​—1 Tes. 3:2, 3.