1. Jehova Seere saba minw kofɔra, olu y’a yira cogo di k’u masirinin lo kosɔbɛ Jehova la?

MIIRI koo saba nunu na minw ye Jehova Seere dɔw sɔrɔ. 1) Sungurunin dɔ tun be klasi la loon dɔ ani a ka kalanfa y’a ɲini klasidenw bɛɛ fɛ u k’u niin don ngalon diinanw ka fɛti dɔ la. O sungurunin tun b’a lɔn k’o fɛti man di Ala ye minkɛ, a y’a ɲɛfɔ ni bonya ye ko ale tɛna a seen don o fɛti la. 2) Kuma man di kanbelenin dɔ ye. Loon dɔ, a tun be waajuli kɛra soo ni soo ani a y’a ye ko a be nana don luu min kɔnɔ, a ka klasiden dɔ ka soo lo. O klasiden delila ka Jehova Seerew lɔgɔbɔ. O bɛɛ n’a ta, kanbelenin donna ka waajuli kɛ yen. 3) Cɛɛ dɔ b’a seko bɛɛ kɛra a ka baara la walisa k’a ka denbaya mako wasa. Loon dɔ, a ka patɔrɔn y’a fɔ a ye ko a ka nanbarako dɔ kɛ wala ko a ka sariya tiɲɛ. O cɛɛ y’a ɲɛfɔ ko ale ka ɲi ka kɛ hɔɔrɔn ye ani ka sariyaw labato sabu Ala b’o lo ɲini a sagokɛlaw fɛ. A y’o ɲɛfɔ hali k’a sɔrɔ a ka baara tun be se ka tiɲɛ o kosɔn.—Ɔrɔm. 13:1-4; Eburuw 13:18.

2. An bena ɲiningali jumanw lo lajɛ ani mun na?

² Jogo juman lo b’o mɔgɔ saba nunu na? N’a sɔrɔ i y’a kɔrɔsi k’u jaa ka gwɛlɛ ani u ye hɔɔrɔnw ye. U saba bɛɛ y’a yira fana k’u be ni jogo dɔ ye min kɔrɔtanin lo kosɔbɛ. O ye kantigiya lo ye. U kelen kelen bɛɛ ye kantigiya kɛ Jehova ye. U banna ka Jehova ka sariyaw tiɲɛ. Kantigiya lo y’u lasun ka koow kɛ o cogo la. Siga t’a la, Jehova dusu ka di u kelen kelen bɛɛ kɔrɔ. An fana b’a fɛ k’an sankolola Faa dusu diya. O la, an ka ɲiningali nunu lajɛ: Kantigiya kɔrɔ ko di? Mun na an mako be kantigiya la? An be se k’an jija ka to kantigiya la cogo di wagati gwɛlɛ nunu na?

3. a) Kantigiya kɔrɔ ko di? b) Ɲɛyirali jumanw lo be se k’an dɛmɛ ka kantigiya kɔrɔ faamu?

³ Jehova sagokɛlaw b’a yira cogo di k’u ye kantigiw ye? U b’o yira n’u be Jehova kanu n’u dusu bɛɛ ye ani  n’u b’u masiri a la kosɔbɛ. O kanuya lo b’u lasun ka Jehova sago kɛ tuma bɛɛ. Bibulu kɔnɔ, eburukan kumaden min bayɛlɛmana ko “kantigiya,” o kɔrɔ ko fɛɛn dafanin wala fiɲɛ si tɛ min na. Ɲɛyirali fɛ, sariya tun b’a ɲini Israɛldenw fɛ u ka bɛgɛn minw saraka Jehova ye, fiɲɛ si * tun man ɲi ka kɛ u la (Lev. 22:21, 22). Bɛgɛn minw seen kelen, ɲɛɛ kelen wala tulo kelen man ɲi, u tun man kan k’olu bɔ saraka ye. U tun man kan ka na ni bɛgɛn banabagatɔw ye fana. A tun kɔrɔtanin lo Jehova fɛ o bɛgɛnw ka kɛ bɛgɛn dafaninw ye, fiɲɛ si kana sɔrɔ u la (Mal. 1:6-9). An b’a faamu fɛɛn min kama o tun kɔrɔtanin lo Jehova fɛ. N’an be gafe wala minan dɔ sanna, min farannin lo wala min tiɲɛnin lo, an t’o fɛ. An b’a fɛ a ka dafa ani fiɲɛ si kana sɔrɔ a la. O cogo kelen na, Jehova b’a fɛ an k’ale kanu ani ka kantigiya kɛ a ye n’an dusu bɛɛ ye.

4. a) Mun na mɔgɔ dafabali be se ka to kantigiya la? b) Ka kɛɲɛ ni Zaburuw 103:12-14 ye, Jehova be mun lo ɲini an fɛ?

⁴ Yala o kɔrɔ ko walisa ka kantigiya kɛ, fɔɔ an ka kɛ mɔgɔ dafaninw ye wa? N’a sɔrɔ an b’a jati ko an ka jurumuw ka ca kojugu. O kama, an be se k’a miiri ko an tɛna se ka kantigiya kɛ abada. An ka koo fila lajɛ minw b’an hakili sigi. A fɔlɔ, an k’a lɔn ko Jehova tɛ sinsin an ka filiw lo kan. A ka Kuma b’a fɔ an ye ko: “N’i tun ko i be kojuguw jati minɛ, jɔn tun bena se ka to yen?” (Zab. 130:3). Jehova b’a lɔn ko an ye mɔgɔ dafabaliw ni jurumutɔw ye. O bɛɛ n’a ta, a be yafa an ma siɲɛ caaman (Zab. 86:5). A filanan, a b’a lɔn ko an tɛ se ka koo dɔw kɛ. O kama an tɛ se min na, a t’o ɲini an fɛ (Zaburuw 103:12-14 kalan). O la, cogo juman na an be se ka kɛ mɔgɔ dafaninw ye Jehova ɲɛɛ kɔrɔ?

5. Mun na Jehova sagokɛlaw ka ɲi k’a kanu kosɔbɛ walisa ka to kantigiya la?

⁵ Walisa ka to kantigiya la, fɔɔ Jehova sagokɛlaw k’a kanu kosɔbɛ. An ka ɲi k’an sankolola Faa kanu ani ka kantigiya kɛ a ye n’an dusu bɛɛ ye. N’an b’a kanu o cogo la, an bena kantigiya kɛ a ye kɔrɔbɔliw bɛɛ n’a ta (1 Til. Kib. 28:9; Mat. 22:37). An ye balima saba minw kofɔ barokun daminɛ na, an k’olu ka koo lajɛ. Mun na u ye koow kɛ o cogo la do? Sungurunin min kofɔra, yala a man di ale ye ka ɲɛnagwɛ lakɔliso la wa? Kanbelenin min be waajuli kɛra, yala a ka di ale ye mɔgɔw k’a lɔgɔbɔ wa? An kumana sotigi min koo la, yala ale b’a fɛ u k’a gwɛn a ka baara la wa? Ayi, o tɛ. U b’a lɔn ko Jehova ka sariyaw tilennin lo ani u b’a fɛ sɔbɛ la k’u koo diya u sankolola Faa ye. Komi u be Jehova kanu, u be miiri a koo la ka sɔrɔ ka desizɔnw ta. O cogo la, u b’a yira k’u ye mɔgɔ kantigiw ye.

6. a) Mun na an mako be kantigiya la? b) Mun lo b’a yira ko Adama ni Awa tun tɛ kantigiw ye?

⁶ Mun na an kelen kelen bɛɛ mako be kantigiya la? I mako be kantigiya la sabu Sutana ye Jehova ni ele fana jalaki. Kabi Edɛn nankɔ la, o mɛlɛkɛ murutinin y’a yɛrɛ kɛ Sutana, wala “Kɛlɛbaga” ye. A y’a ɲini ka Jehova tɔgɔ tiɲɛ. A y’a fɔ ko Jehova tɛ Kuntigi ɲuman ye, ko a be miiri a yɛrɛ nafa dɔrɔn lo la ani ko a tɛ hɔɔrɔn ye. A fɔ man di nka, Adama ni Awa farala Sutana kan ka muruti  Jehova ma (Zɛnɛzi 3:1-6). U ye sababu ɲuman caaman sɔrɔ Edɛn nankɔ kɔnɔ k’u ka kanuya barika bonya Jehova koo la. Nka tuma min na Sutana y’u kɔrɔbɔ, u y’a yira ko u tun tɛ Jehova kanu n’u dusu bɛɛ ye. Sɔsɔliko dɔ lawulila min tun ka ɲi ka ɲɛnabɔ kɔfɛ: Yala adamadenw bena to ka kantigiya kɛ Jehova ye sabu u b’a kanu wa? O kɔrɔ, yala adamadenw be se ka kantigiya kɛ wa? Sutana y’o sɔsɔliko bɔ kɛnɛ kan Zɔbu ka wagati la.

7. Ka kɛɲɛ ni Zɔbu 1:8-11 ye, Jehova tun be mun lo miiri Zɔbu ka kantigiya koo la? Nka Sutana tun be mun lo miiri?

⁷ Zɔbu ye ɲɛnamaya kɛ tuma min na Israɛldenw tun be Ezipiti. A ka kantigiya ɲɔgɔn tun tɛ yen. Ale fana tun dafanin tɛ i ko anw ani a tun be fili. Nka Zɔbu ka kantigiya kosɔn, a koo tun ka di Jehova ye. A be komi Sutana tun ye Jehova sɔsɔ ka ban adamadenw ka kantigiya koo la kabi Edɛn nankɔtu la. O lo kama Jehova ye Zɔbu ka kantigiya kofɔ Sutana ye. Zɔbu ka kantigiya tun b’a yira ka gwɛ ko Sutana ye ngalontigɛla ye! Sutana y’a ɲini Jehova fɛ a k’a to ale be Zɔbu ka kantigiya kɔrɔbɔ. Jehova sɔnna o ma sabu a tun lanin b’a tericɛ Zɔbu la.—Zɔbu 1:8-11 kalan.

8. Sutana ye Zɔbu kɔrɔbɔ cogo di?

⁸ Sutana ka fari ani mɔgɔfagala lo. A ye Zɔbu bololafɛnw n’a ka nafolo halaki, k’a ka baaradenw faga ani k’a tɔgɔ tiɲɛ. Sutana wulila Zɔbu ka denbaya kama k’a deen kanulen 10 faga. O kɔ, a ye bana jugu dɔ bila Zɔbu la. A fari bɛɛ kɛra joli ye, k’a ta a sentɛgɛ la fɔɔ ka se a kuncɛ ma. Zɔbu muso dusu kasira kosɔbɛ ani a  hakili ɲagamina. O kosɔn, a y’a fɔ a cɛɛ ye ko a ka kantigiya be mun ɲɛ a ye ani ko a ka Ala nɛni ka sa. Zɔbu yɛrɛ fana tun b’a fɛ ka sa. O bɛɛ n’a ta, a tora kantigiya la. O kɔ, Sutana tɛmɛna Zɔbu tericɛ saba fɛ k’a kɔrɔbɔ cogo wɛrɛ la. O cɛɛw nana tile caaman kɛ ni Zɔbu ye. Nka sanni u k’a dusu saalo, u y’a jalaki ni kuma gwɛlɛw ye. U y’a fɔ ko Zɔbu ka tɔɔrɔw ye Ala nɔɔ lo ye ani ko Ala mako t’a ka kantigiya la. U yɛrɛ y’a fɔ ko Zɔbu ye mɔgɔ jugu ye ani ko tɔɔrɔba min b’a kan, a ka kan n’o ye!—Zɔbu 1:13-22; 2:7-11; 15:4, 5; 22:3-6; 25:4-6.

9. Gwɛlɛyaw bɛɛ n’a ta, Zɔbu ma sɔn ka mun lo kɛ?

⁹ Zɔbu ye mun lo kɛ o kɔrɔbɔli sen fɛ? Komi a tun dafanin tɛ, a ye kuma dɔw fɔ a nimisara minw na kɔfɛ. Ɲɛyirali fɛ, a dimina k’a dususalobaga juguw kɔrɔfɔ ani a ye hakilintanya kumaw fɔ. A y’a yɛrɛ ka tilenninya lafasa ka tɛmɛ Ala ta kan (Zɔbu 6:3; 13:4, 5; 32:2; 34:5). Nka o wagati gwɛlɛw bɛɛ n’a ta, Zɔbu ma sɔn k’a kɔɔ sin Ala ma. A ma la a teri juguw ka ngalon kumaw na. A ko: “Ala ka ne kisi jo dili ma aw ma. Ne tɛna ne ka [kantigiya] bila fo ka taa ne sa.” (Zɔbu 27:5, Bible senuma). O kumaw kɔrɔtanin lo kosɔbɛ. U b’a yira ko Zɔbu ma sɔn k’a ka kantigiya dabila. An fana be se k’o ɲɔgɔn kɛ.

10. Sutana ye sɔsɔliko min lawuli Zɔbu koo la, o ɲɛsinna ele ma cogo di?

¹⁰ Sutana ye sɔsɔliko min lawuli Zɔbu koo la, o ɲɛsinna ele ma cogo di? Sutana ko i tɛ Jehova Ala kanu sɔbɛ la ani ko n’i niin be farati la, i bena Ala sago kɛli dabila. O kuma kɔrɔ ko i tɛ kantigi ye tiɲɛn tiɲɛn na! (Zɔbu 2:4, 5; Yir. 12:10). I be mun lo miiri o koo la? Siga t’a la, o b’i kɔnɔ gwan kosɔbɛ. Nka miiri k’a filɛ: Jehova lanin b’i la kosɔbɛ. O kama, a be sababu ɲuman d’i ma. A b’a to Sutana b’i ka kantigiya kɔrɔbɔ. A lanin b’a la ko i be se ka to kantigiya la ani k’a yira ko Sutana ye ngalontigɛla ye. A ye layidu ta fana ko a bena i dɛmɛ k’o kɛ (Eburuw 13:6). Duniɲa kuru bɛɛ Masaba ka la i la o cogo la, o ye nɛɛmaba ye dɛ! I y’a faamu fɛɛn min kama kantigiya kɔrɔtanin lo wa? Kantigiya b’an dɛmɛ k’a yira ko Sutana ye ngalontigɛla ye. A b’an dɛmɛ fana ka Jehova tɔgɔ ɲuman lafasa ani k’a yira ko an sɔnna a ka kuntigiya ma. Mun lo bena an dɛmɛ ka to kantigiya la?

11. An be kalan juman lo sɔrɔ Zɔbu ka koo la?

¹¹ Sutana be Ala sagokɛlaw kɛlɛla kosɔbɛ “laban tuma” nunu na (2 Tim. 3:1). An be se k’an jija ka to kantigiya la cogo di wagati gwɛlɛ nunu na? An be se ka kalan caaman wɛrɛw sɔrɔ Zɔbu ka koo la. Wagatijan ka kɔn a ka kɔrɔbɔli ɲɛ, a tun ye kantigiya kɛ Jehova ye koo caaman na. An k’a filɛ an be se ka kalan saba minw sɔrɔ Zɔbu ka koo la. O bena an jija ka to kantigiya la.

12. a) Ka kɛɲɛ ni Zɔbu 26:7, 8, 14 ye, mun lo ye Zɔbu dɛmɛ a tora ka kabakoya Jehova koo la ani ka bonya la kan? b) Mun lo bena an dɛmɛ an ka to ka kabakoya Ala koo la?

¹² Zɔbu y’a ka kanuya barika bonya Ala koo la, a kɛtɔ ka bonya la a kan kosɔbɛ. Zɔbu ye Jehova ka danfɛn kabakomanw lajɛ wagati caaman kɔnɔ (Zɔbu 26:7, 8, 14 kalan). Tuma min na a miirila dugukolo, sankolo, sankabaw ani sanpɛrɛn koo la, a kabakoyara kosɔbɛ. A y’a faamu ko Jehova ka danfɛnw ka ca kosɔbɛ ani ko ale tɛ bɛrɛ lɔn u koo  la. A tun be Jehova ka fɔtaw jati fɛɛn nafamanbaw ye. A y’a fɔ Ala koo la ko: “A ye minw bɛɛ fɔ, ne y’o mara n kɔnɔ.” (Zɔbu 23:12). Zɔbu tun kabakoyanin lo Jehova koo la ani a tun be bonya la a kan kosɔbɛ. A Faa Jehova koo tun ka di a ye ani a tun b’a fɛ k’a dusu diya. O kama, a tun cɛsirinin lo ka to kantigiya la. An ka ɲi ka Zɔbu ladegi. An be koo caaman lɔn Jehova ka danfɛn kabakomanw koo la ka tɛmɛ Zɔbu ka wagati mɔgɔw kan. Bibulu kuturu bɛɛ b’an fɛ fana, o min b’an dɛmɛ ka Jehova lɔn ka ɲɛ. An mana koo o koo faamu Jehova koo la, o b’an kabakoya ani o b’an lasun ka bonya la a kan. O bɛɛ b’a to an b’a kanu, an be mɛnni kɛ a fɛ ani an b’a ɲini ka to kantigiya la.—Zɔbu 28:28.

13-14. a) Ka kɛɲɛ ni Zɔbu 31:1 ye, Zɔbu y’a yira cogo di ko a be mɛnni kɛ Ala fɛ? b) An be se ka Zɔbu ladegi cogo di?

¹³ Zɔbu tun be mɛnni kɛ Ala fɛ koo bɛɛ la. O lo y’a dɛmɛ ka to kantigiya la. A tun b’a lɔn ko walisa ka to kantigiya la, fɔɔ a ka mɛnni kɛ Jehova fɛ. Tiɲɛn na, an mana mɛnni kɛ Jehova fɛ koo o koo la, o b’an jija ka to kantigiya la. Zɔbu y’a jija ka mɛnni kɛ Jehova fɛ loon o loon. Ɲɛyirali fɛ, a tun b’a janto a ka kɛwalew la ni musow ye (Zɔbu 31:1 kalan). Komi a tun furunin lo, a tun b’a lɔn ko a bɛnnin tɛ a ka ɲɛbɔ muso wɛrɛ fɛ. Bi, duniɲa ka koow ka teli ka cɛnimusoko nege don mɔgɔ la. I ko Zɔbu, yala an bena ban ka ɲɛbɔ mɔgɔ wɛrɛ fɛ min t’an furuɲɔgɔn ye wa? Yala an bena ban ka porno wala jaa wɛrɛw filɛ minw be kakalayako nege don mɔgɔ la wa? (Mat. 5:28). Loon o loon, n’an tora k’an yɛrɛ minɛ o koow la, an bena an jija ka to kantigiya la.

¹⁴ Zɔbu tun be bololafɛnw jati cogo min na, o b’a yira ko a tun be mɛnni kɛ Jehova fɛ. A y’a faamu ko n’a y’a jigi la a ka bololafɛnw kan, o ye kojuguba ye min  ka kan ni ɲangili ye (Zɔbu 31:24, 25, 28). Bi, mɔgɔw be boliboli bololafɛnw lo kɔ. N’an be wari ni bololafɛnw jati ka dama kɛɲɛ i ko Bibulu b’a ɲini an fɛ cogo min na, an bena an jija ka to kantigiya la.—Talenw 30:8, 9; Mat. 6:19-21.

15. a) Mun lo ye Zɔbu dɛmɛ ka to kantigiya la? b) Jehova ye siniɲasigi ɲuman min labɛn an ye, mun na an ka ɲi k’o to an hakili la?

¹⁵ Zɔbu tun lanin b’a la ko Ala bena ale duga. O lo y’a dɛmɛ ka to kantigiya la. A tun b’a lɔn ko a ka kantigiya ka di Ala ye (Zɔbu 31:6). A ka gwɛlɛyaw bɛɛ n’a ta, a tun lanin b’a la ko a mɛɛn o mɛɛn, Jehova bena ale duga. O lo y’a dɛmɛ ka to kantigiya la. Zɔbu ka kantigiya tun ka di Jehova ye kosɔbɛ. O kama, Jehova y’a duga bɛrɛbɛrɛ a sii tɔɔ bɛɛ la! (Zɔbu 42:12-17; Zaki 5:11). Zɔbu bena duga caaman wɛrɛw sɔrɔ. Yala i lanin b’a la kosɔbɛ ko Jehova bena ele fana duga i ka kantigiya kosɔn wa? An ka Ala ma yɛlɛma (Mal. 3:6). An ka kantigiya ka di a ye kosɔbɛ. N’an y’o to an hakili la, an bena banba ka to kantigiya la ani an bena siniɲasigi ɲuman sɔrɔ.—1 Tes. 5:8, 9.

16. An ka ɲi ka banba ka mun lo kɛ?

¹⁶ Banba ka to kantigiya la! Tuma dɔw la, n’a sɔrɔ a bena kɛ i ɲɛɛ na ko ele kelen lo be kantigiya kɛra. Nka, i kelen tɛ. Duniɲa kuru bɛɛ kɔnɔ, mɔgɔ miliyɔn caaman be kantigiya kɛra fana. Galen, cɛɛ ni muso minw tun limaniyanin lo, i bena fara olu kan. Olu tora kantigiya la k’a sɔrɔ u niin tun be farati la (Eburuw 11:36-38; 12:1). An bɛɛ k’an jija ka Zɔbu ladegi, ale min y’a fɔ ko: “Ne tɛna ne ka [kantigiya] bila fo ka taa ne sa.” An k’a to an ka kantigiya ka nɔɔrɔ la Jehova kan fɔɔ abada!